الاثنين، 30 نوفمبر 2009

كده كتير وانا زهقت + تحديث لdr.norahaty

تحديث : بجد بجد بعتذر يا د. نورا انا قرأت التعليقين بتوعك وعجبوني بجد ورفعوا من روحي المعنوية بس لأني كنت بقرأهم بسرعه من الموبايل وصاحيه من النوم ومسافرة اتلخبطت واخترت رفض وحاولت ارجع الكومنتات تاني معرفتش بجد بجد بعتذر

*********************************************

أول تدوينة ( المقدمة) ده أول بوست كتبته في المدونة ياريت تقرأوه

انا بجد مكنتش عايزة اتكلم في الموضوع ده لكن خلاص بقى over أوي أوي أوي

انا لما عملت مدونة كان هدفي اني اتعلم واعمل صداقات وأخوات وكنت متفائلة جدا وفعلا عرفت بنوتات وناس من أرقى وأحلى الناس من التدوين أولهم كيكي أختي اللي لسه متقابلناش لغاية النهاردة ومع ذلك وقفت معايا في كل موقف ضايقني وكل ازمة اتعرضت ليها وبعد كده عرفت ناس تانيه كتير وبدأت الوجوه تظهر والصورة تبان حبه حبه العالم اللي كنت فرحانه بيه بدأ يظهر ناس غريبه فيه بالظبط زي ما بابا قاللي لأنه كان معترض اني اعمل مدونة وكان رأيه ورأي ناس كتير ان النت عموما عالم مزيف وكله بيكدب على كله بس انا مسمعتش الكلام

المهم قضيت وقت جميل جدا وعرفت ناس بجد رائعين ومدونتي كانت مكاني المفضل اللي بفرح فيه وبهرب فيه من أي حاجه مضايقاني وعمري ما كنت اتخيل ابدا ان يجي اليوم ومدونتي نفسها تضايقني

كتير سألوني انتي عاملة موديرشن ليه

الاجابة اني عاملة موديريشن لأن في تعليقات غريبة بتجيلي وبضطر احذفها وقولت لصاحبها بكل ذوق تعليقاتك غير مرغوب فيها ومع ذلك عنده اصرار انه يتابع المدونة وبيكتب تعليقات مستفزة وانا خلاص زهقت مش كل ما هدخل مدونتي هضايق
صديقة ليا قالتلي عتاب الندل اجتنابه بس خلاص طفح الكيل زي ما بيقولوا

انا حبيت التدوين وحبيت مدونين كتير بقوا فعلا جزء من حياتي ومش هقول اسماء لأن الأسماء كتير وخصوصا بعد لقاء المدونين في المنصورة لأني لما شفت اصحاب المدونات اللي اعرفها واللي حتى مش عارفاها فعلا حسيت اننا أسرة واحدة وحسيت بألفه وود واحترام بيننا كلنا وصعب عليا اني أقول انه
لو استمرت المضايقات وقلة الذوق دي انا هحذف المدونة ووالله العظيم انا بتكلم بجد لأن بصراحة كده كتير وانا عمري ما هنزل للمستوى ده وأرد ردود مش لطيفة على اي حد بيستفزني

هناك 38 تعليقًا:

الشعب لابد له من حكومه تشكمه يقول...

برااااااااااااحه..هكلمك بكره ان شاء اله علشان عاوزه اتكلم معاكى براحتى اوك.
انتى والهانم التانيه انتو بتعدوا بعض ولا ايه.
هكلمك بكره ان شاء الله..
روووووووووووووق..

شاب فقرى يقول...

بسم الله الرحمن الرحيم

بصراحة استغربت لما لاقيت كلامك

وإفتكرت

إنى لما وصفت مدونتى فقلت انها هى عالم خاص بيه

لا يمكن لاى شخص كان الدخول إليه عنوة أو إنه يعكر صفو العالم الجميل دا

لكن الغريب ان انتى مش ماشية بالمبدأ دا

يعنى لو فى حد بيكتب تعليقات سخيفة على حد وصفك

فالطبيعى انك تلغى التعليق من الموديريشن وبدون رد

دا هيحرق دمه اكتر بكتير مما تعملى اللى بتعمليه دا

ابتسمى

وقولى طز :)

انا عن نفسى بعمل كدا

وتذكرى دايما ان النخلة العالية هى اللى بتترمى بالطوب

الناجح بس هوا اللى ليه أعداء

إنما الفاشل لا ليه أعداء ولا بتاع

ولا حتى ليه حد يعرفه

فأنتى عشان ناجحة فى ناس بتغير من نجاحك دا

وفى ناس تانية بتحاول تشوشر عليكى
وفى ناس تالتة طبيعى هتطمع فيكى وفى نجاحك دا

تذكرى دايما

ان انتى الأقوى

وإن إنتى مستمرة رغم عواء الكلاب ورغم شراسة الذئاب

برغم تواجد أى حد مش محترم يقرا مدونتك فانتى هتستمرى برده

برغم ان دمك بيتحرق لما بتشوفى تعليق الشخص دا

لكن من السهل جدا انك تحرقى دمه بالتجاهل التام

ومتقريش حتى التعليق بتاعه

ولا تعبريه:)

تلغيه اول ما تشوفى اسم الشخص وتلغى الغير معرف

بس كدا

شفتى الموضوع سهل ازاى

ربنا يفرج همك ويسعدك يارب ويبعد عنك سحب الغيوم والكلاب الضالة

خالص تحياتى وتقديرى وإحترامى

شاب فقرى

Unknown يقول...

مرحبا
مش عارف شو احكي !
كلماتك بتألم كتير , حسبنا الله ونعم الوكيل على كل واحد ما بحرم نفسه بالتدوين .

حسألك سؤال :
برأيك هل عدم التدوين وحذف المدونة هو استسلام لمثل هؤلاء ؟
هل فئة غبية مثل هؤلاء استطاعت ان تنال منكِ ؟
هل سلبيات المدونة أكثر من ايجابياتها !
فكري كويس يا صغيورة , واكيد بالنهاية اللي بيناسبك اعمليه
مع ودي

عاشقه الرومانسيه يقول...

تحذفى المدونه؟؟؟؟!!!!!
ايه ياليدى الكلام ده؟
ياامى اعملى زيى
الغى الغير معروف
وتجاهلى اى حيوان يضايقك
عالم المدونات عالم افتراضى بس زى دنيتنا بالضبط
فيه الكويس وفيه والوحش وفيه المنيل بنيله(:
اضحكى بقى
طنش تعيش تنتعش ياجميييييل

ستيتة يقول...

يعني يا ليدي انا لو رديت يمكن انتي تضايقي
انا عادة عينيفة وده بصراحة لأني على قدر ما بحب الشخص بتمنى انه يكون قوي
مش عضلات ومجانص وترابيس
نو
قوة داخلية
ان حد يجبرك على غلق مكان بيكون لك راحة وسعادة
ان حد يخليكي تضربي رجلك في الأرض وتقولي مش لاعبه
ده معناه انه قوي جدا عنك لدرجة مجرد رؤية كلماته السرية المستخبية في صندوق الإشراف بيضايقك
طيب انا لما اعرف كده مزعلش ازاي؟
مزعلش على بنوتة مثقفة ومحترمة ومتربية كويس وتعرف كويس تكون كويسة وجامدة بدون اي تأثر
والا ازعل على كلمة تضايق بجد زي ها اقفلها يا ردالة واقعد على تلها
يا منتييييييييييييييييييييي
يااااااااااااااااااااااااامنتي
اذا كنت انا اللي بلغت من العمر ارزله لقيت واحد شغال لي سنسنة
مش عاوزة قمر زيك اسمها ليدي هانم يجي واحد يقول
يا دميل
يا حلو
حن يا واد :)
يا عزيزتي مجتمعنا بقى خالي من الإتيكيت والذوق والشياكة
اللي لو موجودين يكفي اي رجل مجرد تلميح اني مش مستعدة يا سيدي لإستقبال مشاعرك فيركب "الهورس" بتاعه و"يجو تو هيز مزر" بالصلى ع النبي

شلاطة يقول...

هههههههههههههههههه

مايولع اللي بيضايقك في المدونة
يا بنتي في حكمة بتقول
القافلة تسير والكلاب تنبح
واحد مش عاجباه المدونه عادي وايه يعني ولو علق تعليق مش لطيف عادي انتي زعلانه من ايه
المفروض انك تعرفي ان كل نجاح بننجحه في حياتنا بيبقى عليه ضريبة
والمفروض تتعلمي ازاي تبقى من اصحاب النفس الطويل
مش لما واحد يضايقك تقومي تسيبيه وتمشي لا دا انتي (تلبديله في الدرة) وتحتقريه كمان وتديله بالجزمة على دماغه
لان مش في المدونة وبس اللي ممكن تلاقي حد يضايقك
في شغلك هتلاقي واحد مقرف وبيضايقك هتعملي ايه تسيبي الشغل
لا طبعا تقعديله كده وتحطي رجل على رجل وتثبتي انك احسن منه
مش تقوليلي هقفل المدونة
طب على الله اعرف انك قفلتيها مش هعديها
يومك مش فايت ياحسب الله
ههههههههههههههههههههه

Ahmed يقول...

يادي النيله
هما الناس دول وصلولك انتي كمان

بصي ياليدي انا مش هقولك كلام انتي عارفاه
مش هقولك ان الجنيا فيها الحلو والوحش والنت زي الدنيا والكلام ده

بس هقولك قفل المدونه ده مش صح
انتي عامله زي المسؤل اللي شاف واحد بيعاكس واحده على الكورنيش راح طلب هد الكونيش وكده هيحرم ناس كتير بتستمتع فيه وناس عايشه

بصي بأه ومن الآخر لو فكرتي تقفلي المدونه معنديش غير بلاغ صغير لشرطه المدونات ودول بعيد عنك ملهمش عزيز وهيعرفوا يوصلولك لو كنتي فين
وعلى فكره مش هيكون عندك فرصه للدفاع, هيتحكم عليكي على طول وبرضه المونه هتتفتح (وش مطلع لسانه)

كل سنه وانتي طيبه وصلي على النبي كده واستهدي بالله وسيبك من الناس ديه

مي يقول...

يابنتى طنتشيه خالللص خليه يهوهو مع نفسه متكونيش ضعيفة وينجح فى اللى هو عايزه مسيره يزهق لوحده
انسىىىىى وطنشىىىىىىىىىى خالص

mohamed ghalia يقول...

انا متفق تماما مع كلام شاب فقرى
الناس الى بيحبوا مدونتك عمرهم مهيضايقوكى ابداا لكن الى بيرخموا هيعجبهم أوى كلامك الأخير يبقى انتى كده بتحققلهم رغبتهم وبتسبيلهم بيتك
وده طبعا مستحيل
امسى الكومنتات السخيفة ولا كأنك شوفتيها بس

Lady E يقول...

شاب فقرى : ما هو مفيش اجنور او بلوك علشان تمنع اي حد متطفل من متابعة مدونتك

فاكر انتا في فترة كنت كاتب في بداية مدونتك " اطلع بره يا معفن ..." كنت كل ما بشوف الجملة دي ببتسم وبقول هو ده استقبالك لينا يا شاب :) وفي نفس الوقت كنت بغبطك على قوتك وقدرتك انك تتنطش اي حد سخيف

من فترة كبيرة وانا مش راضية اتكلم عن الكومنتات ومطنشة ومتجاهلة السخافات دي بس لما الأمور زادت عن حدها ووصلت للتجريح فيا مكنش ينفع اني اسكت واطنش وفي نفس الوقت مينفعش انزل لنفس المستوى واكتب كلام مستفز انا كمان

"ربنا يفرج همك ويسعدك يارب ويبعد عنك سحب الغيوم والكلاب الضالة "

أمين يارب
ربنا استجاب دعائك النهاردة ومكنش في سحب الغيوم والشمس كانت طالعة واحنا رايحين القاهرة :)
كده هتدعيلي كتير يا شاب علشان دعائك مستجاب

ربنا يكرمك وبجد انا سعيدة اني بشوف كلامك ده ويارب تفضل في المود ده على طول متفائل ومبتسم :)

Lady E يقول...

Mr.Hazem: مرحبتين
كل ده ومش عارف شو بتحكي يا مستر
لأ فعلا في الكومنت ده حسيت انك محامي :)

فعلا حسبنا الله ونعم الوكيل على اي حد مش محترم عموما مش بس في التدوين

ج1 : لأ مش استسلام بس حالة من الملل من سخافة هؤلاء

ج2 : للأسف !! بس مش هخليهم ينالوا مني تاني

ج3 : لما تعمل لك طاقة سلبية وتضايقك يبقى سلبياتها اكتر من ايجابياتها
لكن عموما ايجابياتها اكتر من سلبياتها

دمت بخير

Lady E يقول...

الشعب لابد له من حكومه تشكمه : هي الظروف مسمحتش نتكلم النهاردة يا اوشي بس اكيد هنتكلم ونرغي كتير

Lady E يقول...

عاشقه الرومانسيه : ما هو ده السبب اللي خلاني الغي الغير معرف مع اني كنت بحب تعليقات ديدي واعمل موديريشن بس مفيش احساس اطلاقا من الشخص ده فأكيد هيفرح بقى ويتبسط لما احذف المدونة ويضايق باقي المدونين :) نياهاهاها شوفتي بقى انا شوريرة ازاي يعني يرضيكي اضايق لوحدي يعني :)

Lady E يقول...

مي : ياريت بجد
ادعي معايا يا مي انه يزهق :)

Lady E يقول...

مي : نسيت أقولك صورة البنوتة اللي في بروفايلك جميلة ورقيقة اوي بجد بحبها اوي
يسلم ذوقك بجد :)

Lady E يقول...

أحمـــــــــــــد أبو العلا : ياريت كانوا الناس الغريبة اللي بسمع عنها لكن للأسف ده مدون كنت شايفاه انسان
كويس وبحترمه في يوم من الأيام

يا تشبيهاتك يا انجينير :)
بجد يا تشبيهاتك يعني انا مدونتي كورنيش زي اللي قدام كليتنا هههه
مينفعش خالص ده انا بشوف عليه ناس غريبه تحس بجد انك بتشوف افلام عربي

لأ بجد بعيدا عن الهزار تشبيه قوي بجد

ويا خبر احنا فينا من شرطة المدونات :)
وكمان مش هيكون عندي فرصة للدفاع يعني مخالفة فورية :) لأ لازم افكر كويس بجد

وانتا طيب يا انجينير
اللهم صلي على النبي
والله انا سايباني منهم من زماااااااان بس هما اللي مش عايزين يسيبوني وغيرانين من طاقتي الايجابيه :)

Lady E يقول...

ستيته حسب الله الحمش : مين ده انا اضايق؟ ومن مين من كومنت لخالتو ستيتة حبيبتي نووووووو نيفر نيفر
ده بابا لاحظ مدى انبساطي وانا بقرأ الكومنت
كنا في الكتكوتة وبص عليا في المراية وانا فاتحه الموبايل وعمالة ابتسم :) من الكومنت بتاعتك وبتاعت الانجينير

بجد الكومنت عملت لي دماغ شوكولاته يا خالتو وانتي عارفه دماغ الشوكولاته بتبقى ازاي :)

"مزعلش على بنوتة مثقفة ومحترمة ومتربية كويس وتعرف كويس تكون كويسة وجامدة بدون اي تأثر"

كله الا زعلك يا خالتو مقدرش عليه

يا كزوفي يا كزووووفي والله يا خالتو رأيك عني ده عندي بالدنيا
المشكلة ان مش كل الناس يعرفوا ليدي كويس علشان يقولوا نفس رأيك
تخيلي لما فجأه تلاقي واحد كاتب عنك بوستات حب وهيام وتسمعي تعليقات غريبة وتضايق وتلاقي مضايقات وتعليقات من اللي مش عارفينك كويس ده غير تعليقاته في مدونتي وفي نفس الوقت نفس الشخص السايكو بيقول ان انا اللي بكتب عنه بجد مش عارفة اقول ايه غير ربنا يشفيه

"اذا كنت انا اللي بلغت من العمر ارزله لقيت واحد شغال لي سنسنة"

لاااااااا متقوليش كده يا خالتو ارزله ايه بس ماما زيك برضه عمرها قريب من عمرك بس ما شاء الله بيقولوا عليها اختي الكبيرة مش ارزله خالص مالص :)
عارفة يا خالتو انا اتمنيت من كام يوم ان عمري يكون اكبر من كده علشان محدش يقدر يسخف عليا بس طلع ان الموضوع مش بالعمر اللي عايز يسخف بيسخف على كل الأعمار

ياريت ي جو تو هيز مزر اند هيز ويف كمان

بحبك اوي يا خالتو بجد ولازم احضنك حضن كبيييييير لما اشوفك ان شاء الله :)

Lady E يقول...

شلاطة : لحظة بقى
شلاطة اللي قافل مدونته وقافل الباب في وشنا هو اللي مش عايزني احذف مدونتي ؟ ماشي ماشي مليش دعوة روح افتح مدونتك يا شلاطة والا هيبقى يومك مش فايت يا حسب الله :)

وبعدين هجيب الدرة منين انا يعني :)

للأسف مش أسلوبي ومش بقدر ادي حد بالجزمة :(


"في شغلك هتلاقي واحد مقرف وبيضايقك هتعملي ايه تسيبي الشغل"

ده تنبؤ ولا ايه يا شلاطة يا خوفي يا بدران طب مش لما ابقى اشتغل الأول من اولها كده هلاقي واحد مقرف في شغلي ربنا يستر :)

افتح باب المدونة يا شلاطة لأن بجد مدونتك جميله

صوت من مصر يقول...

لا تعليق للاسف

Lady E يقول...

mohamed ghalia : هييييييييه في ناس بتحب مدونتي هيييييييه :)

تسلم على كلامك يا محمد

Unknown يقول...

ولا يهمك ياليدى
المهم انهم دخلوا
الانفخ الجميل
وقرأتيهم
وتعملى
بيهم.
ماتسيبيش
التدوين الا لما
تتجوزى وتخلفى 8عيال
ومايبقاش عندك وقت للمدونة
ساعاتها أحنا حنيجى نساعدك فى تربية
العيال ونقفل مدوناتنا تضامناً معاك.

Unknown يقول...

بقولك ايه ياليدى
امانة عليكِ ياليدى
ما تفتحى التعليقات
وأنتى قايمة من النوم
استنى لما تصحصحى وتفوقى
وتروقى وتشربى النسكافية
وتردى بعد كدهـ
كمان حاجة بالمرة
ومعلش يعنى ازاى بتقرأى الرد
على الموبايل :اشرحلى بالتفصيل
معلش اصل انا متأخرة شوية فى التكنولوجيا:)

صوت من مصر يقول...

لا تعليق لانى لا املك تعليق على المضايقات التى يفعلها من لا يحترم ثقافة الاخرين
اظن ان فى مدونتى اقدر اوضع حد لده
وعموما غلق المدونه لا يجدى

Lady E يقول...

صوت من مصر : فعلا لا تعليق :(

Unknown يقول...

علشان تعرفي مش بس انتي عندك مضايقات عالمدونة
روحي شوفي اخر موضوع عندي كيف بيحاولوا يستفزوني لدرجة وصلوا بيا انه انا كافر , ولكن اعرف كيف ارد عليهم , وكيف اتعامل معهم
ومن منهم يستحق الرد من عدمه :)
تحيتي

شلاطة يقول...

هههههههههههههههه
هي لو جت على قد المدونة بس يبقى كويس
دا عملتها في الشغل قبل كده
امال انا بنصحك ليه
مش بيقولك اسال مجرب
عمال انصح وانا عاوز النصيحه
جبتك ياعبد المعين
هههههههههههههه
بس والله المدونة قفلتها لظروف شخصية انا عارف انه كان لازم انوه قبلها
بس للاسف ظروفي مسمحتش ان شاء الله في القريب العاجل هفتحها تاني وتنوروها

شلاطة يقول...

على فكرة مش القصد من الكلام اللي قلته انه تنبؤ ولا بد من حدوثه
بس صدقيني وعن تجربه وزي ما قالت دكتورتنا العظيمة ستيته
اغلط حاجه ممكن تعمليها ان واحد يضايقك في الشغل وتسيبيه
هتحسي انه انتصر عليكي
وعامة ربنا يوفقك في شغلك وما تقلقيش مش هتلاقي في شغلك ان شاء الله الا كل خير

Somaya Kamal El Din يقول...

ااااااااااه
لما قلتى فى كومنت عندى امال لو حد بيضايقك كل ما بتدخلى المدونة كنتى عملتى ايه مفهمتش قصدك
بس دلوقتى فهمت
يا ستى حد يدخل وبعدين يبقى يضايقنى هههههههههههههههههههههههه

مش عارفة بجد دى طبيعتى كل ما بتضايق ببعد عن الناس ومن فترة وكل شوية بتضايق اكتر ومش عارفة اعمل حاجة

بس بجد خليكى مع كل الناس اللى بتحبك ومتقفليش المدونة

Maram يقول...

علي فكره انا لسه كاتبه بوست عن الموضوع ده ... بجد في ناس وظيفتها في الحياه تعكنن علي الناس التانيه ....والله انا امبارح فضل مزاجي متعكر بسبب كومينت اتبعت لي ... انتي متعكريش مزاجك الرايق بس ومش واحد ولا اتنين يخليكي تسيي مكان انتي بتحبيه روقي روقي

صوت من مصر يقول...

اذا وصلت الفكرة
اعجبنى فكرة المدونه والمضمون

Lady E يقول...

norahaty : اكيد دخلوا الانفخ واتبسطت بيهم كمان يا د. نورا :)

و8 عيال وانا اللي هخلفهم :) متقلقيش يا دكتر مش هخليكو تقفلو مدوناتكو تضامنا معايا

ربنا يكرمك يارب

Lady E يقول...

norahaty : استنى كل ده :) وبعدين انا مش بشرب نيسكافيه اعمل ايه بقى ؟ :)

وعلى حسب الموبايل يا دكتر في خدمة انترنت ولا لأ

بالنسبة لموبايلي في عندي ايقونة اسمها web بدخل عليها وبكتب لينك المدونة وبفتح المدونة عادي زيها زي النت من الكمبيوتر :) بس

Lady E يقول...

صوت من مصر : فعلا غلق المدونة لا يجدي بس احيانا بيكون الحل الوحيد للابتعاد عن المضايقات

Lady E يقول...

Somaya Kamal El Din : ههههههههههههه يعني عايزة حد يدخل عندك ويضايقك يا سمية اسألي مجرب ان محدش يدخل عندك احسن من ان حد يدخل يغلس عليكي

موضوع انك لما بتضايقي بتبعدي عن الناس ده طبيعي بس مش مع كل الناس في ناس ممكن يخرجوكي من مود الضيق والاكتئاب وفي ناس احسن انك تبعدي عنهم علشان متتضايقيش زيادة

وبعدين لازم تعرفي انتي بتضايقي من ايه علشان تبعدي عنه واسألي نفسك انا عايزة ايه ؟ خليكي واضحه مع نفسك وانا متأكده انك هتطلعي من المود ده

حاضر يا سمية مش هقفل المدونة وانتي كمان اطلعي من المود ومتقفليش المدونة لأن مدونتك جميلة وبحب اقرأها
ويلا انا وانتي ننفذ كلامك ومتبعديش عن كل الناس اللي بتحبك واللي انا منهم :)

Lady E يقول...

شلاطة : يا خبر ابيض معقول سيبت الشغل علشان كان في حد بيضايقك
عالعموم هو تصرف مش وحش لأن ربنا سبحانه وتعالى اكيد هيعوضك بشغل احسن منه ف ليه تفضل في مكان بتضايق فيه الحياه مش مستاهله

هستنى مدونتك وان شاء الله ترجع تنورها تاني قريب جدا بمواضيعك الجميلة ويومياتك

Lady E يقول...

شلاطة : انا عارفه ان مش قصدك تنبؤ :) بس اصل الكلام مكتوب بثقة كبيرة وكإنه هيحصل فعلا

سمعت عن مقولة القدر موكل بالمنطق؟ يعني موكل بنطق الانسان فكل كلمة في حياتنا ليها دلالات ومعاني ورسالة ربنا سبحانه وتعالى عايز يوصلها لينا بس احنا ناخد بالنا

ويمكن كلامك بيقولي الصورة مش هتبقى وردية اوي زي ما انا متخيلاها عن الشغل لما اتخرج ان شاء الله

موضوع انه انتصر بالعكس طبعا لو في المدونة هقولك ايوة يبقى كده انتصر لكن لو في الشغل انتا اللي انتصرت انك ريحت بالك واعصابك من الاستفزاز وحرق الدم

امين يارب ربنا يكرمك
وتسلم على الدعوة وان شاء الله ليك مثلها

Lady E يقول...

Mr.Hazem : حسبنا الله ونعم الوكيل

الشخص ده لو عنده احساس كان هيحترم نفسه من كلامك لأنك ما شاء الله رديت عليه رد قوي يفحمه

وكفاية انه كفر مسلم دي لواحدها مصيبة

Lady E يقول...

MaraM : مرام اهلا بيكي يا قمرايا

ربنا يجازيهم اللي بيحبوا يضايقونا ومش عارفين ان الكلمات نور وبعضها قبور

سعيدة بزيارتك للمدونة وبكلامك الجميل