السبت، 17 أبريل 2010

أكتب لأتداوى




* بداية العنوان مش كلامي ده كلام الكاتبة التشيلية ازابيل الليندي واللي كتبها كانت بتغمزلي وانا في معرض الكتاب السنة دي بس زي حيرة البنوتات لما بتشتري دهب أو اكسسوارات بيبقى قدامها حاجات كتير جميلة وكلها ليها قيمة وغالية ومحتارة تختار ، أنا كنت كده في معرض الكتاب كنت واقفة وسط الكتب الانجليش ومحتارة اختار لأن كل كتاب ليه قيمته وقررت اني مش هجيب كتب الا بالعربي برغم دراستي للإنجليش بس لسه معنديش صبر اني اقرأ رواية أو كتاب انجليش من أوله لأخره

الكتابة من زمان أوي وهي صاحبتي لكن دلوقتي بقت بتزورني حُمى الكتابة بكتب لأتداوى
زي ما تكون في نداهة بتندهني وتخطفني لبحور الكتابة وتلح عليا لغاية ما اكتب ويا سلام بقى لو مكتبتش تفضل الافكار تلعب استغماية جوه دماغي وتحرمني من التركيز والنوم أحيانا ولو نمت أفكاري مبتسبنيش بتجيلي في أحلامي


* بودع حياه استمرت 4 سنين – حياة الكلية- وبستقبل حياة جديدة الحياة العملية وأتمنى انها تبقى أحلى
عارفة انه برغم ان الكلية مكنتش الكلية اللي بحلم بيها لكن برضه هفتقد أيام التزويغ من الكلية :) يوم لما بحب أطنش المحاضرات مفيش مشكلة لكن مينفعش أطنش الشغل

*أحلام كتير عايزة أحققها في مصر قبل ما أسافر وأسيبها ان شاء الله بعد التخرج ، الحلم القديم بتاع الجامعة الأمريكية بيزغزغ خيالي وصوت العقل بيقول اللي ميتحققش النهاردة يتحقق بكرة وصوت القلب بيقول خير البر عاجله ، انتي لسه في الكلية وفاكرة اللغة لكن بعد الكلية حتى لو اشتغلتي هتنسي كتير من دراستك
محتارة ومش عارفة أوصل لقرار حاسم وربنا يسهل وأوصل لقرار


* مش مطلوب مننا يبقى في ألفة بيننا وبين دكاترتنا في الكلية أو رؤسائنا في العمل
اتعلمت السنة دي اني أحترم الانسان لعلمه من غير ما أبص عليه انسانيا عامل ازاي
الموضوع ده صعب شوية على الشخصية الحسية اللي بتتعامل بإحساسها والاحساس جزء كبير من شخصيتها
ومع ذلك قدرت أوصل للمعادلة دي وأنفذها ، ده بالنسبة للدراسة أو الشغل لكن بالنسبة للصداقة أو الزمالة أو غيرها ببص للناحية الانسانية والاخلاقية كمان وفي الحالة دي ليا الاختيار بالرفض أو القبول



* سواء بتمثلي أو انتي كده فعلا ، مش مصدقاكي في الحالتين ومن أعماق قلبي الجوانيه بجد كرهتك من أفعالك الغبية وكلامك السلبي وانك مبتراعيش شعور حد غير نفسك ، لكن في نفس الوقت انتي صعبانة عليا ومتعاطفة شوية معاكي برغم انك قولتيلي قبل كده انك بتحقدي عليا !

من فترة وانا شايفة مبدأ نفع واستنفع في كل مكان وكل حاجة ليها مقابل ، والماديات بقت مهمة أوي والناس بيتعاملوا على الأساس ده
لكن أقتنعت ان لسه في ناس مش كده مثلا في المدونة
، زي متابعين المدونة اللي مشتركين في المتابعين عالمدونة
وزي قراء المدونة الكتير اللي بيقرأوها وزي القراء والمتابعين للمدونة اللي بيتابعوها وكمان بيعلقوا على المواضيع اللي بكتبها ومش منتظرين مقابل اني اعلق في مدوناتهم بيكتبوا تعليقات لأنهم فعلا بيحبوا المدونة
وزي الناس اللي أصلا معندهاش مدونات وبياخدوا من وقتهم القيم وبيتابعوني

ليكم كلكم شكرا


وأحب اختم كلامي بكلام عاجبني من مسلسل ورق التوت ومن كلام أبو الأداجير ادجر الان بو اللي كتب قصة ليجيا اللي مطلعة عيني


تتوه الحواجز

تتهد السدود

وأقولك وتفهم حتى السكوت


اما ادجر وأول مرة اخد بالي دلوقتي ان اسم ادجر شبه كلمة ضجر اللي معناها ملل :)

المهم أبو الأداجير بيقول في مراته


طفلة كانت وطفلا كنت

في تلك المملكة بجوار البحر

الا اننا عرفنا الحب الذي هو اقوى من الحب ذاته

حبا اثار حسد الملائكة ذوات الاجنحة علينا


الله عليك يا حبيب ولديك ايه الكلام ده ، اهو الكلمتين الرومانسيين دول بيصبروني اني اكمل مشروع التخرج بتاع المرعبة ليجيا


ودي صورة ليجيا كلارك البطلة المرعبة ل أبو الأداجير
وجمعة مباركة علشان امبارح كان الجمعة

bonne nuit طابت ليلتكم بالفرنساوي نياهاهاهاها

------------------------------------------------------
ع الهامش : سعيدة جدا برأيك الرائع عن مدونتي ، لأنك اكتر انسان في الحياة يهمني رأيه
بحبك أوي

هناك 10 تعليقات:

هي وظروفها يقول...

ازيك يا ايناس

مش عارف اقولك ايه والله

بس اقدر اقولك ربنا يوفقك وتحققي كل احلامك

وادينا عايشين وبردو بنقابل ناس حلوه ونتعرف عليهم وبياخدوا جزء من محبتنا من خلال احترامنا ليهم او لفكرهم او لمبادئهم او لضميرهم المهم ان لسه في ناس محترمه عايشه معانا وبينا وايناس اختنا اكيد منهم

ربنا يبارلك ويكرمك في اللي جاي ويبقي احسن من اللي عدي

فراشة يقول...

بداية كمان وحشتيني يا نونتي

انا قبل المدونة كنت بكتب ف ورق دلوقتي بستسهل المدونة وفعلا لو مكتبتش بحس اني من كتر الكلام والتفكير ببقى نفسي ادلقه وخلاص ههههه

يارب تودعيها وتشتغلي حاجه بتحبيها وتكملي ف المكان اللى تحبيه والعمر ميسرقكيش ف التفكير وأخد القرار

انا شايفه انك توازني ف قرارك بين قلبك وعقلك مع اني شايفه الاتنين مقتنعين بس الظروف اللى مش مناسبه

مش كل الناس زي بعض وزي ما انتي قلبك ابيض فيه ناس كتير زيك وهتاقبليهم ف حياتك ان شاء الله

Ana keda يقول...

:)
بشرة امل طالعة الحمد لله الغيمة ابتدت تنزاح حبة حبة
وده مريحنتى اوى دلوقتى يا ليدى انتى عارفة ان برغم كل الوقت الى انا فيه عندك والى انتى فيه عندى وحبى الى بجد مش محتاج اقوله ليكى لانك اكيد حساه وعارفة اننا اخوات اوى وجدعان اوى انى لسه لحد ناو معرفش اسمك :)
ههههههههه متتخليش عن اى حلم ليكى يا بنتى واجمدى واقوى كده وانتى جدعة وربنا هيديكى الى تتمنيه ان شاء الله
مكنش له لازمة الكلام الاخرانى الى ليا ده
ههههههههههههههههههه
شفتى الغلاسة بقى بس يا ليدى بودا لسه مجاش عشان يقول رايه بس هوصله الكلام يعنى
هههههههههه
بحبك اوى

قلم رصاص يقول...

أكتب لأتداوى

العنوان تحفه فعلا ويعبر عن حاله موجوده بالفعل .
الشعور بتدفق الأفكار دون سطرها أولا بأول بيعطي الواحد منا احساس بالكركبه ان جاز التعبير . لكن الكتابه للتداوي هي قمة الانسجام والانصهار بين الكاتب وحبه وعشقه للكتابه..!

أيام الجامعه انا باعتيرها اجمل سنين العمر
على الاقل لحد دلوقتي .. عرفنا فيها كتير واتعلمنا وأثرنا واتأثرنا .. ملامح شخصيات ناس كتير اتكونت في مرحلة الجامعه فعلا..فمن الصعب الانفصال نفسيا عنها لمدة طويله .

ربنا يوفقك في الجي ان شاء الله

تقبلي مروري

star in the sky يقول...

هههههههههههههه
ربنا يعدى عليكى مشروع التخرج على خير
ويكرمك يااارب

وناوية تسافرى ليه خليكى البلد دى احسن من غيرها هع هع هع هع هع هع

وبخصوص الجامعة مع انى مش فاهمة بس صلى صلاة استخارة وان شاء الله خير

Lady E يقول...

هي وظروفها : الحمد لله تمام

اللهم أمين

ربنا يكرمك ويحقق أحلامك يا وليد

وانت اكيد منهم يا وليد

اللهم أمين وليك مثل دعائك

دمت بخير

Lady E يقول...

فراشة : وانتي اكتر يا فراشتي يا جميلة

انا كمان كنت بكتب في أي كراسة أو كشكول المحاضرات بس الكتابات كانت بتضيع لكن الميزة عالمدونة ان مفيش حاجة بتضيع

يا مامااااا فراشه بتخوفنيييييي
بتقولي عمري هيسرقني عارفة لو سرقني هبلغ عنه البوليس نياهاهاها

انتي من الناس اللي قلبهم أبيض يا حبيبتي

نورتيني

Lady E يقول...

Ana keda : الحمد لله يارب الغيمة هتنزاح والدنيا هتمطر :)))

الحمد لله ربنا يديم عليكي السلام النفسي والراحة النفسوية يا حبيبتي

ههههههههه يا سلام بقى كل الناس اللي عاملين يندهولي بإسمي الحقيقي ومش عارفة اسمي :)

اسمي إيناس يا مرمر
طبعا عاشت الأسامي :))

وانتي كمان يا مرمر بنوتة جميلة وقلبك أبيض ورقيقة وعسولة وجدعة وكلك على بعضك حلوة :)

لع ليه لازمة مش انا خالة النونو :)
ربنا يباركلك فيه يارب ويوصله بالسلامه ويجعله ابن بار بيكي

ههههههههه أيوة كده شطورة

وأنا كمان

نورتيني

Lady E يقول...

قلم رصاص : فعلا كتر الأفكار بتعمل كركبة :) والكتابة عامة بتبقى علاج للروح

مرحلة الجامعة مش زي ما تخيلتها في ثانوي لكن عالأقل مرحلة الكلية أحسن من ثانوية عامية بكتير

اللهم أمين وليك مثل دعائك

دمت بخير

Lady E يقول...

star in the sky : أميـــــن بدعي من كل قلبي يا ستار خصوصا اني همتحن في مشروع التخرج عااااااااا

اللهم أمين انا وانتي يا حبيبتي

ههههههههههههه حد يقدر يقول غير كده

ان شاء الله يا قمرايا

نورتيني