الأحد، 8 نوفمبر، 2009

خبر عاجل وياريت الجميع يدخلوا بسرعة


بصوا بقى صلوا على النبي كمان زيدوا النبي صلى وكل من ليه نبي يصلي عليه (شكلي في فرح تقريبا)


عرفت النهاردة من كلية الأكاليم اللي انا فيها ان بكرة ان شاء الله ان جايلنا صحفي ومذيع اسمه سيد علي هو تقريبا مقدم برنامج 48 ساعة على المحور وهو كان جاي لقسم اعلام وانا روحت اتحاد الطلبة وسجلت اسمي في الحضور وهتكلم عن المدونين ان شاء الله في أسئلتي

طبعا انا قسم انجليزي يعني مليش علاقة بإعلام غير ان ليا صحبات منهم فأستأذنت الدكتورة اللي مسؤلة عن اللقاء وطلعت عسولة أوي شبه الدكتورة جيهان اللي كانت جايه في فيلم مورجان احمد مورجان

المهم من هنا للصبح الساعة 10 او 11 قولولي ايه الأسئلة اللي تحبوا اني أسألها عن لسانكم ليه
هدخل النت من الموبايل وانا هناك ان شاء الله

احتمال يعملوا انترفيو معايا على اعتبار اني من مواهب الكليه بس الله اعلم ده هيحصل ولا لأ انا متوتورة شوية بس خير ان شاء الله


بالنسبة لتعليقات البوست اللي فات بشكركم فردا فردا وان شاء الله هرد عليكم فردا فردا


ادعولي اصحى بدري أساسا علشان أروح :)

هناك 15 تعليقًا:

Saso يقول...

انتى يابت ياطفله
ممكن تسالوهم هما ليه حاطيين مدوناتنا تحت المراقبه؟
سمعت الكلام دا فى المنصوره وموش مصدقاه

عاشقه الرومانسيه يقول...

انا اوافق فاتيما فى رايها فى موضوع الاعلام والمدونات ده
ان المدونات بتكون شخصيه بحته وبتعبر عن اراء اصحابها
يعنى احنا مش محتاجين الاعلام فى شئ
انا باشوف عالم التدوين انه عالم خيالى جميل مليان طيبه وحنان
ولو دخل الاعلام بكل الزيف والغش اللى فيه وتزييف الحقايق ده هيفسد علينا عالمنا
فيبقى اول ما تشوفى عمو الصوحفى ده
تقولى له
دودو بتسلم عليك وبتقولك
صباح الخير ياجارى انت فى حالك وانا فى حالى
مااااشى؟

عاشقه الرومانسيه يقول...

تصبحى على خير بقى
علشان انا اتاخرت قوى
ولازم انام
سلالالالالام

صاحب رأى يقول...

بما انى دايما بفكر سياسيا
لانى بحب اسايس الناس :)

كيف نستطيع الرقى بالمدونات حتى تؤثر تأثيرا ايجابيا فى ارتقاء الوطن ؟

لو السؤال مش مفهوم اوى

ازاى من الآخر نخلى المدونات سبب فى ان البلد دى تبقى كويسه وزى الفل

وتصبحوا على خير

شاب فقرى يقول...

والله يا Lady أنا أساسا مبحبش المذيع دا بالذات

السبب إنه مش حيادى ولا بيعرف يناقش ومش عارف بيذيع إزاى ومش عنده حضور

يلا

إن شاء الله بالتوفيق

شاب فقرى

Mr.Hazem يقول...

بدايةً بتمنالك التوفيق يارب
وان شاء الله نهارك بيكون موفق وسعيد

بخصوص الاسئلة يلي ممكن تسأليها .
1- هل للتدوين قواعد يمكن للمدون الاستناد اليها في تدوينة
2- كلمة تهمس بها في آذان المدونين , أو نصيحة او كلمة اخيرة تخاطب بها المدونين , ماذا تقول بها ؟

معلش مش مركز كتير عشان هيك يمكن كلماتي مخربطة
بالتوفيق يارب

قوس قزح يقول...

ياريت تساليه ازاى كل مدون بيكتب حاجة ادبية يقدر يحافظ عليها من سرقتها و هل لها حقوق فكرية و لا لا

و ليه النت لحد النهارده مش معترف بان فى جزء كبير من مستخدمينه ناس هدفها مش بس اللعب و السيرش او نشر افكار وحشة
مع ان كتير من المدونات و المنتديات مفيدة جدا .. ياريت الاعلام يظهر الجانب الجيد للنت مش بس السىء


تحياتى

همس الاحباب يقول...

اللهم صلى على سيدنا محمد اولا
اعتقد مش فارقة رايهم كاعلاميين
لاننا بنكتب ما يعبر عنا وما بداخلنا
تمنياتى بالتوفيق

ليس فقيرا من يحب يقول...

طبعا خلاص تقريبا اليوم خلص

يارب تكونى انبسطتى وتحكيلنا بقى اللى

حصل بالتفصيل

فى حفظ الله يا قمر

Soul.o0o.Whisper يقول...

ليدى الجميلة

إزيك يا قمر؟؟؟ عاملة ايه؟؟
معلش جيت متأخر و زمان اليوم خلص من زماااااااااااان ههههههههه

ياللا احكيلنا بئا حصل ايه

سعيدة بجد بالتعرف عليكى
و يارب يديم الود ما بينا


دمتى بكل الخير

Lady E يقول...

Saso : هو ميعرفش الموضوع ده يا ساسو

وبعدين سيبك المدونين مش بيعملوا حاجة غلط علشان يخافوا من الرقابة سواء في رقابة أو لأ مش فارقه

Lady E يقول...

عاشقه الرومانسيه : وده رأي يحترم طبعا

وانا معاكو بس الاعلام مش كله غش وتزييف يا دودو بلاش النظرة المتشائمة دي في اعلام كويس

Lady E يقول...

عاشقه الرومانسيه : وانتي من اهل الخير يا حبيبتي

Lady E يقول...

صاحب رأى : أهلا بيك

سؤالك حلو أوي ومهم أوي بس ملحقتش أسأله للأسف

Lady E يقول...

شاب فقرى : انا كمان ده كان رأيي

بس يا شاب ده اعلامي وصل لمكانة كبيرة وسافر بلاد كتير ولما اتكلم فتح كذا موضوع وكان مثقف جدا فبصراحة أي حد يبقى معندوش عقل لو فوت فرصة انه يستفيد بخبرة أي حد ليه مكانة في مجتمعه مهما كان اختلافنا معاه