الأحد، 25 أبريل، 2010




خلينا نتفق في الأول ان اسمي في المدونة lady E
لو كنت عايزة ادخل بإسمي الحقيقي عالمدونة مكنتش كتبت اسم مستعار
وبعدين كمان مبحبش حد يندهلي بإسمي غير المقربين جدا مني وعلشان كده فضلت في التدوين سنتين تقريبا محدش يعرف الا اسم ليدي
فياريت فضلا لا أمرا انا عالمدونة اسمي lady E اتفقنا :)

مش عارفة ليه النهاردة حاسة ان جيلنا مظلوم اوي
في حاجات كتير في حياته بقت مزيفة
التدين بقى مزيف بقى تدين شكلي وبس
الحرية بقت مزيفة ده لو أصلا في حرية
التعليم بقى مزيف بقى مجرد ان احنا رايحين المدارس والجامعات وجايين م المدارس والجامعات :)
الصحة برضه بقت مزيفة أغلب جيلنا معندوش طاقة لا نفسية ولا جسمانيه
الصداقة بقت صداقة مصالح ما عدا القليل جدا منها والحمد لله انا عندي أصدقاء نادرين في الزمن ده

وكمان جيلنا جه في وقت غريب يعني مكنش في تكنولوجيا خالص وفأجه بقى في تطور غريب
فمفيش جيل قبلنا كان عنده تكنولوجيا فيفهمها ويفهمها لنا والجيل اللي قبلنا مش بيفكر زي جيلنا حتى لو كانوا احسن مننا بكتير

وأخيرا الفن الراقي اللي بيسمو بالشعوب مبقاش موجود لا في مصر ولا في الوطن العربي عموما
أغلب الكليبات والأفلام بقت موجهة للغريزة مش للروح وفي الحالة دي عندهم حق يقولوا الفن اللي من النوع ده حرام وده أصلا مش فن دي تجارة
بعد لما شوفت وسمعت أغنية Je suis malade ل داليدا ول لارا فابيان اتأكدت ان حاليا مفيش حاجة اسمها غنا جنب الناس دي ولولا فيروز وأم كلثوم وكل العباقرة مطربين زمان مكناش هنعرف يعني ايه فن راقي أصلا !
أول ما سمعت Je suis malade من داليدا عينيا دمعت برغم ان مكنش في ترجمة عالأغنية وبرغم كمان اني مش فاهمه كل الكلام لكن فاهمه بعضه و داليدا ، كنت حاسة في عنيها انها بتقول ل اللي حواليها
انها اد ايه حزينة ووحيدة وبرغم ان مش هي اللي كاتبه الكلمات الا انها غنتها بشكل رائع
وقدرت توصل الاحساس كويس اوي هي ولارا
على فكرة الأغنية دي كانت أخر أغنية ل داليدا وبعدها انتحرت !

وعلى رأي فؤاد المهندس لما كان عايز يتكلم هندي
انه بياكل منجا هندي وبيستحمى حمام هندي
وامبارح جاب فيل هندي صغبر
انا بقى بسمع أغاني فرنساوي
وبقرأ كتب فرنساوي _ مترجمة طبعا _ :)
وعندي برفيوم فرنساوي :)

وأخيرا

كان يا مكان كان في انسان بيحب يساعد الناس وبعدين في يوم من الأيام جتله انسانة غلبانة ومن حياتها زهقانه
فساعدها ماديا وعمل لها مرتب تاخده كل شهر وفاتت الأيام والراجل في يوم نسي يبعت فلوس للانسانة الغلبانه
فرفعت علية قضية :)

معنى الكلام ان اذا انت أكرمت الكريم ملكته واذا اكرمت اللئيم تمردا
المشكلة اننا نعرف مين الكريم ومين اللئيم

People never tell you
The way they truly feel


تنويه بسيط : لما اتكلمت على فيلم ليجيا البوست اللي فات
مكنتش لسه شوفته وحيث انه مفيش عليه تنويه انه للي عمرهم فوق ال150 سنة فأنا مكنتش عارفة ان في مناظر خارجة ده غير كمان انه فيلم رعب
وفي اختلافات كتير بين الفيلم وبين القصة وان شاء الله هقول الاختلافات دي في بوستات جايه
دمتم بخير

هناك 10 تعليقات:

هراء لا داعى له ..... يقول...

150 سنة !!!


طيب

إحنا عندنا مشكلة فى غاية الضخامة

ألا و هى إنفصام شخصية مجتمعنا اللذيذ

بمعنى

إن المجتمع دا لما بيخلفنا بيقولنا إنه مجتمع مسلم

بينما تصرفاته بتقول غير كدا

إيه يا عم إنت تصرفاته دى ...؟

تصرفاته إللى بتظهر فى الإفلام و الأغانى
و الإعلام و علاقته بأعداء الدين و سيطرة العقلية الغربية على تصرفات الشعب و تفكيره على مستوى الأفرجماعات

بمعنى لو قارنا بين صورة المجتمع المسلم كما أوسس لها فى القرءان و السنة و بين مجتمعنا فى صورته الحالية

هنلاقى إن مفيش أوجه تشابه إلا فقط فيما يتصل بوجود الجوامع للصلاة و شرائط القرءان فى محلات الكاسيت و شوادر الياميشلما رمضان بيقرب
و دى كلها مظاهر متصلة بأساسيات الإسلام

لكن اللبس ، المعاملات ، التفكير ، الثقافة ، العلم ، الحرية ، .......و غيرها من صفات المجتمع المسلم

مش موجودة أو على أحسن تقدير هى مضمحلة و نحيلة فى مجتمعنا الحالى

و دا بينشأ عنه نوع من إنفصام الشخصية عندنا كلنا لما بنقارن مجتمعنا دا بالمجتمع الذى كان يفترض أن يكون عليه

و علشان كدا بينشأ داخلنا ـت كشباب بالذات ــ نوع من الصراع النفسى الداخلى بيتسبب فى تشويه أفكارنا و تمزيق أرواحنا

كما هو كائن بالفعل .......

فراشة يقول...

حاضر انتي تؤمري يا حبيبتي
بس انا بحب أناديلك باسم الدلع بس خلاص نخليها هنا ليدي

هو انا م الجيل دا ولا انا كبرت هههههه بس عندك حق بحس اننا الحياة مختلفه كتير قوي قوي عن ايام الجيل اللي قبلنا على طول مش عارفه ايه اللي خلانا كدا معقول التطور أدي لتدهور اخلاقي وثقافي وديني ..احتمال برضه

الفن بقى تدهور برضه زي كل حاجه ف حياتنا لما بسمع حليم وعبد الوهاب وفيروز بحس ان مينفعش اسمع غنا تاني

بالنسبه للفيلم انا حملته وخايفه اشوفه بصراحه وبعد كلامك هفكر مشفهوش :)

وحشتيني خالص

الشـوكة الــنـاعـمـة يقول...

السلام عليكم
واضح انى هادخل المدونه دى كتير
ليدى e لكى ان تتمتعى بكامل خصوصيتك
ثانياانتى عندك حق كل حاجه بقت ع الريحه مابقاش فى اصل كل حاجه تقليد
كل حاجه كدب مابقاش فى صداقه ولا حب وتعليم بجد
كل حاجه مجرد مسخ من الاصل
احيكى على فكرك وكلماتك
تقبلى مرورى

MR.PRESIDENT يقول...

هناك شيئا إما ان نبكي علي كل شيء ونرثيه أو نبستم ونصحح ، كل في مجاله ، ويا ليدي إيه كما تحبين إسمك اتمني وهذا رأي وليس حكماً عليك الا تنشر أفلام أو اسماءها لعلها تكون ليكي زخرا يوم القيامة تكرمي علي التدوينة

sony2000 يقول...

جيييييييييتي لمربط الفرس
جيلنا دا ربنا بس هو اللي عالم بيه
وبالات فكل حاجه بتقوليها
لااحنا فاهمين حاجه ولا اللي حولينا بيفهومنا
نفسيا متدمرين
وجسدجيا مدمرين اكتر ومحتاجين قطع غيار من اي مصنع صيني موجود:)
طب نعمل اييييييييييه
الله معنا

لولا وزهراء يقول...

لـــــيدى

تصدقى بقى انا نفسى اعرف اسمك ايه
هههههههههههههه
المهم انا باحب كلمة ليدى اوى اوى واصحابى المقربين منى اوى لما احب ادلع حد فيهم اقولها انتى ليدى

بصى يا ليدى
نعيب زماننا والعيب فينا وما لزماننا عيب سوانا
الناس اتغيرت
النفوس بقيت ضعيفه
فاكره اغنيه ايهاب توفيق اول ما الواحد يعلا مش عاوز حد معاه وبينسى مين كان واقف جنبه لحد ما علاه وكانه كبير طول عمره وماكانش ضعيف وصغير
الدنيا ما بتغيرش لكن احنا اللى بنتغير
ده تعليقى على البوست
اتمنى لكى السعاده

زهراء

صوت من مصر يقول...

الزيف له حلول لكن من يقتنع به هو من ليس له حلول

MaNoO يقول...

عارفهمش قادر اقول دا ظلم لجيلنا ولا ايه بالضبط لان كل كلامك صح ومنقدرش نهرب منه برغم كل دا برده بنتعلق بالأمل البسيط الموجود لسه سواء فى التدين او المزيكا او الحريه لاننا لازم يبقىف ى أمل عشان نعيش وبالنسبه للقصه اللى قلتيها انا عندى جمله بحبها اوى فى ناس دايما تقول كن ذئبا حتى لا يأكلك الذئاب حاجه شبه كدا
انا بقى بقول تعلم متى تكون ذئبا ومتى تكون حملا دا الصح
تحياتى

SHAPE YOUR LIFE (ABOALI) يقول...

الجيل ده مظلوم ؟؟
طب يا ترى مين الظالم ..هو برضوا نفس الجيل بمعنى ان العيب علينا وفينا ..صحيح مش كل الناس بتخطىء نفس الاخطاء ..لكن من المؤكد ان كل فرد له دور فى الاصلاح وليس كل دوره هو ان يبكى حزنا وتحسراا على الزمن وظروفه لان الله لا يكلف نفس الا وسعها ولا يظلم احد ولذلك من المؤكد انه اعطانا القدره على التعايش فى هذا الجيل بما يرضيه عنا ويرضى عنا انفسنا .

بالنسبه للاسم فطبعا يا ليدى ده حقك وليدى اسم شيك ولذيذ.

تحياتى ليكى يا ليدى وموفقه دايما.

أحمد شريف يقول...

السلام عليكِ
أولاً : حمدالله على سلامة والدتك وإن شاء الله تكون في تم صحة

عن ثانياً أقول : المجتمع بخير ليس لأنك رأيت نماذج سيئة أن تعممي النظرة .. صدقيني المجتمع فيه خير كثير .. فقط حاولي أن توسعي دائرة الرؤية
وجود شر وفساد أمر طبيعي في أي مجتمع وبأي زمان .. هذه سنة حياتية

ثم ثم ثم نعم يوجد فن طالح فاسد لكن كذلك هناك فنانين محترمين يقدمون فناً راقياً مهذباً .. على سبيل المثال لا الحصر : محمد الحلو ، ماجده الرومي ، غادة رجب
القائمة تطول

نعم كان هناك لهث وراء مطربات سيئات لتستعرض بأجسامها لكن الحكاية كلها تجربة مدتها حوالي خمس سنوات وأغلب شركات الإنتاج طردت تلك المطربات والمطربين الآن .. لأن السوق لم يستوعبهم فبالتالي خسرت شركات الإنتاج وهذا دليل على نقاء المجتمع وأن الصفة الغابة عليه هي الإيجابية

نعم يوجد سلبيات بحاجة لتقويم وثقافات بحاجة لتعديل .. لكن التعديل لا يكون ببسط النظرة التشاؤمية بل التسلح بالعزيمة والتفاؤل والحماس .. صدقيني أنت هكذا من تظلمي جيلك .. انهضي وقومي وتفاءلي وضعي خطط تساهمين من خلالها كفرد وكمواطنة في نهضة المجتمع وتقويم سلوكياته

أخيراً : أحييكش على ما تحمليه من قيم محمودة وأتمنى أن تكون هي رفيقة عمركِ على طول الطريق

آآه نسيت .. سعيد أن تشاهدي حملة ممارسة الرياضة من أجل الرياضة ... لأني سعيد بها وتابعهتا وهي بحاجة لتسويق إعلامي من شباب النت والتدوين

شكراً لكِ