التاج المئوي للبرينسس ليدي

التاج ده جالي من 4 مرات من 4 مدونين وطبعا لازم اجاوبه

وهما احساس طفلة محبة للرومانسية بس واقعية

والانجينير أحمد ابو العلا

وقبلاوي

واخويا الكبير دكتر عمرو بلو ويف

شكرا ليكم على اهدائي التاج وعلى انكم دبستوني في اجاباته ههههههههه
على فكرة البوست ده رقم 100 في مدونتي :)

اسمك؟
اسمي مين فيهم؟؟ في المدونة ولا في الكلية ولا في البيت :)
نقدر نقول lady e

المشهور بيه وسط اصحابك؟
كتير

سنك؟

ماشية في الواحد وعشرين ان شاء الله

مجال دراستك؟

أداب اللغة الإنجليزية للأسف !!
وتنمية بشرية قريب ان شاء الله

اسم مدونتك؟

طفلة مش عايزة تكبر


صورتك الرمزية فى المدونة بتعبر عن ايه؟
رمزية اخت رمزي :)
صورتي في المدونة حاليا لأني بحب اغير الصورة الرمزية دايما
هي ايد بيبي وفي ايد كبيرة حضناها والمعنى ده انا حباه جدا بحس في الصورة دي بعطف وحنان وحماية وحب
ولما بشوفها مش عارفة ليه بحس اني مطمنة

هل فكرت فى اغلاق المدونة ؟ والسبب؟
ايون وكذا مرة مش مرة واحدة وده كان استسلام لحالة نفسوية مش متظبطة
او كنت بقول ايه اللي انا بكتبه ده ؟؟

ايه رد فعلك لو حد قل ادبه فى تعليق ؟

اذا نطق السفيه فلا تجبه فخير من اجابته السكوت
لأني لو رديت هبقى نزلت للمستوى ده
وعالعموم على حسب الكلام نفسه قل ادبه في ايه بالظبط؟؟ وممكن الرد عليه واقناعه انه غلط
او ميستاهلش الرد وامسح التعليق ف على حسب الكومنت ذات نفسيها

اسوأ مدونه؟
السؤال ده جاوبت سؤال اخوه قبل كده في اول تاج حليته بس هجاوب تاني يلا ان شا الله محد حوش
اسوأ مدونة هي اللي بتعدي الخطوط الحمرا بأنها بتسب ربنا سبحانه وتعالى والأنبياء والرموز الدينية او بتهاجم المدونين والى اخره من الحاجات اللي الانسان بيشمئز لما يقرأها


هيحصل ايه للايميل بعد ماتموت؟
يعني اذا كان صاحبة الايميل اللي هي انا ماتت وقتها يبقى الايميل هيحصله ايه هيروح الديسكو مثلا؟؟
طبعا هيموت معايا ويا نعيش مع بعض حبيبي يا نموت احنا الاتنين
اوعدني نكون يا حبيبي مع بعضنا في الحالتين

اديت الباسوورد لحد قبل كدة؟
ايوة قولته لماما بس ماما نسيته عاااااااااااااااا

السفر بالنسبالك ايه؟
حياة وروح جديدة بتدخل حياتي
لما بكون مهمومة جدا وحزينة جدا او عندي مشاعر سلبيه بحب اسافر
وفي السفر 7 فوائد منها ان لو مسافر مع حد بتقدر تعرف اذا كان انسان كويس ولا لأ
و قال رسول الله صلى الله عليه وسلم :السفر قطعة من العذاب يمنع أحدكم طعامه وشرابه ونومه فإذا قضى نهمته فليعجل إلى أهله متفق عليه
واكيد لو سافرت بالطيارة على مصر للطيران هتحس ان السفر قطعه من العذاب فعلا
اما بالنسبة لأحلامي عن السفر فنفسي اسافر العالم كله بس علشان حلمي يكون واقعي
اكتر بلاد هموت واشوفها هي لبنان وانجلترا واسبانيا وان شاء الله متاكده اني هزور واحدة من البلاد دي خلال ال3 سنين اللي جايين او يمكن ازورهم كلهم ربنا يسهل هههههههههه

الموود بتاعك ايه ؟
دلوقتي ولا من دقيقة ولا بعد دقيقة؟؟

بتعمل ايه فى وقت فراغك ؟
على حسب الموود ساعات بقرأ
وساعات بعلي الكمبيوتر عالاخر واغني معاه ( الله يكون في عون الجيران)
وساعات تأمل اللي هو الجو بتاع العفاريت ده بخور وشمع وموسيقى هاديه وضوء خافت وتأمل
وساعات بحب ارغي مع حد قريب مني في التليفون او عالايميل
وساعات بكتب
وعندي مفرش صوف بشتغل فيه في اوقات فراغي او لما اكون مضايقة
وساعات بجيب الوان مية وارسم قلوب واشخبط شخابيط بحب الألوان جدا
وساعات بحب الميك اب وبجرب كذا شكل ليا ولو عجبني شكل الميك اب اللي عملته بصوره
وساعات بدخل المطبخ واعمل اكلة جديدة
كفاية كده بقى مع ان لسه في حاجات كتير تانيه نياهاهاهاها

الأكلة المفضلة ؟
بعشق الأكل الايطالي المكرونات والبيتزات والحاجات اللي بتتخن دي
وبحب الفراخ بكل انواعها والكبدة الاسكندراني كمان بحبها جدا والخضار السوتيه
وبحب المشويات واخيرا ساعات بحب السي فود :)

الصفات التى اخذتها من والدك؟
كتير مش عارفة اقول ايه ولا ايه
بس اللي لاحظته اني بقلد بابا في حاجات كتير تلقائيا يعني مثلا طريقة القيادة للكتكوتة بتاعته
وبقلده في كلامه احيانا حتى ماما دايما بتقولي اني اخدت معظم صفاتي من بابا
التدين والثقة بالله سبحانه وتعالى

الصفات التى اخذتها من والدتك؟
طول عمري نفسي اوصل لنص صفات ماما
مامتي انسانة اكثر من رائعة ومعقداني عاااااااااا
والسؤال ده بالذات استعنت فيه بصديقة اللي هي مامتي علشان انا احترت بصراحه واخيرا بعد نقاش توصلنا الى اني اخدت شوية حاجات من ماما وهي العقل الرزين بس مأخدتوش كله لأن بيغلب عليه العصبية والتسرع عاااااااا
وكمان حب القراءة واللغات اخدتهم من ماما
والاعتماد على الذات وقت الأزمات ) حلو السجع ده
التدين والثقة بالله سبحانه وتعالى
والالتزام بالأخلاق الفضيلة اني ماشية في الطريق الصح مش ببص يمين ولا شمال وعلى رأي المثل امشي عدل يحتار عدوك فيك
واتقال عليا معقدة علشان مش بكلم ومش بصاحب الشباب حتى زمايلي في الكلية
الحقيقة اللي بشوفه في الكلية مش علاقات زمالة لكن علاقات زبالة
لو حد عارف معقدة من ايه يقوللي ههههههههه


اكتر ست حاجات بتكرههم ؟

الفراق والوداع
الظلم
اننا في مجتمع ذكوري اغلب اللي فيه بيبصو للمرأه بصة منيلة _ اغلب مش كل_
الزحمة بكرهها جدااااااااا
حد يعرفني علشان مصلحة
غربة النفس مش شرط اكون مسافره علشان احس بالاحساس ده

اكتر ست حاجات بتحبهم ؟
صلاة الجماعة مع بابا في رمضان ونفسي اصلي صلاة الجماعة مع زوجي المنتظر ان شاء الله
بعشق الطبيعة عامة وخصوصا البحر والنيل
بحب الموسيقى الهادية والرومانسية وشوية من الاغاني الانجليش والعربي وبالمرة الفرنساوي
بحب جدا كل نظرة خوف عليا او حنيه او احساس ان حد مهتم بيا او بيخاف عليا
بحب الشوكولاته لدرجة الهوس ههههههههه
بحب ادردش مع مامتي وخالتي في ساعة سمر بالليل مش عارفة الضحك ده كله بيجي منين


شخصيتك نوعها ايه ؟
Made in Egypt
يعني ايه نوعها ايه (وش بيطلع لسانه)


لماذا دخلت عالم التدوين من الاساس؟
عااااااااااا بريئة يا بيه
حد زقني مش انا اللي دخلت عالم البحار ده هههههه
دخلت برجلي اليمين علشان افضفض واستفيد بخبرات الاخرين واتعرف بأجمل عيلة تدوينية


احلى جملة قيلت فى وصف مدونتك؟

هما كتير بصراحة كفاية ان من فترة قريبة اصدقائي واصدقاء المدونة موافقوش اني احذفها او افضل قفلاها

وخالتو المصرية حبيبتي قالتلي والمدونة بتاعتك لما اتفتحت عملت جو مبهج للمدونات كلها
ده علشان عنيكي حلوين بس يا خالتو


اهمية التعليقات بالنسبالك؟

زي المية والهوا بستناها وبفرح بكل تعليق جديد وخصوصا لو كان التعليق من حد بثق في قلمه ورأيه

احلى بوست كتبته؟ ضع اللينك ثم اذكر لماذا؟
يا عمي أنا جاي أطلب اني امرمط وابهدل بنتك
http://justbabygirl.blogspot.com/2008/07/blog-post.html

و
كان هيحصل ايه ؟؟

http://justbabygirl.blogspot.com/2008/06/blog-post_28.html

اول موضوعين كتبتهم وراضيه عنهم ممكن امسح المدونة كلها واخلي الموضوعين دول
ممكن تشوفوهم وتقولولي رأيكم انا هبقى متابعاهم لو حد حب يعلق فيهم


افضل مدونة قرأتها؟
في مدونات كتير قرأتها وحبيتها بالزاف بالزاف وبرشه برشه
واكيد موجودين عندي في الفيفوريت لاني لو قلت افضل مدونة هكتب مدونات كتيييييير
وعالعموم افضل مدونة هي كل مدونة صاحبها اخد من وقته وكتب فيها احساسه وافكاره ومشاعره


افضل بوست قرأته؟

بجد بوستات كتير في كذا مدونة يعني مثلا بتعجبني بوستات دكتر ستيتة حسب الله الحمش
وبتعجبني اشعار ومواضيع وحكايات دكتر عمرو بلو ويف
وبتعجبني بوستات خالتو المصرية
وبوستات البنوتة الجميلة بسمة انور
وكمان بوستات ابو على
وبوستات احساس طفلة محبة للرومانسية بس واقعية
واخيرا بوستات الانجينير
وبوستات محمد غالية
وبوستات لجين ابو الدهب
وغيرهم والله بس دول اللي حضرو في ذهني

الشغل بالنسبالك ايه؟

حلم مصبرني على الكلية ورخامتها
حلم بحاول اوصله واحققه ان شاء الله

الانترنت بالنسبالك ايه ؟
الانترنت ده روحي روحي روحي مقدرش استغنى عنه للأسف عاااااااااا
ادمان ادمان يعني مش اي حاجه ومش بحب الانترنت لنفسه لكن بحبه علشان بيوصلني بالناس اللي بحبهم في الله
وهما كمان بيحبوني في الله

تمرر التاج ده لمين ؟

اهدي التاج
لخالتو المصرية حبيبتي
و للبنوتة الجميلة غروب
ولصحبتي الانتيم كيكي
وللبنوتة العسولة بسمة انور
وللمدون الجميل محمد غالية
ولدكتر ستيتة حسب الله الحمش

الصبر مر وكمان اليأس مر

اولا مبروووووك على التعادل بين الزمالك والأهلي علشان محدش يستهين بالزمالك تاني والاهلاويين يبطلو غرور وعارفة انكو هتسيبو البوست كله وهتمسكو في حتة ان الاهلاويين مغرورين بالنادي بتاعهم

امبارح حصلت معايا مواقف كلها اسوأ من بعض ومنها اني خرجت عن شعوري لأول مرة في الكلية
لما ضاكتور الفرنساوي المحترم خلص محاضرة مع سنة تانيه واخرنا ساعة كاملة عن معاد محاضرتنا
وطبعا مفيش مكان نقعد فيه واللي زاد وغطى ان كان في مايك في مدرج من المدرجات المايك ده كان بيصفر وصوت الصفارة ده ممكن يخلي الواحد ميسمعش تاني وخصوصا واحنا في مكان مغلق الصوت ده كان قوي لدرجة خلتني صدعت
وقلت اكيد حد من العمال هيتصرف ويطفي المايك ودخلنا محاضرتنا لقينا ال......... بيقولنا اطلعو بره
مش عايز سنة تالتة دلوقتي اصله مدرج ابوه عمركو شوفتو حد بيمضي الطلبة انهم حضرو المحاضرة؟؟؟
لما اتطردنا كده واحنا لسه داخلين لقيتني تلقائيا بقوله يخربيت غبائك بس والله كنت تعبت من انتظار المحاضرة قدام باب المدرج وتعبت من صوت المايك وفي الاخر لما طلعنا من المدرج انا اللي نزلت للمدرج اللي فيه صوت المايك الشنيع وقفلته ولا حد سأل ولا حد اهتم
وبعد ساعة تانيه من الانتظار وطلبة تخرج واحنا واقفين وطلبة تطلع واحنا واقفين لقيت كل سنة تالتة بيدخلو
المدرج فدخلت معاهم وبعد لما قعدت وسلمت ع البنوتات اللي معايا
طردنا لتاني مرة وكنت في تاني بنش ووقتها قولت بصوت عالي اكيد وصله حسبي الله ونعم الوكيل
و البنات اللي معايا في نفس البنش قالولي بنقولها كتير حسبنا الله ونعم الوكيل
فكرت وقتها امشي وطظ في المحاضرة وحسيت بكمية غضب ونرفزة وصلتني لدرجة اني هعيط
بس تماسكت وقلت اما اشوف اخرتها ايه وبعدين مش انا لوحدي اللي بيحصل معايا الهبل ده
وبعد كل ده لما دخلنا المحاضرة قالنا كلمتين وبس
مش هاحذف حاجه من المنهج المنهج كله مقرر عليكو
وطلعنا من المحاضرة والأمن بدأ يطرد الطلبة بره الكلية كالعادة علشان يقفلو الكلية
وانا مشيت على رأي ام كلثوم واثق الخطوة يمشي ملكا مليش دعوة بأمن الكلية
وروحت بكل هدوء نقلت جدول الامتحانات ولقيت منظر ورود بيضا جميلة جدا في الكلية

المنظر ده عجبني جدا بس لما صورته الصورة مطلعتش حلوة زي الحقيقة دايما الاصل احسن من الصورة واخدين بالكو ان حتى الورود حزينة علشانها في كليتنا او يمكن حزينة علشان حاسة بيا
انا متأكده ان ربنا مش هيضيعنا ومتاكده ان ربنا هيذل الشخص ده في يوم من الايام علشان ظلمه للناس
ده مفيش حد خالص بيقول كلمه حلوه فيه ؟؟؟؟ معقول يكون في ناس كده في الدنيا طب ليه؟؟
وعمري ما هنسى ان لما دخلت قسم لغة انجليزية وعرفت ان عندي فرنساوي قولتله انا مدرستش الفرنساوي في ثانوي قالي ولما انتي عارفة انك هتدرسي فرنساوي في قسم لغة انجليزية دخلتي انجليزي ليه ؟؟؟ يعني قمة الغباء في الرد انا اصلا مكنتش عارفة ان هيبقى عندي فرنساوي في انجليش
دوشتكو انا بموضوع الفرنساوي ده بس قولت يمكن لما اكتب ارتاح نفسويا شوية
لأن انا نفسيتي مدمرة وحاسة اني مكسورة اوي من جوايا وكل يوم بيعدي قلقي بيزيد
ومتأكده انه هيجيب لنا امتحان يشيب الكتكوت زي ما عمل السنة اللي فاتت
اللجنة كانت عبارة عن مشرحة مش لجنة في ناس قطعو الورقة ومشيو وناس اغمى عليهم
مفيش قدامي غير حلين اني اتوكل على ربنا سبحانه وتعالى واني اذاكر بس مع ذلك حاسة بالضعف والانكسار والوحدة لأن مفيش حد هيقدر يجتاز الامتحان ده غيري

من اصعب الحاجات على الكبار انهم بيستحملوا اختياراتهم
وانا كان قدامي كل اقسام كلية الأداب وانا اللي اخترت اللغة الانجليزية يبقى لازم استحمل واكمل
ومعملش زي الغريق اللي لما قرب يطلع على الشط تعب واستسلم مع انه كان فاضله خطوة وينجو !!

(فَصَبْرٌ جَمِيلٌ وَاللّهُ الْمُسْتَعَانُ عَلَى مَا تَصِفُونَ) سورة يوسف الأية 18

محدش فاهم حاجه !!

* لو عايز تنام كويس اضرب كوباية نيسكافيه ايام الامتحانات هتلاقي النيسكافيه احسن من احسن منوم

* اكتر حاجتين بكرهم في حياتي الانتظار والتجاهل وزمان قالو وقوع البلا ولا انتظاره

* اديها بنادول تديك طراوة ( بنادول ده دواء مسكن لو حد مش عارف يعني)

* روى الإمام البخاري رحمه الله في صحيحه معلقا مجزوما به عَنْ عَائِشَةَ رَضِيَ اللَّهُ عَنْهَا قَالَتْ سَمِعْتُ النَّبِيَّ صَلَّى اللَّهُ عَلَيْهِ وَسَلَّمَ يَقُولُ : " الأَرْوَاحُ جُنُودٌ مُجَنَّدَةٌ فَمَا تَعَارَفَ مِنْهَا ائْتَلَفَ وَمَا تَنَاكَرَ مِنْهَا اخْتَلَفَ . " صحيح البخاري : كتاب أحاديث الأنبياء : باب الأرواح جنود مجندة .

* مش كل اللي بنقابلهم في حياتنا بنرتاحلهم وبنحبهم

* نفسي اعرف ايه اللي جوه قلوب الناس كان نفسي يكون عندي الحاسة السابعة

* نفسي اعرف بكرة هيبقى عامل ازاي بيقولو بكرة بيتحدد على النهاردة بالطريقة دي يبقى مفيش بكرة

* هي ايه الحياة ؟؟

* انا في سنة تالتة والتالتة ثابته اومال ليه كل الناس حاسين اني في سنة رابعه مش فاهمه ؟عالعموم ربنا يسهل كلها شهر ان شاء الله واروح سنة الليسانس

* اعتقد ان الاحلام تستحق المعاناة علشان تحقيقها بس لو كانت احلام تستاهل وليها قيمة

* وحشتوني جدا جدا جدا واكتر انسانة وحشتني ومش هقدر اشوفها اسمها مياء كانت الملاك الحارس بتاعي وانا في تالتة ابتدائي بس للأسف رجعت بلدها وافترقنا يا ترى لسه فاكراني؟؟ لو شوفنا بعض دلوقتي مش هنعرف بعض الأيام بتغيير !!

* فاتت عشرين سنة من حياتي وانا مش راضية عن حاجات كتير في حياتي , يا ترى هحتاج كام عشرين سنة علشان احقق ذاتي وارضى عني ويا ترى العمر باقي فيه كام سنة؟؟؟

* يا ترى ليه بعض المدونين اللي المدونة بتاعتي في المفضلة عندهم بيتابعوني في صمت ؟؟؟ سؤال يطرح نفسه

* كل ما بتعلم حاجة جديدة بفهم اد ايه انا مش فاهمه اي حاجة في الدنيا

تلومني الدنيا على مدونتي التانيه http://sun-east.blogspot.com/2009/04/blog-post_21.html

انا جييييييت نورت المدونة :)

هييييييييييه والله كنت ناوية اطول الغيبة اكتر بكتيييييييييييييييير بس رجعت المدونة تاني بناءا على طلب الجماهير :) اللي وقفو ضد اني احذف المدونة او اطول الغيبة اكتر من كده
وهما
خالتو المصرية حبيبتي : انسانة رائعة بمعنى الكلمة انا كنت عارفة انها انسانة جميلة من مدوناتها لكن لما كلمتها ع الايميل عرفت انها اروع بكتير من اي صورة رسمتها ليها في خيالي وبجد كنت طايرة من السعادة وانا بكلمها

كيكي انتيختي : كلمتني في الموبايل مرتين عالفاضي واخده لي بالك يا كيكي ههههههههههههه بسيحلك عالمدونة
اي خدعه بصراحه في الاول خضيتيني وعملتيلي جو ساسبنس وتشويق وبعدين لقيت الكلام عالمدونة
روحي يا شيخه وتعالي بسرعه هههههههههههه بحبك جداااااااااااا ووشك حلو عليا يا كتكوتتي

البنوتة الجميلة غروب : اهتمت جدا بإني ارجع للمدونة مع اننا لسه نعرف بعضينا قريب بس عملتلي مفاجأه
امبارح كنت بشد في شعري من الفرنساوي وخلاص هعيط لقيتها بعتتلي مسج بجد فرحت بيها جدا ميرسي يا قمرايا وربنا يديم صداقتنا وانا حبيتك في الله


صبحتي كيارا : اتصلت بيا عالموبايل برضه وقالتلي افتح المدونة شكرا يا كوكي كل يوم بتثبتيلي انك انسانة جميلة


القمرايا دراما كوين : تسلميلي على اهتمامك يا قمرايا وعالكومنت الجميلة في المدونة التانية شكرا يا احلى كوين عالنت كله


الانجينير احمد ابو العيليه :) : شكرا على الكومنتات في المدونة التانية والله كلامك ده شهادة اعتز بيها


محمد غالية : تسلم يا محمد وربنا يوفقك في امتحاناتك


دكتر عمرو بلو ويف : متشكرة جدا على الطاقة الايجابية اللي منحتها لي في حياتي بجد حضرتك انسان جميل ربنا يكرمك


مجنووون : تسلم يا مجنووون انا مكنتش اعرف ان في حد بيفكر في مدونتي بالطريقة الجميلة دي


ABOALI : تسلم يا ابو علي على كلامك الرقيق وان شاء الله هاخد بالنصيحة


انا اللي استاهل : شكرا على النصيحة من مجرب :) وعلى رأي المثل اسأل مجرب ولا تسأل طبيب


بجد شكرا ليكم وشكرا لأي حد زعل ان المدونة كانت مقفولة






**************************************************





امبارح كان عندنا محاضرة ترجمة ومتحمسة بقى ونازلة رايحة الكلية وماشية بالكتكوتة واذ فاجئتن لقيت الكتكوتة بتعرج قولت في حاجة مش مظبوطة ونزلت اشوف في ايه؟؟؟ لقيت في مسمارين دخلو في الكاوتشاية اللي ورى وكان قدامي حل من الاتنين اقف جنب الكتكوتة واعيط او اركب فيها واعيط برضه :) اصل هغير الكاوتش ازاي انا ؟؟؟ وبعدين لقيت لمبة نورت فوق دماغي زي افلام الكارتون نزلت جبت من الشنطة منفاخ
وبدور ع البتاع اللي بينفخو الكاوتش منه ملقيتوش المهم قررت اني امشي بشوييييييش لغاية لما اروح لأقرب حد بتاع كاوتشات لأن مكنش في مكان اركن فيه والشارع صغيييييير فمكنش ينفع اسيب الكتكوتة واخد تاكسي
المهم ركبت الكتكوتة ف لقيت صاحب محل السوبر ماركت اللي قدامي بيقوللي حرام عليكي مينفعش تمشي بيها وهي كده قولتله طب اعمل ايييييييييييييييه ؟؟؟؟؟ قالي اركنيها قولتله اركنها فييييييييييييين مفيش مكاااااااااااااان
المهم نزلت اشوف الكاوتشايه اخبارها ايه ف جه ناس وغيرولي الكوتشاية وانا كنت في قمة الاحراج لأنهم كل ما يسالوني على حاجة مكنتش عارفة اماكنها ولا اساميها واول مرة اعرف ان الاستبن ليه مخبأ سري في شنطة العربية نياهاهاهاهاها وفاااااااات نص ساعة على معاد المحاضرة وروحت الكلية لقيت الدكتور لسه مجاش هييييييييييييييييه ولقيت البنوتات زميلاتي موحدين الزي ولابسين عبايات كان يوم العبايات العالمي
وروحت اسلم على بنوتة زميلتي هي منتقبة وبقولها ازيك يا علا قالتلي انا مش علا ههههههههههههههه يادي الاحرااااااااااااااج قولتلها انا اسفة كلكو شبه بعض اعمل ايه يعني؟؟ قالتلي ولا يهمك
بس بجد انا اتحرجت جدا
وحكيت لزميلاتي على موقف الكاوتشاية اللي فرقعت من جنابها ودعت عليا فقالولي يا بنتي سميناكي ليدي حوادث خلاص قولتلهم عيب عليكو دي مش حادثة وكل واحدة في الجروب قالت موقف حصلها مع العربيات والحوادث
وضحكنا وفرفشنا لغاية لما الدكتور جه وكانت محاضرة تحففففففه
احلى حاجة فيها ان الدكتور فهمنا ان اللي هيترجم هيجيبله العندليب الله يرحمه ويقوله لكن سمائك ممطرة وطريقك مسدود مسدوووووود مسدووووووووووود يا والدي
دكتر اتش اتش _ احنا مسميينه كده_ جابلنا كلاكيع وقالنا ابقو قابلوني لو عرفتو تترجموها نياهاهاهاهاهاها وجابلنا ترجمات لمترجمين بيترجمو حرفيا وقرأها لينا واللي يشوفنا وقتها يقول اننا كنا بنشوف مسرحية كوميدية مش في محاضرة من كتر ضحكنا في المحاضرة دي
ولما طولت المحاضرة تنحنا كلنا فسالنا سؤال ومحدش رد عليه قفالنا انتو متبنجين ولا ايه؟؟؟؟؟
قولتله متخدرين يا باشا نياهاهاهاها طبعا هو مسمعنيش بس زميلاتي بصولي وقالولي وده من ايه ان شاء الله
قولتلهم نص اللي في المحاضرة نامو اساسا
واخيرا خلصت المحاضرة


اما النهاردة بقى راجعه من كورس الفرنساوي واللي المسيو فيه كان بيدعي على الضاكتور بتاع الفرنساوي مع انه صاحبه وقاللي ربنا يكون في عونك طعن الخناجر ولا الخسيس يحكم فيا
كل الناس عارفين اصلا اد ايه الضاكتور ده ظالم ومفتري ع العموم منه لله

المهم لقيت ست وست يعني ستتين واقفين في عز الشمس ومفيش مواصلات ومعاهم حاجات تقيلة
قلت اقف لهم اوصلهم ولا هيقولو عليا مجنونة؟؟؟ المهم بعد صراع بين قلبي وعقلي وقفت اخيرا
ومتكلمتش ولا قولتلهم تعالو حتى علشان اشوف رد فعلهم وبعدين لقيتهم عرفو اني وقفتلهم فعلا وركبو معايا
واخدت كمية دعوات من اللي قلبكو يحبها منها ربنا ينجحك يااااااااااااااااااااااارب امييييييييييييييييين
وكمان دعوة ضحكتني جدا ربنا يرزقك بإبن الحلال اللي يعرف قيمتك ويهنيكي ويسعدك ويكون دكتور
ههههههههههههههههههههههههههه انا بصراحه ضحكت جدا اشمعنا دكتور يعني علشان مصاريف العلاج ولا ايه
وصلت واحدة قبل بيتنا والتانية طلع بيتها بعد بيتنا بمسافة بس وصلتها برضه حد طايل الدعاء ده كله
وبعدين والله انا اللي محتاجه للثواب والدعوات الجميلة دي اكتر ما هما كانو محتاجين ان حد يوصلهم
اما بقي بالنسبة للانجليزي النهاردة فحدث ولا حرج صاحبة ماما دردشت معايا عالايميل بالانجليزي
وشوية ولقيت دودو زميلتي في الكلية بتكلمني انجليزي وانا بكلمها بالعربي فقالتلي انجليش بليز اي دونت نو ارابيك فضحكت جدا وقولتلها ريلي؟ قالتلي اها ريلي واتكلمنا فرانكو اراب لغاية لما زهقت واتكلمنا عربي
سبحان مغير الاحوال في اولى كلية كنت بقول ل دودو ما تيجي ننمي اللغة ونتكلم انجليش كانت بتقولي النبي عربي نتكلم انجليزي احنا ليييييييييييييه ؟؟؟؟؟؟؟؟؟؟؟
واخيرا وليس اخرا كل شم النسيم وانتو طيبين هتعملوا ايه بكرة؟؟
عن نفسي هجيب ورد ان شاء الله بس مش هاكل فسيخ ولا رنجه

best wishes

A new day has come أتى يوم جديد

مواعيدي اي كلام واستحق بجدارة ابقى من العالم التالت علشان مش بعرف اظبط مواعيدي دايما بروح متأخرة ربع ساعة او اكتر عن اي ميعاد عاااااا بس بحاول اظبط الموضوع ده واخلي مواعيدي دقيقة

روحت الكورس كالعادة متأخرة ومكنش ليا نفس احضر مع مجموعتي مش عارفة ليه , المهم دخلت الكورس وسلمت على السكرتيرتان
وهزرت شوية معاهم وقالولي بطلي تغيبي كتيييييير وبعدين خبطت على باب القاعة اللي المستر بيشرح فيها علشان ادخل احضر الكورس وانا مكنتش عاااايزة احضره وقتها

ودخلت قولتلهم في مكان ليا ولا مفيش؟؟ المهم تقريبا المستر لمح اني مش عايزة احضر وقاللي ايه رأيك تحضري مع المجموعة اللي جاية ؟؟ قولتله اوكي :) وفضلنا نتكلم انا والسكريتيرات ثم جت بنوتة مشغلة اغنية جنات الجديدة اسمها حب امتلاك حسيت بإعجاب بالاغنية دي وقولت للبنوتة تبعتهالي وفعلا بعتتهالي بعد عذاب تليفوني مكنش متقبل البلوتوث وبعدين المجموعة بتاعتي خلصو الكورس ودخلت اسلم عليهم
وكذا بنوتة اخدوني بالحضن وقالولي عاش مين شافك بطلي تنفيض للكورس والكلية لسه أقل من شهر عالامتحانات وانا عارفة الحقيقة دي بس الحمد لله بستهبل اخر استهبال
المهم النهاردة كان عندنا ادب كلاسيكي مسرحية اوديب ف اوديب بالانجليش مكتوبة اوديبس ففي بنت زميلتنا بتقول للمستر مين اتوبيس ده يا مستر
انا انفجرت في الضحك بصراحة حد في الدنيا ميعرفش اوديب اللي قتل ابوه واتجوز امه واولاده قتلو بعضيهم عيله اجرام برضه ههههههههه
لأ وايه كمان بتقول عليه اتوبيس مش اوديبس كل واحد وعلامه صحيح العلم نورن
بجد المجموعة التانية اللي بتيجي بعد مجموعتنا يستحقو يتكتب عنهم كتاب وانا فعلا كتبت عنهم موضوع في كتابي حبيبي بجد شوية بنات مش طبيعين في خفة دمهم
المهم سمعت شرح رواية اوديب لسوفليس ودوخت من كتر الأحداث الدموية اللي في القصة لأ وايه المستر بيحكيها مع مؤثرات صوتيه من البنوتات
يعني مثلا يقول قتل ابوه كل البنوتات يقولو يالهووووووووي
اتجوز امه وطبعا مكنش عارف في الاول انها امه كل البنوتات يقولو : الصوت بتاع شهقة الملوخية مش هعرف اكتبه هههههههههه
المهم كان في فزرورة الفزرورة دي بيقولها وحش مش بيسمح للناس انهم يدخلو مدينة ثيبس او طيبة الفزرورة دي بتقول
ايه اللي بيمشي على 4 الصبح وبيمشي الظهر على رجلتين وبيمشي في المساء على 3 ارجل ؟؟
اللي يجاوب الفزرورة دي كان بيعدي الطريق واللي مكانش بيجاوب كان الوحش بيقتله يعني اللي مش هيجاوب الفزرورة دي مش هيخرج من البلوج حي نياهاهاهاهاهاهاهاهاها بعد الكورس فضلت اسمع أغنية جنات وغيرت المووووود بتاعي اتخنقت
الكلمات بتقول

اتقالي عنه يا ريت تحاولي تحاسبني منة دة كتير بيوعد بس مبيوفيش بوعد
.............

مش فاهمة بس ازاي ولية عدت عليا وانا غلطتي ان مشاعري خلتني اندفعت

لما اتعاملت معاه بطيبة وحسن نية كانت النتيجة ان النهاردة لقتني ضعت ...... الخ

يخربيت الحب اللي بالشكل ده انا شايفة نموذج قدامي لبنوتة زميلتي في الكلية كل يوم بتتحطم بسبب الحب اللي حبته لواحد ميستاهلش
ومن كتر ما صعبت عليا واتأثرت بحالتها خايفة حد يستهين بمشاعري كده في يوم من الايام لأني عمري ما هستحمل
منهم لله الناس اللي زي دول سواء بنات او ولاد
يا ترى ليه في ناس وحشة كده؟؟ نفسي افهم هيستفيدوا ايه؟؟

المهم حبيت اغير المود رحت لصحبتي شيماء هي خريجة اداب انجليش وكانت في نفس ذات الجامعة بتاعتي وحاليا بتشتغل في صيدلية
والدوا ماثر عليها اخر تأثير المهم اتفقنا نروح راس البر سوى أيون انا من دمياط :) وفخورة اني دمياطية

صورة من احد شوارع راس البر تصويري طبعا
المهم فعلا روحنا راس البر علما بإن الرخصة بتاعتي الحمد لله ضاعت هي والبطاقة وكارنيهات الكلية والمكتبة يعني م الاخر مبقاش في ليا اي اثبات شخصية المهم واحنا في طريق راس البر قولت لشيماء على فكرة الرخصة بتاعتي ضاعت قالتلي خير خيرهنتاخد تحري وهيصادرو العربية بسيطه :) قولتلها لا تقلقي اطلاااااااقا ربنا يستر
وشغلت
الmp4
في الكتكوتة ومعظم الاغاني اللي حطاها اغاني رومانسية حزينة لكن شيماء معجبهاش الاغاني دي
وكانت بتبحث عن اغنية روشة في الميموري لغاية لما اخيرا عثرت عليها لون شعرك ل كريم ابو زيد
وبعدين فكرنا نتغدى في كنتاكي وعلى فكرة الاكل بتاعه بشششششششششع نصيحة محدش ياكل فيه
كنتاكي مصر غير كنتاكي عمان خااااااالص
المهم متغديناش في كنتاكي طلعنا على النيل نتفرج على الهدوم ويا سلام لما تجيب هدوم مع اصحابك يااه
شعور جميييييل دايما لما بجيب هدوم مع مامتي
اللي بيعجبني مبيعجبش مامتي والعكس صحيح لكن الفيست اللي عجبني عجب شيماء برضه
المهم بعد ما شوفنا الهدوم واشترينا وشيماء طيرت فلوسها كلها
عزمت شيماء على الغدى وقولتلها المرة الجايه عليكي عاااااااااااااا
وروحنا لمطعمنا المفضل اسمه سلطانه ودردشنا مع صاحب المطعم وللأسف بنوته مكنتش موجودة وقولنالو احنا بنحب الاكل في المطعم عندك وخصوصا الكريب لكن الفاست فود دايما بيتخن واحنا للأسف بنعمل ريجيم فقالنا على فكرة بنتي اتخن منكو بكتيييييييير متأزموش نفسكو ورفع من روحنا المعدنية :) بس بجد هو انسان محترم جدا وبنته زي العسل وبعدين
طلعنا علشان نتغدى على اللسان والجو كان تحفففففففه موج البحر كان بيخبط في الصخور وبيطلع علينا
والجو كان هوا
واللسان وهو فاضي كده بيحسسني براحة نفساوية والهوا هناك نقي جدااااااا
المهم معرفناش نتغدى على اللسان عشان في قطط كتير اتلمت حوالينا وشيماء بتترعب من القطط
واضطرينا نتغدى في الكتكوتة ومعرفتش اصور اللسان من رذاذ الموج والهوا بس اللسان في الحقيقة راااااااائع وبرتاح جدا لما اروح هناك
واتكلمنا ودردشنا انا وشيماء وحقيقي بتعلم منها بس بخاف من ذكائها الزيادة عن اللزوم فهمت كتير في شخصيتي
بس لغاية دلوقتي انا مش فاهماها
ونصحتني نصائح كتير حلوة قالتلي اوعي تردي الإساءة بإساءة او
انتقام قولي بس حسبي الله ونعم الوكيل يا رب خدلي حقي من اللي ظلمني
وفعلا انا مقتنعة بكلامها لأن ربنا سبحانه وتعالى يمهل ولا يهمل

بس اللي شيماء مقدرتش تفهمني فيه اني اوكي ممكن اتعلم منها لكن بتخنق من كتر النصائح وخصوصا لما قالتلي اني اخلي ماما تبعد عن حياتي لأن في نظرها ماما بتتحكم في حياتي بس للأسف هي مش فاهمه ان ماما معاملتها ليا مش ام بتعامل بنتها بس لكن امي هي مامتي واختي وانتيمتي فطبيعي ان انتيمتي تبقى معايا دايما ويبقى معاها معظم اسراري وده مش ممكن يقلل مني بالعكس بنوتات كتير يتمنوا مامتهم تبقى صاحبتهم لكن للأسف مش بيلاقو ده

المهم جايين نطلع من راس البر ضللنا الطريق وكنا بنطلع من طريق نلاقي نفسنا في طريق تاني حاجه غريييييبه
وقعدنا نضحك ونقول ع الحلزونة ياما الحلزونة وديني ياما يا حلزونة
ايوة كنا بنضحك بس برضه كنا مرعوبين لغاية لما الحمد لله وصلنا للطريق الصح
ورجعنا تاني لدمياط وعندي امتحان فرنساوي برضه كمان كام ساعه اييييييه دنيا
بس كان يوم لذيذ بصراحه :)

بالله عليك اعد لي قلبي + تحديث

أتى لها يحمل الورود

قدم لها كل الوعود

كم كان يظهر انه ودود

أحبته لا بل عشقته من قبل الوجود

وتمنت لو احبها نصف حبها الموجود

قال لها احبك بعدد من في الوجود

غمرتها السعادة وطار قلبها المولود

فقلبها لم يعشق سواه

ولم تتمنى الا بقربه الخلود

ولكن أتى اليوم وقال لها وداعا

سأمضي مع أخرى في طريقي المنشود

قالت وهي تتصنع الصمود

امضي ولكن بالله عليك هلا تعيد لي قلبي المفقود !!

بقلمي

*************************

تحديث : الباشمهندس علي درويش كتب خاطرة راااااائعة في التعليقات ردا على البوست ده والخاطرة دي مكانها الصفحة الرئيسية للبلوج مش صفحة التعليقات

مهندس / على درويش يقول...
أمضي فسأظهر لك كل الصمود

.أمضي فقد كان حبك مكذوب.

أمضي أو ابحث معي عن قلبي المفقود .

أو اتركه وارحل فلم تعد هناك عهود.

لم تعد هناك وعود .علمتني ان ...

الحب أكذوبه تتلاعب فيها القلوب .

والغدر مهارة تتعلمها بقلبك المكذوب .

فكم من بسمة رسمتها لتداري بها الخداع.

وكم من أقنعه لبستها.

وكم من فرحة مثلتها .

وكم حزن أثرته لي ولها .

صدقني لن ابكي ولكن سأبحث لك عن غيري .

ولكن تذكر انك لن تري ابدا حب مثل حبي .

ومضت الأيام ......

وهاانت تقووول أحسست بألام.

ولكن هل مني أم منك أم من الأيام

*****************************************

وكمان عجبني جدا تعليق hasona

hasona يقول...
السلام عليكم

مؤلمة

لكنها تتحدث عن نموذج من البشر

يستمتع عندما يأتي لكل زهرة في البستان

ويحاول ان يستأثر رحيقها

وعندما تبادله وتنشر أريجها

يهرب الي زهرة أخرة

وكأنه نحلة طنانة

تنتقل بين الزهور

وها هو يترك كل زهرة في حالة من الذبول والتردي

انا كنت عايزة اقول نفس ذات الكلام برضه :)

*************************************

وكمان تحديث :))))))))))

والله بتحرجني يا ابو علي الخاطرة بتاعتك راااااااااائعة بجد

انا كده حسيت اني مش بعرف اكتب عااااااااااااااااااااااا

ABOALI

وقع منى قلبى

وابحث عن العنوان

كان فى يوم عندى حبيبى

ولكنه اخطء المكان

فذهبت لابحث عنه فوجدته كرة

" يتلاعب به بين الحين والان

فاسرعت الى قلبى الملمه واحتضنه

ليعفو عما سلف وكان

فوجدته يبكى وتتساقط دمائه

حتى صارت كالبركان

فهرولت اليه كل انفاسى

لالالالالالالالالالالا

لن يكون تعب بعد الان

فانت لؤلؤتى وها هو مكانك مصان

لن اهبك يوما

"الا لمن حفظك

وكان يستحق لقلب انسان

اجمل ما فيها ان الحبيب رجع قلبه ليه وصانه للي يستحقه

بس المشكلة ان الحب ده مش بإيدينا المشكلة انه بيجي فأجه زي الانفلونزا

فأجه الواحد بيلاقي نفسه بيحب ورغم انه ممكن كل الناس يقولوله على عيوب حبيبه

وهو يبقى مش شايف العيوب دي او بيلتمس اعذار او بيقول ممكن اغير العيوب دي

لكن فعلا لما الانسان يفوق ويفهم ان قلبه بيتلعب بيه الكورة يبقى لازم يبعد والا يبقى مجنوووووووون

تسلم ايدك بجد يا ابو علي

ايام وبعيشها

*امبارح دورت الكتكوتة لقيتها مش بتدور عاااااااااا اتاري البطارية نامت وشدت اللحاف والبطانية ااااااااااه يا كتكوتة وجعتي قلبي المفروض انها بتتصلح من امبارح وهروح اخدها النهاردة ان شاء الله بس وحشتني بطريقة وحشة
وعرفت قيميتها امبارح والنهاردة برغم انها تعبت نفسيا وشدت في شعرها وقالت ارحمووووووني من ليدي اللي خبطتني وبوظتني ربنا يصبرها عليا :)
وصدقت خالتو لما قالت انتي بتعاملي العربية دي معاملة وحشة اوي بحس انك بتديها بالالم وانا فعلا لما اكون زهقانة او في زحمة بضرب الدريكسيون
وماما بتقوللي طب ذنبه ايه عشانه تضربيه عملك ايه ؟؟؟؟ ربنا يستر لما البيج بوص يقرا الكلام ده

*في حد يفضل ربع ساعة او عشر دقايق مش عارف يعدي الشارع
الاجابة ايووووون انا , لما بكون ماشية سيرا على الأقدام لأني ببقى عارفة سرعة العربيات اللي ماشية وان اللي بيسوق العربية مش هيقدر يتحكم فيها ويوقفها لو عديت ولذالك بحاول استنى لغاية لما الشارع يفضى واعدي الشارع عااااااااا ولا اطفال الحضانة :)


*كنت بتكلم انا وصبحتي امبارح عالايميل وقولتلها تصدقي انا مترددة من المشاركة مع المدونين في اللقاءات واحدى الأسباب ان اكيد معظم قراء المدونة راسمينلي صورة اني طفلة بقى وبضفاير ...... الخ والحقيقة مش كده انا روحي روح طفلة
وده مكتوب في البروفايل بتاعي وفي
About me
وكمان اسم مدونتي طفلة مش عايزة تكبر بس الأكونت بتاعي
Lady e
يعني انا روحي روح طفلة بس في نفس ذات الوقت ليدي

*الخطوط داخله في بعضها عندي بين الانجلش والفرنساوي لو قررت أذاكر انجلش بتنط في عقلي الكلمات الفرنساوي ولو ذاكرت الفرنساوي بقول ايه النطق الأهبل ده وبنطق انجلش وبالطبع بتنط في دماغي الكلمات الانجلش واصلا الانجليز والفرنساويين كارهين بعض من بداية التاريخ حتى مدرسين الانجليزي والفرنساوي كارهين بعض حاجة غريبة !!
ده غير منهجنا المتخلف بتاع الترم ده نفسي في مررررررررة ترم يعدي من غير ما يجيبولنا قصة قتل والرواية المرة دي بتتكلم عن واحد قتل بنته ثم مراته قتلته وطبعا قتلت عشيقته ثم واخيرا ابنها قتلها يعني م الأخر هما عيلة اجرام احنا ماااااالناااااااااا

* فاكرين لما نزل معايا حوار في جريدة العالم اليوم تقريبا مفيش حد قرأه من المتابعين لمدونتي ولقيتني بفكر شوية في الموضوع وطبعا زعلت وقولت لو كانو مهتمين كانو قرأوا الحوار عااااا وقولت لأسماء صبحتي والصحفية اللي كتبت عن مدونتي تفتكري لو انا فعلا عملت كتابي ممكن حد ينفق وقته وفلوسه ويشتري الكتاب ويقرأه وكمان يحضر حفلة التوقيع

قالتلي اكيد اللي هيجيب الكتاب يا مجنون يا ميدمن

قولتلها لأ هيبقى مجنون لأن مفيش حاجة اسمها ميدمن :) وضحكنا بس الموضوع فعلا شاغلني لأنه موضوع مهم بالنوسبة لي

*لما ربنا بيفتحها عليا وبفكر افتح اي كتاب من كتب الكلية وطبعا مش بكمل
خمس دقايق على بعض في قرائته بفتكر اغنية الجميلة فيروز وهي بتقول
: انا كل ما بشوفك كإني بشوفك لأول مرة حبيبي
خير خير ربنا يعدي السنة دي على خير ان شاء الله
هتعدي

القرار

تنويه : البوست النهاردة لبناني ف اللي يلاقي كلمة غامضة يعديها او يسألني فيها :) اي خدعه هترجم العربي كمان

لا وقت لببقى حدك عم كون مرتاح
ولا وقت لببعد عنك بتهون جراح
ياهل القلب اللي حبك مكسور جناح
لا قادر طير وعلي ولاعمري بإيدك خلي

ياريت بيوعا قلبي يوم ناسي كل اللي كان
ويغرقني هالنوم ببحور من النسيان
حبك خلاني صير دنيي من الاحزان
دنيي من الاحزان

ياريت بيعرف قلبي يريد مرة ويملك قرار
عمر انسان جديد واترك خلفي الدمار
حبك هدمني كتير ومش قادر اختار
ومش قادر اختار

شو بكره حالي ابقى بالشوق مسجون
وشو بفكر تا ما اشقى مرات مانكون
ياهل كلمة ال ع ورقة ويمحيها جنون
كل مافكر رح قلك بلاقي حالي اشتقتلك

ياريت بيوعا قلبي يوم ناسي كل اللي كان
ويغرقني هالنوم ببحور من النسيان
حبك خلاني صير دنيي من الاحزان
دنيي من الاحزان

ياريت بيعرف قلبي يريد مرة ويملك قرار
عمر انسان جديد واترك خلفي الدمار
حبك هدمني كتير ومش قادر اختار
ومش قادر اختار

القرار أغنية لمروان خوري

عروسة ننوسة جميلة ومفروسة :)

بغض النظر عن امتحان الفرنساوي حبيبي حبيبي اللي بعد كام ساعة - الضاكتور بذات نفسه هيمتحننا- وبغض النظر عن كل افلام الرعب اللي حظي الكميل خلاني اشوفها النهاردة لا وايه عارفين اني عندي فوبيا الدم فجايبين افلام كلها دم مناسبة تماما للفرنساوي اللي مش عارفه احفظه ههههههههه الا اني الحمد لله مبسوطة

و بجد بجد مش عارفة اقولكو ايه كلمة شكر مش كفايه ربنا يكرمكو ويسعدكو دايما يارب رفعتو من حالتي النفسوية وروحي المعدنية بتعليقاتكم الجميلة حسيت انكم واقفين جنبي وبجد انتو احلى ناس وانا بحبكم في الله ونفسي اسلم على كل واحد فيكم واديله هدية كمان :) غالبا هتبقى وردة :)
وشكر خاص شوية لمامتي حبيبتي اللي فضلت ورايا لغاية لما طلعتني من جو الاستئكاب اللي كنت فيه واللي دايما شايفاني انسانة جميلة وبإختصار انا من غيرها ولا حاجه
وشكرا كمان لأنتيختي كيكي بحبك يا بت انتي ويا رب نفضل اخوات واصدقاء ومنبقاش اعدقاء ابدا :)
ولذلك قرقرت انا ليدي الاولى اني احكيلكو على موقف كنت هكتبه في الكتاب اللي بكتب فيه بس يلا بقى انتو طلعتو جدعين معايا وانا كمان هطلع جدعه معاكو وان شا الله محد حوش هسيبكو مع مواقف لعروسة ننوسة وان شاء الله تعجبكو

كان ياما كان في قديم الزمان من اسبوعين :) روحنا للكوافيرة وهناك كان في عروسة العروسة دي كانت عثولة جدا وبتعمل مواقف ضحكتني انا وصحباتها اللي كانو معاها يعني مثلا هي رفيعة وجايبه فستان الفرح واسع شوية عليها فبدأت تجيب قطن وتحط قطن جوه الفستان علشان تملا الفستان وتقول مش نافع كده كان لاااااازم اتخن شوية قبل الفرح لغاية لما بقت شوال قطن فصحباتها قالولها حرام عليكي بقيتي لحاف وبعدين وانتي بترقصي القطن ده كله هيقع _ منك لله يا هيفا عقدتي البنات المهبوشات لا الرفيعين عاجبهم حالهم ولا التخان مبسوطين خليتيها سيلكون خااااالص _
وبعدين العروسة كانت لابسة فستان شبابيكه وبلكوناته مفتوحة وبالرغم اننا كنا العصر والجو كان معقول الا انها كانت برداااااااانه وبتكتك من البرد قولتلها من دلوقتي وانتي بردانه اومال هتعملي ايه في البرد بتاع بالليل وفعلا يوميها الجو بالليل كان لا يطاق كان فريزر حسرة عليها يا حيرة عليها حد قالها متبقاش عروسة محجبة؟؟ تستاهل
شوية وبدأت الكوافيرة تجهز شعرها وشعرها ما شاء الله كان جميل بس المشكلة ان شكل شعرها كأنها اتكهربت شعرها كان واقف
وكانت موصرة تحط عليه كريم والكوافيرة قالتلها هتبوظي شعرررررررررك قالتلها خلاص خليني منكووووووشة عاجبك كده عاااااااا
شوية والعريس اتصل بيها
العروسة : الو عملت الزينة ع العربية ولا لسه - يا تامر مينفعش كده اومال هتحط الورد عالعربية امتى - يعني ايه كمان شوية اومال هتزف في ايه وشوية وبدأت تزعق للعريس وتقريبا هو كمان اتنرفز عليها واتخانقو مع بعض في حين ان انا كنت مستغربة لسببين
اولا : شكل الموضة في عرسان اليومين دول ان يبقى اسمهم تامر عشان خطيب بنت خالتي اسمه تامر :)
والسبب التاني ان النهاردة فرحهم وبيتخانقو اومال بعد الفرح بيومين هيعملوا ايه هيضربو بعض بالنبابيت ولا ايه
ومع ذلك اخذت بالمقولة متركزش علشان متهيسش
وسرحت ومركزتش مع العروسة لكن فأجه لقيتها بتقول بقولكو ايه خلو الساعتين يعدو على خير ونفس علامة الاندهاش اترسمت على وشي تاني مرة .
الفرح بالنوسبة للعروسة دي ساعتين وعايزاهم يفوتو لكن بالنوسبة لغيرها من البنوتات الفرح والفستان الأبيض وحبيب العمر حلم جميل
ولولولولولولي وربنا يكتر من افراحنا ويبعد عننا الأحزان ويبعد عننا الشر والأشرار ويقدرلنا الخير
عقبال الجميع اللي لسه متجوزوش وانا منهم اكيد يعني :) اما المتجوزين فربنا يسعدهم ويهنيهم ويهدي سرهم
بصو بقى اللي مش متجوزين عايزاهم يحكولي متخيلين فرحهم ازاي ؟؟

والمتجوزين عايزاهم يحكولي عن فرحهم كان شكله ايه ؟؟

واللي مش هيجاوب هياخد زيرو في الشفوي انا بقول اهو :) وقد فعزر من بعجر

مازلت في عنق الزجاجة

واضح اني مش هطلع من عنق الزجاجة ابدا لغاية لما روحي تتحرر من الدنيا ومشاكلها

كنت فاكرة اني لما اخلص ثانوية عامية يبقى كده عديت من عنق الزجاجة لكن رحت الكلية ولقيت برضه في تحديات بتواجهني وبتحسسني بالإنكسار والانهزام وبعد الكلية شغلي برضه هيبقى فيه عنق الزجاجة حتى لو اتجوزت هيبقى كل يوم في تحدي جديد وهفضل في عنق الزجاجة

ببساطة انا تعبت والله تعبت ومش قادرة اكمل مع اني المفروض مقولش الكلام ده والمفروض ابقى متحمسة ومتفائلة بس مش عارفة مالي ولغاية امتى هفضل بالطريقة دي الله اعلم ...

* ناس كتير بيقولو عليا طفلة وانا مش بنكر ده انا فعلا طفلة ومعترفة اني شابة عايشة بروح طفله بس مش معنى كده اني اتعرض للسخرية ويستضعفوني يا ترى هفضل طفلة على طول؟؟ ويا ترى غلط اصلا اني ابقى طفلة مش عارفة

* حاسة اني مش راضية عني عايزة اغير حاجات كتير في كل حياتي ومش عارفة

حاسة ان انا مش انا مش عارفة اتكلم واعبر عن اللي جوايا ولو اتكلمت بحس اني بحدف طوب في كلامي

* اصعب شعور في الدنيا كلها شعور الفراق لما تفارق ناس بتحبهم وروحك فيهم وتحس انك بتكلمهم وبتضحك معاهم وتبص لصورتهم وتنزل دمعة من عيونك يا ترى بيحبوني زي حبي ليهم يا ترى انا في بالهم ولا الحياة اخدتهم مني تبقى هتتجن وتطمن عليهم بس للأسف متقدرش تقرب منهم لانهم بعيد اوي عنك وربنا بس اللي قادر انه يحفظهم

الحكاية وما فيها + تحديث

مدونة جديدة ايه رأيكو تبصو عليها ؟؟ ان شاء الله تعجبكو
http://lovelycutelife.blogspot.com/ اجعل حياتك رائعة

----------------------------------------------------------------------

ملحوظة : مش هظلمكوا زي ما ظلمتوني وهطلع أحسن منكو ومش هجرح فيكو زي ما جرحتو فيا والكلام ده موجه لأتنين كنت معتقدة انهم غاليين عندي وللأسف مكنتش اتصور انهم يبقو كده ع العموم منهم لله وكويس اني اكتشفت حقيقتهم نفسي اقول كلام اكتر من كده بس هما ميستحقوش كلام اكتر من كده

-------------------------------------------
زمان وانا في تانيه اعدادي قرأت قصة عن اتنين كانوا بيتراسلوا بالرسائل المكتوبة عبر البريد المهم بدأوا يفهموا بعض اكتر وبعدين اعجبوا ببعض وبعدين شوية بشوية حبو بعض المهم قرروا انهم يتقابلوا علما ان كل حد فيهم كان في مدينة مختلفة فالبطلة وكان اسمها ماري بعتت واحدة صاحبتها من ناحية الشكل مش مقبولة او نقدر نقول مش جميلة – مع اني بكره الكلمة دي بس مضطرة استخدمها- علشان تشوف رد فعل جون اللي حبته وبعدين كانت مراقبة اللقاء بين صاحبتها وبين جون من بعيد ,
وبعدين لقت ان رد فعل جون كان رخم اوي ضحك على شكل صاحبتها في الاول وبعدين اعتذر وكان مضايق وعايز يقوم وقرر انه يشيل من دماغه اللي هو فاكرها ماري علشان هي مش حلوة او باللغة الشبابية مش مزة وبعدين وهو ماشي لمح ماري من بعيد حس ان قلبه رفرف وراح لها ببساطة لأنها جميلة واتكلمو وبعدها بفترة صاحبة ماري قالت لجون ع اللي حصل وان ماري اللي بيكلمها هي نفس ذات ماري اللي كان بيبعت لها جوابات ف جون صارح ماري بحبه واتجوزو وعاشو ف تبات ونبات وخلفو صبيان وبنات
لكن القصة دي علقت في دماغي وبقيت لا شعوريا بطبقها على اللي حواليا لو كلمت حد ع الايميل ببقى عايزة اعرف يا ترى هيحترم روحي ولا هيبقى كل فكره في شكلي مش روحي ولما روحت كورس التنمية البشرية الفكرة دي رسخت فيا اكتر اننا كائنات روحانية ليها تجربة بشرية بمعنى اننا قبل ما نتولد كنا ايه؟؟ كنا روح وبعد ما نموت برضه هنكون روح والجسد مجرد وسيلة نقدر نعبر بيها عننا لكن روحنا الأهم
حد هيقرأ الكلام ده هيقول ياااااه دي وحشة اوي _ وحشة شكلا يعني _ علشان كده بتقول الكلام ده عادي انا معنديش مشكلة ان حد يقول عليا مش حلوة وانا ميهمنيش الرأي ده وكفاية ثقتي في نفسي وكفاية ان القريبين مني واللي يعرفوني بيحبوني حتى لو كنت دراكولا
كفاية اني أكون انسانة ليها لازمة في الحياة علشان ابقى جميلة ومش مضطرة ابدا اني اغير في شكلي علشان ارضي حد المهم اني ارضي نفسي
المشكلة فعلا ان مقاييس الجمال بقت بشوية ........ عملو عمليات تجميل وبقو في نظر معظم الشباب والرجالة قمرات لكن البنوتات الي فعلا قمرات بدينهم وبروحهم وب رقتهم مبقوش يعجبو, فعلا الرجالة ماتت في الحروب !! ومعظم اللي موجودين اشباه رجال للأسف وانا بقول للأسف
المهم نرجع تاني للقصة بتاعت ماري ولنفرض اني اتحطيت في نفس ذات موقف ماري مش هتكون نهاية قصتي زي نهاية قصتها مش هتجوز البطل اللي كل همه كان شكل البطلة واضايق انها مش جميلة لما بعتتله صبحتها ولما عرف انها جميلة صارحها بحبه واتجوزها عارفين ليه لأني مش ضامنه الايام ازاي أأمن لإنسان كل همه الشكل يعني لو شكلي اتغيير لأي سبب هيرميني يعني لو كبرت شوية وملامحي اتبدلت وبانت عليا علامات السنين مش هيكرمني لكن هينساني !! عمري ما أقدر استحمل الموقف ده يبقى لأ من الاول
وبقولها
بعلو صوتي اللي مش هيحترم روحي قبل شكلي ميلزمنيش في حياتي

كل سنة وانتي أغلى حب في حياتي

بصو بقى بداية اللي هيقرأ البوست ده قبل ما يقرأه يصلي عالنبي ويقرأ المعوذتين اللي هما سورتي الفلق والناس وسورة الاخلاص معاهم وياريت كمان أية الكرسي أيووووووة انا مش ناقصة أر تمام كده قرأتوا اوكيشن أقرأوا الموضوع ده واللي مش هينفذ الكلام ده هزعل منه جدااااااااااا انا مش بهزر بجد
--------------------------------------------------------------------
انا مكتبتش بوست اقول كلام حلو ليكي فيه في يوم عيد الأم علشان أنا اصلا بتخنق من عيد الأم ده

بيضايق ناس كتير اكتر ما بيفرحهم

وادخرت الكلام الحلو اللي عايزة أقوله لليوم ده

يوم بحتفل فيه بمامتي انا بس ولو ان كل كلام الدنيا شوية عليكي يا أغلى من نور عيوني يا مامتي

دي تورتة العيد ميلاد ولأني بعشق الورد وحضرتك زهقتي من ان معظم الهدايا بتاعتي ورد هههههههههههه فأنا أخترت تورتة فيها ورد برضه :) وورد أحمر علشان ابعبر عن الحب الحب اللي جوايا اللي مش هيوصفه أي كلام

ودي تاني هدية ما هي هدايا عالنت بقى هو انا دافعة حاجة يعني ههههههههههههههههه

من فترة يا مامتي قعدت مع نفسي قعدة أخوية وبدأت افكر لو مكونتيش مامتي كان ايه اللي حصل ؟؟

كان زماني بعاني من الطفولة المشردة والكلاكيع النفساوية وحياتي سودا سودا يعني

مش هقدر أقول اي موقف عملتيه معايا لأنك جوه حياتي كلها , حبك حب مش مشروط وحنانك مشفتوش عند حد من المهمهات ربنا يستر ومتخديش عين النهاردة :) انا بحاول امنع نفسي عن الكتابة بالطريقة دي بس المشاعير والأحاسيس مش قادرة تسكت

اما العقد او الكوليه ده بالفرنساوي يعني اصل انا بيني وبينه عمار هههههههه فحلم من احلامي اني اجيبلك احسن منه ان شاء الله لما اتخرج واشتغل وبرضه هيبقى قليل اوي عليكي يا رب حقق لي الأمنية دي

أقولك على سر يا مامتي ومتقلقيش محدش شايفنا ولا سامعنا خااااااااااااالص أنا كنت بضايق اوي لما حد يقول عليا أختك مش بنتك الكلام ده من كام سنة لكن دلوقتي بقيت بفرح لأنك فعلا أختي وحبيبتي وانتيمتي ومامتي بس انا دايما ببوظ الأمور وبضحك وبنسى وبقولك يا ماما قدامهم وساعتها كل الناس بتندهش ماما ؟؟ ازاي يعني؟؟ احنا كنا فاكرينك اختها الكبيرة :)

ربنا يكرمك ويباركلي فيكي انتي وبابايا ويرزقكم بالرزق الحلال من حيث لا تحتسبوا في الدنيا ويكرمكو وانا معاكو ب جنة الفردوس في الأخرة ان شاء الله وربنا يجعل دنيتنا وأخرتنا جنة يارب

كل سنة وانتي طيبة وبخير وصحة وسعادة يا حبيبتي وربنا ميحرمنيش منك لأنك عارفة انا مليش في الدنيا غيرك انتي وبابايا ربنا يخليكو ليا ويباركلي فيكو

بنتكو : انا ( مش هقول اسمي انتو عارفينه نياهاهاهاها)