الاثنين، 1 نوفمبر 2010

كال هو نا هو

العنوان مش تخريف كال هو نا هو يعني غدا قد يكون أو لا يكون ممكن يجي وممكن ميجيش بس بالهندي :)

ده اسم فيلم رهيب ونهايته منيله بنيله –واقعية- وكمان اسم أغنية في الفيلم على اسم الفيلم عجبتني جدا- اغاني الفيلم كلها حلوة أصلا- وكمان الموسيقى التصويرية رائعة

احنا اتضحك علينا واحنا أطفال لما كانوا بيقولوا لنا في نهاية القصة وعاشوا في سعادة للأبد أو وعاشوا في تبات ونبات وجابوا صبيان وبنات ودخلوهم مدارس لغات :)

الفيلم فيه قصة حب من نوع سلطة الخضار علاقة حب من النوع المكلكع اللي فيه 3 أطراف وفي في أخر الفيلم حتة لئيمه بتبين تفكير المنتجين اللي بيؤمنوا بتناسخ الأرواح والكارما والدهارما والكلام اللي بعتبره فارغ أحيانا

لو حد هيشوف فيلم هندي عموما يحضر نفسه لكذا حاجة هيرقص وهيغني وهيحب وهيعيط وهيفرح وهيحزن م الأخر نصيحة لمشاهد الفيلم الهندي شوف الأفلام الهندي لواحدك علشان ميقولوش عليك اتجننت على كبر أو شوفه مع حد بيحبك علشان يمسحلك دموعك التي ستجري أنهاراً

عرفت الفيلم من اليوتيوب اذ فأجه لقيت نفسي عايزة اسمع أغنية لفضل شاكر اسمها انا اشتقتلك بقالها كتيييييير وسمعتها كذا مرة بالصدفة لكن لقيت كلماتها جايه على بالي وأكتر كوبليه بحبه : حبيبي يا حبيبي أنا اشتقتلك انا بحنلك متل شمعة على غيابك انا عم دوب حبيبي يا حبيبي سهر عينيي بيهون عليي اذا بعرف انت راجع بعد الغروب

الأغنية بتعبر أوي عن قصة الفيلم

محدش يعتبرني بقول الفيلم جميل وحلو وشوفوه الفيلم فعلا قصته قويه والمشاعر فيه بزيادة اوي وبيعيط فلو حد شافه يبقى على مسؤليته انا مليش دعوة

اللي بيعجبني أوي في الأفلام الهندي ان كلها رقصات جميلة أوي باللبس الجميل بتاعهم وغنا وفي كل الأفلام الهندي اللي شوفتها مفيش لقطة واحدة خارجة بعكس كتير من الأفلام الأمريكية

اللي طلعت بيه من الفيلم الحالة اللي انا عايشه فيها من السنة اللي فاتت من ساعة ما العربية اتهبلت وانا بسوقها وعملت بينا دوخيني يا لمونه وخبطت في الحاجز الأسمنتي اللي بيفصل بين الطريقين السريعين 3 مرات وبعدين لفت تحت المطر

في الوقت ده مكنش بيفصل بيني وبين الموت – انا وماما- الا تكة مجرد ثواني وبرغم اللي مش مصدقينني أنا كنت حاسة ان المكان كله ملائكة بتطمئننا والاحساس ده لقيت ماما بتتكلم عنه من غير ما أقولها لما طلعنا من الحادثة اللي كانت مميتة مليون في المية لولا رحمة ربنا سبحانه وتعالى وقرأت بعد كده في علم النفس ان اللي بيتعرض لحوادث مش شرط يموت من الخبطات ممكن يموت من الخضة نفسها وعلشان كده انا بعتبر كل يوم في حياتي هو هدية من ربنا سبحانه وتعالى ساعات بنسى بس برجع افتكر تاني ان الدنيا مش دايمة

لازم كلنا نعتبر كل دقيقة في حياتنا هدية من ربنا سبحانه وتعالى لينا بيقول لنا فيها اتقدموا واتعلموا واعملوا حاجة كويسة في حياتكم وانفعوا الناس وحبوا بعض واعبدوا الله مش عبادة بس لكن كمان معاملة والأخلاق وافرحوا واضحكوا وانجحوا دي الحياة في حد ذاتها هدية

في أمل طالما احنا لسه عايشين

هناك 25 تعليقًا:

Ramy يقول...

على فكرة كل الأفلام الهندى الجديدة الهندى فوق الرائعة

أنا اخويا عنده فيلم استعراضى هندى فى البيت


أتفرجنا ع الفيلم كذا مرة

و كتير كنا نشغل الأغانى و الأستعراضات بس

على فكرة احنا مضحكش علينا

هما صح هما بيفكروا السوق أزاى

هما طوروا نفسهم جداً

دة هما عندهم بوليوود

مش مدينة الأنتاج الأعلامى

و ان شاء الله هنزل الفيلم دة و هشوفه

شكراً جزيلاً ليكى (:

Ramy يقول...

شوفتى بقا

نستينى

حمد الله على سلامتك انتِ و الوالدة


ربنا يحفظكم من كل شر

Lady E يقول...

Ramy : في أفلام هندي كتير رائعة بس مش كلها ساعات بتبقى عارف نهاية الفيلم من أوله زي الأفلام المصرية

الأغاني والأستعراضات مبهجة ومفرحة أوي والكلمات ليها معنى عميق وجميل مش كلام والسلام زي كتير من الأفلام العربي

وفعلا طوروا نفسهم جدا الهند عموما مش بس أفلامهم

ويعني هما بيعملوا ايه بمدينة الانتاج برضه مفيش اعلام كويس وبالصدفة لو لقيت كام فيلم ولا كام مسلسل حلوين وفيهم قيمة

شوف الفيلم بس على ضمانتك انا مليش دعوة بشوية النكد اللي فيه :)

وشكرا جزيلا لتعليقك انا كنت بشوف التعليقات ومش متخيلة ان في تعليق جالي بسرعه كده :) وانا لسه ب رد على تعليقات البوست اللي فات :)

Lady E يقول...

Ramy : الله يسلمك من كل شر

ربنا يحفظنا ويحمينا جميعا

sony2000 يقول...

ياااااااااااه
دا انا بمووووت فالافلام الهندي لأني من عشاقها
بسبب اميتاب باتشن الله يمسيه بالخير
والملاحظ
انهم كانوا ذينا
اميتاب وحش الشاشه اللي بلمسه بيطير الكل
ياتري بيفكرك بميييييين؟؟
بس هما اتطوروا جدا جدا
واحنا وقفنا محلك سر

بنت الغربة يقول...

الف مليون سلامه عليك ياقمر انتى وماما..شوفى السواقه مالهاش كبيير
ومهما كنتى بتسوقى بقالك كام سنه ومتمكنه من السواقه.ماتضمنيش غلطات الاخرين..
وبصراحه انا مش من هواة الافلام الهندى الحقيقه..بس مادام بتشكرى فيه كده انا هادور عليه على النت وهاشوفه..
وانا كمان بامووت فى فضل شكر على فكرة..ذوقك حلو ياجمييل..
تحياتى

Tears يقول...

و الله كتر خيرك انك بتستحملى الافلام الهندى

انا مش بقدر احس اى حاجة مش اقدر اشوف نفسى فيها

iـــــــــــsــــــــــlــــــــــــaـــــــــm يقول...

الحياة في حد ذاتها هدية

ياااااااااااااه جبتى م الاخر فى اخر جمله
مش هعلق بعد الكلمه دى حاجه
بس عارفه ياريت كلنا بجد نستوعبها
تحياتى ليكى

أسمعنى شكراًً يقول...

ياريت أنا أتمنى من الله أن كيمو يكون قرأ البوست دة علشان يعرف أن الأفلام الهندى حلوة وبها قصص مميزة كتير
وليها فوايدها

شكرا

Asmaa Amer يقول...

عندك حق لازم الانسان يستغل كل دقيقة من حياته علشان يعبد ربنا ويحسن من نفسه ومن حياته
ماينفعش ان الانسان يعيش على طرف الدنيا , لازم يشارك فيها ويكون له دور

موناليزا يقول...

الفقرة الاخيرة جامدة جدا
نشكرك على التذكرة

mrmr يقول...

يااااااه
انا من عشاق الافلام الهنديه
بس مؤخرا مش فاضيه اقعد اتفرج
تحياتى

The illusionist يقول...

كال هونا هو

ممممممممممممممممممم

واتاشى وا نيهونجوجا سكوشى واكاريماس

انا بتعلم يابانى

مممممممممممممممممم

خمد الله على سلامتك

مقريتش حرف بس لازم اسلم وارحب واهنئ

هراء لا داعى له ..... يقول...

لسا من حوالى أسبوع بس باديء أعترف بروعة الأفلام الهندى و جمالها

رغم إنى بقالى فترة مقاطع الأفلام عربى و إنجليزى

بس فعلا الهندى ليه طعم تانى


بالمناسبة هو بطلة الفيلم هى بريتى سينتا ؟؟

قلم رصاص يقول...

الفيلم الهندي حاجز لنفسه اسم ومكانه كبيره جدا من زمان اوي في السينما العالميه
صحيح من وجهة نظر البعض ، وهم احيانا على صواب، أن قصته دايما متشابهه والاحداث والظروف كلها تنسخ نفسها بشكل شبه مرتب .....لكن لايزال الفيلم الهندي يحتل مكانه هامه جدا عند المصريين بالخصوص..وانا واحد منهم..
وكمان بدأو ينتجوا أفلام رعب بيحاولوا يجاروا بيها الانتاج الهوليودي بس اكيد بنكهه بوليوديه

اميتاب تشان كان ولايزال الفارس الأول الملهم لحب الفيلم الهندي جوايا..لكن اليومين دول مقدرش انكر روائع شاروخان والمدهش دايما ريتيك روشان بحب كل اعمال الممثل دا جدا

_________
حابب بس أضيف الى وصفك الرائع بجد للفيلم الهندي خصوصا الظروف المحيطه بمشاهدته والأثار الجانبيه التي ستترب على هذه المشاهده ، ان الفيلم الهندي مبيحلاش الا في اخر 3 ساعات هههههههههه

_________

أحييكي على نظرة التفاؤل في نهاية البوست وأد ايه الواحد بيبقى سعيد لما بيلاقي لسه ناس متفائله عشان ميحسش انه كائن فضائي ^_^

تقبلي تحيتي

Lady E يقول...

sony2000 : ههههههههه بيفكرني بناس انتي عارفاهم

للأسف وقفنا محلك سر

Lady E يقول...

بنت الغربة : عندك حق ربنا يحمينا ويسلم طريقنا

مبيسمعش فضل الا الرومانسيين والحساسين يسلم ذوقك

Lady E يقول...

Tears : بحب حبهم للحياة ولبسهم وغناهم ورقصهم دي اهم حاجة بتميز الأفلام الهندي

Lady E يقول...

iـــــــــــsــــــــــlــــــــــــaـــــــــm : ياريت فعلا نستوعبها يا اسلام

دمت بخير

Lady E يقول...

Asmaa Amer : أجمل كلام يا سومة

لازم كلنا نفكر كده

دمتي بخير

Lady E يقول...

موناليزا : بشكرك على القراءة والتعليق يا مونا

Lady E يقول...

mrmr : ربنا يبارك في اوقاتك يا مرمر

Lady E يقول...

The illusionist : وبتقولي الحمد لله على سلامتي على أي أساس لما انت مقرأتش :)

حلو الياباني بس معناه ايه ؟ :)

Lady E يقول...

هراء لا داعى له ..... : كل فيلم وليه طعمه

أيوة بطلة الفيلم هي بريتي زينتا والبطل شاروخان وواحد تالت مش عارفة اسمه

Lady E يقول...

قلم رصاص : أكيد زي ما قلت الفيلم الهندي بقى متميز في صورته وقصصه واستعراضاته وبقى بينافس الأفلام الامريكية والعالمية

التفاؤل والأمل بيهم تحلا الحياة