الأربعاء، 7 أبريل 2010

مجتمع غبي وعايز الحرق


النهاردة بنوتة زميلتنا جت الكورس وهي في حالة صدمة ، مالك يا فلانه مبتردش
مالك في ايه؟ مبتردش

وفي الأخر أخدتني على جنب بعد الكورس وقالتلي وهي ماشية في الشارع واحد اتحرحش بيها - في الشارع في عز الضهر ومعرفتش تتكلم -

طبعا الولاد هيقولوا البنت لبسها مش حلو الحجه المتخلفة والخايبة اللي بيتحججوا بيها

البنت منتقبة وزي ما بتقول عن نفسها انها خيمة ماشيه عالأرض يبقى بأي سبب الحقير ابن الحقارى يتحرش بيها

واشمعنا التحرش ده موجود في مصر بس ومش موجود في اي بلد عربيه تانيه ، وحياة اغلى حاجه عندكو محدش يقولي المعيشة ويخترع ومبررات ملهاش لازمة

والله لو اديت لواحد أقصى مرتب ممكن يحلم بيه واديتله كل أسباب الغنى وهو أخلاقه وحشه وزباله ومش متحضر برضه هيفضل كده مش بالمادة ولا بالمكانة اطلاقا

وبعدين في مصر بس برضه اكسكلوسف في التحرش من نوع أخر التحرش بالمشاعر

واحد يفضل يمثل على واحدة انه بيحبها وبيموت فيها وفي الاخر يسيبها ويروح يتجوز صالونات وممكن اوي تطلع البنت اللي اتجوزها مشيت مع كل سكان البلد وضواحيها وعلى المقيمين خارجها مراعاة فروق التوقيت بس هو غباء مستحكم

واحد يفضل يكلم واحدة عالنت ويقولها يا حياتي وذكرياتي وامنياتي ف الحياة والخ الخ الخ وفي الأخر تكتشف انه متجوز وعنده اربع عيال أوعنده 60 سنة وبيمثل انه شاب

عمالة بسأل نفسي مين ال....... اللي اخترع المدارس والكليات

الأطفال في مصر دونا عن كل اطفال العالم عمرهم بيتسرق بيرجعوا من المدرسة مدروخين والدروس بتقضي عليهم وبعدها يناموا
وهكذا زي الحيوانات اللي مربوطة في ساقية ولا بيستمتعوا بطفولتهم ولا بيمارسوا أي نوع من أنواع الأنشطة ولا حتى بيتعلموا لأنهم بيحفظوا وخلاص وفي نهاية الترم بيرموا كل اللي حفظوه في ورقة الاجابة وخلاص وكل عام وانتم بخير

* كل عرض من العروض التجارية أو البنكية أو حتى التعليمية أو الصحية او الاعلامية لازم ميكونش فيها صدق ، مفيش حاجة ممكن تثق فيها في مصر لأن أكيد هتتسرق ويتنصب عليك للأسف

* واقفة كتير مش عارفة أعدي الشارع النهاردة والعربيات هاين عليها تدوس على الناس اللي ماشية
وكل ما بتزيد تناحة السواقين بتزيد تناحة المشاة وبينتج عن كده الوضع المزري اللي في الشوارع دلوقتي

انا خلاص تخليت عن كل احلامي اللي ممكن احققها هنا طالما انا عايشة في مجتمع زي ده وأعترف اني خايفة انزل القاهرة وأعيش فيها لوحدي ، خلاص هنسى حلم الدراسة في الجامعة الأمريكية ، هنسى شهادة HR TRAINER
هنسى دراسة الموسيقى ف الى الجحيم وفي داهيه يا كل أحلامي لأني خايفة من المجتمع ده ومش هعرف أعيش لوحدي فيه

متلعنونيش يا احلامي اني حلمت بيكم ومقدرتش أحققكم ومتزعلوش مني

يا محمد منير دي مش بلد البنات زي ما انت بتقول دي بلد الدراع ، كل واحد بياخد حقه بدراعه والانسان المتحضر اللي عنده عقل ملوش مكان فيها

وعلى رأي أبو الليف الندالة دي حالة عامة

هناك 33 تعليقًا:

KEBLAWYAT يقول...

"واشمعنا التحرش ده موجود في مصر بس ومش موجود في اي بلد تانيه ، وحياة اغلى حاجه عندكو محدش يقولي المعيشة ويخترع ومبررات ملهاش لازمة"

زى ما قلتى مجتمع عايز الحرق

P A S H A يقول...

ممممم

شكلك مشحونة و ع الآخر .. روقي وسيبيها على الله
:)
مش عارف هي صدفة ولو أنتِ قاصداها إن آخر البوست ع اليمين أجد تلك العبارة مكتوبة :

" اذا الدنيا كشرت في وشك عوم واتمخطر عوم واتمخطر "

عشان كده باقول لك إن تعليقي ده تعليق منه فيه :))

ربنا يكرمك يا ليدي يا رب وتكوني بألف خير إن شاء الله ويوفقك للخير دايماً .

وبعدين يا ستي اتفائلي خير في الله .

مش هو قال برضه : "لو بطلنا نحلم نموت" مين عارف مش "ممكن" ؟

تحياتي
:)
سلام

Sad Angel يقول...

ااااااااااااااااااااه
اه يانى اه

هموت والله
الضغط بيعلى عليا
كل اللى حكيتى عنو
وكل اللى اتكلمتى عنو
مريت بيه انا عشتو
عارفه بكره البلد دى اوى وبكره الناس اللى فيها اوى

عايززة اروح اى مكان بعيد عن هنا
ان شالله المريخ حتى

اه يانى يامرارى ااااااااااااه

الزهرة البرية (Joudy) يقول...

متفكرنيش بجد باللى حصل لى بصراحة أنا بقى عندى جنون الارتياب بقيت خايفة أمشى فى الشارع لوحدى ولو مشيت ببقى متبرجلة وبتلفت حواليا دى بجت حاجة بقت تخنق الواحد مبقاش حايي بأمان أنا بخرج من بيتنا بالعافية لازم سبب قهرى يخلينى أخرج

خايفة الحال ده يفضل كتييييييييير

بجد ربنا يستر

دمتى بكل الخير والسعادة

صيدلانيه طالعه نازله يقول...

التحرش كتير عندنا لان مفيش قانون رسمى بيمنع التحرش
و اما نهى رشدى من سنتين حاولت تاخد حقها من اللى اتحرش بيها طلعت عينها من اول الضابط اللى فى القسم لغايه المحاميه اللى اتقلبت عليها و ادعت انها اسرائيليه

بالنسبه لموضوع النت و اللى بيحصل فيه فحدثى و لا حرج لاننا كعرب مش بنقدر الخدمات اللى بيقدمها النت صح و بنستعمله اسوا استعمال


اما بالنسبه للعيال و المدارس و الامتحانات فانا معاكى فى كل اللى بتقوليه
لانى حاساه و لامساه و شايفااااااااااااااااه

عااااااااااااااااااا

انا مش باعيط و لا حاجه
دى دموع الفرح يا انوس

لــــ زهــــــراء ــــولا يقول...

ليدى

-*-*-

مسا الفل
واضح ان القمر زعلان ومتضايق معلش ممكن بس استئذنك ان الكومنت يكون طويل شويه ....
نعيب زماننا والعيب فينا وما لزماننا عيب سوانا ....
لو قعدتى تتكملى مع حد من العيله كبير فى السن يعنى ست او رجل هيقول ان الستات زمان كانوا يلبسوا ملابس قصيره جدا جدا ومع ذلك لا كان فيه تحرش ولا اغتصاب ولا قلة ادب ولا قلة ذوق
والله العظيم الستات الكبيره فى السن ممكن تتعاكس من شباب صغير مش مهم هى لابسه ايه او شكلها عامل ازاى ...
الله يرحم الادب والاخلاق ومعاهم الرجوله اللى على حق ....

بالنسبه انك خايفه من انك تنزلى القاهره تقريبا انتى من دمياط لو الذاكره مش خانتنى صح ...
كملى دراستك وتعليمك وانتى واثقه فى نفسك وقبل ثقتك فى نفسك خلى عندك ثقه فى ربنا وان شاء الله ربنا يوفقك ...

بالنسبه بقى للكدب اللى اصبح منتشر تقريبا ده موضه وماشيه فى البلد واى حد بيقول الصدق نقعد نشكك فيه ياترى هو فعلا صادق بجد من كتر النفاق والكدب الواحد بقى مش عارف الصدق فين ...

رغيت كتير اوى
سورى يا ارق ليدى ...

زهراء

واحده و خلاص يقول...

مش عارفه اقولك ايه غير انى كمان حاسه بشمئزاز من المجتمع اللى اقل كلمه فيه غبى بجد مش هقولك غير انى بجد بقيت اكرهه امشى فى الشارع عارفه لما تكون ماشيه وحاسه انك هدف لاى حيوان معدى جمبك بجد انا ببقى ماشيه مرعوبه لو حسيت بخطوات قريبه منى علشان موضوع الزفت التحرش لدرجه انى دايما بيكون فى ايدى مقص صغير او ابره تشريح او اى حاجه حاده بجد انا كرهت انى بنت وبجد لحد دلوقتى مش عارفه لو بنت اتعرضت لحاجه زى دى تلجأ لمين انتى عارفه ان حتى الحرس اللى على باب الجامعه حاجه كده منتهى السفاله وبيوقف البنت لو عجبتو والكارنيه ويشوف الصوره ويطابق ب الاصل واسئله غبيه ونظرات اغبى وفى الاخر تلاقيه واقف فى نص بوابه عرضها مش اكتر من متر ومش عارفه انا المفروض البنت اللى عايزه تعدى تدخل منين
انتى عارفه انا كنت مع واحده صحبتى فى نادى الاطباء وطلبت منها اننا نشرب شاى قبل ما نزاكر لقيتها متضايقه لان صاحب الكانتين هناك نظراتو مش مظبوطه وكمان بيتكلم كتير بس انا كانت طالبه معاى شاى يعنى المهم رحنا وفعلا حد كده كبير لقيت اللى جاى يعرفنا على نفسو مش عارفه عقيد باين على المعاش مش فاكره ب الظبط بس كان رتبه يعنى ولسه هيكمل حوار حقيقى انا قفلتو وانا اساسا لما بتضايق ملامحى بتضرب غباء واتخنق مننا المهم الويتر طلب مننا نروح نقعد وهوا هيجيب الاوردر بس واستنينا نص ساعه ومفسش حاجه جت قمت اكدت تانى على الويتلر على الاوردر وبردو مش جه واستنتجت ان الكتكوت الرتبه سابقا ده طلب منو مش ينزلنا اوردر تخيلى حد حقير وحاول يفرض سيطرتو بحاجه تافهه اما بعد كده لما ادخل فى مجال الشغل وحد يبقى فى حد ممكن ينهى مستقبلى المهنى او حد يتحكم فى حاجه مصيريه مش كويايه شاى بجد انا نفسى اولع كمان فى المجتمع ده

E73 يقول...

بسم الله الرحمن الرحيم
السلام عليكم ورحمة الله وبركاته

يا بنتي أنا مش هنكر اللي انتي بتقوليه

لكن كل اللي هقولهولك ان متتغريش ببلاد الأخرى قوي كدة

بكرة لما تسافري برة مصر تقولي نار مصر ولا جنة غيرها

ربنا يعافينا

كل بلد فيها اللي مكفيها والحمد لله ان القرف اللي في مصر من نفوس شعبها

وعلى فكرة كل واحد فينا جواه عيب ومش واخد باله منه حتى الناس اللي مش عجبينك دول بيلعنوا العيشة في مصر ومش عجباهم مع ان هم السبب في اللي بيحصل

وأنا مش فاهمة عمالين نقول مش عاجبنا التعليم وهو حد كان ضربنا على ادنا عشان نعلم ولادنا في مدارس الحكومة

منعلمهم احنا في البيت وان كان عالشهادة يبقوا يروحوا يمتحنوا وخلاص

قولي احنا شعب سلبي عوزين كل حاجة تجلنا على الجاهز كدة أصدق أكتر

بالتوفيق لنا جميعا

قلم رصاص يقول...

السلام عليكم

انا حقيقي محبط مما آلت إليه الأوضاع المجتمعيه والقيم والاخلاق في بلدنا..!

انتي لخصتي الموضوع في كلمتك دي:
"والله لو اديت لواحد أقصى مرتب ممكن يحلم بيه واديتله كل أسباب الغنى وهو أخلاقه وحشه وزباله ومش محتضر برضه هيفضل كده مش بالمادة ولا بالمكانة اطلاقا"

اتفق جدا معاكِ في هذه النقطه .. وصحيح فساد الراعي من فساد الرعيه كما قال شيخ الاسلام ابن تيميه ،،، الا اني ايضا لا ابرئ ساحة النظام الحاكم والحكومات المتعاقبه على تغيير كل شيئ في البلد .. كما قال قبل ذلك الأستاذ هيكل عن النظام الحالي بأنه غير جينات الشعب..!!!


انا عارف ان سياسات الحكومه ليست لها ادنى علاقه بأخلاق البشر والصالح صالح من يومه والطالح طالح من يومه بردو، الا اني مش قادر اهضم برائتهم من ايصال الاخلاق العامه في البلد الى حافة الهاويه كما نرى....!

موضوع التحرش دا من اكتر الموضوعات التي تؤرقني نفسيا لسبب وهو اننا لم نعد نشعر بالأمان على المرأة في المجتمع من ابناء البلد نفسهم .. فاكره زمان شهامة ولاد البلد لما كان الشاب يثور وينتفض لمجرد ان يرى احدا يعاكس بنت الجيران او بنت من اي مكان لابعرفها ولاتعرفه .. بدافع الشهامه والرجوله الخ الخ الخ !

حقيقي الموضوع شائك ومحتاج مشاركه من كل الفئات وفي كل وسائل الاعلام وان تقتنع الناس بوجود هذه الظاهره الجديدة وان تقتنع بسوء من يقوم بها وتنبذه ..

انا اقترح تعديل تشريعي لتغليظ العقوبه في مثل هذه الحالات للردع..ولا نصبر شويه لما نشوف ماذا سيسفر عنه الحراك السياسي اللي بتشهده البلد لعل وعسى يحصل تغيير لأن اي تعديل على المنظومه القائدمه في كل المجالات لن يأتي بجديد ولا بما هو مفيد لأننا نعيش في فساد وصل عنا السحاب !

فعلا والله زي ماقولتي : مجتمع غبي وعايز الحرق .. مع الاعتذار للحمار اللي في الصوره بردو.. لأنه لامؤاخذه حمار وليه عذره لو صدر منه تجاوزات .. اما نحن البشر فما عذرنا بالتعدي على خصوصيات الاخر والتحرش به؟!

أسأل الله الهدايه للجميع

واحييكي بشدة على الطرح المثمر

تقبلي مروري وتحيتي

sony2000 يقول...

لاااااااااا موش بحب الحاله دي
لاذم تقاومي المشاعر السلبيه دي
لو سالتي هتلاقي ان معظم البنات والسيدات اتعرضو للموقف ده
هتلاقي حجات كتيييير اوي حولينا غلط
بس هل دا معناه نتخلي عن احلامنا؟؟؟
هما ناس وحشين عوينك ترجعي لعصور التخلف
انتي عليكي تقاومي وتثبتي وجودك
دا اللي اقدر اقوله

أميرة علي كوكب مهجور يقول...

اهلا برياح الكأبه المستوطنه في شباب الجيل
ربنا كبير يا بنتي وقادر علي كل شئ والتناحه وقله الأدب هي لغه التعامل الان والتحضر ده لما تشوفيه سليملي عليه و قوليله انه وحشاني اوي

ان الله مع الصابرين
وان مع العسر يسر
وان دعتك قدرتك علي ظلم الناس فتذكر قدره الله عليك
وان كان الله معانا فمن علينا

فراشة يقول...

اولا وحشاني قووووي

ثانيا مش عارفه اقول ايه بس بجد دي ناس معندهاش تربية ولا دين ولا اخلاق م الآخر الناس اللى بتتحرش دي مريضه بجد ربنا يهديهم

بس التحرش موجود ف السعودية على فكره بسمع عن حوادث خطف واغتصاب كمان ربنا يحمينا كلنا يارب

فعلا التحرش بالمشاعر موجود ووصفك ليه دا بجد وصف حقيقي جدا وبرضه الناس دي ربنا يهديهم مريضه نفسيا مفيش انسان سوي هيعمل كدا

مفيش ثقة مفيش شفافيه,, مفيش فايدة
يعني بابا فتح عليا والله انسحب م الرصيد تقريبا 9 ج عشان ثانيتين دولي

تعليم مين يا بنتي مبقاش لا تعليم ولا تربيه بقى استغلال مادي بحت مع حشو العقول بشوية تخلف عقلي لحسن الطلاب يطلعوا بيفهموا ساعتها بقى هيعملوا انقلاب على كل حاجه

وقفه الشارع دي بقف تقريبا اكتر من 5 دقايق بس عشان اعرف اعدي يا اما اجازف واجرى ف الشارع زي الهبله عشان العربية متخبطنيش

وعن أحلامك ف المجتمع مش هيتصلح لو فقدتيها بالعكس لو حاولتي وحاربتي العادات السيئه والمجتمع اللي ماشي بالدراع هتقدري تحققي الاحلام الجميلة بتاعتك دي

دا مش تعليق دا بوست (كماله) هههههه
متحبطيش ومتتخليش عن احلامك لانك هتندمي ف يوم دا فيه ناس نفسها بس ف حلم تحلم بيه مش اكتر عشان تقدر تكمل حياتها

ثالثا .. بحبك قوووووي

AhMeD RaDy يقول...

بصى يا ليدى

هو انا مش هقولك عن حجج فارغةلاننى سئمت منها كثيرا ولا حتى اساسا يهمنى هى البنت دى لابسة ايه .. حتى لو لابسة لبس رقاصة

لان فعلا هى ازمة اخلاق .. المجتمع المصرى بقى عنده مشاكل فى اخلاقه .. ازمة رهيبة اسمها عدم تقدير الغير .. كل شئ حوالينا بقى مستفز للمشاعر وللشهوات ولكل شئ .. اللعب على الغرائز بقى اوفر

اشمعنا القاهرة بنت المعز ...؟؟ القاهرة بنت المعز هى المكان الاكثر التحاما لكل شئ فى البلد دى .. هى النقطة اللى عندها الجميع يندمج

تلاقى وجه قبلى على وجه بحرى على وجه عابس شيطانى الجميع يتحد .. يذوب حتى لا تسطيعين التميز ما بين الوجوه

احنا بقينا نرتكب الجرائم باسم كل شئ واى شئ .. المجتمع فاسد جدا .. لانه ثابت جدا لانه متحجر فى افكاره .. فكرة ان البنت تسكت هى الفكرة اللى لازم تستمر حتى يحصل الشاب على كل ما يريده الخوف من الفضيحة والتردد ما بين السمعة والشرف واللى هيحصل لما الناس تسمع دا عن بنت

احنا فعلا مجتمع لا يقول الا عواء فارغ لا يمس لاى طبيعة بشرية ندعى الايمان الزائف ... والواقع لا يدل الا على شديد الجهل والكفر بكل ما نحاول ان نقنع انفسنا ايمانا به

عذرا لتلك الفتاة التى حدث لها ماحدث ولكن لماذا الان فقط تطالبون بان يكون هناك رجالا .. فعصور الرجال انتهت منذ امدا بعيد ..

شكرا سيدتى لانك نشرتى هذا

اما احلامك فلا تدعى التلوث المشين هذا يطولهم .. فان تنازل كلا منا عن احلامه فلا تلومى اهل الظلام عن نجاحهم فى نشر ظلامهم ...اذا كنت يا من تمسكين بالضوء قرراتى بمحض ارادتك ان تتركى ضوءك المنير ... لظلامهم المزيف

تمسكى للنهاية باحلامك حتى تجبرى الاخرين ان يدركواان فى هذا الخراب المدمر ضوء وان كان ضوء شمعة .. ولا تجعلى غيرك يضل الطريق ان انطفاء ضوء شموعك

الى الامام .. استمرى .. تحفظى .. اصرى وحاربى .. لا تتركى السلاح الفتاك يلمس ارض الظلام .. قفى فى الميدان .. واصرخى بعلو صوتك

ساقتل للنهاية

غير معرف يقول...

السلام عليكِ
أولاً التحرش موجود في كل مكان وزمان بكافة صوره وليس في مصر فقط لو تتابعين أخبار بصورة جيدة ستجدي وتسمعي حواديت عجب العجاب في كل الدنيا

ثانياً : يعد حالياً في مجلس الشعب والدوائر النقاشية المختصة قانوناً لعقاب التحرش ويشتمل على كافة الأنواع ومنها التحرش اللفظي كذلك وهذا بشرة خير

ثالثاً وهو الأهم .. قلبي معك ومع صديقتك وأنا مقدر تماماً لحالة الغضب التي تعتريكِ ولو كنت معك أو مع صديقتك أظن أن حالة الغضب تلك ستملكني كما هي الآن .. والله بصدق أنا غضبان وحانق على هذا

الله المستعان

صمت المشاعر يقول...

الصراحه مش عارفه اقول ايه حاسه اني مصدومهاو حد رش علي وشي ميه ساقعه

بس انا معاكي في كل حرف قلتيه ومقتنعه بيه تمام

الدنيا معتش فيها امان نهااااااااااائي فعلا بلد الدراع البنات بعد كدا هتمشي والمطواه تبقي حاجه اساسيه في ايديها

ربنا يهدي الجميع يااارب

Bent Men ElZman Da !! يقول...

ليه بس التشائم ده
بصى طبيعى ان اى حد يعدى عليه فتره احباط زى اللى انتى فيها دى لو شاف موقف قدامه او اسلوب او اخلاق حد معين حس انها مختلفه عنه تماما وبتنافى اى تفكير كان فى دماغه او يتخيله
بس ده كله مايمنعش انك تحاولى تحققى احلامك
انتى اتنازلتى عنها من غير ماتحاولى لمجرد انك خايفه من المجتمع انه يرفض تحقيق احلامك ده
حاولى ويكفيكى شرف المحاوله
اما بالنسبه للتحرش
ده مابقاش عشان البطاله ولا عشان قله المرتبات ولا عشان الكبت النفسى والجنسى ولا عشان انعدام الاخلاق والوعى الدينى
ده بقى عشان كل الحاجات دى متجمعه مع بعضها واكتر منها كمان
والخلطه دى صدقينى مش تعمل تحرش وبس
دى تعمل اغتصاب كمان

محمد فؤاد (صاحب عمود النور) يقول...

ينهار ابيض

ايه يابنتى السووووواد دا كله؟؟
انا معاكى ان البلد بقيت حاجه لاتطاق
بس برضة نحاول نشوف اى جانب ابيض فى الموضوع
دا انتى لسه ماخرجتيش للحياة العمليه وبتقولى كدا امال لو خرجتى لمجال العمل هتعملى ايه؟؟؟

حنين الذكريات يقول...

الحقيقه البلد بريئه حرام تحكمى عليها بالحرق
العقول المقفوله والعادات اللى انتشرت عن طريق الاعلام هى اللى غيرات فى العقول
شوفتى بعض الاعلانات اللى كلها حقد وغل وطمع وحاجات تانيه
البنات دايما بتتعاكس ولكن موصلش للبيحصل دلوقتى
ماما نجوى كانت بتيجى مع بقلوظ يعمل غلط وتبين الصح والاطفال كانو بيقلدو بقلوظ ومابيخدوش بالهم من التصحيح اللى صححتها ماما
أقصد ان تركيز الاعلام احيانا كتير بيجى بعكس النتيجه
وفعلا كل ما الانسان اتغنى هيقول هل من مزيد مفيش حاجه بتملى عين البنى أدم غير التراب
وللأسف معدش صدق فى مشاعر ولا عروض ولا غيره العالم كله بيكذب على كله
مشكلة الاطفال فى المدارس فى مصر انهم فيران تجارب وياريت التجارب بتتنقل كام تطبق فى الخارج لكن للأسف بياخدو القشور فقط
ولا تتخلى عن أحلامك ان شاء الله ربنا يحققها وتحلمى تانى
ربنا يوفقك

Ana keda يقول...

يالهوى يا ليدى مالك بس يا حبيبة قلبى ؟
والله انا امبارح برضه كنت ع اخرى بس الدنيا زفت اى نعم بس برضه اول حاجة بالنسبة للتحرش موجود وبغباء والله لو لابسة ايه برضو بس الحل انك تبقى معاكى الملاية اللف يا ليدى والله هنا لازم قليل من قلة الادب واللسان الطويل عشان تسلكى
ومينفعش تسكتى هزأى وعلى صوتك الناس دى بتبقى جبانة جدا صاحبتك كانت المفروض تتكلم
ولان فى بنات كتير بتسكت سواء حياء او من الخضة الناس دى بتتمادى
تانى حاجة العربية لما بكون راكبة بكون عاوزة اولع فى البنى ادمين ولما بكون ع رجلى بكون عاوزة اولع فى العربيات :)
ازدواجية يا اوختى دى ولا ايه
انتى متتخليش عن احلامك لاى سبب كان لان المجتمع هيفضل زى ما هو وانتى الى هتضيعى حلمك وهدفك
طول ما ربنا معاكى خلاص تعالى انتى بس هنا فى القاهرة وانا هقعدك معايا انا وعبد الرحمن مش يبنتى انتى خالته هو هيعرف ياخدلك حقك
بحبك اوى

هراء لا داعى له ..... يقول...

و أنا كذلك مواققك فى كل كلمة و كل حرف

فعلا

مجتمع غبى و عايز الحرق

مجتمع عنده إنفصام فى الشخصية

مجتمع ماشى على إيديه زى المهرجين



فعلا شيء مزرى و مؤسف إنك تبقى مصرى




الموضوع مش موضوع تحرش و لا موضوع فساد تعليم و لا موضوع فساد أخلاق

دى كلها نتائج

دى أعراض إكلينيكية ما هى إلا معبر
عن أمراض متفشية

مجتمع مريض

SHAPE YOUR LIFE (ABOALI) يقول...

مش الحل يا ليدى اننا نتنازل عن احلامنا ونعلن الاستسلام للواقع المرير ...فهناك من غيروا فى ظل ظروف اسوا من ظروفنا حاليا واستطاعوا بقوه الاراده والايمان ان يضعوا بصمه نور تنير لهم ولمن حولهم ....ولكن كلنا نحتاج ان نعيد ترتيب اوراقنا ونقترب اكثر من خالقنا ونحاول احداث التغيير بداخل انفسنا اولا ثم بعد ذلك يقينا سنستطيع التغيير فيما حولنا .

ابتسمى يا ليدى لان الحياه مليئه بالصعاب والتحديات ولكن الله لا يكلف نفسا الا وسعها وهو الذى اراد لنا ان نعيش فى هذا الزمن والعصر وتحت هذه الظروف لاننا حتما قادرين عليها ولكننا نحتاج ان نعرف انفسنا اكثر.

كيكى عوووووو يقول...

ياااااااااااه
اكتشافاتك دى وخرى اوى
بس يعنى الواحد يعمل ايه يعنى يهاجر يسافر برة
فاكرة ان دة الحل يعنى؟؟
مين قال ان الهروب هو الحل الامثل للمشكلات
وان السلبية هى البديل الافضل!!!
عيشى وانقدى
وهتحلى مرة
ومرة هتخيبى
ماهى دى الحياه يانونتى فى اى حته فى العالم
يلى بتسأل على الحياه خدها كدة زى ما هى فيها ابتسامه وفيها اه
فيها قسية وحنيه
********************
نرفزتك فى البوست وصلتلى على الاخر شوفتى خلتينى ارد ازاى
خلاص بقى انا كمان زهقت ومسافرة برة عند ستو فى شبرا
ال مش هتيجئ الجامعه الاميركية عشان افهمك زى انجى انها المتحف المصرى
يلا ربنا يشفينى ياختشى واروح معاكى
فكك ياعم الحج
عوووووووووووو

ريمان يقول...

ازيك يا انوس

واللهى انا محروق دمى برضه

بصى

زمان كانوا بيتحرشوا بالبنات اللى مش لابسين كويسن زى اللى لابسين محزق كده وملزق انما الوقتى بقى كله بيتحرش بيه سواء منقبه او مختمره او لابسه طرحه او بشعرها يعنى كله كله
وزمان كانت الحلوة بس هى اللى بتتعاكس الوقتى بقت الوحشه والحلوه بتتعاكس كله زى بعضه

وقبل كده كانوا بيعاكسوا البنات الصغيرين بس

الوقتى بقى كله كله

هههههههههه حتى العواجيز بيتعاكسوا الوقتى والستات الكبار

هو مجتمع عايز الحرق حسبنا الله ونعم الوكيل

ربنا يهدى هنقول ايه بس

بجد والله نشكو الى الله ما نحن فية

ستيتة يقول...

شوفي يا ليدي

ما لا يؤتى بسيف القرآن يؤتى بسيف السلطان

لو السلطان مش عاوز قانون يمنع الفضائح دي مش ها يقره

لو عاوزه شكلي ها يطلعه يفطس من الضحك

ولو عاوز فعلا كل واحد يلتزم بحدود حرية الأخرين ها يطلع قانون ميخرش المية

قصة التربية قصة غير محلولة
لأن بكل الشواهد الدنيا من سيء لأسوء

ربنا يحميكم كلكم ويفاديكم

يومين كده وها تلاقي حلمك بيزغلل عينك تاني
هو وأد الأحلام ده بالساهل؟
لأ
دي حالة مؤقتة خالص ان شاء الله والعزيمة ها تنتصر ان شاء الله

تحياتي ودعواتي ربنا يحميكي انتي وكل بنت طموحة وجدعة

مجرد بنت يقول...

والله معظم كلامك فل
بس على فكرة التحرش موجود فى كل بلاد العالم
بس فى مصر موجودة بصورة غبية ده لان اساسا مفيش تربية يا عزيزتى اذا لم يوجد حجر اساس مهما ارتفع البناء واخد من الجمال مالم ياخذه احد من قبل ينهدم لانه مفيش اساس اصلا


وبالنسبة للاطفال ياعزيزتى
والله والله انا بقيت اشفق على اختى لدرجة انى ساعات بقعد اكلم نفسى واقولها اهدى هى مضغوطة ولازم تلعب حبة لازم تفرح عن نفسها يا ليدى احنا مبقاش عندنا اطفال احنا بقا عندنا دواير بتلف على بعضها

سعيدة جدا بزبارة مدونتك

د/ رامي شهاب الدين يقول...

ههههههههه هى وصلت لأبو الليف كمان

بصى .. موضوع التحرش هو سلوك شاذ مستحدث فى بلدنا نظرا لغياب الرادع وتطبيق القانون فعليا

أيوة فىه قوانين تعاقب كل جانى ، بس للاسف محدش بيتكلم سواء الضحية أو شهود العيان وخلافه ، لأنهم بحكم تقاليدنا الشرقية عيب نتكلم فى الحاجات دى ونخليها توصل لأقسام الشرطة والمحاكم إلخ

عمر ماكان الإستسلام والتخلى عن أحلامنا هو الحل ، عمر ماكان سخطك على المجتمع هو الحل ، ماهو المجتمع دا عبارة عن أنا وإنتى وناس تانيه كتير فيها الكويس وفيها قلة من المش كويس ، ليه مانبدأشى نحاول نقضى على القلة الشاذة فى المجتمع بدل ما إحنا شغالين سخط وإستسلام

لو طبقنا القانون فى كل حالة وأخد الجانى جزاءه ، الظاهرة دى هتختفى ، لكن المتحرش عارف إنه هيعمل عملته وهيهرب دون عقاب

أتمنى إنك تخرجى من مود الإحباط ده ، وتتمسكى بكل أحلامك وتسعى لتحقيقها ، فالحياة أقصر من أن نقصرها

دمتى بكل ود .. تحياتى

beautiful mind يقول...

دي اول مرة ازور فيها مدونتك
وكان نفسي تكون حالتك المزاجيه او المود احسن من كدا شويه
لكن للاسف دي بقت حالة عامة عند كل الناس
وعندك حق فعلا في كل كلمة قولتيها لان الغباء والجهل والتخلف سيطر علي عقول ناس كتير جدا في بلدنا
لكن نصيحتي ليكي هي الصبر ومحاولة تغيير الاوضاع
يمكن الموضوع صعب
لكن العجز اصعب
تحياتي
وان شاء الله البوست الجاي يكون اجمل

Lady E يقول...

قبلاوى : عايز حرق أفكار البالية المملة وأخلاقه اللي بقت في الحضيض

دمت بخير

Lady E يقول...

P A S H A : اكيد لازم ابقى مضايقة جدا لما الاخلاق في بلدي توصل لكده

على فكرة انا كنت هحذف صورة نيمو ودوري اللي بتقول عوم واتمخطر قبل ما اكتب البوست ومرضتش تتحذف :)

اللهم أمين وليك مثل دعائك يا شريف باشا

وطبعا متفائلة خير في الله لكن في حاجات كتير في المجتمع مش مضبوطة واتمنى انها تتغير

وقال "ربك لما يريد" و"دور ع الناس "

دمت بخير

Lady E يقول...

Sad Angel : البلد ملهاش ذنب يا انجل كل مكان في الدنيا ليه عيوبه ومميزاته

العيب في الناس اللي اخلاقهم اتدهورت جدا

ربنا يهدينا ويهديهم

Lady E يقول...

الزهرة البرية : ربنا يحفظنا جميعا يا حبيبتي

خليها على الله بس ابقي مستعدة لأي موقف

وربنا يحمينا من كل شر

Lady E يقول...

صيدلانيه طالعه نازله : وحتى لو في قانون ، هو في حد في بلدنا بيحترم قوانين ؟ ولو في قوانين هتفضل السلبية موجودة برضه دي عادات مجتمع صعب تتغير بين يوم وليلة لكن اللي ممكن يتغير ان كل أنثى تغير تفكيرها وتبقى ايجابيه ومتخفش لو حصلها موقف زي ده انها تتكلم

النت اللي بيستعمله غلط بالطريقة دي ناس تعبانه نفسيا وعندهم عقد نقص كتير

ربنا يعينك يارب ويوفقك ابنك وبنوتتك يارب

Lady E يقول...

لولا وزهراء : يسعد صباحك ومسائك

من غير اسئذان يا زهراء اتكلمي من القلب

اكيد في السبعينات كانت الموضة الميني جيب ومكنش في تحرش بالعكس لما واحد كان بيتجرأ وبيعاكس واحدة كان الرجالة في الشارع بيبهدلوه

انا مش بتكلم على تكملة الدراسة انا بتكلم على كورسات نفسي أخدها وموسيقى نفسي اتعلمها وكل ده مش موجود الا في القاهرة

ربنا يجعلنا من الصادقين ونتعامل مع الصادقين

ارغي براحتك يا احلى زهراء دي حاجة تسعدني

نورتيني