الأحد، 11 أبريل 2010

يارب كتر أفراحنا


ملحوظة قبل ما ابدأ في البوست : تعليقات البوست اللي فات ان شاء الله هرد عليها ده مش تطنيش اطلاقا بس انا فعلا مضغوطة كلها شهر ع الامتحانات ومشروع تخرج وشيتات ودوفوار وبلاوي سودا وأؤكد لكم اني مبعملش ولا حاجه من دول والوقت بيروح في ايه؟ الله أعلم وبعترف بتقصيري الشديد في الرد في المدونات لكن الأكيد اني متابعاكم وربنا يسهل وأزهقكم من كتر التعليقات

انا طاااااايرة عاملة دماغ رومانسية انما ايه رهيبة ، النهاردة كان فرح بنوتة صحبتي وانا فعلا بدور ع الفرح فين اليومين دول عااااااايزة أفرح بقىىىىىىىى ولقيت ايمان العروسة بتعزمني ع الفرح
ايمان صحبتي من وانا في خمسة ابتدائي وفضلنا أصحاب لغاية ما دخلت اعدادي بعدها الدنيا شغلتنا وخدت كل واحدة في طريق ، كنت بحب مامتها جدا وكانت حنينة جدا وكريمة جدا ومعطائه جدا الله يرحمها

هختصر الأحداث وهبدأ من أول لما دخلنا على الزفة قبل القاعة
الزفة الدمياطي مفيش زيها فيكي يا مصر ودي حاجة معروفة طبعا ، حاجة جميلة بجد ويمكن أحلى من الباند والدي جي كمان وبيعملوا روح جميلة في الفرح

أخت العروسة زي القمر والعروسة ملاك في الفستان الأبيض والجو كان برد جدا وهوا جدا ، ماما سابتني ودخلت القاعة وانا وقفت في الزفة مع العروسة والعريس
العروسة من بحري دمياطية والعريس من قبلي من أسيوط وهكذا تلتقي الحضارات :) وعلشان كده الزفة كان فيها فقرات رقص صعيدي ورقص بحري :) ابتسمت ابتسامة ذات مغزى :)

بعد شوية ماما جت بتقولي انتي بردانه قولتلها لأ اطلاقا ومسكت ايديها وايدي من كتر البرودة بتلسع :) زي شويبس بالضبط الجو كان برد بطريقة غريبة بره القاعة وكملنا الزفة وكان في واحد في الزفة شبه دكتور اسلام بالضبط – دكتور في كليتنا – تقريبا دكتر اسلام بيشتغل دكتور الصبح وبيزود دخله بالفرقة بالليل :)
بجد نفس الشكل ونفس الصوت ونفس الحركات ونفس الزعيق :) كان بيزعق للمعازيم علشان يبعدوا عن العروسة


اكتشفت اكتشاف هائل ان صعب التعامل مع الفستان الأبيض وانه بيبقى تقيل وعايز معاملة خاصة وعايز تدريب من العروسة ازاي تمشي فيه وازاي تقعد بيه قبل الفرح :) طول الزفة كنت مفتقدة مامة العروسة بطريقة غريبة الله يرحمها

بس برضه مهما شفت من زفاف تبقى زفة مامتي وبابتي أحلى زفة ويارب الزفة بتاعتي تبقى في جمال الزفة بتاعتهم

أه صحيح انا جالي عريس زي القمر كفاية بس نظرة عينيه ولا ضحكته ولا الغمازات ومرضاش يشيل عينه من عليا طول الزفة وعنده 6 شهور بحالهم :)

ودخلنا القاعة وحبسوا العريس والعروسة في أوضة لغاية لما الزحمة تخف شوية وبعدين يدخلوا القاعة
ودخلوا القاعة على أغنية طلي بالأبيض طلي يا زهرة نيسان لماجدة الرومي انا بعشق الأغنية دي ومعرفش ليه دمعت لما سمعتها ، وأول رقصة سلو كانت ع بالي حبيبي ل اليسا حسيت كإني أول مرة أسمعها

ع بالي تكملني واسمك تحملني ، بقلبك تخبيني م الدنيي تحميني ، وتمحي من سنيني كل لحظة عشتا بلاك – يعني من غيرك – بس ممكن تبقة بلاك بمعنى سودا يعني كل لحظة سودا عشتها من غيرك :)

ورحت في دنيا تانيه وحسيت ان انا اللي برقص سلو مع عريسي وسرحت بقى وتخيلت كيكي معايا ما هي على طول بتقولي هتبقى معايا يوم فرحي انا حاسه انها فشاره ولو عملت فرحي في دمياط مش هتيجي لازم اعمله على سطح بيتهم علشان تحضر :( بجد يا كيكي تخيلتك معايا يوميها ومع عريسك برضه وبترشي بيرسول بس مش عالعريس هههههههه زي ما احنا متفقين وعالعموم يا اختي انتي مدعيه عالفرح من قبل العريس :) ولما يجي أبقى اعزمه عالفرح زي فرحه برضه :)



حاجة معجبتنيش حماة العروسة وقفت بينها وبين العريس في الزفة ، يارب انت عارف انا ان شاء الله هحب حماتي لأنها السبب في وجود حبيبي في الدنيا لكن مش هقدر استحمل ان حاجة زي كده تحصل في يوم انا بحلم بيه طول عمري

يارب يفرح كل البنوتات والشوباب
يارب كل الناس تلاقي الحب اللي بجد اللي يفرحها ويقر عينها طول الحياه
الحب اللي يطلع أحلى حاجة في الزوج والزوجة ، الحب اللي مبني على مودة ورحمة
يارب كتر أفراحنا وابعد عننا الكدابين والمزيفين والحاسدين زي ما باعدت بين المشرق والمغرب
وعقبالنا كلنا

هناك 17 تعليقًا:

فراشة يقول...

ربنا يفرح قلبك ويسعد ايامك يااااااارب انتي وانا وكل المسلمين والمسلمات يارب

انا مبحبش الافراح نوهائي وبروحها بس عشان قرايبنا .. معرفش ليه بايني معقدة هههههههه

لو فرحانه مع عريسي خلاص كفايه هو لازم الناس تتفرج علينا ما لو بيحبونا هيفرحولنا من قلبهم

يارب دعواتك تستجاب وكلنا نلاقي الحب اللى بجد اللي ربنا قال عليه

ويارب يفرحنا كلنا يارب
وحشااااااااني

قلم رصاص يقول...

الف مبروك لصديقتك
وعقبالك ان شاء الله في اجمل ليالي العمر

بخصوص دكتور اسلام
مش دا الأستاذ بقسم اللغه الانجليزيه بأداب المنصوره بردو؟

لو هو اللي تقصديه ،انا فاكر شكله واسمه من السنه اللي قضيتها فيها قبل ما احول كلية الحقوق.

بس هو ابعد مايكون عن تحسين دخله بعد الظهر ، أصله متهيألي كان خجول شوية..

أما بقى فيه واحد تاني انا فاكره ، اسمه الدكتور حمدي شاهين ،، دا بقى ممكن يرقص باليه عشان يجيب فلوس .. طبعا لتسديد ديون مصر مش عشان نفسه
هههههههههههه


لتاني مره باقولك :

عقبال فرحك ان شاء الله وربنا يرزقك بابن الحلال اللي يستاهلك وتستاهليه.



تقبلي مروري وتحيتي

sony2000 يقول...

عقبالك ياقمر لما تفرحي وفرحك دا يكون احلي فرح
اللهم امين
بس اوعي تنسينا يوميها:)

E73 يقول...

أول تعليييييييييييييييييييييق
على ما أظن

بسم الله الرحمن الرحيم
السلام عليكم ورحمة الله وبركاته

مليون مبارك لإيمان صحبتك
وعقبالك وعقبال كل البنوتات
والله يرحم والدتها ويسكنها فسيح جناته يا رب

وربنا يجعل حماة ايمان ست طيبة ومتبقاش ....... ولا بلاش

ومليون مبروك ليكي على العريس الخفة اللي لقطك من الزفة ده .. ياختي مكنش فيه مقاس أكبر شوية؟

وآمين آمين آمين آمين على كل الدعوات اللي قلتيها تحت دي

صيدلانيه طالعه نازله يقول...

ربنا يفرحك و يفرح كل اللى زيك يا جميل

و بعدين جميل اوى العريس ابو غمازات و اللى عنده 6 شهور ده
بس بصراحه حياخد منك شغل جامد قوى
ههههههههههههههههه
بامبرز و سيريلاك و عك كتير
شوفيلك حد اكبر شويه
يعنى سنتين تلاته و اهو يطلع على ايدك و تكونى ضامناه

لــــ زهــــــراء ــــولا يقول...

ليدى

الله على كلامك
ربنا يفرح قلبك يا قمرايه
بجد كلامك مليان فرحه
اقولك بقى على حاجه على اعتبار انى بيقول عليا منسقة افراح والحمد لله شوفت افراح كتير
بصى يا ستى موضوع الفستان ده لازم العروسه تبقى مرتاحه فيه يعنى مثلا تقدرى تمشى به كويس ومش يكون طويل اكتر من اللازم لازم يكون فى حد قريب منها على طول علشان يساعدها انها تقف او يضبطه اهم حاجه تكون مرتاحه فيه بجد ....
دى شوية نصايح ع الماشى كده بس وقت الجد ان شاء الله هتلاقى نصاااااايح كتييييييييير اوى فى تنسيق شكل القاعه والجيرب ربنا يفرح قلبك ويفرح كل قلوبنا يااااااااااااااارب

زهراء

د/ رامي شهاب الدين يقول...

الف مبروك وعقبالك يارب مع عريسك ابو 6 شهور ده

انا حضرت قبل كدة فرح بزفة دمياطى وكان فعلا جامد ، وأكيد فرحك كان أفضل نتيجة لتلاقى الحضارات الشمالية والجنوبية .. ماعلينا

بخصوص فستان الفرح ففعلا كان الله فى عونكم ، يكفى إن بعض الفساتين من جوة فيها حلقات حديد عشان الفستان يفضل منفوش .. حمالين قسية والله ، وحديد كمان ههههههههههههه

دمتى بكل ود .. تحياتى

الجواز و سنينه يقول...

يارب كتر افراحك يا ليدى اى
و ان شاء الله تفرحى فرحتك الكبيره يوم فرحك مع واحد يحبك و يقدرك
اوعى تخلى مامه العريس تقف جنبه فى الكوشهدافعى عن عريسك علشان هيه فى يوم كانت عروسه و دافعت عن عريسها و عن حقها فيها
عارفه انك هاتحبى حماتك بس هيه كمان لازم تحبك و تعرف تقف فين
و تخيلى ده بيبدأ من بدرى
ربنا يسعد الجميع و يهدى الحموات

غير معرف يقول...

عقبالك يا جميلة إن شاء الله
وحشاني مووووووووووووووووت ، أخيراً عرفت أعلق عندك .
شدي حيلك في المذاكرة عايزين نجاح بتفوق .
ديدي

موناليزا يقول...

عقبالك ياقمر وربنا يتمم لها بخير

همس الاحباب يقول...

الف مبروك لصاحبتك
وعقبالك يا ست البنات
ولو على كيكى متخافيش هنجيبها لحد عندك وما فيش مانع تبات معاكى كماان
متخافيش هى عاملة رجيم مش هتاكل الاكل كله هتخلى العضم
ههههههههه
تحياتى

كيكى عوووووو يقول...

كشفتى الزر يافتكات
فضحتينى والى كان كان
انتى نسيتى انا برش البير سول لية ؟؟
دى التحية واجيب وولاعه مع البيرسول واعمل احلى واجب
عرفتى ازاى انك لازم تعملى الفرح فوق سطح بيتنا انتيحتى ياناس وعارفانى
يااااااااااااااااااه
والله حسيت بفرحتك لصاحبتك
انتى قلبك قلب خصية
عقبالى
عقبالى
عقبالى

احم احم اقصد عقبالك ياقلبى
رصيدى خلص على فكرة وعديت العرض
وهجيلك بتاكسى هاااااااا
ماشى ياخالد والله لتكون اول ضحية ليا
ههههههههه
عوووووووووووووووو

KEBLAWYAT يقول...

ألف مبروك يا فندم وعقبالك

ومبروك العريس :) .. بس مش كبير عليكى شويه ؟

أنا - الريس يقول...

عباااااااااااااااالي ياااااااااااااارب
طبعا بهني العروسين ، وان شاء الله كل واحدة بنت حلال تلاقي واحد ابن حلال ويتجوزااااا ويبقي زيتنا في دقيقنا وعبال كل اللي نحبهم ، واللي مش نحبهم كمان ، اصل اللي مش نحبهم تم اختيارهم فيستاهل اللي اختارهم ، علي فكرة يوم جواز البنت بيكون صعب جداً علي الأب والعكس في جواز الإبن ..
شكرا علي البوست

Ana keda يقول...

يا رايق انت
ههههههههههه
فكرتينى بيوم فرحى كان يوم عالمى والله يبنتى انا كنت مهيسة تهييس غريب فيه انا وجوزى وروحنا البيت الساعة 4 الفجر
والفستان متفكرنيش ااااه كان بديل كده وطويل وجابلى اعاقة وكل شوية اشلت فيه كان فيلم والله
هههههههههههه
يا رب يا ليدى ربنا يديكى الى يستاهلك ويقدرك كده يا حبيبتى
ونيجى فرحك بقى ولا كيكى مقتصرة عليها الدعوات :p
وحشانى اوى والله

شوكولاتة يقول...

عقبالك يا بطوطة يارب وأشوفك كده في الكوشة وهاجي أحضر

safa7_karmooz يقول...

ربنا يفرح صاحبتك ويفرحك وكل اللى بتحبيهم يااااااااااااااااارب

على كده البوفية كان حلو ولا لاء؟؟ :p