الثلاثاء، 11 أكتوبر 2011

تالت يوم حداد على مصر

أنا مصرية زملكاوية وأعلن احتجاجي واعتراضي عن عدم تأجيل ماتش الزمالك النهاردة ودي جليطة وقلة ذوق وعدم احترام لمشاعر المصريين والنهاردة تالت يوم حداد على الضحايا اللي ماتوا في أحداث أول امبارح

نفس الأسلوب القذر اللي كان بيتبع قبل كده أيام غرق العبارة ومشاكل الحضري وماتشات الأهلي ومفيش احترام لمشاعر أي حد وأنا كزملكاوية مش هتفرج على الماتش وميهمنيش لو الزمالك فاز في وسط المصايب اللي مالية مصر وقمة الغباء ان بعض الأهلاوية النهاردة بيقولوا رايحين نتفرج ع الماتش علشان نشمت في الزمالك !!!!

من ناحية في عنصرية ففي عنصرية في مصر بين أطراف كتير مش بس الديانات المختلفة وطول عمر المسؤلين مخوفننا من بعض كمسلمين ومسيحيين بس الأحداث الأخيرة ملهاش علاقة بالمسلمين ولا بالإسلام لا من بعيد ولا من قريب ومش هفضل أقول ديني دين السلام ورحمة للعالمين مش بس للمسلمين وحدهم تعبت من كتر ما التهم بتترمى عالإسلام

مستحيل المسيحيين المصريين يضربوا الجيش ولو -افتراض 1%-حصل ف هما اتهد ليهم كنيسة في بلدهم حد فاهم ده يعني ايه؟ يعني دار عبادة اتهدم بدون وجه حق مخالف مش مخالف مش موضوعنا وكان في 100 حل غير هدم المبنى اللي اخواتنا بيصلوا لربنا فيه

اللي حصل بإجماع كل أصدقائي وصديقاتي تدبير الفلول وشوية الحرامية اللي في السجن ولسه معاهم فلوس ونفوذ وعايزين مصر تشيط ويلهونا دلوقتي عن محاكمتهم وعن بناء مصر بس بإذن الله ربنا مش هينولهم اللي في بالهم


أنا حزينة وموجوعة زيي زي باقي المصريين البقاء لله وربنا يعدي الأيام دي على خير

هناك 4 تعليقات:

أع ـقل مـ ج ـنـونــة يقول...

هي دي الكارثة !!
انهم بيتبعو نفس الاسلوب
والغريبة
اننا شعب مبنحرمش
الناس بتتفرج
وتهلل
وتشمت ف الخسران
وتحتفل مع الفائز
ومفيش فايدة
!!!!!!!!!!!!!

nour alqamar يقول...

والله الموضوع بيزعل ..
انتم شعب واحد كلكم واحد
وربي يحميكم يارب
نور

rona ali يقول...

حبيبتى هي مترتبه كدة الاحداث تحصل اليوم الفلانى
اللي بعده ثورة داخليه وغضب جوانا
هوبا يجى التلات يلهي اغلب الحمير قصدى البنى ادمين عن حال البلد

والله مصر البارح كانت قهاويها منورة اول مرة اشوف امان في البلد دى البارح وانا ماشيه ساعه الماتش اصل مافيش حد كان هيسيب الماتش ويعملى انا حاجه
هههههههههههههههههههههه

لكى الله يامصر

The illusionist يقول...

اعلام واطى كالعاده

جماهير ولا عندها ريحه المسئوليه

اتحاد كوره سافل

نفترض جدلا ان حصل ضرب نار او احتكاك مدبر بين مسلمين ومسيحيين فى المدرجات

كان حصل ايه

الناس دى معندهاش دم ولا دين ولا وعى

دول يهمهم الماتش يتلعب والكاس يتاخد والله اكبر لله الحمد

ده استهبال وعدم مسئوليه واضح جدا

المشكله ان صعب الواحد يمسك نفسه بعد اللى حصل

انا بس اللى فارسنى

ازاى محافظ اسوان ميتحاسبش رسمى على اقواله وتصريحاته دى

ازاى مفيش حد من اسوان من ناحيه كنيسه الماريناب سمعنا تصريحه ويقولوا مين الفاعل

ليه بيتقال بس انها اتهدت واتحرقت والمحافظ بيتكلم كانه شئ عادى

فى حين ان مفيش جانى واحد اتمسك فى الحادثه دى

هو مين اللى هدها يعنى

واحد جاب فاس وراح هدها ورجع فى نص الليل والناس نايمين

دى مهازل ومساخر ومحدش بيتحاسب

انا مش عارف اقول ايه

بس الفلول دول خلاص مفيش دين ولا خشيه من الله

دول مستعدين يعملوا كل شئ يضؤ بمصلحه البلد ولو يقدروا يجيبوا احتلال امريكى اسرائيلى انجليزى فرنسى علينا مش هيتوانوا

الواحد بيحس بالعجز وهو عمال يحلل زى الاهبل وخلاص ومفيش استجابه

بس اعمل ايه

اهو اللى فى ايدى

سلام عليكم ده الواحد انفقع