الأحد، 21 مارس 2010

أمي يا ملاكي يا حبي الباقي الى الأبد


طبعا أكره كل المسميات لكل الأعياد ذات اليوم الواحد عيد الحب ، عيد الأم حتى عيد العمال :)

الحب عموما أو الأمومة مش محتاجه ليوم علشان نعبر عنها والا كنا عملنا يوم الأبناء بالمره وكل أب وام يراعوا أولادهم فيه وباقي السنه ولا يعبروهم

ف من الأخر الاعياد دي فيها كم كبير من الأنانية والاستعباط واصلا ملهاش معنى

ليه ؟ لأن في عيد الحب مثلا مش كل الناس بتحب وانا الحمد لله بحب ربنا وماما وبابا بس مش ده الحب اللي بيجيب ورد ودباديب في عيد الحب :)

وفي عيد الأم مش كل الناس أم وانا برضه منهم :)

بس طبعا النقط اللي فاتت دي مؤقته يعني مش هفضل كده طول عمري يعني ان شاء الله الوضع ده هيتغير ، بس برضه مش بحب الاعياد دي ولا هحبها

وتعالوا نتخيل مع بعض أي حد يتيم بيكون احساسه ايه في اليوم ده

ولأن الأنانية سمة البشر ولأن أمي هي أغلى وأعظم انسانة في حياتي ولأن محل الورد كان زحمة جدا النهاردة ولأن كل
الناس بتجيب هدايا النهاردة بالذات فبهدي لمامتي الكلمات البسيطة دي مع اني كاتباها من زماااااااان

حين يجن العالم من حولي

حين أشعر بالإغتراب

عندما ارتعب من الزمان

عندما تقيدني الأحزان

يتلاشى كل شيء
ويبقى حضنك يا أمي يشعرني بالدفء والأمان

ربنا يخليكي ليا وانا بعشقك لأن كلمة بحبك قليلة عليكي

ربنا يحميكي ويباركلي في صحتك وعمرك ويحميكي من الانس والجن ومن أي شر


وربنا يسعدك ويفرح قلبك
-----------------------------------------------------
ع الهامش : كل ليلة من ليالي البعد عدت عليا وانت مش جنبي يا روحي يا نور عينيا يا نوووووور عينيا
حبي فيها كان بيكبر 100 ليلة واكتر والله 100 ليلة واكتر
انا بحب الاغنية كلها بس المقطع ده في بالي اوي النهارده عليكي

هناك 17 تعليقًا:

NeVeN يقول...

انوسة ايه توارد الافكار دة
انا لسة عاملة بوست حاطة فيه بس اغنية امى يا ملاكى اجى هنا الاقيكى عاملاه عنوان ؟؟


وبعدين فعلا عي الام وعيد الحب وعيد العمال
كل دة استعباط

بس اكيد اى يتيم فى ليوم دة بيتحسب من اسوء ايام السنة مع بداية كل سنة جديدة بيعد فيها ايامه اللى جاية


وحلوة اوى الكلمات اللى كتبتيها لمامتك

كل سنة ومامتك بالف خير وصحة

وحشتينى انتى

مساءك فل

Unknown يقول...

كل سنة وانت وهي طيبين ويارب يخليكم لبعض

Sad Angel يقول...

كل سنة ومامتك بخير
وكل سنة وكل ممهات الناس بخييييير وبهنا دايما

تحياتى ليك ياقمر

غير معرف يقول...

ربنا يخليهالك يااااااااااارب

وتجيبى بيبيهات صغنطوطين كده ويقولوا لك كل 21 مارس كل سنة وانتى طيبة

الجواز و سنينه يقول...

كل سنه و كل الامهات طيبين
عجبتنى اوى كلمه للبت شرين
لما قالت انها كانت عايزه تشتغل علشان تخلى امها تبطل شغل و ترتاح
كل الامهات تعبانه فعلا
و ماحدش بيعرف احساس الام ايه إلا لما بيجربه
شيئ تانى مختلف
كل التعب اللى الواحد بيحسه بيضيع فى ثانيه ادامهم
ربنا يخليلك مامتك و تسلم اديكى على الكلام الحلو اللى قلتيه عليها

صيدلانيه طالعه نازله يقول...

انتى جميله قوى يا انوس
ليدى بجد و الله باقولها و انا حاساها

كل سنه و انتى و مامتك مع بعض و كل الناس اللى بتحبك معاكى و حواليكى

كلامك جميل قوى النهارده
يمكن عشان لماما
جااااااااااايز

دعاء يقول...

كل سنة وانتي ومامتك وكل الأمهات بخير يا رب.
و ربنا يخليهالك وتفرح بيكي إن شاء الله

Unknown يقول...

كل سنة وانتى ووالدتك وكمان خالتك ههههه وكل اسرتك بالف خير
ربنا يديم علينا نعمه ويديم علينا نعمة وجود الام فى وسطنا واحنا فى حضنها
ربنا يبارك فى امهاتنا

الزهرة البرية (Joudy) يقول...

كل سنة ومامتك طيبة وانتى كمان طيبة يا قمر

هو حكاية يوم واحد طبعا مش مضبوطة بس تقريبا زى ما تقولى كده يوم الكل بيتجمع فيه كاختلاف عن باقى الأيام اللى فى العادى بيتجمعوا فيها واختلاف الأيام اللى بيجيبوا فيها هداية يوم واحد الكل يجيب فيه هدية مع بعض يعنى أهو بيبقى يوم مختلف مش معنا كده إن بقيت السنة نكسل لا طبعا

دمتى بكل الحب والخير والسعادة

sony2000 يقول...

يارب يخلي لينا امهاتنا وخالتنا وكل قرايبنا
لانهم بجد ميتعوضوش
اللهم امين
تقبلي مروري وتحياتي

القدر و انا يقول...

ليدى
بجد عبرت عن الامومة الصح
هى الامان والحماية
هى الدفئ فى البرد القارس
هى الغطاء للعريان
الام بسمة وفرحة
الام عطاء و تضحية
ربنا يخليها لك دايما وكل سنة ومامتك وكل نساء مصر طيبين

حنين الذكريات يقول...

كل سنه وانتى بخير
كلامك جميل جداالمهداه لمامتك ربنا يخليكى ليها ويبارك فيكى وتفرح بنجاحك فى حياتك ويفرح قلب ماما بيكى
ربنا يحميكى من شر الانس والجن

كيكى عوووووو يقول...

كلامك مش محتاج تعليق
غير انك وحشانى اوى
عوووووووو

لــــ زهــــــراء ــــولا يقول...

يتلاشى كل شئ الا حضنك
جمييييييييلة الكلمة والاجمل انها طالعة منك ...والاجمل والاحلى انها طالعة لملاك هي امي وامك وام كل الناس

كل سنة وانتم بخير

Lady E يقول...

كل سنة وانتم جميعا بخير وصحة وسعادة

فردا فردا

نورتوني

كيكى عوووووو يقول...

ياعم ياعم كل شوية تغيرى صورتك
فاكرة صورتك اول مرة انا بحبها اووووووووووى
البت الى كانت لابسة بينك
فاكرها
عوووووو

Lady E يقول...

كيكى عوووووو : رجعتيني للذكريات يا صبحتي

دي كانت ملاك في صورة بيبي

اصل انا كنت بادئه تدوين وانا شبهها أوي لكن دلوقتي للأسف مبقتش شبهها