السبت، 11 ديسمبر، 2010

سياسة الأمر الواقع


واحنا أطفال بنعمل حاجات مجبرين عليها
بنروح المدرسة كل يوم الصبح بدري ولازم نكتب الواجب ولازم نذاكر ولازم ننجح

100 حاجة وحاجة لازم ننفذها 100 حاجة مفروضة علينا دي الحاجة الوحيدة اللي كانت بتخليني نفسي أكبر برغم اني كنت بحب حالة الطفولة جدا بس كان نفسي أخلص من كل سياسة الامر الواقع

ولما كبرت – مش اوي يعني- بالتأكيد عرفت ان حتى الكبار بيعانوا أحيانا من سياسة الأمر الواقع ومش بيبقى قدامهم أختيار

سياسة الأمر الواقع بترتبط أحيانا بالإبتزاز العاطفي وبعضها بيرتبط بالإحراج انك لازم تعمل الحاجة الفلانية علشان متتحرجش أو علشان متحرجش حد قريب منك

انا اليومين دول بتعرض لسياسة الأمر الواقع – مش عارفه مين اللي وقعه-

أول حاجة في واحد يعرف بابا للأسف مصري عيلته معاه فطلب من بابا اني اذاكر انجليش لأولاده الأطفال بنت وولد لسه في ابتدائي وباباهم ومامتهم بيشتغلوا ومش فاضيين يذاكروا لهم حد واخد باله من الطلب؟ اذاكر لهم مش أديهم درس هناك فرق

فبابا وافق ولأن معنديش مشكلة اني أذاكر للأطفال بالعكس ده انا هراجع لغتي معاهم ولأن بابا خلاص ادى كلمة لصاحبه وافقت اني أدرس للأطفال وبدأت سلسلة السخافه منهم ومن أهلهم

الأطفال فعلا واضح ان مفيش وقت ان اهلهم يربوهم أو يعلموهم وكانوا صعبانين عليا وكنت باجي على نفسي وبعلمهم وبشرح لهم والحمد لله مستواهم اتحسن كتير جدا في الإنجليش ودي اكتر حاجة كانت مفرحاني ومعرفاني ان تعبي معاهم مش رايح هدر وفي يوم جت مامتهم تكلمني وبتقولي أصل أنا قولت لصحبتي ان ولادي في الدرس ! ودرس معناها اني باخد منهم فلوس وهما تقريبا صدقوا نفسهم ان ولادهم فعلا بياخدوا درس عندي مش انا أصلا متطوعة اني أذاكر لهم وحصل كذا موقف ضايقني من الأطفال وأهلهم وبين معدنهم وقلت خلاص مش هذاكر لهم تاني وجت من عند ربنا سبحانه وتعالى وكان في اجازات كتير وأكيد محدش بيذاكر في الأجازة لكن حاليا عمالين يكلموا بابا ويتصلوا بيا علشان أرجع أذاكر للأطفال تاني وأنا مش عايزة أشوفهم تاني مش أذاكر لهم ومتوقعة ان الايام الجاية مش بس يتصلوا بيا لكن كمان هيزوروني وانا مبحبش أحرج حد بس في نفس الوقت خلاص قفلت منهم

سياسة الأمر الواقع برضه واحده من الناس مصريه عرفت اننا مصريين فقالت تتصاحب علينا وعندها اصرار رهيب انها تصاحبني ومفيش أي حاجة مشتركة تخليني أصاحبها ونبقى أصدقاء وهي انسانة سمجة وقليلة الذوق ومرضيتش اديلها رقم تليفوني فلفت وقالت لماما انها عايزة رقم تليفوني وكل شوية تتصل بيا وأنا مش برد تعرف بقى ان انا مش طايقاها ومش عايزة صداقتها دي لأ في ناس مبتفهمش وسياسة الأمر الواقع علشان ابقى ذوق ومحرجهاش اني اتكلم معاها كويس لما تيجي تزورنا

الحالتين اللي فاتوا فيهم ابتزاز عاطفي

الحياة بتفرض علينا سياسة الأمر الواقع

أمر واقع ان شوية تافهيين مش عارفين حاجة في المجالات المختلفة في المجتمع يبقوا نجوم واعلاميين ودكاترة جامعة

أمر واقع ان مصر ميبقلهاش هوية لا في لبس ولا في حياه ولا في أي حاجه حتى الأكل المصري مزيج من الأكل الشامي وباقي مطابخ العالم

أمر واقع ان طالما قمة الهرم بايظة يبقى الهرم كله لازم يبقى بايظ الا في حالات نادرة أوي

أمر واقع ان بكرة جاي ولو اتفرض علينا الأمر الواقع بعض الوقت مش هيتفرض كل الوقت وبإيدنا هنغيره

هناك 8 تعليقات:

Tears يقول...

فاهمه كلامك اوى بس عايزة اقولك ان مافيش حاجة اسمها ان حد يفرض عليكي اى حاجة

زمان كنا اطفال و لازم نروح المدرسة لكن دلوقتى بلغنا سن الرشد و ماحدش يقدر يفرض علينا حاجة بدعوى انه ح يحرجنا او يستغل ذوقنا...اللى ماعندوش ذوق يستحق يتعامل بالمثل و نحن احرار نرفض و نقبل حسب مصالحنا و رغباتنا اولا

R-H-S يقول...

وانا صغير كنت بقعد اسأل نفسي يعني ايه مشكله ...مكنتش اعرف انها غير ملموسه بتتحس بس معرفتش غير ما كبرت
وان الكلمه ممكن تربط واحد لمجرد انه قالها
ماعلينا من الكلام اللي فوق

المواقف دي فظيعه وجميلة في نفس الوقت الصراحة
ههههههههههههههه

بس انك تلاقي حد مهتم انه يبقى صديقك كدا بغض النظر عن سماجته وغلاستة
جربى وشوفي ايه النظام يمكن تطلع كويسه والسماجه دي عادي

قلم رصاص يقول...

"سياسة الأمر الواقع بترتبط أحيانا بالإبتزاز العاطفي وبعضها بيرتبط بالإحراج انك لازم تعمل الحاجة الفلانية علشان متتحرجش أو علشان متحرجش حد قريب منك "

وصف سليم جدا ..أحييكي عليه

عارفه مره كنت بقرأ حاجه في التنميه البشريه ، فلقت نظري مقاله عنوانها:
سبعة أشياء تجعل حياتك بسيطه

شدني العنوان فقريت الموضوع..وعجبني بصراحه جدا ..المهم من بين ال 7 أشياء دول حاجة مهمه اوي ..وشايف انها تنفع معاكي جدا في المواقف الشبيهه باللي قلتي عليه في البوست

الحاجه دي هي :
( إتعلم إزاي تقول كلمة " لأ " )

فعلا والله رغم بساطة النصيحه الا ان عمقها كبير جدا وتأثيرها الايجابي على حياتنا أكبر وأكبر..!

ما احنا لما يكون مفروض علينا حاجات فوق طاقتنا وقلنا لها لأ من البدايه بكل حزم وجديه وديبلوماسيه بردو ، هنرتاح جدا فيما بعد.

لكن مش كل حاجة تنطلب مننا نقبلها لمجرد اننا نقدر نعملها حتى لو كانت كلها لوجه الله .. طيب انا هافضل اعمل لغيري كل حاجة ..لحد ما وقتي يتهضم .. طب وفين نفسي بقى من الدوامه دي؟؟؟؟؟

اللي بيكلمك دلوقتي أكتر حد بيعاني من عدم قدرته في السااااااااااابق على قول كلمة لأ..إمالإحراج او سياسة أمر واقع زيك كدا او او او
بس في النهايه النتيجة واحده
ودا اللي خلاني اتعلم لغة اللاااااء

^^

نصيحه.. اتعلمي تقولي لأ

واتمنى لك التوفيق

تقبلي تحيتي

يوميات شحات يقول...

بصراحة أنا مش شايف بروبلم من الحالتين اللي ذكرتيهم
المشكلة الحقيقية بعد الزواج لما تجبري على معاشرة حماتك و اخت زوجك او سلفتك و انتي مش طيقاهم
المشكلة كمان في العمل , لما يكون مديرك او زميلة العمل ناس سيئين و طبعا لازم تستحمليهم

لازم تدربي نفسك على التعامل مع الناس كلها

AHMED SAMIR يقول...

ساعات كتير بيبقى لازم نيجي على نفسنا علشان نرضي الناس اللي حوالينا
و في الحالة دي انت جيتي على نفسك علشام ماتحرجيش والدك
بس ممكن برضة تحكي لوالدك على اللي بيضايقك من الناس دي و هو اكيد هيعرف يتصرف
تحياتي

Prince-Palestine يقول...

سلام عليكم

بإدينا نصنع الحاضر والمستقبل ونصلح الماضي


تقلبي مروري وتحياتي

Tamer Nabil يقول...

وانا اتفق مع كلام تريز


مدام فية قلة زوق وعدم تقدير


يبقى انا مش اكسف ولا اتحرج وليا الحق فى الاختيار

مع خالص تحياتى

Nelly Aly يقول...

كلامك جميل بس انا لى راى مخالفك للراى مصر فى الاخر بلدنا ومصر ليها تاريخها واكلاتها وجمالها مهما بقى فيها وحش فهى فى الاخر بلدنا .. واكل مصرى هو مصرى صميم ذى المحشى والملوخيه ورقاق والفته والكشرى ده وفول وطعميه ميه فى الميه بالعكس لما الشوام بيقلد وا اكلنا بيطلع مش حلو ذى اللى احنا نعملو

تقبلى راى

بس بجد طريقتك فى الكتابه رائعه