الثلاثاء، 13 أبريل 2010

ليست قصص لكنها قصيرة 1

الدكتور أعتذر

من ساعات وانا مش متحمسة للمحاضرة ولا للكلية ولا لأي حاجة في الدنيا غير النوم ، طبعا ما الامتحانات قربت وانا قبل الامتحانات ببقى فلة يا روحي وبحب الهروب من الواقع المتقوقع الى قيعان العقل الباطل
النهاردة كان عندنا محاضرة أدب والأدب فضلوه عن العلم بندرس رواية اسمها جوزيف اندروز وبإختصار القصة بتتكلم عن واحد كل الستات اللي في الرواية بيغروه وهو بيتمسك بمبادئه للنهاية وبيقولوا ان الكاتب أستوحى القصة من قصة سيدنا يوسف وبطل الرواية اسمه جوزيف يعني يوسف برضه
لكن المحاضرة مقدرش أقول انها مملة وبرضه مش مملة والضاكطور اللي المفروض قدوة مضايق ان تلميذاته محجبات وعايزنا نعيش حياتنا وبلاش الكبت اللي احنا فيه - بالحجاب-، الضاكطور غلط في في أيات القرأن قبل كده في المحاضرات وكلنا بننسى لكن طالما هو مش متأكد من معلوماته بيقول قرأن ليه؟ احنا في محاضرة أدب ولا دين ؟ وهو أصلا مش قدوة في الدين
كفاية لما أي طالب/ة يبصوا في ايده بيلمحوا دبلة دهب
بجد سعيدة ان الضاكطور اعتذر عن المحاضرة النهاردة ويارب يعتذر باقي الترم

رباعيتي

مش هتقدر تحب بعدي
أيوة عارفة هتموت في بعدي
كل حاجة حلوة عدت
هيجي يوم تندم عليها


يا خسارة

ليه بيقربوا وليه بيبعدوا فجأه ، رحيل المدونين بقى بالجملة وبصراحه في منهم اللي فرحت انه ذهب ولم يعد
وفي منهم اللي اتفاجئت جدا انه ذهب ولم يعد
الانجنير احمد ابو العلا كان اولهم وبعدين صيدلانيه طالعة نازلة وبعدين شيما الشعب لابد له من حكومة تشكمه
وفي مدونات بقت مهجورة بمعنى الكلمة زي مدونة شريف باشا اللي قفل التعليقات وزي مدونة هاجر زعبل اللي برضه قفلت التعليقات وزي مدونة فتافيت اللي مفيش فيها غير موضوع واحد مبيتغيرش وزي مدونة MY GRAVEYARD اللي مفيش فيها مواضيع جديدة من شهر
يا ترى ايه اللي بيحصل للمدونين وليه الانسحاب الجماعي ده ؟ وليه جو الاحباط ده

مشروع تخرج (ليجيا)

عندي مشروع تخرج في مادة الأدب الأمريكي وهو اني أختار قصة أمريكية لكاتب أمريكي وأحللها وأعرف ليه الكاتب كتبها في الوقت ده - على أساس اني اخته الكبيرة فعارفه كتب القصة دي ليه - :)

يعني هل كتب القصة دي علشان كان بيناقش ظاهرة في المجتمع ولا في ايه بالضبط
طبعا مشروع التخرج ده مزهقني لأنه مش وقتـــــه خااااااااالص ومش مهم أصلا ومش عارفة هنستفيد منه ايه
كان قدامي أكتر من 1000 قصة والاختيار بينهم كان حاجة تجنن ، ولأن من سماتي الشخصية اني مبحبش يبقى قدامي اختيارات كتير أوي فلجأت لمساعدة خارجية من مستر محرم وهو اللي اختارلي قصة ليجيا LIGEIA ل إدجار ألان بو واللي أصلا لما بحثت شوية عرفت ان حياته كانت فيلم رعب ، كان كل ما يحب حد يموت ، ده غير انه كان يتيم واتربى بالتبني واتطرد من كل كلية راحها بسبب انه كان بيلعب قمار وبيشرب خمور لدرجة رهيبة
واتجوز وهو صغير ومراته كان عندها 13 سنة بس لكن في النهاية ماتت ومش مهم أكمل باقي المأسي
هو نفسه مات وهو عنده 40 سنة يعني كان شاب
قصة ليجيا بإختصار بتحكي عن واحدة مرضت بمرض نادر وأكتشفت انها هتموت فحبت تبقى خالدة وعملت كل حاجة ممكنه علشان توصل للخلود بس مقدرتش - ده اللي فهماه من القصة لغاية دلوقتي - لأنها قصة رعب بمعنى الكلمة وكئيبة أخر حاجتين تلاتة

شكرا للمدون الرائع psycho لأنه عرفني أدب الرعب وشوية من كُتاب أدب الرعب ف وانا ببحث في مشروع التخرج فاهمة شوية انا بقرأ عن ايه

اكتفي بهذا القدر من الرغي وجاري الرد على تعليقات البوستين اللي فاتوا

هناك 8 تعليقات:

كيكى عوووووو يقول...

انتى حاسه بأحباط
المود اتنقل ليا هو موجود اصلا
بس بندمج مع الحبايب وبعدين ضحكتينى اوى
على أساس اني اخته الكبيرة فعارفه كتب القصة دي ليه - :)
ههههههههههههههه
انتى مشروعك عن قصة انا مشروعى منيل بنيله ياريتوا كان عن قصة
ربنا يسهل
ياااااااااااااااارب
عووووووووووو

Ana keda يقول...

ليدى يا حبيبتى
اهدى يبنتى وبلاش كده انا برضو كنت بنام ساعة الامتحانات بس خلاص هانت اهو اخر تيرم ومش عاوزاكى تطلعى بشيكولاتة او ملبسة زى اختك كده :)
خليكى جدعة واصمدى اما عن الدكتور اقلبيه وخلاص يا ستى النماذج دى الواحد اتعود عليها جدا
القصة شكلها كده هيخليكى تلسعى فى الاخر ايه الراجل لاى يجيب الاكتئاب ده
ربنا يعينك بقى ودكتور محرم شكله بيعزك اووووووووى :)
بحبك يا مجرمة واجمدى يبنتى كده

د/ رامي شهاب الدين يقول...

الدكتور إللى بتتكلمى عنه ده للأسف أمثاله كتير ، مش فاهمين حاجة فى اى حاجة ومن موقعهم كناس مفروضين علينا التعايش معاهم لسبب ما يتحفونا كل فترة بأراءهم الفريدة .. نصيحة منى ليكى : كبرى دماغك ولا تهتمى باللى بيقولوه أصلا

ظاهرة رحيل المدونين أكيد كل واحد ليه أسبابه من مشاغل فى الحياة أو المرور بأزمات أو حتى التوقف عن التدوين لسبب يتعلق بالحالة النفسية والرغبة فى شئ من العزلة .. لو تعرفى حد فيهم وليكى وسيلة إتصال بيه ياريت تكونى جنبه وتحاولى تخرجية من اللى هو فيه

وأخيرا وليس آخرا ..لو عايزة تطلعى بجد على أدب الرعب يبقى تدورى سواء فى النت أو المكتبات على كتب عميد أدب الرعب فى الوطن العربى الدكتور أحمد خالد توفيق ، لأنه مش مجرد كاتب أدب رعب بل هيكون لك بمثابة نافذة ممكن تطلعى منها على أدب الرعب الغربى

دمتى بكل ود .. تحياتى

لــــ زهــــــراء ــــولا يقول...

ليدى
-*-*-

انتى عارفه انى منذ حوالى 3 شهور اعيد اكتشاف موضوع القصص القصيره كيف اكتبها ....
انتى بقى حكيتى شوية قصص رغم انها واقعيه لكنها ممتعه على فكره طريقة عرضك حلوه اوى اوى
تصدقى انا نسيت عاوزه اقول ايه
تقريبا دماغى باظت لانى كنت عاوزه اعلق على اكتر من حاجه:(( :(( :((
اه صح افتكرت حاجه لما كنت فى الكليه وبالتحديد فى سنه تانيه كان عندى ماده اسمها تاريخ قانون وكانت ماده ممله بشكل غير طبيعى وحمورابى وكلام غريب عجيب المهم كنت فى وقت امتحانات الماده دى انام بطريقه غير طبيعيه تقريبا كان هروووووووب برضه
تصدقى الهرووووووب برضه مفيد فى بعض الاحيان ...........

اتمنى لكى النجاح والتوفيق وربنا يكرمك

زهراء

قلم رصاص يقول...

+ مبدأيا أنا لا احترم هذا الدكتور
استنكار للحجاب ، وغلط في آيات القرآن
ناقص ايه تاني..انا لو منك معدتش احضر له تاني !

فعلا والله .. الأدب قبل العلم ^_^

+ الرباعيه حلوة اوي
بس ملحوظتي عليها ان قافية الشطر الرابع غير متسقه مع قوافي الشطرين الأول والتاني

اصل اللي اعرفه عن الرباعيه خصوصا الجاهينيات ، ان قوافي الأشطر الأول والتاني والرابع على نفس الموسيقى ، عكس الشطر التالت ، فهو حر !!!

أرجو تقبل ملاحظتي المتواضعه بصدر رحب
واوعي تفكري اني عاوز اعمل فيها ناصح أو رباعيست هههههه
انه تبادل المنافع ^_^

+ أتفق معاكي جدا في موضوع انسحاب بعض المدونين وخفوت شغل البعض وحالة الاحباط المنتشره في الوسط التدويني..فعلا شيئ مقلق لههذه الحاله الجميله وهي التدوين واللي باعتبرها بكل أمانه أهم واجمل ظاهره على شبكة الانترنت ^_^

ربنا يوفق الجميع لما يحب ويرضى

+ اما بقى بخصوص مشروع التخرج
ضحكت جدا على كلمتك اللي قولتي فيها :
"على أساس اني اخته الكبيرة فعارفه كتب القصة دي ليه - :)"

فعلا فيه بعد أستاذ جامعه لايمكن وصفه سوى بالتحفه في طلباته المتعلقه بالمواد اللي بيدرسها.

ربنا يوفقك وتقدري تخلصيه على خير

تقبلي مروري وتحيتي

sony2000 يقول...

بجد بجد
بدعيلك من قلبي
ربنا معاكي
واما المدونون
فشكلها كدا حاله ذهقان
وربنا يعديها علي خير
اللهم امين:)

أع ـقل مـ ج ـنـونــة يقول...

اذا جاء الامتحان .. حس المرء بأنه عاوز ينام

يابنتي دي سنة الحياة عاتشي يعني لاموآخذة :D

______

الضاكطور بتاعكو دا عاوز الحرق .. لو بيديني كنت قتلته او عملت مظاهرة عليه

يارب يعتذر باقي التيرم <_<

_____

رباعية جميلة .. خير الكلام ما قل ودل

_____

رحيل المدونين !!

اللي اقدر اقوله " لعل المانع خير "

______

مشروع التخرج ع اد ما انا حاسة ومقدرة تعبك .. لكن عاجبني لانه شكله ممتع جدا

______

اخيرا ..

ممكن طلب منك

بما انك ماشاء الله أدبية ممتازة

ممكن تعمليلنا مدونة تعرضي فيها الادب الانجليزي بوجهة نظرك وملخص لروايات وحاجات من هذا القبيل :D

هراء لا داعى له ..... يقول...

كلية أداب دى كانت و لا تزال حلم حياتى

رغم إنى دخلت طب بيطرى و إتخرجت و دخلت بعدها كلية حقوق كمان

إلا إن أداب قسم تاريخ ثم قسم فلسفة ما زالت تداعب أحلامى