الأحد، 29 نوفمبر 2009

خاين والخيانة في دمه+ تحديث

تحديث : الحمد لله وصلنا بالسلامة عند خالتو حبيبتي مع ان ربنا استجاب دعائي والجو بيمطر طول الطريق :) وكنت مهييسة أخر تهييس :) من كتر المطر وان شاء الله بكرة هنسافر قاهرة ام عز اتمنى ان الجو يكون حلو
انا بكتب من اتصالات يو اس بي مودم :) ربنا يخلي لنا التكنولوبيا

--------------------------
تفتكروا اللي في الصورة ده حب بجد؟ ولا عرف أصلا معنى الحب؟ ولا يعرف ان في حاجة موجودة في الحياة اسمها حب؟ معتقدش
لما البكاء والدموع يبقى عادي جدا بإسم الحب والحبيب ولا همه دموع حبيبته وهو السبب في دموعها وحزنها واكتئابها
لما تزرع له في كل يوم ورده ترويها بدمها ودموعها وحبها وتعطرها بأغلى وأحلى عطر عندها وفي نفس الوقت ياخد منها الوردة ويديها لوحدة تانيه
لما الحب يبقى حاجز للنجاح يبقى حب مريض - الحب بيقوي مش بيضعف-
لما الحب يبقى في الضلمة زي الخفافيش بيتخبط في الحيطان مش في النور كل الناس تفرح بيه والمحبوبة تبقى فخورة بدبلة الخطوبة او الجواز في ايدها يبقى مش حب تبقى سرقة ووهم مش هيتحقق
لما تحب أوي وتخلص أوي وتلاقي مقابل ده خيانة وغدر وخداع يبقى انتا اخترت غلط
لما تفتكري انك الوحيدة في حياته وتكوني فرحانه انك في قلبه وان قلبه ليكي لواحدك وفجأه تلاقي كل البنات حافظه كلامه !
لما يرجع لك ندمان مش عشان أي حاجة غير انه اناني وبيحب نفسه وشاف ان محدش حبه واهتم بيه جدا غيرك ومع انه مخترش طريقك ومشي في طريقه مع واحده تانيه بس برضه الخيانة في دمه
لما تكوني شايفاه قمر في السما وهو مش كده وكل الناس بيصرخوا حاسبي ده سراب خداع ميستاهلش ثانية واحدة من حبك وتتناسي كلام كل الناس وتحطي ايدك على ودانك وتقولي لأ انا متأكده انه غير كده وفجأه تلاقيه فعلا كده وأفظع من كده كمان
لما يفضل يقلل صورته في عنيكي ويقللها ويقللها ويبقى عندك فرصة تدوسي على صورته وتكسريه وتخليه يدوق طعم الألم بس متعمليش كده مش علشانه لا سمح الله لأ علشانك متعودتيش تأذي حد وعلشانك مش هتنزلي للمستوى ده
لما تكوني بتدعيله ودلوقتي مبترتاحيش غير لما بتدعي عليه
يبقى حبيتي خاين مقدرش حبك ولا هيقدر حب أي حد واتأكدي انه بيحب نفسه وبس
ملحوظة صغنونة : يمكن اتأثرت شوية بالروايات اللي بندرسها بس ساعات الحقيقة بتكون أغرب من الروايات
ملحوظة تانيه : انا مسافرة على نفس ذات الطريق اللي عملت فيه حادثة :) ويارب الدنيا متمطرش لأني مش ناقصه حوادث تانيه :)
ملحوظة كمان : بلوجر بيهيس ومش عايز يسيب مسافات
اي خدعة نكد بنكد انا كمان بعرف انكد وطالما كل اللي حواليا راكبين موجة النكد ف يلا بينا نكتئب وعلى رأي الشاعر محدش واخد منها حاجه

هناك 9 تعليقات:

romansy يقول...

نعمل ايه بقى فى قلبنا
اللى حبه
بس انا مش معاكى طالما رجع لك تانى وساب الدنيا بحالها وحس انك انتى الوحيده اللى ممكن تنقذيه من اللى هو فيه
يبق ازاى تسيبه
كل سنه وانتى طيبه
ويارب تروحى وترجعى بالسلامه

أحمـــــــــــــد أبو العلا يقول...

ده لا حب ولا حاجه
ده -لو وجد وعلى فكره بيتوجد من الجنسين- بيكون اسمه اي حاجه غير حب

هوا خيانه ووهم وخلاص

وبعدين يعني في الموجه بتاعة الاكتئاب ديه؟ الناس اللي فوق الموجه ياريت تنزلوا بمزاجكم عشان احنا معندناش حد بيعرف يعوم عشان ينقذكم, والبحر غدار

طمنينا عليكي لما توصلي بالسلامه

الشعب لابد له من حكومه تشكمه يقول...

من انصار مبدأ:
اللى يخون مره ,يخون 100,,,وطالما عدى الريد لاين مره انسى خلااااااااااااااص.

اباى طمنينى عليكى وكل سنه وانتى طيبه:)

بنت بتحلم يقول...

(:
ادى الابتسامه
موضوع البوست حلو فعلا
وملخصه ان مرايه الحب عاميه
صح ولا ايه؟

فراشة يقول...

يارب توصلي بالسلامة هتنوري المحافظة كلها والله

انتى فعلا عندك حق لو ف الضلمة مش هيبقى حب لان الحب بيبان ف العين

الحب اللى بجد يبقى الولد او الراجل خايف على حبيبته وميرضلهاش ابدا انها تكدب على اهلها او تحب من وراهم

بس معظم اللى بيحب مبيفكرش غير ف انه بس محتا يحب ومش بيفكر ف اللى هيحصل بعدين

"يارب توصلي بالسلامة"

أميرة علي كوكب مهجور يقول...

ولا تدعي عليه ولا حاجه
اصل الناس اللي زي دي تتنسي وبس
يارب توصلي بالسلامه ويسلم طريفكم

تعالي هنا انتي فين يا بنتي ابقي عبرني وردي عليا

Mr.Hazem يقول...

مرحباااااااااا
كيفك ان شاءا لله تماااامووو
اشتقنالك كتير والله
كل عام وانتي بألف خير يااارب
انا بعتذر جداً لانقطاعي فترة من الزمن بس كان خارج عن ارادتي
يلا عيدك مبارك
والعيدية النص بالنص ههه

ارق تحية

ستيته حسب الله الحمش يقول...

نكد ايه بس في العيد يا جودعان؟
وبعدين الصورة لوحدها كفاية
دي اسمها عند الشوباب تسالي
سلي وقتك ببنت بدل قزقزة اللب
على الأقل اهي تسالي بلا مصاريف
واللي ترضى بنفسها تسالي
متزعلش لما واحد يقول وانا مالي

مجرد حلم... صغنتوت يقول...

لما تكوني بتدعيله ودلوقتي مبترتاحيش غير لما بتدعي عليه

اكتر جملة مقتنعة بيها في كلامك ده كله
بس ساعتها يبقى حتى مش يستاهل انه يتدعى عليه

توصلي بالسلامة ان شاء الله :)