السبت، 13 مارس 2010

لقاء الخير+تحديث هغني


تحديث : لما رحت الكلية النهاردة لقيت ريد كاربت زي ما نكون في هوليود ومشيت عالريد كاربت :) كان في ندوة شعرية -اخت الملوخية بالضبط- واتحاد الطلبة وهما صحباتي اساسا قالولي ان في حفلة في الكلية يوم الاتنين بعد بكرة
ان شاء الله هغني فيها هي صحيح مش الحفلة اللي كانت في دماغي لكن أهي يلا حفلة والسلام وقلقانة خصوصا ان صوتي اليومين دول بقى عامل زي ال اف ام كل شوية بيقطع واحيانا بيروح
غالبا هغني لفيروز وغالبا كمان الاغنية هتبقى بكتب اسمك يا حبيبي او من زمان لعايدة الأيوبي لسه مقررتش

حاجة تانية انا رجعت للقهوة تاني ومش فنجان ولا حاجة ده مج كبير علشان أقدر اكمل باقي اليوم يااااااارب عدي الأسبوع ده على خير
---------------------------------------
الصورة من حديقة التاريخ بعدستي


ملحوظة البوست طويل واللي هيضايق ميقرأش من الأول متفقين؟

لقاء القمة في بورسعيد بجد الحضور كان رااااااااائع
نبدأ من الأسبوع اللي قبل اللقاء علشان السؤال اللي اتسئلته كتير عن البوست اللي فات

كنت مضغوطة جدا-ومازلت- كلية وبعدها كورسات لغاية الساعة 8 بالليل فالبوست اللي فات نتيجة اني ضغطت على نفسي زيادة عن اللزوم ولو مكنتش كتبته مكنتش هقدر أواصل وأحضر اللقاء النهاردة



المهم ليلة اللقاء امبارح مجاليش نوم تيرارارا :) كنت بتفرج على mbc max الفيلم الفوق الفظيع brave heart
وبعدين نمت الصبح وبصراحة كنت قلقانة وبفكر مروحش اللقاء وخصوصا بعدما أميرة قررت انها مش هتروح اللقاء فمبقاش في حد من دمياط يشجعني اني اروح بس كنت خلاص ظبطت كل حاجة اني رايحة اللقاء وكمان قولت انا رايحة في نية خير فمش لازم اضيع فرصة عمل خير وكمان كان نفسي أشوف المدونين الحلوين اللي كنت معاهم النهاردة

المهم فتحت عينيا قبل ما المنبه يرن بدقيقة وفضلت في صراع مع نفسي أقوم ولا لأ
وفي الأخر الحمد لله قمت
وجبنا حاجات للرحلة واتوكلنا على الله قولنا دعاء السفر وروحنا طريق بورسعيد طبعا بالكتكوتة
وخالتو حبيبتي كالعادة تورست جايد هايلة احنا رايحين بورسعيد ودتني طريق الاسماعيلية الدولي :)

ولفينا ورجعنا تاني على بورسعيد وطبعا الردار على الطريق الدولي الساحلي يوم الجمعة بيكون خنيق وبيكون في لجنة كل شوية
المهم اخيرا وصلنا بورسعيد وسألنا تاكسي نروح للممشى بتاع ديليسبس منين فقال لنا وصفة سهلة ووصفة هايلة بس الحمد لله وصلنا وملقيناش مقلة لب وبعدين اتصلت بالقمرايا شفقة فجت خدتني هي واحسان
وايناس – اسم غالي - :) نهر الحب

وبعدين رحنا حديقة التاريخ ، بجد يا ايناس – نهر الحب- يسلم ذوقك حديقة بجد الطبيعة فيها ساحرة
والشجر والورد وشكلها كله على بعضه حلو وكمان تخطيطها ليه علاقه بالنكسة وبالانتصار ومحدش يسألني ليه لأني مش هشرح :)

وبعدين أول لما دخلت ايناس عرفتني بالموجودين ومعلش مش هقولهم لأن انا حاليا مش مركزة خاااالص وبرضه اتلخبطوا بيني وبين احساس طفلة وفعلا مفيش فايدة لازم يا احساس طفلة لما ترجعي من اليابان ان شاء الله نروح لقاء مدونين سوى علشان محدش يتلخبط بيننا تااااني

قعدنا واتكلمنا مع بعضينا شوية وسلمنا ع الأطفال ذوي الاحتياجات الخاصة وبعدين لقيت حد بيقوللي انتي ليدي قولتله أيوة وعلى فكرة يا باشا والله انا كنت حاسه ان انت بس خفت أقول ويطلع حد تاني :) وكنت هبقى محرجة جدااااااا

وكمان أنوسه نهر الحب جابت دي جي وكان فيه فقرات جميلة أوي وفي ناس كانوا لابسين دباديب وكرمبو وشخصيات تانيه كانوا بيرقصوا مع الأطفال وكمان كان في فقرة الأراجوز والرقاصة :) ومحدش يفهم غلط الرقاصة دي عروسة زي اللي بيبقوا موجودين في مسرح العرائس
وكمان الدي جي بجد فنان وعرف يتعامل كويس مع الأطفال

بعدها روحنا عالمطعم وعملوا لنا طربيزة كبيرة وكإننا في قاعة مؤتمرات –زي لقاء المنصورة-وكل الناس جالهم أكلهم ما عدا انا وفاتيما وسومة وبيوتيفول مايند
وفاتيما حبيبتي بعدما لما جت البيتزا بتاعتها مرضيتش تاكل غير لما البيتزا بتاعتي تجيلي وعزمت عليا كتير
وذنبت نفسها معايا لغاية لما البيتزا بتاعتها بردت وأكلتها باردة بسببي - ربنا يكرمك يا أحلى مذيعة عالبلوجر المصري :)وبعدين اخيرا البيتزا بتاعتي جت بعد ساعة ونص :) وكل المدونين عملولي انا وهي احتفال وسقفوا :) يا سلام لو يكونوا موجودين في حفلة التخرج ويسقفولي نفس التسقيف – ده لو عملولنا حفلة تخرج اساسا – بجد كانت لحظة عاطشيفية :) ومش بس كده كمان في المطعم فين وفي
ن على ما عرفت احاسب
وواقفة مستنية الفرج اني أحاسب والمفاجأه كمان بعدما دفعت الحساب وروحت اكتشفت ان في غلط في الحساب وحاسبوني على حاجات أكتر من اللي أخدتها ومن الاستعجال مأخدتش فاتورة واتصلت بالمطعم
وقولتلهم والله أعلم بقى ايه اللي هيحصل
بس على أي حال مش هدخل المطعم ده تاني اطلاقا مطلقا بالتلاتة

بس برضه مميزات موضوع المطعم ده هو أكيد ليه مميزات لما افتكرها هبقى اقولها
روحنا انا وسومة وليساندرا وبرضه ضللنا الطريق واحنا راجعين والطريق كان زحمة وضلمة في نفس الوقت
بس الحمد لله وصلنا بالسلامة

بجد الحضور كان مميز
نيفين صاحبة مدونة صباح ومسا ، ايناس نهر الحب ، نوران بنت خيخية والجميل شريف ابن نوران
، فاتيما ، شفقة ، ماما أمولة ، سارة رحيل ، داليا اهو ده عيبه ، دعاء ربع ضارب ،
خالد همس الأحباب ، شريف PASHA ، أبو خالد أبو المدونين ، الشرير وليد هي وظروفها
بيوتيفول مايند ، عسقول ، محمد ابو العربي ، احسان ويارب مكونش نسيت حد


البوست الجاي ان شاء الله هيبقى عن انطبعاتي عنهم علشان مطولش البوست اكتر من كده

اللي بجد افتقدتهم النهاردة حبيبتي حنين الذكريات وكيكي وأميرة على كوكب مهجور وفراشة وطبعا خالتو ستيتة


كل لقاء وانتم طيبين ويارب دائما متجمعين في الخير وبجد كان يوم جميل جدا بيكم

هناك 54 تعليقًا:

sweet angel يقول...

الأول أحجز وارجع

sweet angel يقول...

حمدالله على سلامتكم جميعا
وكل لقاء وانتم طيبين
وبعدين هو انتي على طول مربوكه ومش مركزه كده؟

Unknown يقول...

حمد لله على السلامة
ونورتى بورسعيد يا اسمى غالى :)
هههههه بجد نورتوا انتى وسومة
ويارب دايما نتجمع فى الخير
وانتى بقى لما تنزلى بورسعيد اى وقت ابقى كلمينى
ميرسى لكى على الورد الجميل
وميرسى على اننا اتعرفنا على بعض وعلى خالتك القمر
ياريت تبعتى لى رسالة عشان اسيف رقمك

لــــ زهــــــراء ــــولا يقول...

ليدى

حمد لله على السلامه
انا قرات 3 بوستات على الرحل وبجد فرحانه اوى اوى بكلامكم
يارب كل رحله وانتم بسعاده وخير


زهراء

Unknown يقول...

انوس
بجد الصور حلوة
تسلم ايدك

فاتيما يقول...

لولووووووو
حلوة الصور قوى
و حلو البوست
و حلو االتذنيبة بتاعة المطعم
حلو اليوم كله
حلوة خالتك قوووووى
و حلو الورد قوى
و حلوة لمتنا قوى
و حلو الخير اللى حصل قوى
و انتى كمان حلوة قوى
قوى
قوى

انا مش عارفة اقول حاجة
غير ان صحبتك كانت ممتعة و اليوم كان جميل و قرفته حلوة و البركة فيكم بعد ربنا و النوايا الطيبة

برضو تهتوا فى الرجوع
لأ دنتا غاووين بقى ؟!!

حمدلله على السلامة يا حبيبتى
و بوساااااااااااااات
و حضوناااااااااااااااااااات

أمل حمدي يقول...

ليدي حبيبة قلبي

احنا اتشرفنا بمعرفة ناس حلوة بجد

ربنا يصلح حالك انت وسومة العسل اللي لازم تفتحي لها مدونة علشان تبقى معانا على طول

جزاكم الله كل الخير اليوم كلن جميل بروحكم الحلوة

دايما يارب متجمعين في الخير

دمت بكل الحب ياليدي أنت وسومة العسل

لــــ زهــــــراء ــــولا يقول...

استمتعت جدا بالقراءة والصور
انا كمان كنت عايزة اشوفكم !!!!!!!!!!
متجوش عندنا القاهرة واسكندرية
لـــولا

Lady E يقول...

sweet angel : تم الحجز بنجاح

Lady E يقول...

sweet angel : الله يسلمك من كل شر يا قمرايا وانتي طيبة

مش عارفة على اي أساس بتقولي على طول مش مركزة
عالعموم لما توصلي لسنة التخرج ويبقى عندك كلية وكورسات وجمعية رسالة وحاجات كتير بتعتني بيها زيي أوعدك انك هتتجنني مش بس هتفقدي التركيز بعض الأوقات
ياريت يبقى كلامك زي اسمك سويت وتعرفي تأثير كلمتك ايه ع اللي بتقوليها ليه

بعض الكلمات نور وبعضها قبور

ياريت تاخدي بالك اكتر في تعليقاتك المرة الجاية وأهلا بيكي وبرأيك دائما

كيكى عوووووو يقول...

ايه ياعم مالك بس!!
استهدى بالله كدة مش بكلم على فكرة على البوست بكلم على حاجة تانى لو فهمتنى انا اقصد ايه!!
ماعلينا ياحبى ربنا يجزيكى خير على الى انتى عملتيه وربنا يكرمك وياااااااااااارب نفسى احضر معاكى لقاء
يلا القاء نصيب!!!
كاتبها صح انا؟
بس بجد بقى اهم حاجة فى اليوم
الى بجد جامدة
اوى
اوى
اوى
اوى
اوى
البيتزاااااااااااااااااا
كع كع كع كع كعكع

همس الاحباب يقول...

نورتى بورسعيد
واللقاء كان جميل ورائع فعلا
وهى سومه طلعت خالتك يا سبحان الله
بس اسعدنا تواجدكم بجد
نلتقى دائما على خير
تحياتى

KEBLAWYAT يقول...

ايه ده انتى رجعتى م اليابان امتى ؟ :D


اول مره اعرف انك بتغنى

ابقى حطى اغنيه ع المدونه من بتوعك بقى

Kiara يقول...

كان نفسي اجى عااااااااااااااااااااا


يلا المهم انكم انبستطو

هي وظروفها يقول...

بقي انا شرير

ازيك يا ايناس

انا شرير ماشي علي العموم انتي عشان جوعتينا انتي وايناس نهر الحب

بيتزتك جت متاخره

نوايا بقي

بقولك بجد

انتي عسوله وروحك جميله

ربنا يوفقك لكل خير

وسلميلي علي سووووومه جامد جدا
واستئذنك البوست اللي جاي مش عايز تشريد وسياحه
احنا اخوات وانا شرير وستين شرير

صحيح بتقلديني وبتحطي اغنيه كنا نتلاقي
بس بجد اغنيه حلوه مووووووووت يلا سلام والحمد لله انك روحتي بالسلامه

كيكى عوووووو يقول...

نسيت اقولك
ابقى غنيلهم اغنية عو عو عووووووو
على ما اظن وقتها هيحرمكى تعدى من قدام الجامعه
كع كع كع كع
والدى جى كان نقاصنى وش بيغمز

Lady E يقول...

نهر الحب : الله يسلمك من كل شر يا حبيبتي

هههههههه مش اسمنا لازم يبقى أحلى وأغلى اسم طبعا

بورسعيد منورة بيكي وبكل اللي كانوا موجودين في اليوم

اللهم أمين

ان شاء الله وانتي كمان اول لما تنزلي دمياط وراس البر كلميني

والورد للورد :)

ومن حسن حظي اننا اتعرفنا يا قمرايا

ومن عيوني هبعتلك رسالة

ربنا يكرمك يا ايناس بجد عملتي مجهود كبير جدا واليوم كان متنظم بشكل حلو أوي ما عدا المطعم :)

Lady E يقول...

لولا وزهراء : الله يسلمك من كل شر يا قمرايا

تسلميلي وان شاء الله اللقاء الجاي تكوني موجودة وأنا كمان أجي :)

دمتي بفرحة وسعادة

Lady E يقول...

نهر الحب : انتي اللي عيونك حلوين :)

ايوة انا بعاكس على فكرة :)

عندي صور تانيه كنت عايزة انشرها بس لقيت فيها بنوتات فمحبتش احطها عالمدونة

سعيدة ان الصور عجبتك

ستيتة يقول...

انا لااااااااااازم احضر توكيع الألبون الأول
اتصرفي
ازاي ها تغني وكمان مشوفكيش؟
انا متخيلاكي بعد بكرة بقة وتلبسي بروبرؤ :)) وتقفي تغني أووووبووورااااليييييييي

Lady E يقول...

فاتيما : طمطم حبيبتي

كل حاجة كانت حلوة علشانك حلوة فشايفة كل حاجة حلوة واليوم بجد كان رائع بوجودك وبوجود كل اللي حضروا وحتى اللي حضروا بقلوبهم

هههههههه مش غاويين ولا حاجة بس ابتسمي احنا في مصر مفيش حاجة اسمها لوحات ارشادية ولا منين يودي على فين


الله يسلمك من كل شر يا حبيبتي

الحمد لله على سلامتكم

وحبايبي البوسات والحضونات :)

NeVeN يقول...

انوسة حبيبتى

انا اتبسطت انى قضيت معاكى وقت جميل انتى وكل الناس الجميلة اللى حضرت
كان نقسى اعمل معاكم واجب والله يلا المرة الجاية
بجد انا كنت متخيلاكى حد تانى وانا قولتلك
بس بجد طلعتى بنوتة عسولة ودمك خفيف
وسومة القمر اديها بوسة منى وواحدة من لارا
وانتى كمان يا قمر ادينى نفسك بوستيم زيها بالعدل
هههههههههههههههه


مساءك وردى

Lady E يقول...

أمل حمدي : ماما أمولة الجميلة

بجد سعيدة بشوفتك وزي ما تخيلت حضرتك بجد نفس الروح الجميلة اللي بتظهر في كتاباتك

ربنا يبارك فيكي وفي بنتك الأمورة والعسولة

اللهم أمين

وجزاكي الله خيرا يا حبيبتي

دمتي بخير دائما

Lady E يقول...

لولا وزهراء : رفعتي من روحي المعنوية يا لولا

سعيدة ان البوست عجبك

وفي لقائات بتبقى في القاهرة واسكندرية واللقا نصيب يا حبيبتي

ان شاء الله نشوفك على خير اللقاء الجاي

R-H-S يقول...

خلاص يبقي انتي لازم تخلي حد يسجلك الغنيوه علشان نحكم اذا كانت وحشه نقول وحشه وانتي تقولي اصل انا مشربتش الينسون وكان عندي برد
ولو طلعت حلوه هتقولي اصل انا كنت محضره الاغنيه ونايمه كويس يوميها

تحياتي

Lady E يقول...

كيكى عوووووو : مالي في شنطتي يا كيكي - وش بيطلع لسانووووووو-

فاهماك يا جنرال وبطلي تهدي النفوس :)

جزانا واياكم يا حبيبتي مش انتي اللي صحيتيني من النوم بعدما صحيت بساعتين :) وكنتي بتتصلي بيا كل 5 دقائق بأمارة المكالمة ام 45 دقيقة :)
ومسجاتك كمان

يارب تفضلي مدلعاني كده على طول
ده انا موبايلي بيزغرط لما اسمك بيظهر فيه :)

وانا بقى مش عايزة اشوفك في لقاء علشان مش هتبقي فاضيالي اشاسا ومش هنعرف نضرب كشري من عند ابو طارق :)

ايون اللقا نصيب يا تؤام روحي

ههههههههههههه طب تصدقي هجيبلك صورتها البوست الجاي :)

ربنا يسعدك ويفرح قلبك يا معيدتنا :)

Lady E يقول...

همس الاحباب : بورسعيد كانت منورة بأهلها وبيكم يا أبو همس وشابي ربنا يحفظهم ويباركلك فيهم بجد عندهم أب جميل ومن الصعايدة الجدعان واللي ليهم هيبة وروحهم حلوة

واللقاء كان جميل بكل اللي حضروه وبروحهم الطيبة وبعمل الخير اللي قدموه

أيوة سومة خالتي :)
ومامتي كانت معايا في لقاء المنصورة وبرضه محدش صدق انها مامتي :)

بجد احنا الاسعد

اللهم أمين وربنا يتقبل ويجعل اعمالنا خالصة لوجهه الكريم

هناء محمود يقول...

كل لقاء وانتوا مبسوطين ربنا يجمعكم على الخير دايما يارب

P A S H A يقول...

السلامو عليكوا

يا مساء الفل .. أخبارك إيه ؟
يا رب تكوني بألف خير إن شاء الله .

والله فرحت جداً جداً إني اتشرفت بيكي .


ألف حمداً لله على السلامة ودايما يا رب متجمعين في الخير إن شاء الله .. دمياط بعتت خير سفراءها ونِعم الناس بجد .. ربنا يا رب يكرمك ويوفقك وإن شاء الله تتخرجي بتفوق .
سلامي الكبير لسومه اللي شرفت اللقاء .. ونتمنى إنها تنورنا قريب في البلوجر :))




خالص تحياتي

:))

سلام

صوت من مصر يقول...

دايما فرحانين

حنين الذكريات يقول...

أزيك ياسكره وحشانى قوى
فرحانه جدا انك فرحتى وكنت اتمنى أحضر معاكو بس الظروف وان شاء الله اللقاء نروح سوى زاى ماروحنا لقاء المنصوره سوى
يوم لقاء المنصوره معرفتيش تاكلى سندوتشك من الكحه المفاجاه لك
وفى بورسعيد تيجى البيتزا متأخره حظك كده مع الاكل
ربنا يجمعنا على خير وعلى أعمال الخير

ســـهــــر يقول...

معتقدش انى اول مرة ازورك يا قمر
زورتك قبل كدة كذا مرة
وبجد كان نفسى اجى اللقاء وربنا أعلم
بس مفيش نصيب بقا :(

وبجد يا بنوتة نيفين شكرتلى فيكم جدا جدا وحقيقى عيشتنى اليوم كانى معاكم

ربنا يوفقك يارب
سلاماتى

Lyssandra يقول...

هااااااي يا ليدي

انا اتأخرت كتير أوي بجد :))
بس الكهربا فصلت وعما بقي جهزت البوست كانت عيني طلعت
هههههههههه

...

عاوزة بقي تفهميني انك سايقه وانتي سهرانه ليلتها وفيلم بريف هارت كمان ؟؟ يا مفتريه حرام عليكي
هههههههههه

....

بجد أنا مبسوطه باليوم ده جداً
وسعيده إني قابلتك للمرة التانيه
ويارب دايماً في الخير يا إيناس

تحياتي
وسلامي لسومة اللب اسمها كله ابتسام :))

Lady E يقول...

قبلاوى : قبلاوي متعرفش اخدت طيارة م يابان مصر -دمياط- لبورسعيد على طول :)

ان شاء الله احساس طفلة وسومة يرجعولنا بالسلامة من اليابان

طبيعي انك متكونش عارف اني بحب الموسيقى والغنا يا قبلاوي

اوعدك لما الغناء يرجع زي أيام ام كلثوم وفيروز واعمل البوم هحط كل الأغاني عالمدونة

Lady E يقول...

كيــــــــــــارا : كنتي معانا بقلبك يا كوكي

ان شاء الله الظروف تسمح وتقدري تيجي اللقاء الجاي

شفـقــة و إحســــان يقول...

انا انبسطت جدا جدا يا ليدى علشان شوفتك انتى وخالتو
ربنا يكرمك يارب
ويارب نشوفك علطول

Unknown يقول...

انا بجد سعيده اوي اني شفتك واتعرفت عليكي
:)

Unknown يقول...

انوس
اية بقى ما عدا المطعم دى انتى هتشهرى بية ولا اية ههههه هاتى عنوانك عشان اخليهم يرفعوا قضية عليكى بجد سلامى لك ولسومة الامورة
وحفلة موفقة ان شاء الله
بقولك يا قمراية انا نازلة ان شاء الله دمياط قريب
اتمنى اشوفكم

Lady E يقول...

هي وظروفها : أيوة

الحمد لله

يا سلاااااااااام انا جوعتكو ليه بقى ! حرام عليك ده انا اللي حاسبت على المية والسلطات بتاعت كل المدونين

تسلم يا وليد وبرغم انك قولتلي بت في البوست بتاعك وبرغم كمان انك رخمت عليا كتير في اللقاء بس خلاص مش هكتب عن اي حد في اللقاء

وبعدين مش بقلدك اطلاقا انا بجد بحب فيروز جدا والاغنية في البلوج من قبل ما اروح اللوقاء اساسا

وليد انت بجد شخصية جميلة بس خد بالك هزارك ساعات بيضايق اللي قدامك

الله يسلمك من كل شر

على فكرة اغنية save your love جميلة جدا يسلم ذوقك في الاغاني

Lady E يقول...

كيكى عوووووو : ههههههه المفروض كنت اروح للعميد في وشه وأقوله عوعو عو وانت اصلا العو :)

Lady E يقول...

ستيتة حسب الله الحمش : وانا واقدر برضه يا خالتو

كرمال عيونك ما غنيت ولا نزلت الكلية من يوم السبت :)

Lady E يقول...

NeVeN : نوفا القمرايا

وانا كمان اتبسطت جدا اني شوفتك وشوفت لارا القمرايا اللي قولتيلي انها اختك وانا صدقت :) ربنا يخليهالك ويبارك فيها ويارب تكون بقت احسن دلوقتي

المرة الجايه ادي كل مدون 20 ج وهو يتصرف :) نياهاهاهاهها

عادي يا نوفا في موضوع التخييل ده معظم قراء المدونة بيتخيلوني بشكل معين وانا مقدرش اكون زي ما بيتخيلوني انا زي ما انا ولا أشبه أحدا :)

انتي اللي بجد طلعتي بنوتة جميلة وأم هايلة وحنينة جدا


ههههههههههه وصلوا البوستين وانتي كمان اديني لنفسك بوسة ول لارا بوستين :)

مسائك سكر زيادة

akeedba7ebha يقول...

يا ليدي اولا نورتينا
ثانيا طبعا مش عرفانى انا محمد اكيد بحبها الى اكلت البيتزا منك انا وبيوتيفل مايند انااااااا هقولك اهو بجد انا اسف اننا جوعناك مكنش من المطعم وبس بس هى سومه هى الى قالت انك طالبه بيتزا تانيه ههههههههههه معلش بقى

ودايما مجمعين فى خير وسعاده دائمع باذن الله

Lady E يقول...

عاوز اصحي : كل ده :)

اهو علشان كل الكلام ده انا اعتذرت عن الحفلة

Lady E يقول...

أم .. بوبه : اللهم أمين

وان شاء الله المرة الجايه تبقي معايا يا ام بوبه ومعاكي بوبه

Lady E يقول...

P A S H A : وعليكو السلام ورحمة الله وبركاته

يسعد صباحك ومسائك

الحمد لله تمام

الله يسلمك من كل شر والحمد لله على سلامتكم وانا كمان اتشرفت بمعرفتك وانت بجد اسم على مسمى باشا وفعلا اخلاقك اخلاق البشوات وقلقك من المطعم طلع في محله :)

اللهم أمين ربنا يكرمك وليك مثل دعائك

ووصل السلام وسومه فعلا عايزة تعمل مدونة وانا شوريرة مش عايزة اعملها مدونة نياهاهاهاها

Lady E يقول...

صوت من مصر : احنا وانت

Lady E يقول...

حنين الذكريات : كلمة وحشاني قليلة عليكي يا حنين يا حبيبتي مفتقداكي بشده ربنا يرجعك بالسلامة ان شاء الله

ان شاء الله نحضر اللقاء الجاي سوى وانتي كنتي معانا لحظة بلحظة وكمان مكالمتك ليا فرحتني جدا

ههههههههه ايوة الأكل مش عارفه ماله معايا

اللهم أمين

بحبك أوووووووووووووووووووووي

Lady E يقول...

ســـهــــر : اهلا بيكي و منوراني دائما يا ساسو

نوفا قالتلي انك كلمتيها عني وقالت كلام كتير حلو عنك كإنك كنتي معانا

ومعلش بعتذر عن الصورة اللي نوفا مسحتها لأني فعلا مبحبش التصوير وان شاء الله نشوف بعضينا اللقاء الجاي متزعليش اللقا نصيب

امين

نورتيني

Lady E يقول...

Lyssandra : يا ويلكم يا ويلكم :)

ههههههههه على فكرة اللي انتي متعرفيهوش كمان ان كان في هوا كتير جدا بيحرك الكتكوتة واحنا على الطريق -عرفت بعدها كده انها كانت رياح الخماسين- علشان كده كنت ماسكة الدريكسيون كويس جدا وممشيتش بسرعه عالطريق :) الحمد لله على وصولنا بالسلامه يا ليسندرا والمرة الجايه اوعي تفكري تركبي معايا تاني نياهاهاهاها

انا الأسعد يا سما
وان شاء الله دائما متجمعين في الخير

وصل سلامك لسومة والله يسلمك من كل شر

Lady E يقول...

شفـقــة و إحســــان : بجد يا شفقة انا كمان اتبسطت جدا اني شوفتك واتعرفت عليكي مع اني ملحقتش اقعد معاكي واكلمك كتير

واصلا لولاكي مكنتش هعرف احضر اللقاء

ربنا يسعدك ويفرح قلبك يا قمرايا

والحمد لله على سلامتكم

Lady E يقول...

esraa : انا الاسعد يا اسراء

وان شاء الله المرة الجايه نتكلم اكتر سوى

Lady E يقول...

نهر الحب : المطعم ده مش محتاج تشهير اساسا هو سيء للغاية كفاية ان زبون يدخله ويقعد ساعة ونص على ما ينزل له طلبه وفي الأخر يحاسبوه على حاجات مأخدهاش ! ده طبعا اللي حصل معايا

وطبعا يا قمرايا تنوري دمياط كلها

قبل ما تنزلي دمياط ان شاء الله قوليلي علشان نتقابل

Lady E يقول...

akeedba7ebha : بورسعيد منورة بأهلها يا محمد وأكيد فكراك

ههههههههههه طب قول أمارة تانيه غير انا اللي أكلت البيتزا بتاعتك دي :)

انا مش زعلانة نهائيا ومفيش داعي للاعتذار بالهنا والشفا وحصل خير

اللهم أمين

سعيدة انك عرفت مدونتي