كلام نواعم

اضطريت أسفة اعمل زيارة اجتماعية مع ماما النهاردة وخارجة مع ماما غصب عني علشان ابطل الحبسة اللي انا حبساها لنفسي دي
المهم روحنا لطنط بايرة وصبحاتها وانا مش بحب اروح لطنط بايرة علشان بتحب اوي تكلمني عن الخطوبة والجواز والعرسان طب انا في ايه ولا في ايه يعني طنط فعلا تستحق انه يطلق عليها لقب خالتي بايرة عن جدارة هي اللي مجوزة نص الجيران لبعض وقديما قالو يا بخت من وفق راسين في الحلال هيدعو عليه كل يوم

روحنا وسلمنا على طنط واتكلمنا ودردشنا وللأسف جابتلي جيلي بالكريم شانتي واتحايل عليها يا طنط والله عاملة ريجيم مش هينفع تقولي ريجيم ايه ده انتي خسيتي عن المرة اللي فاتت
كنتي حلوة كده وماليه مركزك لكن المرة دي خاسة قولتلها يارب اخس كمان وكمان يا طنط امييييييين
طنط بايرة : خليها على الله
انا : كله على الله يا طنط بس انا مش هستنى لما اتعب واعمل ريجيم غصب عني
طنط بايرة : طب بزمتك انا ولا انتي
انا : ..............................
طنط بايرة : الجيلي مبيتخنش وبعدين الريجيم مش هيبوظ من اكلة يعني
انا : قولت في سري عاااااااااااا حد يمشيني من هنا
طنط بايرة : مش هتمشو الا لما تكلي
انا : حاضر يا طنط تسلم ايدك عااااااااااا
وشوية كده وطنط بايرة جابت الصور بتاعت الفرح بتاعها وبجد ما شاء الله كانت زي القمر واللي عجبني ان العريس كان لابس بدله فاتحه مش سودا زي عرسان اليومين دول
وبعدما طنط اتأكدت ان انا كملت طبقي كله كاملا قدمت حاجات تانيه كمان وانا كنت هعيط وماما انقذتني وقالت الوقت اتأخر ولازم نروح فطنط بايرة قالتلنا ابداااااااااااااا لازم تسلمو على جارتي اللي تحت ام عمرو

نزلنا على اساس اننا هنسلم من على الباب ونمشي ف اللي حصل اننا اتخطفنا طنط ام عمرو وطنط بايرة شدونا على جوه البيت دخلنا لاقينا طنط ام عمر وطنط ام علي م الاخر امبراطورية عين وكانت قعدة نواعم وبدام قعدة نواعم يبقى الكلام هيكون كلام نواعم
وطنط بايرة بدأت الكلام بعد التحية والسلام
قالت انها مش عارفة ايه اللي بيحصل لها اليومين دول بتتكلم وهي نايمة دخل عليها جوزها وهي بتقول اه الامارات قال لها امارات ايه قالتلو اللي احنا عدينا عليها واحنا رايحين السعودية مش دبي دي في السعودية اللي اخويا بيشتغل فيها وجوزها فضل صانت ليها وبيتكلم معاها اما يشوف اخرتها ايه معاها وفضلت تتكلم وفجأه صحاها قالتله ايه هو في ايه وبيحصل لها حاجات غريبة يعني مرة
قامت تحضر العشا وهي نايمة وحطت الطاسة في التلاجة وتدور عليها في المطبخ كله مش لاقياها وبعدين قالت لما اروح اجيب بيض من التلاجه لقت الطاسة في التلاجه وحاجات كتير بتحصل لها اليومين دول مع ان معندهاش انطحانات

اما طنط ام عمرو فعايزة تخلع جوزها علشان نده عليها وهي
مسمعتش فخاصمها علشان ازاي ينده ومتسمعوش
وبقاله اسبوع مبيكلمهاش صدق اللي قال رجالة مخهم لاسع
وبعدين قالت اااااااااه متفكرونيش بالذي راااااااح والنبي يختي كل الناس بيقولو على يوم فرحهم ليلة العمر انا بقى بقول ليلة اخر العمر
هو كان يوم اسود من اوله امي وابويا اتشاكلو مع بعض وانا قعدت اهدي فيهم خلاص يا بابا
خلاص يا ماما كل ده عشاني يكش اولع بجاز واقول في سري هسيبهم كده وهما زعلانين مع بعض
قال ايه بابا بيقول انا بنتي حلوة ومتحطش مكياج ايه المسخرة دي والكوافيرة اتأخرت وامي زعلت
وتقول بنتي لازم تحط مكياج وتعمل فورمة وابويا مش راضي المهم الكوافيرة مجتش وجابولي باروكة لبسوهالي
وابويا قعد يزعق ويقول بنتي مش قرعه علشان تلبسوها باروكه
ولا العريس ده بقى اللي حكايته حكايه كان مكسوف يلبس البدلة ويعمل فرح وزفة ويتحايلو عليه ويقولو البس البدلة وهو ابدااااااا مكنش راضي يلبس البدلة
المهم باقي الكلام تحذفه الرقابه مش هينفع اقوله خالص

وكلهم بيتفرجو على مسلسل ميرنا وخليل وكلهم مقتنعين ان مفيش رومانسية كده هي الرومانسية والحب مش موجودين الا في تركيا ولا ايه؟


ومكانوش عايزننا نروح ونفضل سهرانين معاهم للصبح
وبجد كان هيفوتني كتير لو مكنتش روحت مع مامتي
بجد كل الطنطات دول زي العسل

ملحوسة صغنونة : مش هصدعكو ببوستات تانيه دلوقتي لغاية لما اشوف هعمل ايه في امتحان الفرنساوي
واسفة اني مش قادرة اتابع كل المدونات اليومين دول
وصيتكو المدونة لو حصلي حاجه دي غلبانه

ملحوسة تانية : سمعني اغنية اشوف فيك يوم في ضاكتور حامض فرنساوي
الشيء ده موصر انه يتجاهلني وكل محاضرة يسألني هو انتي معانا؟ وحياة خالتك قال يعني مش عارفني وقال يعني انا معرفش مراته وبنته بس تصرفه بالطريقة دي بيقول انه ناوي يخليني اشيل المادة دي السنة الجاية وان شاء الله مش هسمحله بالفرصة دي وربنا معايا ومع كل الدفعات اللي ظلمها واللي مصبرني بجد كلمة قالها انسان عزيز عليا قاللي ان ربنا اقوى منه ومن كل اللي زيه بس انا اعمل اللي عليا واذاكر
وكمان اللي مصبرني اني مش هسمح لشيء زي ده انه يدمر مستقبلي ويحطم احلامي
اكتر من كده وربنا بيزيح
ربنا يوفقنا كلنا في الامتحانات وكل حد يعدي من هنا يدعيلي ويدعي لكل اللي بيمتحنو