الأحد، 19 سبتمبر 2010

وتستمر المعاناة



المشهد الأول : بشوف في التلفزيون حفلة الويلكم بارتي بتاعت الجامعة الأمريكية اللي بتتعمل كل أول سنة للطلاب الجدد بيعرفوهم بالجامعة وبالطلاب اللي بيدرسوا في الكلية

المشهد في كليتنا : مجرد طلاب تايهين مش عارفين يروحو فين ولا يعملوا ايه و بعد شهر من الدراسة والحياة لسه ضبابية ومفيش جدول نزل بالمواد والكتب منزلتش

مشهد الساعات المعتمدة : الكليات اللي بتعتمد على نظام الدراسة بالساعات المعتمدة انت اللي بتختار المواد يعني ممكن تاخد مواد من سنة تانيه واولى مع بعض وتختار المواد اللي تدرسها والدكتر اللي بيشرحها ليك ولازم تعرف الدكتور ده مؤهلاته ايه وبيتعامل ازاي مع الطلاب - ده لو في جامعة أجنبية-

المشهد في كليتنا : في سنة اولى مستنيين طول النهار الدكتر انه يتكرم ويتعطف ويحن علينا علشان يشرح لنا المحاضرة ومن حقه يضيع لنا وقتنا عادي جدا وأهلنا موافقين ان وقتنا يضيع وبيقولوا ما كل الكليات كده - معلش اصبروا اصلكو تاني دفعة في الكلية-

المشهد التاني الدكتور بيقول للطلاب : مطلوب منكم تعملوا أبحاث وتطلعوا وتقرأوا وتتفاعلوا دي حياتكم وده مستقبلكم ولازم تبقو متميزين

المشهد في كليتنا : احفظو المكتوب ده زي اسمكم انا عايز بصمجيه مبتفهمش قدامي !

المشهد التالت : طبعا ممكن تستفسري عن أي حاجة ايه اللي مفهمتيهوش بالضبط؟

المشهد في كليتنا : مش مطلوب مننا اننا نشرحلكو حاجة ! كويس أوي ان احنا بندي الخطوط الأساسية في المحاضرات

المشهد الرابع : انتو هتاخدوا الشهادة وتشتغلوا وتبقوا أشخاص فعالين في المجتمع

المشهد في كليتنا : انتو هتاخدو الشهادة وتقعدوا في البيت أو حد لاقي شغل اليومين دول

المشهد الخامس : كلكم متميزين ومبدعين وجاوبتم كويس في الامتحان

المشهد في كليتنا : كلكو تستاهلوا السقوط ............... قابلوني لو فلحتو

طيب عايزين طالب اتعرض لكل السلبيات دي وقابل ناس بيروقراطيين و .... ومنفسنين وكلهم امراض نفسية وقابل 2 او 3 بس كويسين يعمل ايه
طالب اتخرج لقى نفسه ماشي في الضباب مش فاهم أي حاجة في اي حاجة ولا عارف ايه علاقة دراسته بسوق العمل طب بلاش دي لو عايز يقدم ماجيستير في جامعات تانيه يعمل ايه او عايز يعمل اي حاجة يعمل ايه

انا عايزة افهم بجد احنا اتعلمنا ؟ هو التعليم ده اسمه تعليم ؟ انا مش زعلانة على الكلية ولا كان نفسي اكمل دراسة فيها لأني كنت هاخد الماجيستير وبرضه امشي في الضباب والله مكنتش هتفرق وكنت هضيع كمان كذا سنة في حياتي من غير اي فايدة
انا اخترت الأختيار الصح حتى لو كان الأصعب وحتى لو كل الناس فضلوا يلوموني انا مش فاهمه ليه الناس بقو محبطين اوي كده ليه كل السلبيه دي ليه لما تلاقي نفسك فرحان ومتفائل يقولولك الدنيا سودا والحياة منيله مش كفاية اتعلمنا او اتعلمت تعليم جامعي مينفعش ببصلة كمان زعلانين اني ضيعت الفرصة علشان اكمل في الدايرة المفرغة

انا اسفة هطلع من الدايرة المفرغة ولو رجعتلها مش هرجع طالبة

هناك 44 تعليقًا:

The illusionist يقول...

لو انا الاول

هعمل فرح

The illusionist يقول...

انا الاول

والفرح هيتعمل

The illusionist يقول...

بسم الله

والحمد لله

والصلاه والسلام على رسول الله

نفتتح الفرح باغنيه للاستاذ

الدكتور

دكتور التكنولوجيا الهندسيه بكليه الهندسه الالكترونيه جامعه المنوفيه

دكتور عبد الناصر

واغنيه المشهوره

سقوطك حبيبى مش كفايه

The illusionist يقول...

سقوطك حبيبى مش كفايه

تحل امتحانى مش معايا

تحاول تنجح بمجهودك

ده انت كده ناقص ربايه

نجاحك حبيبى اسمى غايه

وترفع بايدك اعلى رايه

ولكن معايا انا يا حبيبى

هتتفوق وتنجح وتبقى دايه





كلمات الشاعر العظيم

محمد زوناتى

The illusionist يقول...

ازيك يا تنت ليدى

انا بقى ليا تعليق طويييييييييييل


على الحته دى

انا بزورك كتير

بس تلاقينى رخم ومبعلقش كتير

اكيد علشان هرمونات الرخامه بدانت ترتفع باطراد غريب بعد ما نجحت

بس اولا احب تقوليلى انك منبهره بشعرى عشان اكمل مسيرتى

The illusionist يقول...

المهم بقى

افهمك مين عبد الناصر

ده دكتور لسه اول سنه هيدينى السنه دى

اصحابى بقى هجربوه

الدكتور ده بيسقط خمسه وسبعين ف الميه من الدفعه

الزامى كل سنه

قوليلى ليه

اولا عشان مبيعات كتابه تزيد

ثانيا

عشان هو مؤمن بمبدا محدش ينجح فى مادتى

عيب كده

واخيرا

عشان ايه

هقولك عشان ايه التعليق الجاى

Lady E يقول...

The illusionist : كل التعليقات دي محوشها

ده احتلال مش تعليق يا مستر زناتي

The illusionist يقول...

ده بقى بييجى فى مشروع التخرج بيعمل ايييييييييييييييييييه

الطلبه بتلم من بعضها فلوس وتجيبله هديه رمزيه بسيطه خالص

لاب توب

تجددله العربيه
العفشه يعنى مثلا وتعملها عمرا
ممممممممممم
تجددله المكتب
تجيبله تكييف

وما الى ذلك
ده بس عشان يضمنوا نجاح المشروع

غير كده
لو احمد زويل عمل المشروع
بكل امانه
هياخد صفر
مع مرتبه الشرف

The illusionist يقول...

ده انتى هنا

كمان
دى الحياه جميله

The illusionist يقول...

بس بقى

فانتى لما تقولى تعليم
وجوده
وجامعه امريكيه

هههههههههههههههههههههههههه

زومايلى فى جامعه تسمى الجامعه الالمانيه
كنت قابلتهم فى كورس فى القاهره
بيقولولى ايه بقى

هو الدكتور بتاعكم بييجى الكليه بالحمار بقى
وبيحط القله جنبه على المدرج وكده

قولتلهم اه

وبيبقى قاعد على حصيره كمان

Lady E يقول...

The illusionist : واكيد دراكولا اللي في الصورة ده بيغسل اسنانه بسيجنال 2 او كريست علشان اسنانه ناصعة البياض

Lady E يقول...

The illusionist : هههههههههههه كل التعليقات اللي فاتت دي كوم وتعليق اصحابك بتوع الجامعة الألمانية كوم

The illusionist يقول...

عشان كده
لما عرفت انو مش مهم اجيب مقبول زى جيد زى جيد جدا

المهم

انى ابقى عارف انى هلاقى شغل

عشان اطور نفسى براحتى لما اتخرج

بلا خيبه

اهم حاجه الخبره والكورسات
التقديرات الفاشله دى بقى مع نفسهم

The illusionist يقول...

ههههههههههههههههههه

اه والله

سنانه بتلمع

واكيد الدكتور مش هيخلعله ضرس العقل

زى ما بيحاول يقنعنى انى اخلعه

The illusionist يقول...

بس ظريف البوست ده
بيعرفنى انى مش لوحدى

بيفكرنا ان احنا مش لوحدنا اللى هنتشل من التعليم

هناك اخرووووووووووووووون

Lady E يقول...

The illusionist : درس العقل ده مشكلة

The illusionist يقول...

اه وربنا

الدكتور هيخلعلى الاتنين يا ليدى

بيقولى طالعين منحرفين عن المسار

كان نفسى اقول دعابه على كلمه منحرفين

بس الصدمه سكتتنى

Lady E يقول...

The illusionist : ما شاء الله بتلحق تكتب كل التعليقات دي امتى

طب ارد انا على ايه بقى دلوقتي !!

واكيد هناك اخرون مش انا اتخرجت بس مازال الشلل مستمرا

Lady E يقول...

The illusionist : لما يقولك منحرفين عن المسار اكيد احسن ما يقولك اصل الأجيال الجديدة بتنقرض ودرس العقل مش لاقي مكان في الفك :)

The illusionist يقول...

هههههههههههههههههه

اهو والله الواحد على قد ما يقدر بيحاول يحيي الفرح

بس لو تحبى بقى اى فرح احنا فى الخدمه

The illusionist يقول...

اتريقى اتريقى

م هما مش بتوعك

الدكتور بيقولى ان خلعهم زى شكه الدبوس
فاكرنى بشرب اللبن قبل ما بنام و بتفرج على قناه براعم الطفل

Lady E يقول...

The illusionist : والله مش بترييق ولا حاجة ده كلام في دكتور اسنان قالهولي قبل كده

يعني مش كفايه عليك دكتور عبد الناصر كمان هتخلع درسين في نفس ذات الوقت

علشان كده صورة الأسنان ناصعة البياض دي

mrmr يقول...

انا شايفه ان فى عندكوووووووا فرح
الف مبروووووووك
بس فرح من غير زغاريت مش ينفع
خلى الزغرووووته عليا انا
لولولولولولولى
كده الفرح كمل ههههههه
كل سنه دراسيه وانتى بخير يا قمر معاناتك دى مش لوحدك الكل بيعانى مش الطلبه والطالبات لالالا يا عزيزتى الامهات بيشوفى العذاب والمرار

ربنا يفتح بصيرتكم وبالتوفيق

Lady E يقول...

The illusionist : ايه الشعر الفوق الفظيع ده

لما تقرأه اكيد هتضحك بس لما تبقى في كلية فيها كائنات خرافيه كده تبقى مشكلة
ويبقى ده من اللي بيتقال عليه هم يضحك وهم يبكي

Lady E يقول...

The illusionist : واحب أهدي للضاكطور ده وأمثاله اللي كانوا في كليتنا

قولو للي أكل الحرام يخاف

ولابد من يوم معلوم تترد فيه المظالم

وربنا معاك وتتخرج

Lady E يقول...

mrmr : كل ده علشان سيبت صفحة التعليقات لواحدها يا مرمر :)

تسلميلي وتسلملي كل زغروتاتك يا حبيبتي

اكيد امهاتنا تعبوا معانا أخر تعب وكأنهم هما اللي كانوا بيدرسوا وبيمتحنوا ولسه بيتعبوا معانا حتى بعد التخرج ربنا يخليهم لينا ويباركلنا في امهاتنا جميعا

اللهم امين

The illusionist يقول...

هههههههههههههههههه

نحن فى الخدمه

اى افراح معازى خطوبات سبوع عقيقع

نحن فى الخدمه

جست كال

فقط اتصلوا يعنى

بمحمد زوناتى

قلم رصاص يقول...

♫ ♪ ♫
وتستمر المعاناه
وادينا عايشين الحياه
متفائلين رغم الأزمه
ومهما غاب الأمل راح نلقاه

وعجبي! ♪♪♪♪♪

¶ ♫ ♪


ايه رأيك في الرباعيه السريعه دي بقى؟!

________

اتفق معاكِ في كل اللي طرحتيه
التعليم في مصر أزمه بكل المقاييس رغم ان الطاقه البشريه في مصر غنيه جدا بالمواهب في مجالات عديده

الحجه الجاهزه دايما ، الزياده السكانيه اللي بيدعوا دايما انها بتمتص كل فوائد النمو الاقتصادي اللي من المفترض انه يحسن من الاحوال المعيشيه لكل الطبقات خصوصا الطبقات المتوسطه والفقيره

ولم تستح ألسنتهم من تجاهل النموذج الصيني الذي يعج بانفجار سكاني ان صح التعبير واستطاع ان يحول هذه الاعداد الهائله من البشر الى طاقه جباره استطاعت نقل الصين الى صاحبة ثاني أقوى إقتصاد في العالم

التنميه البشريه هي ألف باء تنميه في مصر..اهتموا بالبني ادم يعطيكوا مقابل يعود في النهايه على المجتمع ككل والدوله المصريه


بس تقولي لميييييييين ومين هيسمع ويفهم

والله البلد مليانه طاقات ومواهب فذه في كل المجالات بس مقتوله ومكبوته بفعل النظام والحكومه ومش قادر افهم الناس دي بتنام ازاااااااي وبالها بيكون مرتاح كدا وعادي؟!

ورغم كل السواد اللي في الصوره
الا اني دايما متفائل جدا ومش قادر افهم مصدر تفاؤلي الأزلي دا ايه ؟

احييكِ على الطرح المتميز كالعاده

تقبلي مروري وتحيتي

R-H-S يقول...

متفق معاكي طبعا في معظم الكلام دا

اول سنه ليه اصلا في الكليه مكنتش فاهم الجدول يتنقل ازاي ومعرفتش غير بعدها بفتره كدا اي نعم الاخوان المسلحون كان عاملين شغل كويس بس تعرفي انا بلقي اللوم علي مين

علي الطلبة الاكبر مننا .....انا بقول ان الطلبه اللي هما ال senior دول المفروض يوعوا او يفهموا الطلبه الجدد النظام في الكليه ماشي ازاي وانت محتاج ايه علشان تستفيد من الكليه او محتاج تاخد كورسات ايه الكليه مبتديهاش علشان تنفعك بعد كدا في سوق العمل او حياتك بعد كدا

ويمكن العيب اننا لما بيقولونا اعملو ريبورت او بحث عن حاجه مبنتعبش نفسنا مع ان اهم حاجه انك تروح وتدور في المكتبه او النت او اي حاجه تانيه متاحه ليك

بمناسبه الحفظ كانت معيده عندنا بتسأل زميلنا سؤال قالها ياباشمهندسه احنا حافظين مش فاهمين هههههههه ...الله لايعودها ايام

تحياتي

عمرو يسرى يقول...

المشهد فى كليتنا احنا بقى
انا الجزئيه بتاعتى محدش يفهمها وفى دكاتره مش فهمنها وهى جزئيه مش مفهومه

حصل فى احدى المحاضرات دكتور قال كده عن الجزئيه اللى كان هيشرحها
وكنا عايزين نقول له نقطع درعنا لوكنت انت فاهم حاجه ههههه
حدث فى كليه تجاره جامعه عين شمس 2009
ومازال يحدث

The Queen يقول...

بتفق معاكِ بشكل كلي
انا مجربتش الكليات الخاصة او الكليات الاجنبية علشان اقدر احكم حكم صائب لكن طبعا جربت الجامعات الحكومية والدكاترة الحكوميين المنفسنين وخلي بالك ان مقدار الاحباط والقهر اللي بيقع على الطالب مش بيتجرعه في الكلية بس لا ده معاه من ايام المدرسة ، التعليم كله بايظ في مصر والشباب اللي مش لاقي شغل او مش عارف يشتغل رغم ان معاه شهاده جامعيه ليه حق ونص لانه درس مواضيع بعيده كل البعد عن الحياة العملية والتطور اللي وصل ليه العالم دلوقتي
وده اللي كان بيقولوه لنا الدكاترة في الكلية وكنت دايما اسأل نفسي طيب ليه ميغيروش المناهج ويطوروها وده في ايديهم لان كل دكتور هو اللي بيعمل كتابه ومفيش شئ مفروض عليه ؟؟
بس نقول ايه مؤامرة لنشر الجهل ..
لك الله يا مصر

تحياتي لكِ ومدونة رائعة .. بالتوفيق

Ramy يقول...

اول مرة أجى ألاقى فرح

طب دة انا حظى فى رجليا(:

شوفى كلامك صح

الدكتور من أول ما بدخول من وهو طالب و حاطط فى دماغة يكون دكتور بيخزن كل الأساليب الرخمة و المنحطة اللى حصلت معه و يطورها علشان يكون له شخصيته الهدامه المنفردة علشان ميتقالش عليه بيقلد حد

أنا فاكر الدكتور قلنا ايه فى اول محاضرة فى الكلية يعنى من 13 سنة

قال لنا حكمة جميلة و انا حططها حلقة فى ودانى (:

ذاكروا و أعملوا اللى عاليكوا و يمكن
يمكن تنجحوا

و كان يكتب فى ورقة أسألته أيه

حاول ان تجيب على بعض الأسألة

يارب مكنش رخمت عليكوا فى الفرح

(:

بالتوفيق (:

~ISLAM~ يقول...

على ما اعتقد ههههههههههه
والله اعلم كده
انك تقصدى شارع الضباب بتاع تجاره عين شمس
طب انا هقولك معلومه حلوه
انا دى سابع سنه ليا فى الكليه دى
ايه رأيك فى الاحباط ده
الاجمل من كده انى مستفدتش حاجه من الكليه دى غير الفشل
لدرة انه مبقاش يأثر فيا
تقريبا كل المنفسنين والمعقدين اللى بتحكى عنهم دول قدروا يأثروا عليا
عموما دى السمه الغالبه
حاولى تبقى من الشواذ ده لو عرفتى
والله مبحبطكيش
بتمنالك كل خير
تحياتى ليكى

أميرة علي كوكب مهجور يقول...

كل ده تفسيره ان انتي اكيد في مصر :))

Lady E يقول...

The illusionist : كمان بتعمل اعلانات في مدونتي يال الهول :) طيب بالنص بقى :)

وبعدين هي عقيقع ولا عقيقه :)

Lady E يقول...

قلم رصاص : يا سلام ع الرباعيات الجميلة

بجد تسلم ايدك هي ورباعية ولا اديك بالكوع جميلة جدا :)
ما شاء الله دائما مبدع في رباعياتك

متفقة معاك في كل كلامك
ومش متفقة ابدا مع قبل ما نزيد مولود نتأكد ان حقه في الحياه مفقود ومش متفقه مع وقفة مصرية ولا الكلام الفاضي ده لان ربنا سبحانه وتعالى قال ان كل مولود بيتولد ربنا سبحانه وتعالى كفيل برزقه فالموضوع مش أزمة زي ما هما مصورين وفعلا مصر مليانه مواهب ومبدعين بس مش متوجهين صح وضايعين ومفيش عندهم الموارد اللازمة لتنميتهم

ربنا يثبتك وتفضل متفائل على طول دي ميزة لازم تفضل متمسك بيها وشريف عرفه قال ان اكتر بلد ممكن تنجح فيه البلد اللي كل ناسها متشائمين علشان وانت متفائل وطاقتك عالية في وسط الجو ده هتعرف تنجح اكتر وتحقق نفسك ففعلا في عتمة الصورة في شوية نور ل اللي يشوفهم

شكرا على الرباعية اللي اضافت للموضوع بشكل كبير

Lady E يقول...

R-H-S : عارف المشكلة فينا برضه لأننا مكنش عندنا الوعي الكافي اننا نسأل الأكبر مننا ولما سألناهم كانوا بيحبطونا وبيقولوا لنا المناهج صعبه والدكاترة وحشين والدنيا سودا كانوا بيغرقونا مش بيفهمونا
اللي انت بتقوله حصل معايا في سنة تالتة جت بنوتة من اعلام ليا انا وزميلتي وسألتنا النظام في الكلية ماشي ازاي وبرغم انها في قسم تاني الا اننا جاوبنا ولغاية ما اتخرجت البنوتة دي كانت ممتنة جدا لكلامنا واننا فهمناها

بالنسبة للريبورتات نظام دراستي وانا في ثانوي كان معتمد عليها ولازم من مراجع مش من النت كمان ف اتعودت على البحث بالطريقة دي وطلع عيني في سنة رابعه كلية ومع ذلك مفيش فايدة برضه محدش بيقدر مجهودك

ههههههههه يا خبر ابيض حافظين في كلية عملي طب نظري تمشي لكن عملي صعب شوية حفظ من غير فهم .. امييين

Tears يقول...

لو فضلتى تقارنى ح تتفقع مرارتك من الفرق

سبق و كتبت تجربتى فى جامعه الفرنجة و التعليقات بينت اللى احنا فيه ده

http://tears-demo3.blogspot.com/2010/05/blog-post_18.html

Lady E يقول...

عمرو يسرى : جامعة عين شمس واخدة شهرة كبيرة حقيقي في الكلاكيع بتاعت المناهج والدراسة

منطقي جدا انكوا تقولوله وانت كمان مش فاهم حاجه :) اومال يحبطكوا وخلاص بس لو حد فيكو كان قال كده كان اكيد زمانه شايل المادة دي باقي عمره

اللي يوجع القلب بجد انه مازال يحدث

Lady E يقول...

The Queen : أهلا بيكي

بطبيعة الحال انا كمان مجربتش الكليات الخاصة وموافقة جدا على رأيك التعليم كله بايظ بس فترة الكلية بتفرق عن اي فترة قبلها لأن بيتحدد عليها المستقبل
وبالنسبة لموضوع ان الدكاترة هما اللي بيوضعوا المناهج هما ايوة بيحطوا الكتب ومواضيعها لكن بناءا على تحديد مجلس الكلية والوزارة
دكتور الجامعه معندوش مساحة حرية انه يعمل مناهج زي ما هو عايز بالنسبة لدراسة الأدب الانجليزي مثلا لازم تدرسي الأدب من القرن ال13 للقرن ال20 مقسمين على السنين فبتبقي مقيدة بمواضيع محددة
الحكاية اكبر من الدكاترة للأسف واللي بيراعوا ضميرهم قليلين جدا

انتي الأروع والاجمل

دمتي بخير

Lady E يقول...

Ramy : ربنا يجعل حياتك كلها أفراح

يمكن وحاول يعني الراجل مكنش عايز يتعبكو معاه وكان جايبلكو الطريق من الاخر بدل ما تتصدموا لما تعرفوا الحقيقة المرة

الموضوع طلع عام أكتر ما انا كنت متصورة
معقول في النماذج دي في كل الجامعات :(

في فرح علشان حضرتك موجود بس

دمت بخير

Lady E يقول...

7akwena : هو في شارع ضباب في تجارة عين شمس دي معلومة جديدةاول مرة اعرفها :)

لو انت بتشتغل او بتاخد كورسات او ليك اهتمامات مهمة غير الكلية هقولك ولا يهمك براحتك في الكلية في ناس اعرفهم اخدوا الكلية بعد 9 سنين واكتر ومن المشاهير في الشاعر ايمن بهجت قمر لسه مخلصش كليته لغاية دلوقتي فموضوع ال7 سنين مش مشكلة خالص اما لو موقف حياتك عالكلية فدي تبقى مشكلة كبيرة اوي وانت محتاج تعالجها لأنك تبقى كده سمحت للأشكال الضالة دي تضيع عمرك

الفشل بداية النجاح والدراسة عمرها ما كانت مقياس على الذكاء بس برضه انت محتاج لها علشان هتفيدك في شغلك بعد كده

انا متأكده انك هتنجح ان شاء الله بس تفائل بالخير تجده وخليها على الله

Lady E يقول...

Tears : للأسف الفرق شاسع

انا اتشرفت بقراءة البوست قبل كده وفرحت بجد ان في تعليم كده واتمنيت بجد اني اتعلم في كلية بالشكل ده

رحــــيـل يقول...

بعد ما خلصت دراسة قدمت عشان اعمل تمهيدي ماجستير مش عايزه اقولك كم الاحباطات وكافة انواع المعاملة السيئة وعدم الاحترام والتقليل الدائم من شئننا
كل ده انا مقدرتش اتحمل غير شهر واحد وقررت انى اخرج انا كمان من الدايرة خصوصا ان فى الدرسات العليا بيكون فى تركيز اكتر على الطلبة تحسيهم اساسا مش عايزين حد يحسن من نفسه ليكون فى يوم من الايام احسن منهم دكاترة معقدين وبيطلعوا عقدهم علينا الا فعلا دكتور اواتنين بالكتير جدا محترمين فى معاملتهم معانا
انتى صح اعملى اللى انتى شايفاه مناسب مش اللى الناس عايزاه