الأربعاء، 31 مارس 2010

رحلة الأمس

طبعا انا بحب السفر وامبارح يوم 30/3 استعديت وظبطت الكتكوتة وسيري يا نورماندي على بركة الله

من قبل السفر بأسبوع كنت قلقانة علشان ذكرياتي مع أخر رحلة للقاهرة مش لطيفة خالص ختمت بحادثة شوفت فيها رحمات كتير من ربنا سبحانه وتعالى وفعلا ربنا هو المنجي من المهالك

طبعا منمتش الا ساعتين كالعادة
اتحركنا بعد الفجر على طول ع المطار لأن الطيارة كانت هتوصل الساعه 8 ونص وكان لسه النهار بيطلع والقمر لسه ظاهر ، انا مغرمة بالقمر وعندي استعداد أبص له وأسيب الطريق :)

الجو رائع وهادي ودمياط هادية جدا وروحانية جدا مليانة بأصوات المساجد والقرأن والصلاة وكأن الملايكة ماشية في الوقت ده

بدأنا رحلتنا بسورة البقرة بصوت المقرئ الشيخ الطبلاوي وبدأ النور يظهر ومنظر الشروق على الطريق الدولي الساحلي مع منظر البحر أو البحيرات اللي على الطريق مع منظر السحاب ياخد العقل

الجو برد شوية أوي وأخيرا النهار طلع وبدأت أشوف الطريق بوضوح أكتر
أحلى الصباحات على صوت بابا وصوته كان مرهق جدا وعنده برد وقلقت جدا عليه
وطبعا من وصايا بابا امشي على مهلك ومتستعجليش لسه قدامك وقت وربنا يحميكم
تفاصيل صغيرة زي دي بتفرق معايا جدا وبتخلي معنوياتي في السما

بعد شوية لقيت العربيات ماشية بطيء عرفت ان في رادار

بدأت اتعب ومعدتي توجعني وقعدت افتكر ايه اللي ممكن يخلي معدتي توجعني دلوقتي ؟
افتكرت تحذير جدتي الله يرحمها وخالتو مينفعش تاخدي شاور سخن وتنزلي في البرد علشان هتاخدي برد

قعدنا في أول استراحة في الاسماعيلية ودار الحوار التالي :

انا : في نيسكافيه ؟

- : أيوة يا فندم

انا : طيب في شوكولاته باللبن

- : أيوة في نسكويك

انا : طيب هاخد نيسكافيه

ورحت ظبطت حجابي وغسلت وشي ورجعت لقيت شوكولاته باللبن مش نيسكافيه قلت يمكن ده نوع نيسكافيه جديد :) وهو شكله كده بس فشربت منه لقيته مش نيسكافيه عااااااا بعد بشوية ندهت ل اللي اخد مننا الطلبات وقلتله على فكرة انا طلبت نيسكافيه وجالي شوكولا :) هو مفيش نيسكافيه؟





-قاللي بجد حضرتك طلبتي نيسكافيه ؟
-- أيوة :)
- أنا أسف والله يافندم هاتيه وأنا أغيره
-- حصل خير انا خلاص شربت منه
-لا يافندم بجد مينفعش هجيبلك نيسكافيه حالا
-- خلاص مش هقدر أشرب الاتنين مفيش مشكلة

وبعد شوية

- انا هجيب لحضرتك نيسكافيه حالا
-- خلاص والله انا مسامحة
- انا بجد أسف يا فندم بجد أسف وهجيبلك النيسكافيه
-- الموضوع منتهي بجد قدر الله وما شاء فعل

قلت في سري فينكم يا مطعم سي ستار تشوفوا المعاملة

ومشينا م الاستراحة وحسيت بألم في معدتي تاني طب وبعدين كده مش عارفة أركز في الطريق
وقفنا في استراحة تانيه وتالتة وبعدين تحاملت على نفسي وكملت الطريق وجينا عند بوابة الاسماعيلية وكان أقصى شعور بالتعب وقتها وحسيت ان روحي بتتسحب فحاولت أفوق نفسي وعملت تمرينات تنفس اتعلمناها في الHUMAN RESOURCE خففت شوية من احساس الألم

بعدها مشيت بسرعة نوعا ما وأنا مستمرة في التنفس بعمق وفجأه لقيت عربية ربع نقل بتشاورلي ان في رادار وفي لجنة قدام :( فهديت السرعة وفي اللجنة الأمين اللي هناك قاللي اركني – مش لابسة الحزام وبجري بالكتكوتة – وتقريبا شكلي صعبت عليه وحس اني فعلا مريضة جدا فقاللي بعدها على طول قبل ما اركن عدي
حتى انا اندهشت

وأول ما دخلت القاهرة حسيت ان روحي رجعتلي وسمعت جنات والجو كان حالم أوي وجميل وزحمة أوي
وقفت على المكان اللي المترو بيمشي فيه وعايزة أدخل الشارع طبعا ابتسم انا في القاهرة مفيش حد راضي يديلي طريق ف استخدمت طريقة الBASE بوز يعني تدخل ببوز العربية الشارع وكله هيوسع لك ما هو محدش عايز يخبط عربيته :) عملت الطريقة دي وطبعا العربيات اللي كانت معديه اتنرفزوا عليا :) بس ولا اهتميت مش هفضل مش عارفة أعدي الطريق أكتر من 10 دقائق يعني

ورحت المطار في المعاد بالظبط هما 9 دقائق تأخير بس علشان الزحمة
وطبعا فرحة كبيرة لما أي حد يكون رايح المطار بيستقبل ناس بيحبهم وواحشينه

وبعدين طلعنا على كارفور العبور والساعه كانت 9 ونص وهو بيفتح الساعه 10 قعدنا بره كارفور على الكراسي بتاعت ستاربكس واتكلمنا لغاية لما كارفور فتح



وبدأت أتعب تاني وبعدين لمحت من بعيد محل BABY SHOP جت في بالي مرمر أنا كده وابنها حبيب خالتو عبدالرحمن ، وبرغم ان المحل بعيد عن الهايبر لكن تقمست دور خالة عبد الرحمن و روحت واتفرجت على ملابس الأطفال وبجد جميلة ورقيقة أوي

وأنا طالعة م المحل لمحت صورة بيبي برضه فكرني ب عبد الرحمن ربنا يجيبه بالسلامه يا مرمر ويباركلك فيه


كان نفسي أصور اكتر من كده بس مقدرتش

قررت أجازف وأدخل محل THE BODY SHOP مع اني عارفة ومتأكده ان أسعاره هتبقى غالية جدا والمشكلة ان هو ده الأساس في مصر بالذات ،
الحاجة تتكلف ويبقى فيها ربح كويس لكن بيضيفوا عليها ربح 500 في ال100 :(
الحاجة الوحيدة اللي عجبتني خلصت :( وبعدين استحرمت اني أشتري كريم مثلا سعره نفس مرتب موظف في شهر وقلت لما اشتغل ان شاء الله –عندي أمل- أبقى اجيب بال 145 جنيه كل اللي انا عايزاه :)

لفت نظري اعلان في كارفور أشتري بقيمة 1000 جنيه -بحد أدنى- وأربح 4 تذاكر سينما :) عمار يا أوكرانيا ولا تعليق على الإعلان هسيب كل واحد يفكر فيه بطريقته

رحنا ركن الكتب في كارفور وملقيتش كتاب زغازيغ ولا لماذا من حولك أغبياء :( بدأت اتعب تاني وروحي تتسحب تدريجيا ، رحت أغسل وشي يمكن أفوق وتعبت جدا لدرجة اني مكنتش عارفة هخرج من كارفور ازاي أصلا مش هسافر ازاي ، لمحت صيدلية وخالتو راحت معايا قلت للدكتورة اللي هناك عايزة أي حاجة للبرد في المعدة وكتبتلي حاجات بس دي حاجة انا مضطرة ليها لكن اللي أدهشني بجد ان كذا واحدة جت شرحت للدكتورة الصيدلانية حالتها وكإننا في مستشفى مش في صيدلية ، بيتهيألي اننا شعب مبيحبش المستشفيات وبيثق في الطبيب الصيدلي أكتر من الطبيب البشري

ماما كان معاها بنادول اخدته برضه ، 3 اصناف دوا اخدتهم ومفيش فايدة برضه لسه تعبانه يا خسارة الفسحة أنا كده ضربت اليوم ومستمتعتش بالرحلة

الدكتورة قالتلي المفروض عالغدى تاخدي شوربة خضار أو سوتيه
قلتلها المفروض اني هتغدى بره النهاردة وانتي بتقوليلي شوربة خضار ! :(
وقلت في سري على رأي كيكي اللي كنت حاسه انها معايا وشفت بنوتة شبهها بالظبط في هايبر كارفور
"عند أمه يا أدهم " ومع ذلك مقدرتش أصلا اتغدى بره

ورجعنا وفي الطريق اتحسنت شوية والألم
بدأ يزول والمسكن عمل مفعول والطريق كان رايق

و برغم اني أول مرة اتعب كده في السفر
الحمد لله وصلنا بالسلامه وكانت رحلة جميلة جميلة جميييييييلة ضحكنا فيها كتير ومتوهناش :)

هناك 26 تعليقًا:

غير معرف يقول...

الف سلاااااااااااااااااااامة عليكى يا جميل

وحمد لله على السلامة

حمدلله انك استمتعتى والرحلة كانت حلوة

صيدلانيه طالعه نازله يقول...

?و فيها ايه يا بنوته انتى اما الناس تثق فى الصيدلى اكتر من الدكتور
فيه مانع و لا ايه؟
هههههههههههههههههه
الف سلامه عليكى يا نوسه و يارب تكونى بقيتى احسن
و حممد الله على سلامه المسافرين

دايما كده الرحلات يحصل فيها ما ينغصها بس ولا يهمك
الجايات اكتر من الرايحات

Lady E يقول...

star in the sky : الله يسلمك من كل شر يا حبيبتي

تسلميلي

Lady E يقول...

صيدلانيه طالعه نازله : هههههههه وانا أقدر أقول حاجة برضه :)

الدكاترة الصيدلانيين أجدع ناس وخصوصا دكتورة علا :))

وأنا عن نفسي مبحبش جو العيادات والمستشفيات بس المفروض ان الطبيب البشري والطبيب الصيدلي بيكملوا بعض واستشارة الدكتور الصيدلي بس بتخلي عليه مسؤلية كبيرة جدا وخصوصا انه بيعرف المعلومات من المريض وبس مش بيعتمد على تشخيصه وفحصه للمريض

الله يسلمك من كل شر يا حبيبتي والحمد لله بقيت أحسن برد المعدة راح وجالي بداله برد عادي :)

الحمد لله

نورتيني بجد :)

sony2000 يقول...

الف الف حمدلا علي السلامه
دي مصر كوووووووولها نورت بوجودك :)
وربنا يرجعلك الحبايب بالسلامه يارب
اللهم امين
بس صراحه انا بعمل كتير ذيك كدا وموش بسمع الكلام وفالاخر بقول لنفسي:ادي جذاء اللي موش بيسمع كلام بابا وماما:)

Sad Angel يقول...

الف سلامة عليك يا حبيبتى

بجد زعولتينى عليك خالص
الف سلامة عليك
والحمد لله انك قدرتى تنبسطى

ستيتة يقول...

انا عارفة قد ايه انتي كنتي تعبانة
سلامتك الف سلامة يا حبي

اعلق على ايه ولا على ايه

بس كل اللي اقدر اقوله ليه تجيبي حاجة من بدي شوب هنا
بابا يجيب لك معاه
انتي شوفي الانواع والروائح اللي تفضليها فيه وهو يجيب من هناك ارخص عشر مرات
اصلنا شعب عندنا رفاهية ودخلنا عالي ومش مهم ان الحاجة هنا بتتباع بعشر اضعافها

حكاية تصدير البوز دي مين علمها لك؟
دي تخصصي الدقيق
هع هع هع
وكله طبعا بيخاف من الستات
وانا بستغل خوفهم بشراسة
نيهاااااااااااعععععععععع

لــــ زهــــــراء ــــولا يقول...

الف سلامة ياقمر ...ربنا يحفظك ياااااارب

Bent Men ElZman Da !! يقول...

الف سلامه عليكى يا حبيبتى
حمدالله على سلامتك
المهم تكونى استمتعتى بالرحله :)

R-H-S يقول...

اولا حمدلله علي السلامه

اجمد حاجه عجبتني ان السواقين بينبهوا بعض ان في لجنه وخد بالك والحركات دي وتقلب نور وكلكسات
وبغض النظر عن ارمي بوزك السواقين المصريين امهر سواقين

الزهرة البرية (Joudy) يقول...

ألف سلامة عليكى ياقمر
والحمد لله إنك وصلتى بالسلامة

والأهم من ده كله إنك اتبسطى وكان يوم حلو رغم التعب

دمتى بكل الخير والحب والسعادة

غير معرف يقول...

السلام عليكِ
أعجبني السرد لرحلتكِ
ولا كتب الله عليك الداء في سفر أو غير سفر .. إن شاء الله

بالتوفيق

حنين الذكريات يقول...

الف سلامه عليكى
كنت حاسه بيكى وفضلت أتحايل عليكى لقيادة الكتكوته وأريحك شويه وتحاملتى على نفسك
ربنا يقويكى ويقدرك على تحمل أى صعب ويبارك فيك

MaNoO يقول...

الف سلامه عليكى ويارب تستمتعى كمان وكمان حلوه جدا طريقه سردك للرحله

P A S H A يقول...

ألف سلامة عليكي يا ليدي .

يا رب تكوني بألف خير إن شاء الله

وحمداً لله على سلامتك

:))

تحياتي

Lady E يقول...

sony2000 : الله يسلمك من كل شر يا حبيبتي

مصر منورة بأهلها

اللهم أمين

دمتي بخير وسعادة

Lady E يقول...

Sad Angel : الله يسلمك من كل شر يا حبيبتي

الحمد لله اني زعولتك مش زعلتك أصل هناك فرق نياهاهاهاها :))

Lady E يقول...

ستيتة حسب الله الحمش : اه يا خالتو ده كان يوم ولسه بعاني منه لغاية النهاردة

علقي على كله يا خالتو انا بحب كلامك

الاسعار في بودي شوب مش بتتغير كتير من فرع للتاني يا خالتو
الفكرة انهم بيشتغلوا على طبقة معينه في مصر عكس معظم الدول اللي اسعارهم بتبقى مناسبة لمعظم الناس ، مش أرخص 10 مرات ولا حاجة لكن مناسبة لدخل أهل البلد
وطبعا حضرتك عارفة ان اهل البلد مرتباتهم غير الوافدين

بس فعلا معظم السلع سعرها مبالغ فيه في مصر بشكل يدعو للاستغراب بجد

أيوووووووون عندهم عقدة من الستات اللي بيسوقو الكتكوتة بتاعتهم :)
أحلى حاجة انك بتستغلي خوفهم يا خالتو يستاهلوا

تصدير البوز او البوز بيز قرأت عنه قبل ما اخد الرخصة واستخدمته اول مرة في الزحمة ونفع الموضوع ده ومن يوميها بستخدم الطريقة دي نياهاهاها

Lady E يقول...

لولا وزهراء : الله يسلمك من كل شر

وانتي كمان :)

Lady E يقول...

Bent Men ElZaman Da !! : الله يسلمك من كل شر يا حبيبتي

ربنا يكرمك تسلميلي

Lady E يقول...

عاوز اصحي : الله يسلمك من كل شر

القيادة أصلا لغة تانيه وانت ماشي بالعربية لازم تفهم وتحس بردود الفعل في الناس اللي ماشيين وكمان لغة الكلاكس وتقليب النور حاجات مش اي حد يفهمها الا اللي بيسوق

هي مش ارمي بوزك هي تصدير البوز او البوز بيز

امهر سواقين؟! ممكن يبقوا اكتر سواقين متهورين لكن أمهر معتقدش

Lady E يقول...

الزهرة البرية : الله يسلمك من كل شر يا جميلة

وانتي كمان

Lady E يقول...

أحمد شريف : وعليكم السلام ورحمة الله وبركاته

ربنا يكرمك ، سعيدة برأيك

اللهم أمين وليك مثل دعائك

Lady E يقول...

حنين الذكريات : الله يسلمك من كل شر يا حبيبتي

طول ما انا معاكي الصعب يهون

تسلميلي دائما وربنا يخليكي ليا وليكي مثل دعائك

Lady E يقول...

MaNoO : تسلم يا مانو

الانسان الجميل بيشوف كل حاجه جميلة

Lady E يقول...

P A S H A : الله يسلمك من كل شر يا باشا

الحمد لله انا دلوقتي بخير

يارب دائما تكون بخير

دمت بخير