الاثنين، 4 أكتوبر 2010

مش كل بني أدم انسان 2



ملحوظة : محدش يسمع الأغنية اللي في الفيديو الا لو كان متأكد انه مش هيكتئب أي حد هيجيله احباط أنا مش مسؤلة

بداية الأسبوع يوم السبت اللي فات زرت مدرسة خاصة كلها مصريين في الأول دخلت على الإدارة لقيت البنوتات اللي في الإدارة – عمانيات -لابسين اللبس التقليدي في صلالة وهو العباية السودا ولبسهم متناسق وشيك ولايق عليهم وأول لما خرجت من باب الإدارة كأني رحت عالم تاني مليان كائنات خرافية قاموا من عالسرير لبسوا أي حاجة وراحوا المدرسة والمفروض انهم مدرسات

في مدرسات شعرهم باين ومنكوش وفي مدرسات لابسين عبايات سودا بقالها يجي عشر سنين عندهم هي والحجاب اللي فوقيه وكلهن لابسين لبس المفروض حتى ميلبسهوش في البيت لان صلاحيته انتهت من زمان

وكلهم لابسين عبايات سودا منتهية الصلاحية – تقريبا ده اللبس المعتمد في المدرسة المعفنة دي – على فكرة معفنة دي مش شتيمة لكن أقرب كلمة توصف اللي شوفته

المدرسين المصريين اللي بيدرسوا للجيل الجديد مش فارقه معاهم الصورة الحلوة ليهم عند الطلاب

مش هتكلم عن المدارس اللي دخلتها في مصر بتكلم عن مدرسة خاصة شوفتها هنا ! بس مدرسينها للأسف مصريين من قاع المجتمع المصري

الغريب بقى انهم بصولي انا على ان انا اللي غريبة مش هما ! ونظراتهم ليا خوفتني بصراحة كنت حاسة انهم عايزينني اختفي من قدامهم وكأنهم بيقولوا مين الرايقة اللي لابسة جينز وجاية المدرسة دي والله أعلم لولا لبسي والميك اب الخفيف ونضارة الشمس كانوا افتكروني طالبة في المدرسة مش متخرجة من كلية أد الدنيا :) أو كانوا مرعوبين اني اكون مدرسة معاهم لأن لو الأطفال عملوا مقارنة هتبقى مش في صالحهم :) طبعا خرجت من بيت الرعب ده بسرعة

أما المدير بقى فكان لابس تيشيرت وبنطلون بقالهم 10 سنين برضه وجرافات مش عارفه جابها منين لونها زتوني مترب وأول لما اتكلم قدامي كان نفسي أقوله – سبحان اللي خلى أشكالك مديرين مدرسة –وعلشان كلامي ميتفهمش غلط انا مش بترييق عليهم انا بس بسأل هما ليه كده !

بيتهيألي مفيش مبرر انهم يبقوا بالشكل المقزز ده وذنب النشأ الجديد ايه لما يتخضوا كل يوم كده لما عينيهم تشوف موتى على هيئة بشر ده حتى هنا التوكيلات العالمية للملابس مش غالية أوي بغباء زي مصر يعني ماكس وسبلاش وغيرهم في حاجات مناسبة فيهم طيب ايه حجتهم بقى انهم يبقى شكلهم غريب كده ليه البخل ده !

في فئة من المصريين مبيحبوش يصرفوا فلوسهم خاااااااالص وده بيظهر على شكلهم للأسف وغير كده كمان بيقولوا على الناس اللي بتحب تعيش حياتها وتستمع بالفلوس الحلال اللي عملتها من شغلها انهم سفهاء وبيحقدوا عليهم وبيحسدوهم

لو حد هيفكر ان المرأه العاملة لازم تكون مبهدلة يبقى احسن لها تقعد في البيت ولو حد هيفكر ان المحجبة لازم تبقى مبهدلة يبقى مش فاهم حاجة

مش فاهمة الناس بتبقى بخيلة ليه عايزين يحوشوا ويعملوا مشروع أو يبنوا بيت او يعملوا أي حاجة برضه لازم يستمتعوا بحياتهم مش يحوشوا كل فلوسهم ويمشوا في الدنيا شكلهم غريب وصحتهم بايظة ده حتى اللبس الشيك بينعكس على النفسية وبيدي راحة وثقة في النفس والأناقة والشياكة غريزة في الإنسان بدليل اوقات كتير بتلاقي الأطفال بنات وأولاد واقفين أدام المراية وبيقلدوا الكبار وبيتسرحوا وبيحطوا بيرفيوم وبيلعبوا بالميك اب :)

نفسي أفهم بس الناس دي ضامنين عمرهم ساعة واحدة بس علشان يبقوا بخلاء بالشكل ده هيستمتعوا بحياتهم امتى ؟

هناك 11 تعليقًا:

بنجاواتى يقول...

صباح الفل

هو أكيد محدش ضامن عمره يا ليدزى بس يمكن المدرسات دول زى ما بتوصفى انهم من قاع المجتمع ومعندهومش الثقافة اللى بتتكلمى عنها دى انهم يحافظوا على مظهرهم

كمان احساسهم بالغربة وانهم فى مهمة رسمية بيخليهم يأجلوا حاجات كتير من احلامهم والمصيبة انهم بيعتبروا ان مظهرهم من ضمن احلامهم :D

هو اكيد الجيل الجديد مش بيحبوا مدرسينهم ولا بيقدروهم كما ينبغى لاسباب كتيرة منها ان المدرس مش مهتم بمظهره

كفاية كلام بقى وتحياتى

FAW يقول...

أنا مع بنجاواتي . .
((أو كانوا مرعوبين اني اكون مدرسة معاهم لأن لو الأطفال عملوا مقارنة هتبقى مش في صالحهم :)))
عارف الإحساس الغريب ده . . D:

Tears يقول...

للاسف كل اللى بتقوليه صح و لمسته بنفسى كمان

دى ثقافة شعب

~ISLAM~ يقول...

هههههههههههههههه
انتى بتتكلمى كلام زى الفل اوى والله
على فكره انا كنت بكلم واحد صاحبى فى حاجات شبه كده من اسبوع
عموما انا شايف ان السبب فى كل ده
انعدام الثقافه
الناس متعرفش حاجه عن الدنيا وكأن ليهم هما دنيا لوحديهم
مش عارف الحل ايه بصراحه
تحياتى ليكى

طوبه فضه وطوبه دهب يقول...

هههههههه الناس دى بتحوش لمجرد انها بتحب الفلوس مش اكتر وشكلهم دا طبع وتعود لو معاهم كنوز الدنيا مش هيتغيروا ريحى نفسك تسلم ايدك يا حبيبتى

Tamer Moghazy يقول...

للاسف كلامك صح جدا..
والمصيبة الاكبر مش بس في المظهر الخارجي.
ده كمان في النفوس الداخلية..
مش عارف ليه كل ما تيجي سيرة المصريين بالخارج احس انهم بيتحولوا من سيء...لأسوأ..!!

المظهر ده نوع من الثقافة اللي بتلازم الفرد في كل مكان حتى لو مفيش حد يعرفه فيه..!!

العنوان موفق لحد كبير جدااا..
لان فعلا..مش كل بني آدم....انسان.

MaNoO يقول...

صباحو انا معدى بالصدفه قلت اقول كلام
موضوع بيضايقنى جدا خاصه فى اى بنت او ست لانها فى الدنيا ملهاش الا حاجتين طبيعتها وانوثتها مش بقول تتمرقع وتمشى تتمخطر بس تبقى قدوه ومنسقه خاصه لو كانت مدرسه دى بتربى اجيال وعلى راى مش عارف مين يخربيت الفلوس اللى متمتعش صاحبها

nody يقول...

للاسف فى كتير من الامثال دى بتبوظ شكل وسمعه المصرين
فى الخارج

بس هو اصلا مال الكنزى للنهزى

همسات وبحــ الحياه ــر يقول...

يبقى مش هسمع لانى مس عايزة اكتئب خالص كفاية اللى عند الواحد ههههههه
ايه اللى دخلك البيت المهجور دا :)
رايحة تشتغلى ولا يه هههه
للاسف كلامك كله صح
هما بس بيخافو الفلوس تروح ويفتقروا
فكرنى بواحد عندنا قعد يحوش يحوش يحوش
وفى الاخر مات منغير مايستمتع بحاجه

وبعدين فييييييينك ياجميل بقالك فترة مقاطعانا كدا والقصه والمدونة زعلانين منك خالث مالث

جارة القمر يقول...

طيب

انا مش عارفة اعلق اقول ايه

بس المظهر الخارجي للشخص لازم يكون مريح عشان نعرف نتعامل معاه

وبس كدة خلاص


يسلموووووووو

z!zOoOo يقول...

السلام عليكم

علي فكره ضحكت من البوست ده

تقريبا هم بيقولوا إيه الي يخليني اصرف ماهو انا بشتغل عشان احوش

ولو بدأت اهتم بنفسي هصرف كتير ومش هبطل صرف

بس كل المشكله إني دايما بشوف ناس مثلا بتملك ارض او اي حاجه تقول خليها عشره خمستاشر سنه عشان قيمتها تغلي وبعد كده ابيعها

فبرد واقول طيب ما اتمتع بيهم احسن إيه النفع الي هيعود عليا لما اخليهم
ماهو انا ممكن اموت ومالحقش اتمتع بيهم

ثم فعلا يعني الواحد بيتعب وبيشتغل عشان يحسن عيشته ومظهره وحياته كلها

والاهم من ده كله النظافه من الايمان
ومظهرك ونضافتك ديه وجهه ليك

إزاي يبقي قدامي مدرس هدومه متبهدله ومش مكويه وقديمه المفروض إنه قدوه للطلبه وواجهه للمدرسه

الانسان طبيعي مش بمظهره او بهدومه لكن طبيعي إن مظهره مهم علي الاقل لنفسه

المشكله إن لو كان المدير شيك او منسق كان اكيد هيكلم المدرسين

لكن لما هو زيهم يبقي إيه الي هيفرق
:(

إهربي بقي من المدرسه ديه
عشان انا عارف النظره ديه بالظبط
نفس النظريه الي بتشوفيها في عنين الناس لما تكوني داخله منطقه شعبيه قوي قوي بتحسي إنك تحفه او إنك سايحه داخله عندهم وطبعا بتبقي إنتي الي غريبه

D:

ربنا يوفقك

تحياتي