الخميس، 11 نوفمبر 2010

رصيد في البنك

حد حاسس ان الوقت بيفوت بسرعة ؟ وبسرعة جدا كمان فجأه بنلاقي الصبح بقى العصر والعصر بقى العشاء واليوم خلص والأسبوع خلص والسنة الجديدة جاية واللي بعدها كمان هتيجي بسرعه والعمر بيعدي

الوقت هو ده الرصيد الحقيقي اللي موجود في بنك عمرنا واللي كلنا بلا استثناء مش مقدرين قيمته

ويمكن لأني عارفة اننا عايشين وقت محدد اسمه عمرنا فعايزة أعمل كل حاجة في وقت واحد وفي نفس الوقت مكنتش ببقى عارفة أعمل كل حاجة فمكونتش بعمل أي حاجة وبكتئب زي شباب كتير

لغاية النهاردة وأنا لوحدي في أوضتي وقافلة باب الأوضة ومستمتعة بالتكييف حاولت أكتب كذا حاجة بس كل مرة كنت بحس انه مفيش فايدة في كلامي مش هيغير حاجة ولا هيصلح حاجة ولا هيدي معلومة معينة ولا هيبقى له لازمة أساسا فدخلت على اليوتيوب بالماوس اليمين :) بدأت بالمطربين اللي كنت بسمعهم وللأسف مبقتش احترمهم لأنهم سارقين الأغاني وبيضحكوا على الجمهور العربي ومش عارفة هل يا ترى احنا بنحترم الموهوبين علشان موهبتهم ولا علشان شخصيتهم ولا علشان الاتنين موهبتهم وشخصيتهم ومريت بفيديوهات جيولوجيا وجغرافيا للأثار ولأماكن اسلامية ومرورا كمان بفيديوهات لدكتور مصطفى محمود وأخيرا القشة التي خلتني أقوم افتح باب الأوضة ومخففش من حالة الرعب اللي كنت فيها ومازلت فيها بس مش للدرجة اللي كنت فيها الا أذان الفجر والقرأن في الإذاعة حسيت اني هديت شوية شوفت حقائق علمية بتحصل للإنسان لما بيتحلل وشوية فيديوهات تانيه بنفس المعنى يمكن لو كنت درست الحاجات دي في طب أو علوم مكنتش اتفزعت كده لكن اللي اتأكدت منه ان طلاب طب مبيعرفوش يناموا في الأول لما بيتصدموا بالكم الكبير ده من المعلومات عن الانسان

طلعت من كل الحاجات اللي شوفتها وعرفتها بكلام الجميلة Tears في البوست اللي فات :" و اقولك حاجة كمان...كثرة العلم بتتعب القلب....الجهلة عايشيين مرتاحيين و مش خايفيين من بكرة و لا فاهمين المصايب اللى ح تحصل و لا عندهم وعى عن الامراض و بيعرفوا يناموا بسرعه " ده كلام صحيح جدا وحقيقة من زمان متأكده منها

ذو العقل يشقى فى النعيم بعقله و أخو الجهالة فى الشقاوة ينعم

كل الحقائق اللي عرفتها النهاردة بتقول : اعمل لدنياك كأنك تعيش أبدا واعمل لآخرتك كأنك تموت غداً

ودي نصيحة مامتي ليا دائما – ربنا يباركلي في عمرها- يعني انا متفائلة وبحب الحياة وفي نفس ذات الوقت عارفة ان في آخرة بعد الحياة

وبمناسبة الوقت اللي بيجري بسرعة النهاردة خامس يوم في أيام ذي الحجة وعيد الأضحى قرب

كل سنة وانتوا طيبين وفرحانين وربنا يبارك في عمري وعمر كل اللي بحبهم وربنا يبارك في عمركم وتستمعتوا بيه – هابي فتة-

ع الهامش : وش مكسوف جدا انا لسه مردتش على كل التعليقات في ال3 مواضيع اللي قبل ده بس بدأت الرد على بوست حاجة حلوة وان شاء الله هرد على التعليقات النهاردة ، انا حاسة اني في الفصل ومعملتش الواجب وانا بكتب الملحوظة دي :)))

ملحوظة تانيه : شكرا يا Mano على النصيحة في البوست اللي فات


هناك 12 تعليقًا:

يوميات شحات يقول...

دقات قلب المرء قائلة له .... ان الحياة دقائق وثوانـــــــي.

FAW يقول...

أنا كنت كتبت بوست عن الموضوع ده برضو
اسمه ( لحد إمتي ) . .
لازم يعني تخليني أكتئب تاني !!

أميرة علي كوكب مهجور يقول...

وحشتيني جدا
كل سنه وانتي طيبه يا قمر
مش عارفه ليه البوست ده فكرني بجمله كده كنت قراتها متهيالي للعقاد
"الموت ينهئ كل شئ"

mrmr يقول...

اعمل لدنياك كأنك تعيش أبدا واعمل لآخرتك كأنك تموت غداً

فعلا لو عملنا بالنصيحه دى ح يعيش الانسان حياه كريمه من قبل الاخر ويتعامل الانسان معامله ادميه
لانه ببساطه ح يحاول رضى ربه

كل سنه وانتى طيبه
عيد اضحى مبارك

همسات وبحــ الحياه ــر يقول...

جمييييييييل بحب اقرا مواضيعك قوى :)

اعمل لدنياك كأنك تعيش أبدا واعمل لآخرتك كأنك تموت غداً
دايما مامتى تقوللى كدا

كل سنة وانت طيبة

Tears يقول...

فكرة التدوينة رائعه و جديدة

العمر مهما طال فهو قصير و لا يجب ان نضيعه هباءا


تحياتي

Lady E يقول...

يوميات شحات : صح جدا

دمت بخير

Lady E يقول...

FAW : ده مش قصدي خالص

قصدي ان اللي يقرأ المعلومات دي ينتهز فرصة انه عايش ويعيش بالأمل ويفرح انه على قيد الحياة لأن الحياة نعمه

Lady E يقول...

أميرة : وانتي اكتر

وانتي طيبة وبخير وصحة وسعادة يا مرمر

بعد الموت يبدأ كل شيء

Lady E يقول...

mrmr : عيدك سكر زيادة يا مرمر

Lady E يقول...

همسات وبحــ الحياه ــر : وانا بحب أشوف تعليقاتك اوي :)

وانتي طيبة عيدك سكر زيادة

Lady E يقول...

Tears : الأروع قرائتك ليه

نورتيني