السبت، 4 سبتمبر، 2010

امسك حرامي


التلفزيون حرامي والنت كمان حرامي وحرامي ومليون حرامي في بعض ولأن لسه أقل من أسبوع على العيد ان شاء الله كل سنة واحنا جميعا بخير وبعد العيد مبيتفتلش كحك فهتكلم شوية عن المسلسلات اللي تابعتها طشاش

من قبل رمضان وأنا كنت متأكده اني هتابع عايزة أتجوز علشانه كتابة المدونة والكاتبة غادة عبد العال وكنت بتابعه في الأول لدرجة اني كنت مش بخرج من البيت الا لما أشوف الحلقة وفضل الوضع ده على ما هو عليه كام حلقة وبقول يمكن تمثيل هند الover يتغير لكن التمثيل هو هو وكمية الهطل هي هي وهند بتصرخ أكتر منها بتتكلم وبما اني قرئت الكتاب والمدونة فالمسلسل مش حلو زيهم
وبقيت بشوف المسلسل بظروفها ومبزعلش لو فاتت أي حلقة

اللي لاحظته ان في مسلسلات كتير بتتكلم عن الزواج وتأخر سن الزواج زي المسلسل اللي لمحت اسمه نعم أنا مازلت أنسه ومسلسل زهرة وأزواجها الخمسة ده غير كمان عايزة أتجوز مش شايفة ان موضوع تأخر سن الزواج أو الزواج محتاج مسلسلات كتير ورغي كتير

مسلسل شيخ العرب همام عجبني برغم اني كنت متوقعة انه ميعجبنيش مشوفتوش كله زيه زي باقي المسلسلات بس أكيد هشوفه في الإعادة

نيجي لحكايات وبنعيشها بطولة ليلى علوي من السنة اللي فاتت وأنا معجبة جدا بكلمات التتر لأيمن بهجت قمر ده غير كمان أن المسلسل بالنسبة لي فضل عالقمة من السنة اللي فاتت
الجزء الأول متابعتوش كله لكن الجزء التاني شدني جدا ومتابعاه وفي فرق انك تشوف مسلسل وتضييع وقتك وفي فرق انك تطلع من كل مشهد بقيمة ، عينك تشوف حاجة راقية زي تمثيل ليلى علوي المتميز جدا والأكثر من رائع كمان وباقي الممثلين كمان مثلوا كويس بس معظم أسمائهم رايحة من بالي


كليوباترا معجبتنيش خاااااااااااااااالص هما بدأوا اعلانات مسلسل كليوباترا قبل رمضان بكتير وفي الفترة دي كنت بدرس 3 مسرحيات في الادب المقارن عن كليوباترا وكان نفسي أوي يجي المسلسل وقتها لكن لما شوفت شوية حلقات من المسلسل لقيت كليوباترا مبتعملش حاجة غير انها بتتزين وبتتعطر طول النهار وبتحب أي حد تشوفه ومنفضة للحكم وهي المفروض حاكمة أكبر بلد في الوقت ده ده غير طبعا اللبس اللي مش فرعوني والميك أب اللي أخر موضة وشخصية كاري اللي مش موجودة أصلا في التاريخ

أما أهل كايرو فكان مفاجأة بالنسبة لي في الأول مكنتش مهتمة اني أشوفه خصوصا ان المسلسل اسمه أهل كايرو ف اضايقت انه مسموش أهل القاهرة ليه كايرو يعني ايه الفزلكة دي بعد كده فهمت أن أهم الاحداث في المسلسل تمت في فندق اسمه كايرو بلازا - على ما أعتقد-
فكده يبقى طبيعي ان المسلسل يبقى اسمه اهل كايرو وبعدين في مرة من المرات لمحت اسم بلال فضل في تتر المسلسل ولأن انا متحيزة شوية للكُتاب اللي بقرأ لهم فقولت أتابع المسلسل وفعلا شدني وكل الممثلين فيه مثلوا كويس جدا بس أوقات بحس بملل وتطويل زيادة عن اللزوم في الأحداث لكن المسلسل في المجمل جميل ومشوق وطبعا كلمات التتر لأيمن بهجت قمر مع ألحان وليد سعد مع غناء حسين الجسمي فالتتر طالع خرافي بجد جميل جدااااااا ويا سلام لما الجسمي بيقول لبط ابنها مين يسايرو :) نطقنا الجسمي المصرية الأصلية

وأخيرا برنامج مصري أصلي للكاتب الساخر والصحفي عمر طاهر بداية من أغنية التتر اللي كمان من كلمات عمر طاهر أغنية جميلة جدا ولما تسمعها ترجعلك شعور مفتقده شعور الفخر بإنك مصري وشعور الإنتماء ونهاية بالبرنامج اللي بيقدم معلومات جديدة عن حاجات كتير مصرية ، في حلقات عجبتني من البرنامج وفي برضه حلقات معجبتنيش بس البرنامج عموما مميز

ربع مشكل والكبير وأزمة سكر مش هقدر أكون عنهم رأي لأني بشوفهم تخاطيف أقل من طشاش كمان :)

هناك 17 تعليقًا:

فراشة يقول...

تقريبا كدا اني اول تعليق
التليفزيون عندي مش حرامي والنت هو بقى زعيم العصابة :))

عايزة اتجوز كل يوم كدا كنت بشوف ييجي 10 دقايق ولاني قريت شوية م الكتاب فمحبتش الاسلوب التمثيلي بس كنت بضحك :) يدوي شفت ييجي 5 او 6 حلقات

شيخ العرب همام ابويه بيحب تمثيل يحيي الفخراني شفنا حلقتين وبقينا ننسى معاده :)ملحقتش اعرف بيتكلم عن ايه

حكايات بنعيشها بتاع السنة اللي فاتت يدوب شايفاه من شهرين كدا اول مرة وحبيته جدا خصوصا مجنون ليلى
بتاع السنة دي معرفش بيتكلم عن ايه:D

اما اهل كايرو ولا كنت اعرف حتى بتاع مين غير من بنت بنت خالتي قالتلي انه حلو خالص وللعلم هي 12 سنة :)

والمسلسلات الباقية وعمر طاهر ولا شفتهم ولا فثوه حتى انا بابا وماما تابعوا العار والعتبه الحمرا وطبعا هم يتابعوا وانا معاهم :)))

رغيت كتير انا معلش فاضيه بقى يالا عيد سعيد وكحك جميل ولو اني مش هاكل كحك :(

Admin يقول...

شيخ العرب همام افضل قصه تاريخيه رايتها تتحدث عن تاريخ مصر الحديث والممثل العبقرى يحى الفخرانى عبقرى لدرجه لم اتخيلها

والباقى كله كرانيش

دموع القمر يقول...

والحق 3 تعليق :)
متفرجتش على اى حاجة خالص السنة دى
بس قعدت مع اخواتى واتفرجت على زهرة واللص والكتاب فضولى بقى خلانى اكمل ههههههههه
كل سنة وانت طيبة ياقمر

wa7ed w5las يقول...

السلام عليكم ..
اول زيارة ليا في المدونة الرائعة دي وان شاء الله مش الاخيرة ..
وعلي فكرة انا لسا جديد في التدوين واتمني اتعلم من الناس اللي زيكم ..
نيجي بقي للمسلسلات ..
كنت كتبت في اول رمضان البوست ده
http://wa7edw5las.blogspot.com/2010/08/blog-post_10.html

وكنت بتكلم علي كتر المسلسلات والفضائيات وخلافه وعلي الرغم اني مكنتش ناوي اتابع حاجة الا ان النفس لامارة بالسوء وغصب عني وبسبب قعدتي مع الاهل كنت بشوف اللي هما بيشوفوه.
اللي شفته ولسا بشوفه هو شيخ العرب همام وبصراحة مسلسل جميل مع الجميل الفخراني وأد ايه هو ذكي خاصة مع معاملته لزوجاته الاتنين ومش اي واحدة تقول حاجة يصدقها,لأ هو عارف كل واحدة عايزة ايه .. دنا كمان بحضر لبوست عن المسلسل ده بس .
تاني مسلسل شوفته هو أزمة سكر وده بسبب اني بحب احمد عيد جدا
والمسلسل في مجمله جميل مش وحش خاصة ان عيد فعلا بيخليني اضحك من قلبي مش مجامله ..
وشوفت شوية حاجات تاني بس كفاية كده علشان اكون خفيف (مش باين) في اول زيارة ليا ..
أسف علي الإطاله وتقبلي مروري ..

sony2000 يقول...

انا اتخذت قرار
مقاطعتهم واريح دماغي احسن
وبعدين كلو بيتعاد بعد رمضان
موش كدا احسن؟؟؟؟؟؟؟؟

P A S H A يقول...

تصدقي حضرتك إن ولا حاجة من دول شفتها !
لإني أصلاً مش باتفرج على تليفزيون D:

كل سنة وأنتِ طيبة

:)

قلم رصاص يقول...

الحمدلله اني معتزل المشاهده من زمان
هو الواحد ناقص رفع ضغط ؟!

الاهم : كل سنه وانتي طيبه

7akwena يقول...

ياه المسلسلات هجمت هجمه مهببه
عموما انا حبيت كليوباترا اوى
وحبيت اهل كايرو والعار واللص والكتاب وازمه سكر
طبعا هتقولى ده انت قاطع ادام التليفزيون
ده حقيقى لأنى شغال والتليفزيون ليل نهار ادامى يعنى حاجه عناب اوى
المهم كل سنه وانتى طيبه وعيد سعيد
وكحك كتير وقراقيش اكتر

شيرين سامي يقول...

أنا كمان كنت مستنيه عايزه أتجوز لحد ما فوجئت بانه مزودها شويه و سطحي شويتين بس أسوأ حاجه انه بيرخص البنات و بيبينهم واقعييييين وده طبعاً معجبنيش.

غير معرف يقول...

مش هينفع كده ع فكرة
انتى وحشااااااااااانى بغباء
ومفتقداااااااااااكى اوووووووى
معايا
واخر رقم ده هو ده رقمك الاخير
ولاايه بقى!!!
عارفه اكيد انا مييييييين

mrmr يقول...

كان نفسى اقول حاجه
لكن
انا لست من هواه مشاهده هذا اللعين السارق
كل سنه وانت طيبه

safa7_karmooz يقول...

ايه ده انتى بتتفرجى عالتلفزيون وكده؟؟؟ :D

الوحيد اللى تابعته كان ربع مشكل ومسخرةةةةةةةةةةةةةةةةةةةةةةةة بجد يعنى :D

همسات وبحــ الحياه ــر يقول...

كل سنة وانت طيبة ياقمر
الحلقه الجديدة نزلت

Lady E يقول...

فراشة: منورة اول تعليق يا فراشتي

هههههههه أيوة النت فعلا زعيم العصابة وهو جدير باللقب :)

في حلقات في عايزة اتجوز كانت تضحك وحلقات تبكي :(

حكايات بنعيشها السنة دي قصتين برضه زي السنة اللي فاتت والجزء التاني حلو زي الجزء الأول

ههههههههه كويس ان جيل المستقبل قالولك على اهل كايرو

كل سنة وانتي طيوبه ليييييه مش هتاكلي كحك ابعتلك شوية بالبلوتوث ولا ايه :)

Lady E يقول...

Admin : وجهة نظر برضه

في فعلا كرانيش وفي حاجات كويسة جدا زي اللي اتكلمت عنهم

Lady E يقول...

دموع القمر : عادي كله هيتعاد بعد رمضان طول السنة لغاية لما رمضان الجاي يجي

وانتي طيوبه يا قمرايا
عيد سعيد

Lady E يقول...

wa7ed w5las : وعليكم السلام ورحمة الله وبركاته

كلنا بنتعلم من بعض وبنضيف قيم لبعض يا wa7ed w5las

اكيد هشوف البوست ده

مفيش اطالة ولا حاجة

سعيدة برأيك الجميل عن المدونة