الثلاثاء، 20 أبريل 2010

البحر بيخطفني



البحر عاللسان النهاردة كان هادي

تملأ روحي رائحة الشوكولاتة والبندق ، برغم اني في سوق السمك ذو الروائح النفاذة

شعور ماليني بالحنين لحبيبي الأولاني ( البحر)

هخطف ماما ونروح رأس البر ، برغم أي انشغال وأي مسؤليات ورانا هسرق من الزمن شوية وقت وأروح أشوف البحر ، ياااااااااه احساس جميل أوي احساس انك تعمل حاجة مش اعتيادية

وأنا ماشية في الطريق سامعة في وداني أغنية رجعتلي روحي لأنغام

بحب البحر أوي ومرتبطة بيه لدرجة إني بحس أحيانا إني أصلا سمكة :)

صورة للفنار من بعيد

ماشيين في الطريق وأصالة بتغني : خليك شوية قدام عينيا ملحقتش أشبع حب فيك
لا بلقى راحة في البعد عنك ولا بلقى روحي الا ف عينيك الزرقا طبعا :) ما هو البحر المفروض يبقى أزرق بس لأنه البحر الأبيض المتوسخ ف لونه دائما رمادي

عمري ما تخيلت أني أعيش في أي مكان مفيهوش بحر ، وبرغم أن أغلب حياتي سفر الا ان البحر كان معايا في كل مكان ، وكنت بذاكر وأنا شايفاه من بيتنا في اعدادي وثانوي

البحر ده مش مية أو موجة فوق صخرة ، البحر ده أغنية بسمعها 100 مرة من تاني بتوحشني البحر بيخطفني

أنا بعشق البحر وبعشق السما وبعشق الطريق لأنهم حياة وانت يا حبيبي أنت كل الحياة

ويا ساكني مطروح جنية ف بحركم :)

هناك 25 تعليقًا:

MaNoO يقول...

عندى ملل من المدونه بقالى فتره واوال اما ادخل الاقى بوست التفاؤل دا البحر ياااااااااااه وكمان منطقه اللسان دى بحبها اوى من بعد الفجر لغايه الصبح خاصه تحس انك بعيد عن كل حاجه واحساس الحريه كمان ان الدنيا واسعه ادامك بتتنفسى براحتك احسن من زحمه المدن تحيااااتى

Lady E يقول...

MaNoO : ههههههههه طب الحمد لله اني اجلت البوستات الكئيبة علشان محدش ناقص أساسا :)

ويلكم باك يا مانو وكلنا أحيانا بيصيبنا الملل من كل حاجة في الدنيا مش بس من المدونة

اللسان أكتر مكان بحبه في مصر وفعلا بتحس بالحرية وان الدنيا واسعة وجميلة وبتتنفس هوا صحي ونقي كله يود وريحة البحر المنعشة

سعيدة انك رجعت ولقيت بوست متفائل :)

موناليزا يقول...

أول ماشفت الصورة قلت اكيد هتتكلمى عن حبيبتى راس البر
أصلها برضه واحشااانى اوى
وبجد بنشكرك على صور اللسان:)

Lady E يقول...

موناليزا : خلاص يا موناليزا نورينا يوم في دمياط ونقضي اليوم كله سوى في رأس البر عاللسان

الشكر ليكي يا حبيبتي

نورتيني

هي وظروفها يقول...

طب ايه بقي بالظبط

ابتديتي بعنوان اغنيه للجميله حنان ماضي

وختمتيها بالصوت الدافي نجاه

وفي الويط كلام كان حامل اسرار كل العشاق للحياه

البحر

البحر ده سبحان الخالق العظيم يا ايناس ساعات بتخيلني سمكه
واقف واعيش بخيالي اني بروح مره شواطيء اليونان مرورا بقبرص واخطفلي تعسيله في مالطه واكمل طريقي لمضيق جبل طارق الله الله علي البحر وجماله
بقولك ايه سيبك انتي ادتيني من غير ما تحسي شحنه جمال وتفاؤل وحنين جميييييييييييييييييييييل للبحر
وربنا تسلمي

فراشة يقول...

اممممم انتي يعني بتغظيني عااااااااا
ماليش دعوة بقى والله دا ظلم انا كل سنة بصيف ف السعودية ينفع الكلام دا ..انا رحت راس البر مع اختى ف اسبوع عسلها رخامه كدا هو بيني وبينك عشان احرسلهم الهدوم ع الشط :)

وبما اني بعشق البحر ودبت ف راس البر مش عايزه اقولك حبيت اللسان قد ايه يااااه حبيته م اول نظره وصورته ومشيت ع السور دا وكنت حاسه اني طايره فكرتيني بأيام جميلة قوي

نفسي أروحها تاني, يارب اروح هناك واشوفك هناك :) وحشتيني

غير معرف يقول...

جميل التفاؤل ده تصورى انا مستغرباكى اوى
فى حد فى ايامنا دى عنده تفاؤل بالشكل ده..الله يديمها عليكى نعمه مدونتك عجبتنى اوى
تقبلى مرورى..لكى تحياتى

لــــ زهــــــراء ــــولا يقول...

ليـــــــــــــدى

واضح انك زى حالى مجنونة بحر
انا بقى سكندريه وساكنه جنب البحر كماااااااااااان

انتى عارفه انى نفسى اروح راس البر سمعت عنها كتيييييير اوى

الصور حلوه اوى اوى

زهراء

Sad Angel يقول...

بحب الببببببببببببببببببببببببببببحر

وبخاااااااااااااااف منه اكتر بكتير

حضنه بيحسسنا بالامان ولا بيخطفنا ويغدر بينا؟؟؟

امين بس غدار
حنين بس قاسى
واسع بس ضيق على اللى فينا

غير معرف يقول...

حبى فى البحر براحتك

على الله ينفعك
هع هع هع هع هع هع هع

تصدقى انا همووووت واقعد كده جنب البحر وانام واقضى يوم كامل مع صحابى بس مينفعش ومفتكرش انه هيحصل قريب ولا بعيد حتى هههههههههههههههههههه

تصدقى احلى حاجة التغير و ان الواحد يعمل حاجة مش متعود عليها لانها بتخلق عنده حاجة مختلفة كده وكتييير اوووى بيبسطنا التغير ده

يااااارب دايما مبسوطة وفرحانة

ابقى طمنبنى عليكى دايما

safa7_karmooz يقول...

هى راس البر احلوت عن زمان كده ليه

ياااه زمن

انا اتفق معاكى فى حكاية البحر..بس انا عشقى الاول والاخير اسكندرية :)

sony2000 يقول...

بجد الصور فكرتني بأجمل ايام
علطول سفر هناك مع عليتي
بجد بحبو مووووووووووووت
البحر
وكمان احلي منظر
التقاء النيل بالبحر
سبحان الله:)

قلم رصاص يقول...

اجمل حاجة في البحر اني بحس انه عامل زي حد في حياة الواحد ، دوره فيها انه يضحك في وشه ويبتسم له دايما مهما كانت همومه ومهما كان زعلان من حاجة..المهم انه دايما بيمد الانسان بالسعاده والراحه النفسيه

سبحان الله فعلا..ولله في خلقه شئون

رغم اهمية البحر في حاجات كتير زي انه وسيلة للنقل والصيد وحاجات كتير ، الا انك تحسي ان ربنا خلقه مخصوص عشان الراحه النفسيه للبشر!

الصور حلوة تسلم ايدك وزوقك

البوست دا النهاردة فكرني بتجديد نيتي من السنه اللي فاتت اني ازور راس البر ^_^

تقبلي مروري وتحيتي

كيكى عوووووو يقول...

ياسلااااااااااااااااااااام
ياعم الرايق
اموااااااااة

Lady E يقول...

هي وظروفها : ختمت البوست بالصوت الساحر ليلى مراد مش بنجاة يا وليد

يا عيني عالخيال والروقان
بتتخيل نفسك سمكة :) ويا ترى بقى نيمو ولا حاجة تانيه :))

على اد ما الحياة في البحر جميلة لكن مليانه مخاطر ولو كنت سمكة صغيرة ففي أسماك كبيرة ومفترسة ولو كنت سمكة كبيرة الصيادين هيصطادوك ولو كنت سمكة عموما الانسان هيصطادك وياكلك عالغدى :)
فحياة السمكة مش كلها سفر وفسح

بس بجد بجد الله على خيالك

سعيدة جدا بالاحساس اللي وصلك من البوست

تسلم من كل شر

دمت بخير

Lady E يقول...

فراشة : ايوة طبعا بغيظك :) يمكن لما تتغاظي تيجي دمياط ونروح راس البر سوى :)

وانا كمان بصيف في عمان :)

ينفع كده يعني رخمتي عالبونية في شهر العسل :) هقولها ترخم عليكي :)

هيييييييه سعيدة انك افتكرتي ذكريات جميلة

يارب يا اختي يارب
قرري انتي بس تيجي وأنا هعمل معاكي أحلى واجب

نورتيني

Lady E يقول...

الشـوكة الــنـاعـمـة : اولا اهلا بيكي
كويس ان الانطباع اللي وصلك تفائل
هي الفكرة اني لما بتضايق أوي بروح للبحر وسبحان الله مودي بيتغير تماما

حتى لو شوفتي قبل البوست ده ب2 بوست هتلاقي بوست حزين جدا عن الفراشة بتاعتي :((

يارب كلنا نتفائل

نورتيني وأسعدني رايك

Lady E يقول...

لولا وزهراء : أينعم

وأسكندرية كمان ليها سحر خاص

رأس البر هتنور بيكي يا قمرايا

أنتي الأجمل

نورتيني

Lady E يقول...

Sad Angel : هو ده البحر بكل تناقضاته وثورته

مين اللي قال انه غدار؟ اللي حواليه اللي مش فاهمينه

البحر واسع وعمره ما كان ضيق عالأقل بالنسبة لي

نورتيني يا محاميتنا :)

Lady E يقول...

star in the sky : هو فعلا بينفعني يا ستار وبيهدي نفسوياتي ويخليني في حالة سلام نفسي

هههههههه معلش يا ستار مسيرك هتقعدي جنب البحر براحتك وهتلبسي العوامات وهتعومي فيه كمان :) خلي عندك أمل

أينعم

وانتي كمان يا قمرايا

نورتيني

Lady E يقول...

safa7_karmooz : طبعا رأس البر بقت حاجة تانيه بيقولوا عليها أروربا مصر :) تقريبا بقالك كتير مجيتهاش

طبعا اسكندرية مفيش اختلاف عليها لكن كل مكان وليه طعمه وليه روحه ومميزاته

Lady E يقول...

sony2000 : سعيدة ان الصور فكرتك بذكريات جميلة يا سوني يا قمرايا

فعلا التقاء البحر بالنيل معجزة من معجزات ربنا سبحانه وتعالى

نورتيني

Lady E يقول...

قلم رصاص : بجد مش عارفة أقول ايه من جمال التعليق :)

ربنا يسلمك من كل شر

ان شاء الله تنور راس البر

دمت بخير

Lady E يقول...

كيكى عوووووو : ليه هو انا سفن اب

يا لذيذ يا رايق :)

نورتيني يا حبي

vic يقول...

التعليقات رائعه مثلها مثل التدوينه الرقيقه المفعمه بالاحاسيس الرائعه النابعه من داخل كاتبها
وسبحان الله مع اني ن دمياط واللسان اسهل مكان ممكن اوصله ولكن دائما يشغلنا ما هو اهم من غذاء روحنا
والغريب اكثر ان من هو بعيد عنها يتمني وجوده فيها في حين ان الكثير منا مل من الذهاب الي راس البر
علي الرغم من جمالها وسحرها المعروف وذكرياتها الجميله ....