الثلاثاء، 27 أبريل، 2010

يوم من أيام بنوتة





كنت رايحة للدكتور مع ماما النهاردة والمهم قلنا هنطلع بالأسانسير ، الأسانسير قديم أوي
وفي سلوك نازلة من سقف الأسانسير ومش متقفل من جوه فالحيطة باينة ومن جوه صاج وشكله رعبني ولا أحلى قصة رعب ، فقلت لماما بلاش الاسانسير نطلع الاربع ادوار احسن ومش مشكلة اني لابسة كعب عالي !

ركبنا الاسانسير دخلت برجلي اليمين وقلت اشهد ان لا اله الا الله من منظره وطلعنا الدور الرابع
الأسانسير صغير اوي ومساحته صغيرة اوي وجيت افتح الباب
المفاجئة ان مفيش باب ! في حتة حديد مصدية مغطية مكان الباب ! حاولت افتح الباب وأزقه تاني مفيش فايدة !
فماما طلعت الأسانسير دور كمان لقيته نفس الموضوع وبدات أحاول افتح الباب بيهستيريا وجه في بالي ان خلاص هنموت هنا ومحدش في العمارة كلها عارف اننا في الأسانسير وبدأت احس بدوخة وان روحي بتتسحب
وفجأه لقيت ماما بتقولي الباب أهو
الباب مكان الحيطة ! وخرجنا من الباب لقينا الدور كله مضلم ف اترعبت اكتر وافتكرت فيلم رعب كانت احداثه كده برضه أسانسير بايظ بيطلع لدور ضلمه مليان عفاريت وماما قالتلي يا خوافة ، انتي خوافة وانا كنت ماشية وركبي بتخبط ع الجيران ، ماشية بطريقة البجعه :)

المهم كان في زحمة كبيرة اوي عند الدكتور، فسبت ماما وروحت للجيم – النادي الرياضي – اللي قدام عيادة الدكتور
و دخلت الجيم ودي تالت مرة اروح واتصاحبت على البنوتات اللي هناك
الرياضة دي حاجة بجد جميلة جدا واللي شجعني عالرياضة الاعلانات اللي بتيجي اليومين دول بتاعت عملت رياضة النهاردة ؟ وكمان الرياضة بتخلص من التوتر واي مود وحش وبجد اللي مش بيعمل رياضة مش عايش
ومحروم من احساس ان عموده الفقري والهيكل العظمي كله يوجعه :)
المهم أفتكرت تاني موضوع الأسانسير وجه في بالي ان الانسان ده غريب اوي
الأبواب بتبقى موجودة حواليه بس بيركز في مكان واحد بس قدامه ومش بيبص حواليه وبيفضل يبكي قدام الباب المقفول زي ما قلت قبل كده


كنا بنوتتين في الجيم وجت بنوتة رفيعة جداااا ، البنوتة اللي معايا قالتلها ايه اللي جابك؟ انتي جايه تعقدينا ولا ايه ؟!!!! وضحكنا كلنا وبدأنا نتكلم وطلعنا احنا ال3 بندرس انجليش :)
البنوتة الرفيعة جدا خلصت تربية انجليش والبنوتة التانية في رابعه تربية انجليش وانا ENGLISH ART
وفضلنا نتكلم عن المناهج والدكاترة وباعتراف البنوتيين ان مناهجنا أصعب بكتير من تربية
وقولتلهم ان التربوي عندهم اصعب
بنوتة منهم طلع عندها 30 سنة ومش باين عليها نوهائيا انها 30 سنة
وانا والبنوتة التانية في سنة رابعة في الكلية
البنوتة اللي في الكلية بصتلي وتنحت قالتلي انتي في سنة رابعة؟
قولتلها وانا ببتسم أيوة
قالتلي انا مفكراكي في ثانوي :)
كنت هقولها أومال لو عرفتي روح طفلة مش عايزة تكبر كنتي قولتي ايه بقى :)
كلمة اني في ثانوي دي اتقالتي كتير من وانا في اولى كلية :)
واحنا راجعين للبيت بالكتكوتة عربية كسرت عليا وانا طبعا اعصابي سابت ما هي ناقصة
اسانسير وعربية تكسر عليا وتخبط فينا
المهم فاديت العربية المتهورة وانا اعصابي سايبه لقيت اللي في العربية لما عدى جنبنا قاللي
اجمدي ومتخافيش ، انا عايزك تبقي جامدة !
يعني تموتنا وتقولي متخافيش ايه الناس الغريبة دي

هناك 15 تعليقًا:

sony2000 يقول...

معلشي يابنتي
طب دي غلاسه اللي فالشارع
اوماااال تعملي ايه فاللي بيغلسو فالجامعه
بجد
الله معنا:)

MR.PRESIDENT يقول...

احمدي ربنا جات سليمة ، روحي بقي الجيم البونوتاتي علي طول عشان ما تدبسيش في أسانسير ، ولما حد يكسر عليكي تنزلي تديله كام بوكس ...:)
الحمد لله اليوم عدا بخير واحسن ما فيه انك اتعرفتي علي اصحاب جدد

MaNoO يقول...

هههههههههههههههه الراجل عنده حق برده لازم تجمدى يابنتى تتهزى من اسانسير وكسره عربيه وقال ايه بتروح الجيم كمان لازم تكون روحك كمان فيها لياقه ومرونه بصراحه انا اترعبت منا لاسانسير تخيلت انى فيه والله

فراشة يقول...

حبيبتي ألف سلامه لماما .. بخاف شوية م الاسانسيرات لو ركبت يبقى مع حد عشان لو كدا نموت سوا هههههه
آه افلام الرعب دي والله هتجيبلنا هسهس انا اي صوت بقيت اخاف منه

وعندك حق مش بنشوف بس غير الباب المقفول ونفضل متمسكين بيه لحد ماعمر الواحد يضيع ويقول ياريتني .. ربنا يستر

فعلا الرياضه بتنعش الجسم والذهن كمان وبتدي احساس بالراحه جامد طبعا غير احساس الوجع دا طبيعي عشان مش متعودين ع الرياضه :)

هههههه ايه دا فكرتك ف ثانوي كويس والله .. أنا حرمت أقول لحد اني متخرجه من3 سنين بحس اني صدمتهم,,هو صحيح الشكل بيبقى عامل مساعد بس كمان اسلوب الكلام أكيد بيخليهم يحسوا كدا أكتر

وخلي بالك من نفسك ,الناس أغلبها بقت غريبه جدا ربنا يسترها معاكي ف كل حاجه يارب

قلم رصاص يقول...

انا متهيألي خوفك من بعض الاماكن والمواقف زي اللي حصل معاكِ يوم الأسانسير دا نتيجه منطقيه لمشاهدتك لأفلام الرعب .. انا مش شايف انه من المنطق البنت تشوف أفلام رعب حتى ولو من باب الإطلاع على الروايات العالميه او الثقافه او حتى ولو من باب ان دي موضه السنين الاخيره .. !

خصوصا ان الامريكان بصراحه عملوا بلاوي في افلامهم تكاد تنخلع مما فيها قلوب بعض الرجال ، فما بالنا بقى بالبنات ؟

العقل الباطن ليه دور في الموضوع دا.. أعتقد ذلك !

عاوز اقول كمان اني

أظن الراجل اللي قالك في الطريق :
"اجمدي ومتخافيش ، انا عايزك تبقي جامدة !"

هيطلع هو العفريت اللي كان مستخبي في الدور اللي نزلته فيه من الأسانسير

^_^

رعب برعب بقىىىى هههههههههه

اتمنى لك التزفيق دايما

تقبلي مروري وتحيتي

لولا وزهراء يقول...

لـــــــــــيدى

صباح الخيرات
بصى يا قمر الخوف ده شعور انسانى عادى جدا
انا بقى باخاف من الاسانسير جدا جدا والحمد لله ان شقتنا فى الدور التانى من فتره كده كان نفسى اطلع اتفرج على الفيو من فوق سطح العماره يعنى حضرتك من الدور ال 15 طيب اعمل ايه المهم طلعت السلالم على رجلى لغاية الدور الثامن كنت خلاص هاموت المهم اعرف جاراتنا اللى ساكنه فى الدور ده رنت عليها الجرس وقعدت معها شويه ونزلت وقررت انى مش لازم اشوف الفيو من فوق هيبقى شكله ايه يعنى .....
يا سلام بقى النور مطفى وانتى خايف وتتفكرى فيلم رعب هههههههههههههه

انتى سكره بجد

تحياتى لكى يا ليدى

زهراء

هبة الحياة يقول...

موضوعك رااااااائعه جدا وبعد ازنك انا هاخده كوبي واحط لينك المدونه بتاعتك في مجروب اسمه الخوافين علي الفيس بوك
لان موضوعك جميل جدا

Ana keda يقول...

سلامتك يا حبيبتى
مالك روحتى للدكتور ليه؟
اوعى يبنتى تكونى تعبانة وكده
هههههههه
خلى بالك منك بقى
اه والله عندك حق فى موضوع الابواب المقفلة يمكن لاننا مركزين فى حتة واحدة
وفاكرين انها لو متفتحش مفيش حاجة تانية هتفتح
اه عجيب بتاع العربية ده
العب يا باشا

كيكى عوووووو يقول...

ومحروم من احساس ان عموده الفقري والهيكل العظمي كله يوجعه :)
الحمد الله يارب الف شكر ليك على كدة ان فى نعمه من غير ما اعمل رياضه!!
احنا فعلا ليه دايما بنركز فى اتجاه واحد رغم ان ممكن فى اتجاهات تانيه توصلنا لهدفنا واقل حسائر
ممممممم مش عارفه

قبلاوى يقول...

أمال بتروحى جيم ليه

كان المفروض تنزلى تضربيه

... اعتقد انى المفروض انا كمان افكر فى موضوع الجيم ده جديا

NeVeN يقول...

ازيك يا ايناس

ايه اليوم المرعب اللى خكيتى عليه دة
الاسنانسير دة بجد اكتر حاجة بتطلع روحى وانا جواه متعرفيشفوبيا دى ولا ايه


وجمدى قلبك كدة واللى بخبطك اخبطيه
هههههههه

مساءك فل

Just waiting يقول...

اه فكرتيني باسينسرات القديمة في عيادات الدكاترة بجد حاجة كدا رعب
لا يمكن اركبها
وبعدي انتي كسر عليكي واتخضيتي انا صوت في الشارع علشاان موقف مشابه قريب والناس اتفرجت علي وكانت فضيحة

Lyssandra يقول...

ازيك يا ليدي :)

ياتري هاتروحي بؤجة القاهرة ولا إيه
لو هاتروحي عرفيني النهارده عشان عاوزة اتفق معاكي علي حاجه

هاجي تاني :)

صباحك سكر

Lyssa

صدفة جميلة يقول...

thanks God about any thing
but you must be more cool and control your feeling for the future because the fair donot give you chanse to think good
donot whatch horrore films and only watch carton it is nice to you

" يـ ألوناتك ! " يقول...

السلام عليكم

انا فاكرة ماما لما تعبت وكانت لازم تقعد في المستشفا كم يوم .. وكانت مستشفى نضيفة اوي وشيك .. بس كانو بيصلحو في الاسانسير .. ركبنا بقا .. وكانت طلعة منيلة .. كنا حاسين الارضية واقعة .. غير طبعا موضوع الاسلاك و ان المراية متكسرة وشكل الاسانسير بقا مرعب بعد الحرب .. ربنا ستر ووصلنا :) و في بقا اتنين بقو عايزين يروحو حمااااااام :p