الجمعة، 20 نوفمبر 2009

لا تصالح ومش هصالح

مينفعش اطلاقا مطلقا بالتلاته
مينفعش خالص مالص بالص
مينفعش نيفر نيفر نيفر مش ب بوكيه ورد وكادو هنسى واسامح

ال جاي وجايب كام وردة
فاكر ده يرجع ليالينا
لو كان الورد يجي بفابدة
كانوا كل اتنين زرعو جنينه

مش بإحراج اني اسلم هسلم واقول بالسلام احنا بدينا بالسلام ترا را ردت الدنيا علينا بالسلام ترا را اوكي سلمت بس كان سلام فاتر جدا انا زعلانه من نفسي اوي بس مينفعش مينفعش غير كده فعلا ماما عاملت تنت كويس جدا علشان مهما كان احنا مسلمين وان جالك قليل الأصل بيتك لا تعاتبه ولا تفرط فيه بس انا مكنتش كده كان باين على ملامحي رفض اي صلح كنت سخيفه اوي وزعلانه من نفسي اوي بس لكل فعل رد فعل اول مرة احس اني عايزة ارمي الورد في أقرب زباله ومفتحتش الكادو لغاية دلوقتي ازاي حد بيكرهني من اعماقه وياما أذاني وبيتمنى فشلي وزعلي ودموعي واصالحه بسهولة كده لأ مش ممكن أصالح تنت لسه فاكره تصالح دلوقتي تنت وصلتني لأخر درجات الكره تنت خسارة اني اكتب كلام عنها لأن مجرد ذكر اسمها بيغير مودي وبيخليني مضايقة ان في حد كده في الدنيا لا تصالح افتكرت قصيدة أمل دنقل لا تصالح كلها احلى من بعضها

لا تصالح
أترى حين أفقأ عينيك
ثم أثبت جوهرتين مكانهما
هل ترى؟
هي أشياء لا تشترى .......
هل يصير دمي - بين عينيك- ماء؟
أتنسى ردائي الملطخ بالدماء
تلبس فوق دمائي ثيابا مطرزة بالقصب؟

خير خير انا كنت هرمي الورد في الباسكت الكبيره واكتفيت اني ارميه تحت الكنبه لأني بحب الورد عاااااااااا حتى لو جاي من ناس غريبه -----------------------

---------------------------------

ملحوظة : مقولتش اسم تنت ومش بقول تنت رقة ولا حاجه لا سمح الله ده تقليل من شأن الشخصه اللي بتكلم عنها مش اكتر لأنها للأسف من الكثير التافه اللي انتشروا في مجتمعنا

ملحوظة بره الموضوع مش انا قولت معرفة البنوتات كنوز كلمت مرمر وشيما كونفرنس وغيرولي المود تماما بجد اجمل واطعم واحلى بنوتات هما والحجه كيكي اللي صحتني من احلاها نومه النهارده على فكره شيما شيف هايله قالت لنا على طريقة عمل البطاطا اي حد عايز وصفة البطاطا ياخدها من شيما :)

ربنا يباركلي في صداقتكم يا أحلى بنوتات

هناك 29 تعليقًا:

الشعب لابد له من حكومه تشكمه يقول...

اييييييييه ده؟هى حصلت للبطاطا..كويس انها جدت على اد البطاطا ومقولتيش حاجه تانيه..:) وانا اللى فاكركاى بتهرجى ادخل اتصدم كده:(

بالنسبه للبوست باه انا زيك بالظبط قلبى اسوووووووووووود ايون بقولها قلبى اسود واللى يدوس على رابط الكوتشى بتاعى بسسس مجرد يفكر بس خلاص بشخبط عليه من حياتى نوهائيا.
انا بستغرب اوى والله يادودو تلاقى الواحد يوجعك ويجى وبراءة الاطفال فى عينيه والمفروض انى اسامح وهو اصلا من الاول بيجرح ليه؟
عالم غريبه غريبه..

بقولك ايه:على كوبرى بنها منديل حبيبى حول عينى:))

أميرة علي كوكب مهجور يقول...

تنت دي شكلها كانت عايزة مطوه ولا طوبه من بتوع اخونا الجزائرين :)

ولا هيمنا ولا حد يغير دمنا :) قال تنت قال
احي مامتك ع موقفها اصل ولاد الاصول هبفضلوا ولاد اصول مهما حصل احنا الاحسن والاكرم واللي بنراعي ربنا

انا كمان اتبسطت اووووووووووي وانا بكلمك عملتولي دماغ والله :) وهجرب البطاطا لما يخرجوا علشان اولع في البيت براحتي :)

ربنا يسعدك دايما يا امورة انتي

♥نبع الغرام♥♪≈ يقول...

ربنا يديم الود بينكم

ويكرمكم خير

ربنا يسعدك

شفـقــة و إحســــان يقول...

انا ماليش دعوة انا عايزة اعرف البطاطا بتتعمل ازاى
وياريت لو تجيبلى معاك 2 كيلو هدية
وحشتينى يا بنوتة

Cute Kitty **sookra يقول...

ليدى

ازيك ياقمر
الناس دى اقل اقل من انك تضايقى عشانهم
قال ايه فى الوش مرايه وفى القفا سلايه
لو عرفتى معناه تبقى شاطره
هههههههههههههه
صباحك شيكولاته
ولانقول بطاطا

همس الاحباب يقول...

ربنا يديم الود والمعروف ما بينكم
بس اعتقد لاتصالح مع اليهود فقط
اماالاقارب
فادفع بالتى هى احسن
تحياتى وتقديرى

Unknown يقول...

تنت؟
تــنت؟
تـــــــنت؟
هى مضيقاكى اوى كدهـ؟

بســـمة انور يقول...

لييييييييييييييييييييييييدى

عادى عادى
انا طالما حد ذانى مقدرش ابدااااااا اسامحه
وحتى لو سشامحت مش بعرف اتعامل طبيعى معاه وبيبان عليا جدا ((غالبا ببق قاصده يبن عليا يعنى )) ههههههههههههه

بس اخس عليك صعبت عليا الوردايه اللى طعنتيها بإبرة الخياطة دى وحرام سيباها بتنزف كده

حنين الذكريات يقول...

االتسامح ده شئ صعب لما يكون الجرح كبير
وعلشان كده ربنا انزله فى القرآن وحس عليه فى آياته والكاظمين الغيظ والعافين عن الناس
وانا مثلك تماما فى عدم التسامح بسرعة واجد فيها صعوبة ولكن بحاول اكون من الكاظمين لكن لو كان فيه فرصه وسمحت كام مره من قبل ونفس الشخص غلط بيكون مستحيل التسامح والتصالح

جارة القمر يقول...

يابنتي انتي أطيب من كدة وطالما جت لحد عندك تصالحك يبقى ندمت وعرفت غلطها وربنا غفور رحيم

أسلوبك رائع ضحكني بجد

خليكي متسامحة معلش

:)

a7med-Mado يقول...

كلام كميل وكلام معقول مقدرش أقول حاكة بحدة

Unknown يقول...

شو هالحلاوة هاي
تعرفي الذ شي انه دمك خفيف والله بحب اقرألك ههههه
الله يسعدك ويوفقك ويخليلك احبابك
وما يحرمنا منك :)
مع ودي

شاب فقرى يقول...

بقالى كتير مجيتش

يبقى اكيد بايت فى المدونة للصبح

على كل بوست هتلاقى كومنت من فقرى

بس هنا فى الجزئية دى أحب أقولك حاجة

خلى أعداءك أقرب لك من أصدقاءك

يعنى خد حذرك بس خليك عارفهم لو هما مفروضين عليك وعارفهم كويس قوى وتقدر توجعهم وتحرقهم بسهولة

شفتى مستشار إبليس والشر الكامن :$

يا ستار يارب

بالنسبة لشيما

فهى مبدعة فى المدونة

أكيد كدا يا شيما فى المطبخ

أنا عايز بطاطا يا جدعااااااااااااااان

شاب فقرى

اقصوصه يقول...

انا احب البطاطا :)

Lady E يقول...

الشعب لابد له من حكومه تشكمه : فعلا عالم غريبه غريبه غريبه :)

ههههههههههه ماشي يا شيما

Lady E يقول...

أميرة علي كوكب مهجور : أيون بس انا قلبي رهيف مش هعرف احدفها بطوبه :)

طبعا احنا الأحسن والأكرم واللي بنراعي ربنا وهما ناس مستفزين

ههههههههه ربنا يستر انا لما فكرت في طريقة عمل البطاطا مش متخيله ان الحلة ممكن تطلع سليمه :)

تسلميلي يا مرمر

Lady E يقول...

الأحــــــ إيناس ــــــزان : أمين يارب تسلميلي يا انوسه

Lady E يقول...

شفـقــة و إحســــان : هههههههه ايه الناس اللي داخله على طمع دي

معقول مش عارفه طريقة البطاطا يا شفشوقه يال الهووووول :)

بجد وانتي كمان وحشاني

Lady E يقول...

sookra : الحمد لله ماشي الحال

عندك حق

عيب عليكي بحب المثل ده لأني عرفت ناس كتير كده في الوش مرايه وفي القفا سلايه
يعني وهما معاكي بيعاملوكي حلو جدا ومن وراكي بيبقو كارهينك ناس تقرف بجد

صباحنا سكر زياده :)

Lady E يقول...

همس الاحباب : لا تصالح مكتوبة فعلا لليهود بس افتكرتها في الموقف ده

وبعدين اذا انت اكرمت اللئيم تمردا

وهما مش أقارب الأقارب اللي بجد بيبقوا أقارب اسما وفعلا مش اسما بس

دمت بخير

Lady E يقول...

norahaty : للأسف !!

Lady E يقول...

بســـمة انور : ايه ده يعني مش انا لوحدي :)

وبعدين ملقتش مستشفى الورد فاتحه اعمل ايه انا هه اعمل ايه؟ :)

Lady E يقول...

حنين الذكريات : فعلا عندك حق التسامح شيء صعب وخصوصا لما يكون مع ناس ميستحقوش السماح أصلا

دمتي بخير

Lady E يقول...

جارة القمر : تسلميلي يا قمرايا

معتقدش انها ندمت !!

سعيده ان اسلوبي ضحكك ويارب دايما تبقي سعيده

نورتيني

Lady E يقول...

a7med-Mado : حاكه بحده :)

ماشي :)

Lady E يقول...

Mr.Hazem : دي شهادة اعتز بيها يا مستر

دمت بخير

Lady E يقول...

شاب فقري : انا مش هتكلم :(

اعدائي أقرب من اصدقائي مستحيل
مش بعرف اتعامل مع حد بكرهه مستحيل

وبعدين عادي مش مستشار ابليس ولا حاجه المثل بيقولك احذر من عدوك مره ومن صديقك 1000 مره يعني الأعداء اهون :(

دمت بخير ومفيش بطاطا لأن سعاد حسني الله يرحمها اخدتها :) ولأنك مش بتزور المدونة الا كل سنة مرة على رأي فيروز :)

Lady E يقول...

اقصوصه : بالهنا والشفا يا قمرايا :)

هي بصراحه تتحب وعلى فكره هي كمان بتحبك :)

Lady E يقول...

اسماء احمد : منشترتش تعليقك يا سومه علشان فيه ايميلك

وفعلا تنت دي زيها كتير