الثلاثاء، 19 مايو 2009

حب غير مشروط وحب ميؤس منه + تحديث



دايما ومازال حلمي وحلم كل انسان عنده قلب في الحياة انه يلاقي حد يحبه حب غير مشروط
يحبه علشان بيحبه مش علشان مال او جمال او ثقافة او مكانة في المجتمع لكن حب للحب
ويمكن ده حب ملائكي وافلاطوني ومش موجود غير في الخيال
ويمكن حلم اني اكمل حياتي مع انسان يحبني ويحترمني ويحميني من الأيام واكون انا في نفس ذات الوقت بحبه
ونعيش حياتنا مع بعض لغاية لما نكبر ونعجز وميبقاش لينا غير بعض ونفضل نحب بعض حتى في حياتنا التانيه في الجنة أختاره يبقى جوزي وحبيبي في الجنة برضه
الحلم ده أغلب البنوتات بتحلمه واغلبهم برضه بيتكسر قلبهم بإسم الحب ده والحلم ده
ولو بصينا حوالينا هنلاقي كتير قلوبهم مجروحة ولو فكرنا نقرا كتاب رومانسي برضه هنلاقي قصص الحب فاشلة يعني أشهر قصص الحب فشلت ومكملتش بجواز زي روميو وجولييت وزي قيس وليلى وده لأن الحب عمره ما كان منصف وللأسف ده انطباعي عن الحب لغاية دلوقتي مشوفتش اي حب حقق السعادة لأصحابه
يعني بنوتة اعرفها حبت شاب معاها في الكلية وكانو مع بعض 4 سنين في الكلية وبعدها هو عاد كذا سنة في الكلية وبرضه فضلو يحبو بعض كل ده وحبهم كان في الضلمه مش في النور ولما اتقدم لها اهلها موافقوش عليه لانه كان لسه متخرج ومكنش هيعرف يفتح بيت المهم هي حاربت اهلها وحاربت الدنيا كلها علشان ترتبط بيه وبعد عذاب اهلها وافقو واتخطبت ليه وبقو كل يوم تقريبا يتخانقو مع بعض ويرمو الدبلة في وش بعض ده بعد ما حبهم بقى في النور وقدام الناس كلها وفعلا قبل الفرح بشهر كانو خلاص مش هيرجعو لبعض تاني بس للأسف الحب لعنة وتعويذة بتدخل القلب بتسحره وتخليه اعمى عن اي حقيقة فرجعو لبعض تاني واتجوزو فعلا وسابع يوم من الفرح اللي هو يوم السبوع العريس ضرب العروسة وقابلت اللي جايين يهنئوها بفرحها وهي مضروبة ومعيطة ومتبهدله والشخص ده مطلع عينيها حاليا وهي مضطرة تعيش حياتها لأن ده كان اختيارها من الأول
ودي نهاية قصة حب استمرت 7 سنين
وقصة حب تانيه شبه القصة الأولى والحبيب والحبيبة اتجوزو والاتنين بيندمو انهم ارتبطو ببعض
ويا سلام بقى لما الواحد يحس ان حب عمره ضاع منه يااااااه بتبقى مصيبة وخصوصا لما مبيكونش في سبب للبعد
وده جزء من موضوع قرأته مش عارفه مين اللي كاتبه بس الكلام اللي فيه هو اللي بيحصل فعلا :
بتحبني؟*
أوي-
انت عارف انت كل حاجة في حياتي انا فعلا مقدرش أعيش من غيرك
*و انتي فعلا أجمل حاجة حصلتلي في حياتي و الله حياتي عمرها ما حاتكون ليها معنى من غيرك
** ايه رأيكم في الحوار الرومانتيكي ده 00فظيع مش كدة ؟؟ طيب ايه الموضوع؟؟
الموضوع ان بعد يومين تلاته اسبوع كدة شهر نبص نلاقي حاجات غريبه بتحصل ..
ايه اللي بيحصل هنعرف البوست الجاي ان شاء الله
تحديث : معلش اتأخرت في نشر الجزء التاني واحتمال اتأخر اكتر في نشره
لا تقلقوا اطلاقا :)

هناك 41 تعليقًا:

تامر علي يقول...

طبعاً فعلاً الفشل هو مصير الكثير من حالات الحب وليها أسباب كثير جداً معظمها (فعلاً) هبل أحد الطرفين وعدم قدرته العقلية على تقدير الطرف الآخر التقدير الصحيح وعدم اكتشافه لحقيقته إلا في مرحلة متأخرة

- ايه ده؟؟؟؟؟؟ عايزه واحد يحبك حب أفلاطوني ؟؟؟؟؟؟ ما اكترهم يا ستي :))))
معظم الشباب دلوقتي حبهم أفلاطوني ومبيبانوش الا بعد الجواز :)))))

تحياتي :)

Lady E يقول...

تامر علي : ياه ايه الثقة دي يا أ/ تامر وليه اصلا يبقى مصير الكثير من حالات الحب انها تفشل ده لو كان حب فعلا

وبعدين انا اتكلمت عن الحب الأفلاطوني اللي بتمناه وانه ان شاء الله يبقى حب قبل الجواز زي حب بعد الجواز ويمكن بعد الجواز يبقى الحب أكبر علشان هينضم للحب المودة والرحمة ولازم يبقى في النور
واعتقد ان معظم الشباب دلوقتي مش في دماغهم الحب اساسا لكن في دماغهم التسلية وان كل واحد فيهم يبقى ليه معجبات وهو يبقى زي شهريار ومحطم القلوب

دمت بخير

MOHAMMED ELBANNA يقول...

Lady E
تحياتي
فعلاً هناك كثير من قصص الحب تفشل بعد الزواج ولذلك لأعتبارات عديده - لا يتسع المجال لذكرها - ولكن بالرغم من هذا هناك الكثيرين الذين يحيون حياه اجمل بعد الزواج ويظل الارتباط دائم .
بوست جميل ويمس الواقع .
تقبلي مروري
محمـد
طريق النجاح
ـــــــــــــــــــ
بمناسبه الموضوع
( كيف تسعد زوجتك )
http://tareekelnagah.blogspot.com/2009/03/blog-post_9663.html
( كيف تسعدين زوجك )
http://tareekelnagah.blogspot.com/2009/03/blog-post_26.html

akeed يقول...

طبعاً السبب فى الحالات الفاشلة هو ان الطرفين لا يعلمون اصلاً معنى العلاقة بين طرفين و العلاقه من الاساس غير شرعية علاقة محرمة بين شاب وفتاه دون اطار دينى و هو الزواج فكيف يبارك الله فى امر مخالف لشرعة ؟

وعموماً كل شاب وفتاه عندما يفكر فى الارتباط و الزواج يجب ان ينظر ليس فقط للشكل الخارجى و لاكن للطباع حيث انه توجد فتبات من بيوتات ملتزمة و لاكن طباعها الشخصية غير مريحه بالنسبه لزوجها وهذا الذى يتعرف عليه الطرفين من فترة الخطوبه .


تحياتى

المدونة جميلة فعلا

♥نبع الغرام♥♪≈ يقول...

السلام عليكم
نونا حبيبتى وحشتنى مووت يابت
انا بس جايا اصبح على احلى بنوته عرفتها
ومعنديش تعليق لانى تعبت من الموضوع ده
حسبى الله ونعمه الوكيل فى اى يظلم فتاه
ويعلقها بحبه وفى الاخر يرميها ذنبها ايه ان هى حبته ولا ايه بالظبط
يلا ربنا منتقم جبار
يوووووووووووووه صحيتى جوايا جرح وألم كبير
سلالالالالالالالالالالالالالالالالام
انوسه

romansy يقول...

الحب احساس جميل احنا اللى بنخلقه بايدينا احساس مليان بالحب المتبادل بس فيه حب زى دا فى الدنيا بس الظروف فعلا بتبقى اقوى من الانسان زى قصص روميو وجوليت وقيس وليلى
نتمنى اننا نلاقى الحب اللى بندور عليه

amr elsharqawy يقول...

الحب يحيا بالصدق ويموت بالكذب فان لم تستطع ان تحيه فلا تميته

احساس طفلة محبة للرومانسية بس واقعية يقول...

اية اللى حصل
اتشغلت يومين اجى
الاقى بوستات فيتانى كدا

المهم نلحق نعلق
انتى بتقولى وللأسف ده انطباعي عن الحب لغاية دلوقتي مشوفتش اي حب حقق السعادة لأصحابه

لية بس طيب انا مش هقول عنى انا عشان انا هقول بوست عكس اللى انتى كتباة خالص عن ايمانى بالحب وقصص الحب الصحيحة اللى شفتها

بس عندك ستوتة العسولة شوفيها كاتبة اية فى مدونتها واقرى قصتها
دا اكتر مثال على الحب العقلى الاخلاقى
القلبى الافلاطونى

بس الحب اللى بتقولى علية لازم يكون كدا مادام ابتدى فى الضلمة
وكان عبارة عن كلام ووهم بدون مسؤلية

لكن لو حب صح تضحية صح رأي الاهل ضرورى برضو تفكير وتنظيم اولويات
قياس درجة الحب من اخلاق الطرف الاخر ومبادئة وافعالة وتواجدة بجانبنا فى لحظات الشدة التواصل الفكرى الاتفاق على الاحترام والصراحة والنقاش واحترام رأى وتفكير الطرف الاخر دى مبادئ اساسية بجانب القلب ومشاعرة وتعلقة بالانسان دا وايمانة بية الحب الافلاطونى مش بس رومانسية وهيام وكلمات الحاجات دى بتضيع وبتتهد بسرعة بس المبادء الصح هى اللى بتدعم العلاقة وتخليها اكثر استقرار ومشاعر الحب فيها اعمق

بس كدا
تقبلى مرورى

مسدس صغير يقول...

الحب قد يكون وهم كبير
لا يمكن تصوره
بقدر ما يكون ممتع للطرفين.
ولكن فى النهاية اود أن اقول أن العيب انما يأتى من الاشخاص والحب برئ منه.
معكى انه ما خلد التاريخ اى قصة حب الا اذا كانت مقترنة بالفشل ولكن ليس معنى ذلك انه لايوجد فى التاريخ اى قصة حب ناجحة.وبالنسبة لموضوع الشخص الذى يحب للحب فقط فهذا ليس منطقى فلابد لى قبل ان احب ان اضع المعادلة التى قد تكون صعبة وهى هل يمكن لهذه القصة أن تتم فإن كان. فبها. واما إن لم يكن هناك اى احتمال لاتمامها فلا داعى لعناء التجربة.." يعنى يكونو مناسبين لبعض "
احييكى على البوست
سلامى

ELMASRYA - MOSLEMA LELLAH يقول...

فعلا يا ليدي كلامك صحيح جدا وواقعي ونادر جدا إني سمعت عن قصة حب استمرت وتوجت بالزواج أو قصة حب فعلا توجهوها بالزواج لكن حياتهم زي الزفت أو انفصلوا خلاص

عجبتني الجملة دي جدا

الحب عمره ما كان منصف

ربنا ينصفك في الحب ويجعل نصيبك سعيد وتشوفي الفرح والهنا كله مع إنسان يعرف قيمتك ويقدرك يا حبيبة قلب خالتك المصرية

دمتي سالمة بحفظ الرحمن

micheal يقول...

أفضل وأنجح أنواع الحب هو حب مبني علي العاطفة المتبادلة بين الطرفين التي تنبع أولا من العقل ومستوي التفكير
تحياتي

MǿиY El-Shreef يقول...

كلنا نفسنا ف ده يابنتي والله

وقصص الحب مش كلها بتفشل

في بعضها بيستمر وبشكل تحفففففففه

والبعض الاخر الي هو الجزء الاكبر بيفشل عشان الحب الي ف اول السنين ده بيكون اعمى

وكل حاجه بتبان بعد كده

ربنا يوفق كل اتنين بيحبوا بعض فيه

سلام ياقمره

إيمان يقول...

حب أفلاطونى
أعتقد ان أفلاطون ده كان ضارب اصلا
هل من الممكن ان تحبى انتى حب من غير وجود مميزات معينه فى الطرف الاخر جذبتك اليه
وبعدين ايه التعليقه دى
مش هتكملى

MaNoOoSh يقول...

اعتقد حالات الحب اللى قلتى عليها كان ينقصها الاحترام والصدق.
واكيد دول من غيرهم صعب الحب ميتحولش لعداء.. لان كل واحد كان راسن شخصية غير حقيقته خالص.. فبيتصدموا لما الحقيقة تبان


فى انتظار التكملة

الشعب لابد له من حكومه تشكمه يقول...

امممممممم عارفه قصص الحب بتفشل ليه؟؟؟؟؟
بسبب الجمله اللعينه:
انا لا اكذب ولكنى اتجمل...ولانه حب مبنى على حاجه واحده وبس...وبمجرد ميتجوزوا خلاويص راحت زهوة الحب..

لو كل واحد كان هو ,بدون زيف ولا كذب ولا تجميل .هتلاقى الاستمرار

ولو فشل اعرفى انه حب اى كلام.. حب سكه
انا اعرف ناس حبت بجد وعاشت سعيده..

لكن حب تعالى نرتبط ياسميحه ونتسنكح شويه فى سيتى ستارز..
_امسك ايدى يا صلاح هتلاقيها بردانه من كتر دفى قلبى

بلاش قله ادب ووجع فى قلبك ياسميحه وصلاح..

الحب مفهومه اكبر من كده بكتييييييييير

الحب اللى بجد وبحق وحقيقى لما بتحب بنى ادم بعيوبه وبمميزاته باخده كده على بعضه,.ونقف مع بعض ونستحمل بعض فى كل الظروف..من غير عين تزوغ هنا ولا هنا,,من غير جرح وخيانه..

ولا ايه ده انا فوقت وشكلى كنت فاهم نفسى غلط وطلع صداكه مش حب..

لو لقيتى الحب ده ابأى قوليلى اصلى لما اتكلمت عليه زيك كده قالولى اباى قابلينا لو لقيتى اللى فدماغك..

وشكلى هعنس يادودو هههههههههه بس مسيرى هلاقيه هيروح منى فين..:))

مستنيه بارت توووو 2

Bent Men ElZman Da !! يقول...

برغم انى مقتنعه بكلامك
وشوفت حالات كتيييييييير من اللى قولتى عليها دى
بس مازال جوايا فى حاجه شايفه ان الحب ده اجمل حاجه
ومهما كانت الحاجه حلوه لازم يكون فيها احيانا تفاصيل وحشه
لان الحلو مابيكملش زى ما بيقولوا
وبعدين الحاجات اللى الحلوه اللى فيه اوقات بتخلينا نستحمل الوحش

blue-wave يقول...
أزال المؤلف هذا التعليق.
blue-wave يقول...

ازيك عامله ايه؟
انا الحمد لله تمام واتمنى تكونى بخير وامتحاناتك ماشيه تمام
ابقى ضيفيتى تانى علشان الايميلات ضاعت من عندى وابقى طمنينى عليكى

حكاية لا تنتهي يقول...

من قال ان هذا النوعمن الحب هو حب افلاطوني
بالعكس هذا الحب موجود وربما هو جزء كبير من اساس الحياه
ثم ان الاعجاب بالشكل او المال وان كنت لا ارجح الاعجاب الثاني والاعجاب بالعقل كلها ليست اشياء تغير صفاء الحب ونقائه
فمثلا معظم الشباب ينبهرون بالجميلات ويفغروا افواههم في دهشة كلما راؤهم ولكن هذا لا يعني ابدا انهم احبوهم

فقط الشكل وطريقة التفكير هي احدي الامور المطلوبه لاكتمال الحب اما ان تحب شخص فهو حب مجرد تماما يزيد بما سبق ذكره وليس العكس

كيكى عوووووو يقول...

هو دة التحديييييييييييييييث
الى قولتيلى عليه
!!!
طب علىف كرة بقى انا رايحة والله اكل شيكولاتة حجم كبير
ساااااااااااااااااااااااااادة
عووووووووووووو

Lady E يقول...

MOHAMMED ELBANNA : كلامك جميل وكله تفاؤل يا أ- محمد
قرأت الموضوعين والحقيقة نصائح جميلة جدا لو كل زوجين اتبعوها فعلا هيعيشو حياة سعيدة

ربنا يكرمك ويحفظك

وشكرا للاضافة الرائعة للبوست

Lady E يقول...

akeed : فعلا العلاقات الغير شرعية ربنا سبحانه وتعالى مش بيبارك فيها
وما بني على باطل فهو باطل

وفي الزواج لازم الطرفين يحصل بينهم قبول وايجاب علشان المفروض انهم هيكملو حياتهم مع بعض مش هيطلعو رحلة وخلاص فلازم يكون في تأني وحاجات كتير يجب مراعاتها في اختيار الزوج او الزوجة

شكرا على مرورك ورأيك القيم

Lady E يقول...

عاشقة الأحزان : وعليكم السلام ورحمة الله وبركاته
انووووووس حبيبتي بضم صوتي لصوتك وبقول حسبنا الله ونعم الوكيل

وبعدين عااااااااا مش انا اللي صحيت الجرح ده عااااااا المنبه رن فصحاه عااااااا
نام يا جرح نااااااااااام ناااااااااام ناااااااااااام بنيمه تنوين تغطاطيسي اي خدعه

نورتيني يا اختي الكبيرة
ويارب تفتحي موبايلك علشان اتطمن عليكي

Lady E يقول...

romansy : اييييييييه على رأي المثل القائل الظروف ممكن تخلي الانسان خروف

بس برضه مش لازم نرمي كل حاجه على الظروف والقدر يا رومانسي

Lady E يقول...

amr elsharqawy : حلوة جدا المقولة دي يا عمرو

Lady E يقول...

احساس طفلة محبة للرومانسية بس واقعية : هههههههههههه حد قالك تنشغلي يا احساس طفله ؟

وطبعا كلامك كلام جميل كلام معقول مقدرش اقول حاجه بعده

احساس طفلة غبتي لكن بعد الغياب ده كتبتي كومنت رائعه بجد

ربنا يحفظك انتي وسومة وسمسم

Lady E يقول...

مسدس صغير : ليه الحب للحب فقط مش هيكون منطقي؟؟ بالعكس انا شايفاه منطقي جدا
يعني اوكي ممكن الانسان يحب او يعجب بحاجه معينة في الطرف اللي هيرتبط بيه ويكونو مناسبين لبعض من كل النواحي لكن في حالة ان اي طرف فقد الحاجه اللي خلت التاني يحبه برضه الحب هيستمر لأنه مبني على اسس قوية مش مبني على حاجه مؤقته
وده قصدي من الحب للحب انه حب دائم وعطاء مستمر مهما حصل ومهما الحياة اتغيرت

Lady E يقول...

ELMASRYA - MOSLEMA LELLAH : هيييييييه خالتو حبيبتي جت

اللهم امين يا رب

تعليقاتك وكلامك بحس انه بلسم على قلبي يا خالتو ربنا يحفظك ويسعدك يارب

دمتي في حفظ الله

Lady E يقول...

micheal : يمكن بس مش العقل لواحده لازم وجود القلب معاه
لأن لو اعتمدنا على العقل لواحده وانه يبقى اولا دايما يبقى الحياه هتبقى باردة ومحسوبة وممله

Lady E يقول...

MǿиY El-Shreef : هو ده الكلام يا موني
ربنا يوفق كل اتنين بيحبوا بعض فيه

ربنا يحفظك و يبعد عنك الزلازل والبراكين وكل الحاجات دي

نورتيني يا قمرايا

Lady E يقول...

إيمان : افلاطون ياااااااا الهي فكرتيني يا ايمي
انا كنت بذاكر نظريات بلايتو او افلاطون وانا في اولى كلية وكنت بتخنق من معظم الهبل
اللي كان في نظرياته
أفلاطوني معناه الحب الخيالي او المثالي زي المدينة الفاضلة بتاعت افلاطون كده

والاجابة على سؤالك وعن نفسي لما بحب اوكي ممكن اعجب بمميزات الشخص اللي حبيته او الصديقه اللي حبيتها لكن لو المميزات دي راحت حبي مش بيتغير
وهو ده معنى الحب للحب

Lady E يقول...

MaNoOoSh : عندك حق يا منوش

الاحترام والصدق من اهم الصفات لنجاح الحب

Lady E يقول...

الشعب لابد له من حكومه تشكمه : هههههههههههه مالك ومال سميحه وصولاح يا شيمو سيبيهم مع نفسياتهم يا اوختشي وبلاش الحقد ده هههه

وعلى فكرة انا كمان لما اتكلمت عن الحب الأفلاطوني حسيت وكأني بقول نكته وصبحاتي ردو عليا وقالولي يبقى انتي عايزة تتجوزي ملاك صح عااااااا

اوعدك يا شيمو لو لقيت الحب ده هقولك
ولو لقيتيه ينوبك فيا ثواب قوليلي انك لاقيتيه عالاقل يبقى في امل

وبعدين التعنيسه التمام ولا الجوازة الزئام لو عارفه يعني ايه الزئام دي قوليلي نياهاهاهاها

نورتيني يا حبيبتي

Lady E يقول...

Bent Men ElZaman Da !! : طبعا الحب اجمل حاجه في الدنيا بس لو كان حب بجد
حب صادق ونقي وفي النور

نورتيني يا عسوله
ويارب تلاقي الحب اللي ينورلك حياتك

Lady E يقول...

blue-wave : عودا حميدا للمدونات يا دكتر

و

Too little too late

Lady E يقول...

حكاية لا تنتهي : كلام سليم

وهو ده المعنى اللي انا بقوله واللي أأقصده

شكرا على رأيك القيم يا حكاية لا تنتهي

Lady E يقول...

كيكى : بت انتي يا بت

اطلعي بره البلوج فوووووووورا عاااااااااا بتغيظيني وبتقوليلي شوكولاته
وبعدين هي دي اخرة الصداقة شوكولاته؟؟ حجم كبير ولواحدك

منه له
منه له عاااااااااااااا

Ahmed يقول...

لا لا لا
معلش ياليدي اسمحيلي اختلف معاكي
اللي انتي بتحكي عليه ده مش حب
هوا فيه حب كده؟
فين الاحترام؟ يعني ايه يضربها كده من الاول؟
يعني ايه لما يبقوا في النور يتخانقوا باستمرار

ده مش ممكن يكون حب
ده ممكن يكون اعجاب بين اتنين مختلفين تماما ومفيش بينهم تناغم حب حقيقي

انطباعك عن الحب انا شايف انك ظلمتيه كتير

انا ممكن احكيلك عن قصص حب كتير فشلت
ممكن احكيلك عن تجارب مؤلمه تحبطك بشكل كبير

بس مش هعمل كده
لأنه مش صح اننا نفقد الأمل ويسيطر علينا اليأس كده

في قصص نجاح كتير ممكن ندور عليها ونمشي عليها

احنا اللي بنرسم الرومانسيه بشكل حزين
وكأننا بيعجبنا اوي عذابنا في الحب

Lady E يقول...

أحمـــــــــــــد أبو العلا : ما هو علشان انا عارفة البنوتة دي فأكيد بتحب الانسان اللي ارتبطت بيه
دي عملت حاربت الكل لغاية لما اتجوزو
وفعلا كلنا كنا مستغربين ان لما حبهم بقى في النور بقى بيحصل بينهم كل الخناقات دي
وبعدين يعني ايه يضربها كده من الاول يعني هو ممكن يضربها من الأخر ولا اييييه ؟؟؟؟؟؟!

وبعدين انا قولت انطباعي عن الحب لغاية دلوقتي يعني الانطباع ده قابل للتغيير

وبعدين انا مش حاسه باليأس اطلااااااقا
احنا اللي بنرسم الرومانسيه بشكل حزين
وكأننا بيعجبنا اوي عذابنا في الحب

صح

دمت بخير يا انجينير

Ahmed يقول...

هههههه
لأ طبعا ياليدي
لا من الأول ولا من الآخر
بس انا كان قصدي يعني ان المشاكل بينهم ملحقتش توصلهم في الوقت القصير ده لمرحلة فقدان التقه والاحترام بسرعه كده

بس آدي كل قصدي

وبعدين يعني لازم ننكش بكلمتين كده على الماشي برضه

es.assaf يقول...

طبعاً نسيبنا من الكلام اللى معتادين عليه زى الحب احساس وصدق مشاعر و ... الخ
بس غلط اوى ان الواحد يقنع نفسه انه لو حب هتكون قصته فاشله ومن السذاجه انه يبنى مستقبله على ماضى يعنى انا مش هـ حب علشان روميو قصته فشلت
انا اسمى ده سذاجة
وافتكر ان القصص اللى حكيتيها مبنيه على الحرمان والتسرع
بمعنى ان الانسانه اللى حبت واتخطبت واتجوزت انسانه كان عندها حرمان العاطفه اللى محستهوش فى بيتها او حسته بشكل ملحوظ من شخص غريب عنها فالمكافئه ليه طبعاً انها تسلم قلبها ليه وده تسرع كانت ممكن تهاديه بشىء اقل قيمه وكانت الهديه هتفضل برضه ليها قيمتها
والغريب فى معظمنا انه بيفاصل فى الحاجه قبل ما يشتريها ويقيمها بعد ما يشتريها
تحياتى ليكى على التوبيك الجامد