الثلاثاء، 14 سبتمبر 2010

عن غذاء الروح أتحدث



بعدما كنت نسيت موضوع التاجات اللي مش بحبها جالي تاج عجبني عن الكتب وأسئلة التاج شغلت ذاكرتي ولأني موجوعة أوي ومعدتي بتوجعني من مواضيع كتير منها وضع الكتاب والكُتاب –بضم الكاف- و احوال دور النشر اللي بتاخد 90% وبتدي الكاتب 10% من كتابه يعني الرقاصين بياخدوا اكتر من الأدباء والعلماء – عصر موازينه مقلوبة- ولأن في ناس معينة نفسهم نفضل جهلة وجهال ومغيبين طول عمرنا ولأن ابراهيم المعلم صاحب دار الشروق للنشر قال في حواره في البيت بيتك : ان في واحد بيقول شراء الكُتاب أرخص من شراء الكتب ودي حاجة مخلية الدنيا سودا في عيني علشان واحد حمار معاه شوية فلوس يبقى فاكر انه ممكن يشتري عقول وقلوب ناس مبدعة بقى البني أدمين أرخص من كتبهم !!!!!

أكيد مترددتش اني أجاوب على أسئلة التاج ودي حاجة بسيطة مننا كمدونين تجاه الثقافة والمثقفين المهضوم حقها وحقهم :(

ما هي كتب الطفولة التي بقيت عالقة في ذهنك ؟

في طفولتي لغاية اعدادي كنت مهووسة بمجلة ماجد كنت أغلب أيام الأربعاء لازم أجيبها وكمان ميكي وفلاش وسمير وكنت بقرأ قصص قصيرة متفرقة فاكرة منها قصة المرأه التي غلبت الشيطان مش فاكرة مين الكاتب بس القصة دي علقت معايا فترة وعرفت انها اتعملت فيلم وانا في رابعة ابتدائي قرأت أرض النفاق ليوسف السباعي وفي خامسة ابتدائي قرأت جدر البطاطا هو السبب :) الحرام ليوسف ادريس لفت نظري اسم الكتاب وعرفت برضه ان الروايتين اللي قرأتهم اتحولوا لفيلمين

من أهم الكتاب الذين قرأت لهم؟

أي حد في الدنيا بيخصص وقت للكتابة وبيستمتع بالكتابة وهو بيكتب والشعور ده بيتنقلي من خلال الكلمات وبيخليني أحس بالكلمات وأشوفها وأنا بقرأها يبقى أهم كاتب سواء كان كاتب مشهور أو مش مشهور

صحفي أو مدون أو حتى طالب كاتب موضوع تعبير على ورقة كراسة

دي مش دبلوماسية لكن دراستي للأدب خلتني أحترم أي حد عنده ملكة الكتابة

من هم الكُتاب الذين قررت أن لا تقرأ لهم مجددا؟

هي غالبا كتب مش كُتاب أي كتاب ممل مش بكمله لكن ممكن اقرأ لنفس الكاتب كتاب تاني ويعجبني فمش بحكم على الكاتب من حاجة واحدة بس قرأتها ليه وكمان اللي ممكن يخليني مقرأش لكاتب تاني انه يكون مزيف بيدعو للمدينة الفاضلة وهو أخر واحد ممكن يتكلم عنها مفيش انسان كامل بس الكذب حاجة مقدرش احتملها دي الحالة الوحيدة اللي ممكن تخليني مقرأش لحد بيكتب بالطريقة دي تاني مجددا .

في صحراء قاحلة ، أي الكتب تحمل معك؟

ده على أساس اني في صحراء قاحلة هبقى في حالة تسمحلي بالقراءة وسط كل أهوال الصحراء

أكيد الكتاب اللي أحب يكون معايا في الوقت العصيب ده كلام ربنا سبحانه وتعالى القرأن الكريم

علشان لو نجيت أبقى عملت حسنات كتير ولو موتت يبقى ختامها مسك

ما هو الكاتب الذي لم تقرأ له أبدا ، وتتمنى قراءة كتبه ؟

أي كاتب مقرأتلوش أكيد أتمنى قراءة كتبه

ما هي قائمة كتبك المفضلة؟

هو أنا مش عارفة يعني ايه كتابي المفضل يعني كتاب حبيته أوي ولا كتاب ممكن اقرأه تاني

هعتبرها كتب حبيتها

حبيت أوي كتاب دكتورة هالة سرحان مذكرات طالبة بعثة أمريكا خبط لزق وطول ما أنا بقرأ مش مصدقة ان كاتبة الكتاب هي المذيعة اللي قالوا عليها بتسوأ سمعة مصر !!!! حاجة غريبة بجد

فتيات الليل الحقيقيين الشعب كله عارفهم والموضوع مش محتاج فبركة والحدق يفهم .

عجبني أوي كمان كتاب جر ناعم لعمر طاهر لأنه كتاب كوكتيل مش بيتكلم عن حاجة واحدة بس وأثر فيا أوي

كمان رواية ربع جرام لأني قضيت فيها وقت كبير وكانت معايا شهر كامل بقرأ فيها وواخداها معايا في كل حتة

الكتاب رائع جدا من وجهة نظري

كتاب وظيفة ما تمت لمايكل محسن لأني لسه متخرجة جديد وفهمني شوية الحياه ماشية ازاي بالنسبة لما بعد الدراسة والبحث عن وظيفة

كتاب الرجال والمال والشوكولاته لمينا فان براج كتاب أكثر من رائع من الكتب اللي أحب أحتفظ بيها في مكتبتي واقرأها كذا مرة

طبعا القائمة قابلة للزيادة

ما هي الكتب التي تقرأها الأن؟

مشكلتي حاليا أني بقرأ في كذا كتاب في وقت واحد مش مركزه في حاجة واحدة يعني من كل فيلم أغنية

وساعات كوكتيل الكتب ده بيزهقني ومقرأش ولا أي حاجة

اللي بعت الدعوة ؟

المدون محمد ناصر الدين الهلالي علشان ياخد درجات أعمال السنة :) يارب تاخد الدرجات النهائية أمين

أصل أنا عندي كلكيعة كبيرة من ناحية الدرجات والتقدير لأني ياما اتظلمت فيهم


شكرا ليك

أرسل الدعوة لمدون واحد على الأقل من أجل مشاركتنا في القراءة؟

ذكرياتي حبيبتي

خالتو ستيتة

فراشة


Silver eyes

Sony2000


ليساندرا

واحد وخلاص

Admin

Rack yourminds

RHS

FAW


هناك 15 تعليقًا:

Lady E يقول...

بلوجر لما بيهيس بيهييييييييييس

والبوست مش ظاهر في الريدر :) مسحته ونشرته تاني برضه مش ظاهر في الريدر

ماشي يا بلوجر هكشف راسي ساعة الفجرية وأدعي عليك

mrmr يقول...

لالا
غلطانه اكشفى راسك ساع العصريه
هههههه
تسلم ايديك يا غاليه
فعلا هذا هو غذاء الروح
تصبحى على خير

Lady E يقول...

mrmr : يسعد صباحك ومسائك يا مرمر

هههههه هو في فرق بين الفجر والعصر بيتهيألي الدعاء مستجاب في وقت الفجر أكتر

بهنيكي من معاميق قلبي الجوانيه انتي اول تعليق واحتمال كمان يبقى التعليق الوحيد في البوست ده :)

وانتي من أهل الخير

بجد شكرا على تعليقك

mrmr يقول...

ههههههه
طبع يا غاليه فى فرق
مش بتسمعى المثل اللى بيقول دعوه وليه ساعه عصريه
ههههههه
انا اهوووووو ومش اخر تعليق
هياهياهيا

rack-yourminds يقول...

انا بجد اكتر حاجه بتخليني اكره الكاتب ولا اقرا له مره اخري عندما اراه متذبذب ,بمعني النهارده براي بكره براي تاني بحس انه بيستغلنا او بيراهن علي ضعف ذاكرة القارئ
____

متشكر جدا علي التاج ,بس موعدكيش اني هجاوب عليه,, هسيبها للظروف

محمد ناصر الدين الهلالى يقول...

اولا بشكرك على إستجابتك للدعوة بعد أن ظننت أنك " هتنفضيلى" لما تأخرتى فى نشر التدوينة ، ثانيا قرائتنا فى الطفولة متشابهة لانى كنت عايش على ماجد بشخصياتها " كسلان جدا واخوه .. وشمسه ودانا .. والنقيب خلفان ومساعده فهمان .. وموزة الحبوبة وشقيقهارشود .. وفضولى " وكانت من أمتع ماقرأت الحقيقة هى وميكى وفلاش ، تقريبا في تشابه لكن أنا غير دول مكنتش بقرا وكنت مقضيها لعب كورة فى الحوارى !! وبالنسبة لكتبك المفضلة فمنهم عدد لابأس به لم أقرأه ويدخل عندى فى قايمة الوايتنج ليست ! والشكر لكى أن تفهمتى خطورة الوضع وأنى كنت هضيع فى أعمال السنة :) تحياتى لكى

سُـمـيّـة يقول...

جميل أوى البوست دا
جميلة الأسئلة والإجابات أجمل

فراشة يقول...

انا جييييييت
برضه كتب الطفوله تقريبا هي هياها
يااااه كنت بموت ف فلاش وميكي ولحد دلوقتي بشتريهم عادي يعني :)

هو تاج جميل بصراحة وهجاوبة من عونيا الاربعه :))

وحشتيني كتير كتيير

Lady E يقول...

mrmr: هههههههه هي على ما وصلتلي بقت الفجريه في فرق توقيت يا مرمر

تسلميلي وتسلملي تعليقاتك يا جميله

نورتيني

Lady E يقول...

rack yourminds : وارد ان الانسان يغير رأيه لو كان على خطأ وفهم الصح بس في ناس فعلا زي ما بتقول مش بتعمل كده لكن واخده ارائها تجارة ل اللي يدفع اكتر والمصيبة لو كانت الأراء دي في نواحي مهمة من الحياة

-----
لو كنت قرأت الرد ده على التاج من سنة أكيد كنت هزعل جدا لكن حاليا مش بفكر كده اذا وقت حضرتك سمح بحل التاج ياريت متحرمناش من المعلومات اللي هتقولها لأنك أكيد هتضيف لينا بإجاباتك

rack-yourminds يقول...

اسمحيلي اصصح كلمه كتبتها غلط

"بحس انه بيستغفلنا مش يستغلنا
_________

هحاول ان شاء الله اجاوب عليه بس برده مش وعد

Lady E يقول...

محمد ناصر الدين الهلالي : يا خبر أبيض أكيد مقدرش أنفض من غير ما أقول اني هنفض :) بمعنى اني لو مكنتش عايزة احل التاج كنت اعتذرت عن اجابته

فكرتني بشخصيات مجلة ماجد ورجعتني لأيام الطفولة وافتكرت من شخصيات فلاش مواطن مطحون وعلام
لما كبرت شوية لقيت شوية من شخصيات مجلة ماجد مبقتش موجودة وجت شخصيات تانيه فمبقتش بحبها
جميل انك كنت بتلعب كورة احنا أغلب جيلنا مهمل في الرياضة للأسف

سعيدة انك هتقرأ كتبي المفضلة لكن مقدرش اوعدك انها هتعجبك فمتدعيش عليا بعد ما تقرأها :)
الشكر ليك على التاج مع ان البوست حظه قليل والريدر غدر بيه
مبروك على اعمال السنة وعقبال الامتحانات

Lady E يقول...

فتاة من عالم أخر : أهلا بيكي يا قمرايا

وجودك هو الأجمل

لو عاجبك التاج هكون سعيدة لو جاوبتي عليه

نورتيني

Lady E يقول...

فراشة : نورتي المدونة والبيت وكل حاجة يا فراشتي

في حاجات كتير بيننا مشتركة مش بس الكتب أصحاب أصحاب يعني مش أي حاجة :)

تسلملي عنيكي

وأنتي اكتر بقى عندي امنية في حياتي اشوفك اون لاين انتي وكيكي

Lady E يقول...

rack-yourminds : هي تمشي الاتنين الكاتب اللي بيغير أرائه لأي سبب وبيخدع قرائه يبقى بيستغلهم وبيستغفلهم

ان شاء الله
لحضرتك مطلق الحرية تجاوب على التاج أو لأ

مفيش مشكلة