الاثنين، 29 ديسمبر 2008

حرقة دم زادت من اول امتحان


كل سنة وانتوا طيبين بمناسبة العام الهجري الجديد واقتراب العام الميلادي وربنا يتولانا برحمته في السنة الجديدة

في وسط الأحداث اللي تحرق الدم اللي عايشين فيها جاية الامتحانات تحرق دمنا اكتر

انا متأكده ان الامتحانات هتيجي صعبة اشمعنا هي يعني اللي مش هتنكد علينا

امتحاناتي هتبدأ من بكرة ان شاء الله وعندي مادة غلسة اسمها النقد criticism ومتأكده ان الامتحان هيجي صعب زي السنين اللي فاتت
ربنا يسهل ادعولي وان شاء الله البوست ده هيكون يومياتي في الامتحانات اللي ربنا يخلف ظني وتكون يوميات لطيفة
واليوميات هتبدأ من بكرة ان شاء الله
----------------------------------------------------------------
النهاردة 30/12/2008 زي ما توقعت حصل
اول امتحان جه طويل جدا وصعب جدا جدا وجه من أسخف جزء في المنهج
وملحقتش أحل كل الأسئلة
منك لله يا اللي حطيت الامتحان
وكمان رحت اللجنة متأخره علشان كان في مظاهرات والامن كان قافل الطريق وافتكرت كلام للفنان عادل امام في فيلم مورجان احمد مورجان : وهنا بقى نعمل شارع علشان الطلبة لما تحب تعمل مظاهرات ونجيب كام كاوتش محروق وكام واحد من الكلية يمثلوا دور الأمن
حسيت بكده والأمن قافل الطرق والدنيا زحمة ومش عارفة اوصل للكلية
اوكي احنا متعاطفين مع غزة وزعلانين من اللي بيحصل لكن يا ترى الحل في المظاهرات اللي بتوقف الطريق؟؟
كانت هتنفع بإيه المظاهرات لما تعطل واحد عن الامتحان او تعطل مريض انه يوصل للمستشفى او تعطل حد رايح ينقذ اي حاجة
المظاهرات النهاردة بالنسبة لي كانت عاملة زي الزار اللي بشوفه في الافلام العربي مجرد حاجة بتطلع غضب الناس لكن ملهاش لازمة من وجهة نظري
غير انها بتبوظ المرور وبتملا الدنيا لجان وعربيات مصفحة وحاجات غريبة
---------------------------------------------------------

هناك 14 تعليقًا:

مسدس صغير يقول...

متقلقيش ان شاء الله الدكاترة هيبقو عاملين حسابهم ويجيبو الامتحانات سهله عشان الاحداث اللى حوالينا . بالتوفيق ان شاء الله وكل امتحان وانتى طيبه نحن السابقون وانتم اللاحقون

Lady E يقول...

الدكاترة معقدين الحمد لله وكل سنة بيصعبوا الامتحانات اكتر

والاحداث اللي حوالينا تخليهم ينتقموا مننا اكتر لأنهم على رأي المثل مش عارفين يتشطروا على ...... بيتشطروا على الطلبة عااااااا

شكرا للدعم المعنوي يا مسدس ربنا ميصعب لك امتحان لما تاخد الماجيستير والدكتوراه ان شاء الله

romansy يقول...

ربنا يوفقك واعملى اللى عليكى بس
واللى بيخاف منه مش بيجى احسن منه


ربنا معاكى

وبعدين انا عارف ان دمنا محروق بس لازم تعملى اللى عليكى

e_emy يقول...

ربنا معاكى ويوفقك يارب

وسنة سعيدة ان شاء الله

ويارب يفرجها ع المسلمين ياااااااااااارب

Kiara يقول...

ربنا يسترها معاكي وذاكري كويس وان شاء الله اللي جاي هيكون احسن

Lady E يقول...

romansy: ما هو اللي مضايقني اني عملت اللي عليا

شكرا لتعليقك الجميل يا رومانسي

Lady E يقول...

e_emy : أمين يارب العالمين

تسلمي يا ايمي

Lady E يقول...

كيــــــــــــارا : يا رب يا كيارا

غير معرف يقول...

ربنا معاكي يا جميل
ويوفقك يااااااااااارب
ركزي انتي بس واكيد هتلاقي ثمرة تعبك

بالنسبه لموضوع المظاهرات انا شايفه انها فعلا مش مفيده
بس عارفه
بتخرج الكبت من جوانا :))

كوووووووووووول سنه وانتي طيبه ويارب تكون 2009 سنه حلوه عليكي

دمتي بكل خير وود

تحياتي

blue-wave يقول...

لازم نحاول نوصل للخرفان اللى فوق دول اننا معترضين على اللى بيحصل
دى ااقل حاجه نعملها علشان الناس اللى بتتدبح دى

OPTIMESTIC يقول...

أيتها الطفلة اللي مش عايزة تكبر
اتمنى اكون ضيفة خفيفة ...
معلش ... الامتحانات على طول بتعمل كدة ... بس ممكن يكون تقييمك مش دقيق والنتايج تبقى جميلة ..
ان شاء الله ...
اما بالنسبة للجزء التاني بتاع المظاهر ... انتي قلتي ان مالهاش لازمة
ممكن اتفق معاكي لو تقصدي مظاهرات بلدنا ... لسبب بسيط جدا ... اننا معندناش رأي عام قوي
كل عشرة اتناشر واحد يلموا بعض ويقولوا نعمل مظاهرة .. ويتلم عليهم عشرة اتناشر واحد كمان ويوقفوا المرور ..
انما لو حلمنا ان بلدنا فيها رأي عام قوي ... يجبر اعلى سلطة انها تحترمه ... اكيد هيبقى ليه لازمة ... حتى لو كان غلط ... هتلاقي اللي بيكلمه ويناقشه ويقولله احنا مختلفين في كذا ...
بس برضه مش مبرر ابدا انهم يعملوا فوضة ويسدوا الطريق ... فكرة مرجان هتكون اوقع في الحالة دي ...
:)
تسلم ايدك ... مستنية باقي اليوميات ...

Lady E يقول...

hager za3bal : وربن يوفقك يا هاجر

وكل سنة واني طيبة وفي كل خير وسعادة

وان شاء الله تحققي احلامك في السنة الجديدة

بجد نورتيني

Lady E يقول...

blue-wave : وصلت الرسالة يا دكتر بس التعبير عن الاعتراض مش بالفوضى دي

انا اتأخرت عن الامتحان بتاعي ومكنتش عارفة اوصل الكلية بسبب المظاهرات والأمن اللي كان قافل الطرق
يعني ايه النفع اللي بتعود بيه المظاهرات
ولا حاجة المظاهرات بتستمر يومين وبعد كده كل شيء بيتنسى وبيناااااام
والناس اللي بتتظاهر دي لما جت عربية الاسعاف علشان التبرع بالدم لجرحى غزة مكنش في ولا متبرع حتى يعني الحكاية حكاية كلام وهتافات بس
وبالنسبة لي والله لو مكنش عندي امتحانات كنت رحت اتبرعت بالدم بالرغم من ان عندي فوبيا من الدم

نورت المدونة يا دكتر

Lady E يقول...

OPTIMESTIC : ايوووووون مين بينادي
نووووووو وكلا البتة ضيفة ايه بس انتي صاحبة مكان
وبالنسبة للامتحانات ربنا المستعان عليها
اما بالنسبة للمظاهرات فمفيش كلام ممكن اقوله بعد كلامك الجميل
انا متفقة معاكي تماما

بجد سعيدة بزيارتك الجميلة ويارب تتكرر كتيــــــر