الاثنين، 13 ديسمبر 2010

ازاي؟


مش عارفة ليه المشاعر السلبية والسيئة بتبقى قوية أوي أقوى من المشاعر الإيجابية أحيانا
لما قعدت مع نفسي وبصيت في المدونة لقيت ان في أحداث كتير فيها تعتبر بتعبر عن حياتي حاجات حصلت فعلا وحاجات محض خيال بتمنى انها تحصل وحاجات مش عايزاها تحصل وحاجات متغاظة منها فكتبت عنها
الغريب بقى ان معظم المواقف اللي بتستفزني علشان اكتب عنها مواقف سلبية مواقف تضايق ومحبطة
ازاي الأحداث السيئة في حياتنا ليها كل القدرة دي انها تستفزنا وتخرجنا من شعورنا وتخلينا نعيش مود زي الزفت فترة وتخلينا حاسين بالألم برضه فترة
ازاي ناس أغبيا ياخدوا من وقتنا كل ده وهما مجرد قمامة البشر ووقتنا أغلى من أننا حتى نفتكرهم ونفتكر غبائهم
هي عادة الحياة نرى بوضوح اللون الأسود على الصفحة البيضاء - الزملكاوية- ولا نرى الخط الأبيض - الزملكاوي- في الصفحة البيضاء الزمالكاوية :)

هناك 23 تعليقًا:

Tamer Nabil يقول...

الكتابة فى نوع من المواضيع مهما كان لو سلبى فهو مفيد لاانسان


الكتابة راحة لمن يريد ان يستريح


ربنا يوفقك ويكرمك

مع خالص تحياتى

SHAPE YOUR LIFE (ABOALI) يقول...

توهج الانسان

لما الانسان اللى جوانا يفقد توهجه ونوره
ويكون هوى النفس بيساعد على استنفاذ توهجة
بتبدء كل المشاعر السلبية تاخد مننا الحلو
وتسرق اللحظات اللى كنا فينا فرحانين سعداء
واحنا بنشوفها وهى بتخطف مشاعرنا الايجابية الجميلة
بس الاحباط والياءس مش بيخلينا ندرك

لو ادركنا يا انسانه قيمة الحياه
واننا لازم يكون عندنا حالة توهج تساعد على اننا نتغلب على كل تحديات الحياه هانكون اد ايه انسان بجد

اهم شيىء يا انسانه
اننا مش عند اول قلم نقع ونبكى وننذوى
ونترك لغيرنا الملعب فهذا هو ما يحتاجه الشيطان واعوانه

استمرى فى شعورك الايجابى وافتكرى كل شيىء كويس

حتى لو افتكرتى انى الاهلى غلب الزمالك 6 والزمالك جاب 1

بس الزمالك دلوقتى بقى كويس ورجع تانى

يعنى لسه فيه امل
انى الزمالك يحافظ على مركزه المحبب ليه
وهو المركز التانى

ولالالالالالالالالالالالالالاايه وش بيغمز
افسحى الطريق للبسمة تبتسم لك الدنيا

SHAPE YOUR LIFE (ABOALI) يقول...

http://aboali26m.blogspot.com/2010/11/blog-post_07.html

لينك الموضوع ده هايعجبك وهاتحسى جمال فى الدنيا

اقرئيه لله
مش لحد تانى

zay maTigy يقول...

بصى هى مش عادة أد ما هو قوة تأثير يعنى الحزن والواقف السلبية تلاقيها بتأثر فينا اكثر من المواقف الايجابية بمراااحل لانها بتكون بتوجع اوى ( فراق _ خيانة _ يأس ,,,,,,,) دى حاجات بتحط وبتهد وبتوجع عشان كده بنكتب مقتنعين باننا كده بنخرج من الود شووية ونلاقى اللى بيواسينا واشجععععععععك بانك زملكااوية الله عليكى هو ده الاختلاف اللى بجد

مدونة رحلة حياه يقول...

السلام عليكم
دايما مطلوب مننا مناقشة السلبيات عشان نقدر نعالجها ونتغلب عليها والا مكنش حد هيصحح خطأه وكمان مطلوب اننا نظهر الحاجات الكويسة عشان ننميها وننشرها بين الكل
بستأذنك تعلقى على موضوع مشروع قانون للزواج الاجبارى ودا طلب لكل المدونين والمدونات
http://ourlife-accountant.blogspot.com/

بنوتة مصرية يقول...

ازاي ناس أغبيا ياخدوا من وقتنا كل ده وهما مجرد قمامة البشر ووقتنا أغلى من أننا حتى نفتكرهم ونفتكر غبائهم...

هما خدوا من وقتنا الغالى عشان كنا فاكرنهم بشر بيحسوا بيفهموا عندهم اخلاق تحكم تصرفاتهم ... لكن تعرفى بقى ان فى بشر فيهم من صفات الحيوانات واولهم الغباء... كويس اننا بنفطن اننا مينفعش نفتكرهم اصل بكدا نبقى احنا كمان اغبياء لسة بنضيع من وقتنا كتير فى التفكير فيهم او لمجرد الزعل بسببهم ..مسير الزمن يولى ادابرة ..والصمت والبعد والتجاهل هو اكبر جرح ليهم...

تحياتى

Nelly Aly يقول...

مدونتك رائعه بجد وانا ضيفتها فى مدونتى بجد ممنازه

Nelly Aly يقول...

اتمنى انك تنورينى فى المدونه بتعتى اكيد هتنوريها

R-H-S يقول...

انا اللي شدني كله الصفحه البيضا الزملكاويه
والخط الابيض الزملكاوي
اييييييييييييييييييه انتي كنتي نايمه طول السنين دي ولا ايه ؟؟

دا الزمالك دا فريق فيه كل العبر ياشيخه

أيـــــام يقول...

فعلا بتبقى أقوى وبتحط الواحد ف مود وحش لمده اكتر من لو كانت مشاعر سلبيه

مش عارف بقى دا نتيجه اننا بنزعل قوي على نفسنا وبنحب طعم الزعل

ولا مبقيناش نحس الفرح قوي او طعمه بقى غريب عشان مش بندوقه غير كل فين وفين

تحياتي

غير معرف يقول...

الاهلاويه هيوروكى اللون الاحمر فى الصفحه البيضا
ههههههههه

Lady E يقول...

Tamer Nabil : أكيد كلامك صح

بس بيقولوا في المثل أنت ما تقرأ وأكيد كمان أنت ما تكتب لأن مع الوقت الكلمات اللي بنكتبها بتأثر على حياتنا

اللهم أمين وليك مثل دعائك

دمت في أحسن حال

Lady E يقول...

SHAPE YOUR LIFE (ABOALI) : الله على تعبيراتك يا أبوعلي

حلو أوي تعبير توهج الإنسان

بس الإنسان مش هيتوهج ويتألق ويفضل كده 24 ساعه لازم وحتما التوهج ده يقل ويزيد على حسب حاجات كتير زي مثلا المواقف اللي بيمر بيها الإنسان وحاجات كتير

وبعديييييييييييين بلاش الزمالك

وزمالك حتة ف قلبي وهناخد الكاس م الأهلي هييييييييييييييه

والزمالك برضه فاز عالأهلي قبل كده 6 برضه
الأيام دول والبقاء للأصلح :)

Lady E يقول...

SHAPE YOUR LIFE (ABOALI) : الله عليك بجد

الموضوع جميل اوي وانا رديت فيه وأخدت صورة البيبي الجميل اللي بيضحك

الحمد لله انا حاسة بجمال الدنيا وقيمة الحياة لا تقلق اطلاقا :) الموضوع مجرد تساؤل

شكرا على الموضوع وربنا يكرمك ويجزيك خير

Lady E يقول...

zay maTigy : الله على كلامك فعلا المشاعر السلبية بتمر بمراحل لكن الفرحة بتطلعنا للقمة مرة واحدة فجأه بنلاقينا فرحانين وطلعنا فوق أجمل سحابه

أفهم من كده انك زملكاوية لأن لو مش زملكاويه وبتقولي كده تبقى روحك حلوة أوي بجد

نورتيني

Lady E يقول...

مدونة رحلة حياه : وعليكم السلام ورحمة الله وبركاته

أنا فعلا قرأت الموضوع وقرأت مواضيع كتير في مدونة حضرتك لكن للأسف مكنش بيبقى في عندي وقت للرد

ان شاء الله هرد ع الموضوع ده

دمت بخير

Lady E يقول...

يتبـــــــــــــــــــــع

Lady E يقول...

بنوتة مصرية : المشكلة لما نعامل الناس انهم ملائكة مش بشر كده بيبقى أسوأ بكتير من اننا نعاملهم على انهم بشر

الحيوانات مش أغبيا لأن الغباء مش حاجة الكائن الحي بيتولد بيها لأ دي حاجه بيكتسبها

"والصمت والبعد والتجاهل هو اكبر جرح ليهم..." صح

ربنا يوفقك في امتحاناتك انا بدعي كتير اهو :)

Lady E يقول...

Nelly Aly : أهلا بيكي يا جميله

شكرا على رأيك الرقيق وعلى الإضافة

أكيد ان شاء الله هزور مدونتك

نورتيني

Lady E يقول...

R-H-S : ههههههههه لأ كنت بذاكر :)

وبعدين الزمالك بيمثل حالة مصر حاليا حد يقدر يقول ان مصر فيها كل العبر ؟
عيب عليك

Lady E يقول...

أيـــــام :"ولا مبقيناش نحس الفرح قوي او طعمه بقى غريب عشان مش بندوقه غير كل فين وفين"

ربنا يسعد قلوبنا وأيامنا جميعا جمعااااء :)

دمت بخير

Lady E يقول...

غير معرف : انا نشرت تعليقك بس علشان كل الناس يشوفوا تفاهة كلامك

بجد ربنا يشفيك

so4mp3 يقول...

طريقتك في الكتابة عجبتني اوي اوي
هتابعك بإذن الله