الاثنين، 4 مايو 2009

عقلي خدوه مني اجيب عقل صيني؟؟



كده يا كيكي زعلاااااااااانه منك بجد وكمان موبايلك مقفول في وشي وانا مش بحب البيبي كول ده

ربنا يخليكي ليا ويبارك في عمرك ولو كتبتي كومنت تاني زي الكومنت بتاع البوست اللي فات والله هبعت ابلة ظاظا تضربك بالبوكس في مناخيرك وهمنع عنك الشوكولاته يا رخمه

*****************************************

عمالة اسأل نفسي واقول لها هو انتي ليدي ولا بيبي ؟؟ ويا ترى عندك عشرين سنة ولا سنتين

وطبعا الاجابة بيبي وبيبي وبيبي كمان

ودلوكيت بحاول بقدر الامكان اني ابعد اي افكار كئيبة وشوريرة عن بالي ورفعت شعار كفاية تفكير لا عقلك يطير لأن الافكار وذكريات شيماء الله يرحمها معايا هي ومامتها واخواتها وخصوصا بالليل قبل لما انام ده لو عرفت انام اساسا لازم اعيط شوية وخصوصا اني عارفة حالة مامة شيماء النفسية دلوقتي لأني عزيت طنط في بيبي اتوفى ليها قبل ما يجي الدنيا قبل كده ربنا يصبرها هي وعمو واخوات شيماء يارب وكمان اليومين اللي فاتو كان عندي رغبة مكبوتة اني اتصل بمايا واقولها انتي عملتي فيا مقلب صح انا مش مصدقة ان شيماء ماتت !!! الله يرحمها

المهم كل ما افتح كتاب اسرح دي المرحلة الاولى

اتنح واذبهل دي المرحلة التانية ثم اعيط وارمي الكتاب دي المرحلة التالتة في التنسيق

فقولت هواجه الافكار بالأفكار ولا يأكل النار الا النار وكده الحالة بقت دمار في دمار وشوية وهحدف الناس بالطوب وابيع فشار

وبعدين قولت لازم اشغل نفسي مش هذاكر لا سمح الله لكن تا تا تا تااااااااااا تش هدخل المطبخ _ تصفيق حاد_ ومش هدخل المطبخ وبس لأ ده انا كمان قرقرت اني اعمل العشا اهو منها حاجة انشغل فيها ومتكونش مذاكرة ومنها اني اساعد مامتي حبيبتشي

دخلت المطبخ وعملت العشا واتعشينا وفتحت الايميل والمدونة ونسيت المطبخ خااااااااااالص وبعد فترة كابيرة ماما داخلة المطبخ بالصدفة شافت ايه؟؟؟؟ شافت المقلاية متولعة هي والغطا اللي عليها والمرحومة كنت تيفال الله يرحمها ومن ساعتها اخدت قرار بعدم دخول المطبخ تاني منعا لإهدار الارواح والأدوات المطبخية لكن مع الأسف مامتي سامحتني على الغلطة الشنيعة دي هي صحيح خسرت مقلاية لكن كسبت دخولي للمطبخ بعد غياب عاااااااااااا وللأسف هدخل المطبخ رغم انفين انفي عاااااااااااا وبعدين هو ايه اللي حصل انا كنت بعرف اطبخ ايه اللي مسح الميموري مش عارفة عااااااااااااااااا

ولاني بتبع مبدأ التشتيت يجلب التركيز فرجعت من الكلية وشغلت الكمبيوتر بصوت عاااااالي ايون نسيت بمناسبة الكلية انا حاسة ان حد عاملي عمل على رجل نملة عورة وحولة مش عارفة ليه بكره الكلية دي ولما بروح ببقى مخنوقة عااااااااااااااا المهم نرجع للموقف اللي كنا فيه علشان منتوهش في السكة كنت بغني وبقول لأ مش ياليل ويا عين دلوقتي في حاجات احدث كنت بقول متحيرة ومتغيرة وكإني لسه صغيرة فماما ردت عليا وقالتلي اومال انتي ايه؟؟ ما انتي صغيرة

وقال ايه خير اللهم اجعله خير اليومين دول بيقولولي اللي واخد عقلك يتهنى به

لييييييييه يعني هو انا لما اعمل بخور واحطه جنب الشمع والشمع يسيح ويبهدل الدنيا ويملاها دخان يبقى بعد الشر حد واخد عقلي؟؟

ولما احضر لبس هلبسه وبعدين انسى انا طلعت اللبس ده ليه وامتى واروح اطلع لبس تاني يبقى حد واخد عقلي؟

لما ادخل المطبخ علشان اعمل قهوة والاقيني بدل ما اعمل القهوة جبت عصير وجيت يبقى حد واخد عقلي لا سمح الله؟

ولا لما ابقى رايحة الكلية والاقي نفسي فجأه وصلت ومختش بالي من اي حاجه عالطريق يبقى كده حد واخد عقلي عااااااااااااا

يا جماعة اللي عارف اللي واخد عقلي يقوله يجيبه علشان انا دلوقتي عايشة بحلة مهلبيه مش بعقلي

قطشيعة محدش بياكولها بالساهل

هناك 39 تعليقًا:

blue-wave يقول...

اوووووووووووووول تعليق
متهيألى كدا

blue-wave يقول...

انا عارفه
بس هاقوله يخليه معاة:))

عاشقه الرومانسيه يقول...

اييييييييه ده
ده انتى فى الباى باى خالص
واللى واخد عقلك ده شكله كده جامد موت
انتى قربتى تنسى اسمك يابنتى
(:

شعار كفاية تفكير لا عقلك يطير
مبدأ التشتيت يجلب التركيز
************************
ههههههههههههه
انتى بتجيبى الحاجات دى منين؟

Lady E يقول...

blue-wave : ايوة اول تعليق يا دكتر

وياريت لو فعلا تعرفه تقوله يرجعه لأنه حرامي سرقه غصب عني

Lady E يقول...

عاشقه الرومانسيه : هههههههههههههه من السوبر ماركت يا دودو

نورتيني يا قمر

لجين أبو الدهب يقول...

حبيبتى ليدى ام دماغ متكلفة جدا بس حد واخدها منها دلوقتى .. ياترى ميييييييين D:

والحمد لله ان الحوادث بتحصل دلوقتى فى بيت ماما ..

احسن لما تعملى كده فى بيت جوزك بقى ويبقى منظرك ووووحش .. ههههههه

وخلاص هانت الكلية ايام والامتحانات تيجى وتستريحى منها كام شهر وسنة ان شاء الله وترتاحى منها خالص ..

دمتِ بخير حبيبتى ..

moustapha achraf يقول...

ربنا يكرمك انشاء اللة الى عاجبنى فيكى لمل بتقولى عااااااااااااا لوووول و أنك بتحاولى متبقيش مكتئبة و انا من هنا حاخد سشعارك و اطبقة على نفسى علشان الهسهس تعبنى خالص

Bent Men ElZman Da !! يقول...

طب وربنا انتى عسل :D
بس مش شرط يبقى حد واخد عقلك
ممكن دى بدايه فقدان ذاكره مؤقت ههههههههههههههههههههه
بس الموضوع ده بقى منتشر
لان لو السبب ان فى حد واخد عقلك وبتدورى عليه يبقى ياريت تدوريلى على عقلى معاكى :D
تحفه البوست بجد وانتى اتحف منه ههههههههه

كفايـة طيبـة يقول...

كل ده ومحدش واخد عقلك ؟ D:

ربنا معاكى يابنتى ... وشوية تركيز بقي عشان الدنيا متولعش تانى :)

مدونتك لذيذة واسلوبك حلو اوى ماشاء الله :)

♥نبع الغرام♥♪≈ يقول...

السلام عليكم
أيه يابنتى الجمال ده
بس بجد اللى واخد عقلك يابخته
ممكن تدينى حته من عقلك
ههههههه
بجد أنتى قمرايه ربنا يوفقك
وركزى اليومين دول مش وقت تواهان
ربنا معاكى
أختك إيناس

يوميات شاب منوفى يقول...

حاسس ان الى واخد عقبك حي ولا حاجة يمكن انتى اسلوبك جمبل اوى فى الكتابة تقبلى مرورى

احساس طفلة محبة للرومانسية بس واقعية يقول...

هاههاهاهاهاهاهاهاهاهاهاهاهاها
ايوة خلية مع اللى اخدة بقى
كدا ترتاحى اكتر
حد غاوى تفكير

وبعدين مش العصير طعمة حلو وبيكون مناسب مش لازم قهوة
و مش الطقم التانى حلو برضو
مش مشكلة

هاهاهاهاهاهاهاهاهاهاها

بالنسبة للاكل والمطبخ اعملى حركتين كمان زى اللى عملتيهم وماما هتمنعك خالص من المشى قرب المطبخ

وساعة ما تكونى داخلة المطبخ ابقى قبلها على طول تكونى مخلصة قعاد على النت عشان تكونى زهقانة منو ومترجعلوش تانى قبل 5 دقائق كدا

هاهاهاهاهاهاها
يارب يرجعلك عقلك يا ليدى
بس بينى وبينك التهيس برضو حلو

تقبلى مرورى

MaNoOoSh يقول...

ههههههههههههههههههههههههه
يعنى بردو معرفتيش تنفدى بجلدك من المطبخ يا ليدى
واللى واخد عقلك يا ستى..... جارى البح عنة علشان مش ناقصين كوارث مطبخية
هههههههههههههه

ستيتة يقول...

خير خير خير
خير اللهم اجعله خير

دي يا بنتي اثار امتحانية من الدرجة التالتة
لأ مش خطيرة ولا حاجة هو مرهم وانتي بيوتك وتبقى ماركة فله يا روحي

روحي يابنت ذاكري وبطلي تفكري في اللي واخد عقلك
ده هلاوس من نوع الفسفس الهستيري

Lady E يقول...

لجين أبو الدهب : هههههههه يالهوي يا لوجي دماغ ومتكلفة جدا ليه مخضروات ولا ايه :)

وبعدين ان شاء الله جوز المستقبل يبقى عنده صبر ايوب وتحمل الجمل علشان يقدر يصبر عليا وميجيليوش هسهس :)

ودعواتك بقى يا لجين العد التنازلي بدا للانطحانات بقيت بحسبها بالساعة عااااا

منوراني ومعطرة صفحتي دايما بوجودك

Lady E يقول...

Blind Sniper : هههههه ماشي

خد الشعار بس متنساش حقوق النشل محفوظة

Lady E يقول...

Bent Men ElZaman Da !! : ازيك يا بنوتة اخبارك ايه

بجد انتي اللي عسل والكومنتاية بتاعتك اتحف من البوست نفسه :)

وتفتكري دي اعراض فقدان ذاكرة ؟؟ مش وقتها خااااااالص عااااااا عاااااا عاااااااااااا

واوعدك هخلي كرومبو يدور على عقلي وعقلك واللي واخد عقلنا ميتهناش بيه يا اختي

Lady E يقول...

كفايـة طيبـة : تسلمي يا قمر

وجودك في البوست هو اللي خلاه جميل

نورتيني

شاب كــ طخين ـــــا يقول...

ربنا يرحمها والتفكير فى الحاجات دى متعب جدا

وانا عارف الاواخد عقلك ومش هقوله يرجعه عايزينك كده بحله المهلبيه دى

دمت بكل خير

Lady E يقول...

عاشقة الأحزان : وعليكم السلام ورحمة الله وبركاته

يا بخته ايه بس يا انوس وهو ياخد عقلي ليه طيب عاااااااااااا ايه الناس الشوريرة دي

ربنا يكملك بعقلك يا اختي ومحدش يسرقه منك زي ما حصل معايا عااااا

Lady E يقول...

يوميات شاب منوفى : تسلم يا شاب منوفي

تامر علي يقول...

علامات السهو ... وحرق الاواني ... والتخبط في المواعيد كلها حاجات طبيعية بتحصل للشباب من سن 3 الي 6 سنوات عادي يعني ...أهم حاجة انها متستمرش لبعد الامتحانات علشان خطر على المستقبل (المهني)
تحياتي :)

Lady E يقول...

احساس طفلة محبة للرومانسية بس واقعية : امين يارب يرجع لي عقلي سالم غانم

سلامتك الف سلامة يا احساس طفلة وبعد الشر عليكي من الانفلوزا

Lady E يقول...

MaNoOoSh : هههههههههه شوفتي يا منوش ورايا ورايا مفيش فايدة

ولما تلاقيه قوليلي علشان الكوارث الحياتية مش بس المطبخية

نورتيني يا برج الددي :)

Lady E يقول...

ستيته حسب الله الحمش : هههههههههههههه هو فعلا فسفس هستيري يا دكتر هههههه احلى اسم بجد

ومرهم وانتي بيوتك وهحاول ابقى فلة يا روحي

ادعيلي كتير يا دكتر والله انا اتخنقت عااااا

Lady E يقول...

أمبارح كان عمرى عشرين : حتى انتا كمان عارفه يا امبارح كان عمرك عشرين يعني انا لوحدي بس اللي مش عارفاه
طب لما تشوفوه قوله ينوبك ثواب رجع عقل ليدي مينفعش تاخد حاجه مش بتاعتك غصم واقتدار عاااااا

Lady E يقول...

تامر علي : من 3 الى 6 سنوات كويس جدا يعني انا قربت اتجاوز المرحلة الخطيرة دي الحمد لله

Ahmed يقول...

ههههههههههههه
ايواااااااااا
هيا ديه ليدي
ليدي اللي ياريت تفضل تضحك على طول

قبل لما تنامي اخبطي على دماغك كده (بس بالراحه مش ناقصين ارتجاج) وقولي كفايه تفكير وهدي اعصابك كده


اللي عندك ده مش حد واخد عقلك, ده الزهايمر والتوهان بتاع الشباب كلهم
هههههههه

أصل احنا جيلنا كله مصاب بالموضوع ده
ههههههه
بلاش موضوع الصيني ده, المثل بيقول ابعد عن الصيني وغني له

ربنا يروق بالك دايما

ELMASRYA - MRS WRITER يقول...

ده انتي هتدخلي المطبخ أكييييييد مش علشان تتعلمي طبخ لا سمح الله

لا لا ايفر نيفر

انما علشان تاخدي كورس في كيفية حماية الطاسة التيفال من الإحتراق

عاجباني محاولاتك للخروج من الإحساس السلبي اللي حاسه بيه

وهدية ليكي موضوع جديد أعتقد مناسب لحالتك في مدونة أيقظ قدراتك

لعيونك يا قمراية

وبالنسبة للي واخد عقلك أعتقد إنه امتحان الفرنساوي

ولا يهمك كله بيعدي يا توته

دمتي سالمة بحفظ الرحمن

dramaqueen يقول...

لا محدش واخد عقلك ولا حاجة
انتى بس وصلتى بالسلامة لسراية المجانين

ايه دة ؟؟؟؟؟
دة انتى مهلبية خالص
بس عسل والله

MǿиY El-Shreef يقول...

اولا كده

سووووووووووووووري والله العظيم الريدر ما اظهر البوست الا دلوقتي

ثانيا ياعيني ياعيني ع الي واخد عقلك

ايه كل ده دانتي واضح انك ف الضياع اصلا اساسا خاااالص

والمطبخ بقى ياعيني هتدخليه تاني

انتي الي جيباه لنفسك اانا مش برضى ادخل عشان هيحبسوني جوه لو دخلت :D

المهم خدي بالك من المذاكره عشان تخلصي من الكليه بقى وتشمي نفسك

سلام يا جميله :)

Lady E يقول...

أحمـــــــــــــد أبو العلا : اخبط على دماغي ده على اساس ان في حد هيفتحلي باب دماغي ولا ايه ؟؟ طب ما يمكن تكون دماغي نايمة ولا حاجه لازم ازعجها يعني عااا


واحنا جيلنا كله مصايب مش مصاب بس يا انجينير :)

Lady E يقول...

ELMASRYA - MRS WRITER : هههههههه انا مش هتعلم الطبخ فعلا لأني بعرف اطبخ يا خالتو بس لكل جواد كبوة

وربنا يكرمك يا خالتو بجد هدية جميلة جدا وجت في وقتها ربنا ميحرمنيش منك يارب

وفعلا امتحان الفرنساوي مطير عقلي مش واخده بس ربنا يستر

ادعيلي يا خالتو

دمتي في حفظ ورعاية الرحمن

Lady E يقول...

dramaqueen : طب يلا نروح زيارة كلنا للسرايا الصفرا :)

وانتي اللي عسولة يا كوين

دمتي بخير وسعادة

Lady E يقول...

MǿиY El-Shreef : تصدقي كنت لسه بفكر النهاردة وبقول يا ترى فينك يا موني زعلانه مني ولا ايه

معلش بقى انا عارفه اني مقصرة في زيارة البلوج بتاعك

نورتيني جدا جدا جدا

Dr Ahmed Said@Black Armor يقول...

بصى يافندم الزاهايمر ماشى فى الشباب اليومين دول ونصيحة كل واحد يخلى باله من عقله
لان اصلا اللى بيحصلنا ينسى الواحد اسمه
دمتى بخير

إيمان يقول...

لالالالالالا

محدش واخد عقلك ولا حاجه

هو بس مبدأ التشتيت يجلب التركيز

بدأ يؤتى ثماره

ربنا يوفقك يا بنتى شوفيلك عقل صينى وخلصينا

Lady E يقول...

Dr.A.S. black armor : الزهايمر ده مشكله فعلا
يعني محدش عارف يوقفه ويخليه يرحم الشباب

ربنا يستر والواحد مينساش اسمه

Lady E يقول...

إيمان : ههههههههههههه هي دي ثماره اومال الحصاد هيبقى ايه

بجد نورتيني يا ايمي بعد طول غياب

بحبك جدا