الثلاثاء، 12 مايو 2009

كلام بحس بيه

البوست اللي فات مهم جدا وعايزله دماغ للرد على الكومنتات ف ان شاء الله هرد عليها بس بعد امتحان الفرنساوي اللي هو يوم السبت الجاي ان شاء الله صحيح انا مش بذاكر
ومش من الناس الحتيتة لكن معلش بقى حاسة ان الكلام ضايع مني عااااااااااااااا
*****************************
انا مش مرتاحه حاسة بمشاعر سلبية كتير جدا وزي ما بيقولو قلبي واجعني وخصوصا ان اقرب الناس لقلبي عندهم مشاعر سلبية وواضح انها حالة معظمنا بيمر بيها
وكمان حاسة اني مشتتة عارفين حاسة اني زي حد قدامه سفره كبيــــــــــرة عليها اصناف كتير وهو محتار ياخد ايه من اي صنف
فبياخد من كل صنف شوية وفأجه يلاقي نفسه مأكلش حاجه ومشبعش اشاسا ده بالظبط حالي مع الفرنساوي بتصفح في كل موضوع فيه شوية وبعدين بزهق وبحس ان اللي بعمله ده هبل مش مذاكرة
وكمان حاسة وانا بكتب دلوقتي ان في حد لما يشوف البوست هيقول هو مفيش حد بيمتحن غيرك يعني ده انتي حتى مش في كلية قمة ! معلش بقى لا يألم الجرح الا من به ألم وبعدين انا مش بشتكي انا بفضفض
انا دلوقتي مش خايفة من الامتحان على اد ما انا خايفة من نتيجة الامتحان واللغة الفرنسية لغة الحب ف ليه متعلمهاش يعني؟؟؟؟ دي لغة رومانسية وكميلة ومش ذنبي وذنب كل اللي في كليتي ان في حد درسهالهم غلط
وعلشان تعرفو بس انه كلام طفلة مش عايزة تكبر كل شوية بكتب بوست يعني هخنق مين غيركو يعني عاااااااااا

لنا الله انا وكل اللي بيمتحنوا
ربنا يوفقنا
الهي منك اسعادي وخيري ومنك الجود والفرج القريب

اللي مش هيشوف البوست ده في مدونتي التانيه هيفوته كتير
ابتهال ومناجاة

هناك 27 تعليقًا:

الشعب لابد له من حكومه تشكمه يقول...

ايييييييييييييييه دنياااااااااااااا

خدنا ايه من كليات القمه يابنتى طب زى معهد طومبسكو قسم لحام...

ان شاء الله خير تفائلوا خيرا تجدوه وبعدين اسهل امتحانات ومذاكره بتكون فى اللغه اسألينى انا اصلى دايما اقول اللغه دى سينس احساس يعنى حاولى تخيلى سينسك عالى.

وبعدين بكره تخلصى وتيجى تقعدى جمبى نبص للسقف وتقولى فينك يافرنساوى ولايوم من ايامك فين ايام مكنت بقول كونجى,,سون فاسون,,

ان شاء الله خير بس انتى بجد متذاكريش سعات متواصله كتير حاولى تغيرى جو ومكان وابعدى عن السرير ,,السرير به نوم ينادى وقت المذاكره...

ابأى طمنينى...

حسام غانم يقول...

ربنا معاكي يا ستي

فعلا الحالة النفسية السيئة بقت منتشرة بشكل غير طبيعي

يظهر فيه حاجة في المية

Lady E يقول...

الشعب لابد له من حكومه تشكمه : ايييييييييه ولا دايم الا وجه الله وكلنا لها يا اختي

وبعدين انا متفائلة الحمد لله بس مشكلتي في المشاعير السلبيه اللي حاسه بيها
وحلوة الترجمة الفورية بتاعت سينس دي ثانكيووووووو ههههههههههه مش عارفة من غير الترجمة دي كنت هعمل ايه :)))

وبعدين ان شاء الله لما اخلص مش هقول فينك يا فرنساوي لكن هبص للسقف معاكي :)
وممكن لو مفتكرتش حاجه في الامتحان اكتب سون فاسون دي هههههههههه هضمن الدرجة النوهائية

وبعدين مين ده اللي ميذاكرش ساعات متواصلة انا لو ذاكرت 5 دقايق على بعض بقول ذاكرت بجد مش بهييس عااااا
وبالنوسبة للسرير حبيبــــــــي خصوصا ايام الامتحانات

تسلميلي يا قمرايا وبجد انا بفرح بتعليقاتك ووانا بكتب البوست كنتي في بالي في موضوع كليات القمة ده :)

♥نبع الغرام♥♪≈ يقول...

السلام عليكم
صبحاوكى سكر وعسل
إن شاء الله ياقمرايا ربنا معاكى
ولكل مجتهد نصيب
بس أهم ماتكونيش متوتره كده يابنتى
نونا حبيبتى
إنتى إنسانه جميله قوووى وحاسسه وإن شاء الله ربنا هيكون معاك لأنك تستهلى كل الخير نونو
بدعليك والله من كل قلبى
يااجمل واحلى اخت ليا فى الدنيا كلها
ربنا معاكى
بحبك مووووووووت
إيناس
نوسه النوسه كونوسه

dramaqueen يقول...

فعلا ناس كتير حاسة باحباط اليومين دول
بس انتى ولا يهمك
دائما يبقى الامل فى غد أفضل
اما المزاكرة
فربنا معاكى معلش الفترة دى صعبة لكنها هتكون محصلة كل اللى فات
استعينى بالله
وربنا هيوفقك

دعواتى ليكى

waid Al-Qassem وعد القاسم يقول...

ااااااااااااخ
وانا كمان بعاني متلك باخد فرنساوي ومرات بطلع من محاضرتي مش فاهمه شي ...

ولما افتح كتابي بحس حالي تافهه اني بدرس هاد الكلام لاني بكون اصلا مش مركزه مع المس الي بتعطينا المحاضر

ونيالك لانه انتي عندك اسلوب تفضفضي فيه ...



وموفقه بالامتحان ..

تحياتي
اختك
بروميس الفلسطينيه

MǿиY El-Shreef يقول...

معلشي يابنتي

اكتئاب امتحانات ويروح

بصي انتي عدي اليومين دول بالاستعانه بربنا

وكل حاجه هتبقى بمبي

سلام ياقمره

Ahmed يقول...

ياستي مش محتاجه كليه قمه ولا حاجه

الخوف من الامتحانات ده وخصوصا في حالة لما يكون أن بتاع الماده شخص مش متورازن احساس عند الناس كلها
قمه بأه ولا مش قمه

وبعدين احنا اللي بنعمل القمه مش هيا اللي بتعملنا

ان شاء الله خير وان شاء الله هتعدي على أحسن خير

MaNoOoSh يقول...

متقلقيش ان شاء الله هتعدي على خيييييير
بس حاولي تركزي شوية وان شاء الله ربنا هيكرمك بامتحان سهل ودرجات جميلة
ربنا معاكي يا قمر

Lady E يقول...

حسام غانم : ربنا معانا كلنا يا د . حسام

وتقريبا هي حاجه في الهوا
خد بالك بقى علشان متوصلش ليك

إيمان يقول...

اجمدى يا بنت مش كده

كلنا لها وياما اتمرمطنا

واكتأبنا وكله ولله الحمد طلع فى الغسيل

ربنا معاكى يارب ونسمع عنك اخبار حلوه وكميله زيك

Lady E يقول...

عاشقة الأحزان : وعليكم السلام ورحمة الله وبركاته

تسلميلي يا انوسة يا رب

بس اعمل ايه انا متوتورة والوتورة دي مش هتروح الا لما اخلص انطحانات ان شاء الله

وانا كمان بحبك جدا يا قمرايا
منوراني دايما

Lady E يقول...

dramaqueen : انا عايشة بالأمل في غد افضل ده يا كوين ولولاه كان الاكتئاب والاحباط قتلوني
اليوم اللي اخد الليسانس واحقق ذاتي واحس ان تعب الكام سنة بتوع الدراسة دول ليهم فايدة

تسلميلي يا كوين
وربنا يستجيب دعواتك الجميلة زيك يا قمر

شاب كــ طخين ـــــا يقول...

ربنا معاكى
حاولى بس تركزى
وفى الاخر صدقينى سينا زى سونيا :D
ربنا معاكى

Lady E يقول...

pOOmmIIIsE : اهلا بيكي يا قمرايا

انا مش بعاني من الفرنساوي ك لغة لكن كنت بعاني من اسلوب التدريس المتخلف والمنهج الغريب اللي بندرسه

وبعدين بلاش الحسد ده ههههههههه نيالي ايه بس

تسلمي يا قمرايا وشكرا لكلامك وربنا يوفقك في دراستك وامتحاناتك

نورتيني

Lady E يقول...

MǿиY El-Shreef : يسمع منك ربنا يا موني

نورتيني يا حبيبتي

Lady E يقول...

أحمـــــــــــــد أبو العلا : ده مش متوازن ومش متوازن ومش متوازن كمان يا انجينير

وبعدين احنا اللي بنعمل القمه مش هيا اللي بتعملنا

بجد كلمتك دي عمالة تيجي على بالي كل شوية

ربنا يكرمك ويسمع منك يا انجينير
نورتني

Bent Men ElZman Da !! يقول...

فعلا حاسه ان التوهان ده بقى حال ناس كتير
مش عارفه العيب بقى فينا والا فى حياتنا عموما
بس مش شرط عشان تشتكى من الامتحانات تبقى فى كليه قمه
كل واحد شايف الكليه اللى هو فيها بايخه ورخمه وده لانه هو الوحيد اللى عارف هو بيذاكر ايه ومطلوب منه ايه
ماحدش تانى اللى هيحس بيه
ومش تقلقى ان شاء الله امتحان الفرنساوى يعدى على خير حاولى انتى بس تعملى اللى عليكى وربنا يجازيكى خير عنه
ربنا معاكى يا قمر

Lady E يقول...

MaNoOoSh : امين يا اختي

وفعلا نفسي اركز شوية ومبقاش عاملة زي الراديو اللي بيبقى قدامه موبايل ومشوش عااااااااا

تسلميلي يا منوش

نورتيني يا قمرايا

Lady E يقول...

إيمان : اجمد ازاي ؟؟ ادخل اقعد في الفريزر يعني ولا ايه عاااااا

ايون عن الاكتئاب والمرمطة فحدث ولا حرج الحمد لله

ربنا يكرمك يا ايمي
نورتيني يا حبيبتي

حاجات جوايا يقول...

ربنا معاكى يا جميلة
ان شاء الله تقدرى تلمى المادة وربنا يوفقك فى الامتحان

نصيحتى ليكى بجد

خليكى كووووووول

كوووول جدااااا

انا المادة اللى كنت بشد اعصابى فيها مكنتش بعرف اركز فى المذاكرة واتوه

اما المادة اللى كنت بذاكرها وانا كووووووول حتى لو كانت 3 كتب كانت بتوصل كويس جدا وبجيب فيها تقديرات عالية

شدة الاعصاب بتضيع الوقت والتركيز

اهدى واتوضى وصلى واقرأى قرآن كل استراحة كده وادعى ادعية المذاكرة

عند المذاكرة

اللهم ارزقنى فهم النبيين وحفظ المرسلين والملائكة المقربين

وبعد المذاكرة

اللهم انى استودعك ما قرأت وما حفظت فرده عليا عند حاجتى اليه .. انه من فضلك ومعطياتك

وعند تسلم ورقة الاجابة

اللهم لا سهل الا ما جعلته سهلا فانت تجعل الحزن ان شئت سهلا


ومتقلقيش خالص
لا يضيع الله اجر من احسنوا عملا


ربنا معاكى يا قمر

سالى

ريمان يقول...

انا برضه عندى امتحانات واعصابى تعبانه اوووووووووووى


ربنا ينججنا ياااااااااا رب


بقولك ايه

مفيش طريقه للتخلص من المشاعر السلبيه؟


لو لاقيتى قوليلى

Lady E يقول...

أمبارح كان عمرى عشرين : يااااارب ربنا معانا كلنا

وفعلا مبقتش تفرق سينا من سونيا نياهاهاهاها

تسلم يا محمود ياللي كل يوم عمرك عشرين :)

Lady E يقول...

Bent Men ElZaman Da !!: اييييييه كلامك حكم يا اوختشي

ربنا يكرمك ويوفقك وتاخدي الليسانس
انتي السابقون في الليسانس وانا اللاحقون ان شاء الله :)

منوراني يا عسوووولة

Lady E يقول...

حاجات جوايا : ايه المفأجه الحلوة دي منوراني يا قمرايا

وانا هخليني كووووووولد مش كووووووول ههههههههههه لاني مش عارفة ابقى كووووول للأسف فهدخل التلاجة وابقى كووووووولد نياهاهاهاهاها

ربنا يكرمك يا رب نصائح رائعة وادعية اروع
تسلميلي يا جميلة

Lady E يقول...

ريمان : امين يارب

وفي طرق كتير يا ريمان بس اللي ينفذها

ربنا يعدي الامتحانات على خير ويوفقنا

نورتيني يا قمرايا

The illusionist يقول...

الكلام شدنى اوى
ليه بس الخوف والتشتؤم ده
انا لسه طالع من ثانوى واضربت بالنار
دخلت على هندسه
وبضررب بالنار اهه
عادى زى ما اتقال فى اول رد
غيرى اجواء دايما
متذاكريش فى نفس المكان
وفرفشى
بس طالما كليات قمه مفيش فرفشه خالص
بس بالجزمه وهنجيب الفرفشه