الخميس، 19 نوفمبر 2009

هزيمة الحزن بالإبتسامة :) والتحرر من القيود



مين فينا دمه متحرقش امبارح وزعل واتضايق واتنرفز واتخنق طبعا كلنا أو أغلبنا

امبارح كان عندي طاقة سلبيه كبيرة تكفي بلدين وقولت استغلها والحقيقة لولا ماما ربنا يباركلي فيها ويرضى عليها شجعتني مكنتش عرفت استغلها
عملت اسينمنت كان مطلوب مننا وكنت غواصه في بحر جوجل :) وجمعت معلومات كتير عن الأسينمت والرواية اللي كنت بعمل بحث عنها

سبحان الله بعدها ارتحت اني عملت حاجة كبيرة كانت مطلوبة مني واني مفضلتش حاطة ايدي على خدي ودمي محروق وخلاص

والنهاردة رحت الكلية بعد غياب وقدمت الأسينمت وناقشت الدكتر فيه والدكتر اعجب جدا بطريقة البحث وبالأفكار اللي ناقشتها فيه فحسيت بالفرحة اكتر اني عملت حاجة وليها قيمة وفي نفس الوقت لقت قبول عند مدرس المادة وفي نفس ذات الوقت ان شاء الله هدخل كورس H.R جديد يوم السبت وراجعت شوية مبادئ من مبادئ الH.R النهاردة منها مبدأ الحب غير المشروط لأن أي علاقه مشروطة بين الناس لازم تبوظ ويدخل فيها الشيطان ويبوظها اكتر علشان كده اغلب علاقات الصداقة او الحب أو الزواج بتنتهي نهاية مأساوية علشان حاطين لها شروط مش معنى كده اطلاقا ان حد من الطرفين يجي على كرامته


الاعتذار بيكون بكلمة بعتذر عن كذا لأن كلمة أسف أو أسفة اوsorry بتتقال في الكوارث وحالات الوفاة وكده بس ونفس المعنى ده في اللغتين العربي والانجليش


كمان في الاعتذار لو كنا جروب مثلا بنعمل مشروع معين كلنا مشتركين فيه يبقى مينفعش واحد هو اللي يتحمل ذنب الباقيين ويعتذر عنهم الاعتذار بيكون عن نفسك وبس


كمان في الاعتذار :) الاعتذار بيكون على قدر الخطأ يعني مينفعش حد يهدد حد ويخوفه ويروعه وممكن يضربه كمان وبعدين في الاخر يقوله كركركو كنت بضحك معاك ويعتذر وخلاص لازم يكون الفعل مساوي لرد الفعل يعني لو حد عمل كده واعتذر من غير تصليح اخطائه يتأكد ان عمر عمر عمر ما حد هيسامحه مهما قعد يقول انا بعتذر من هنا للسنين الجايه لأن الاعتذار مش ممكن يرجع ثانيه من الثواني البشعة اللي كانت في الخصام ثواني الحزن والدموع والزعل والاكتئاب والتعب والمرض أحيانا نفسجسمانيا


في رأيي الشخصي المتواضع جدا ان كل اعتذارات الدنيا مش بتساوي ثانيه راحت من العمر ولو حد زعل حد او جرحه قدام الناس لازم برضه يعتذرله قدام نفس الناس


لسه هقول ايه تاني ؟ أيوة دكتر اسلام بيقول عليا اروبة انا اروبة؟ ! يعني ايه اروبة اصلا سألت عن معنى الكلمة دي قالولي ذكية هي بتهيألي كلمة كويسة صح أكيد كويسة يعني

وديت لدكتر اسلام النهاردة البوستات اللي كتبتها عنه مطبوعه من المدونة وزميلاتي قالولي اني ذكية ذكية ذكية فعلا يعني علشان أقول لدكتور عندي في الكلية رأيي فيه بصراحة بس عادي ان شاء الله خير


كمان بجد الحمد لله بحب حياتي أوي الفترة دي بحاول بقدر الإمكان احافظ على روح الطفله اللي بحبها جوايا وكمان طاقتي الايجابيه

ومهما حد حاول يضايقني يحاول من هنا للسنة الجايه ينسى بجد بجد ينسى هفضل متفائلة وفرحانه

واحساس رائع احساس التحرر من القيود حاسة اني كنت ال3 سنين اللي فاتوا في الكلية كنت مقيده وخايفة اسأل واستفسر عن اي حاجة في دراستنا السنة دي بقى مختلفه تماما حاسه اني واثقة ف نفسي ومفيش حاجة خايفه منها ايه يعني لما اسأل واتناقش وافهم انا في سنة رابعه :) بجد لما نتحرر من القيود السلبيه اللي في حياتنا زي الخوف واليأس والاحباط والحزن والعجز وغيرهم كتير لما نتحرر من كل ده حياتنا بتبقى أحلى وأجمل


أخر حاجة احب أقولها في كلمة كاتباها في أول صفحة من كشكول محاضراتي عجباني أوي وبحبها اوي وبتطمنني أوي هي للإمام الشافعي رحمه الله :

( علمت أن رزقي لن يأخذه غيري فأطمن قلبي )


دمتم فرحانين ومطمئنين واوعوا حد ينسى

هناك 34 تعليقًا:

لا تـــشـــتــــاق يقول...

ليدى
والله انتى اروبه ههههههههههههههههههه
جميل جدا البوست
وربنا يوفقك في القادم والى جاى
وتكونى دايما ذات اهميه في اى مكان تتواجدى فيه

Lady E يقول...

هههههههههه طب ما ينوبك فيا ثواب قوللي يعني ايه اروبه يعني ذكيه ولا ليها معنى تاني

أمين يارب ربنا يسمع منك وتكون ابواب السما مفتوحه

اخيرا تعليق مفهوم ل لا تشتاق احمدك يارب :)

Unknown يقول...

يا سلااااااااااااام عالناس المتفائلة والمبتسمة
بجد رسالتي بالحياة التقت مع موضوعك
موضوعك اعجبني كتيييييير
وبتمنالك التوفيق ياااااااااارب
وربي يسعدك ويحميكي
وللأمام :)

بنت الأسلام يقول...

لذيذ قوى البوست دا
ومليان كدا حب وتفاؤل

ربنا يسعدك يارب

تحياتى

Cute Kitty **sookra يقول...

ربنا يوفقك يارب وتفضل الروح الايجابيه دى طول العمر معاكى
اقولك اروبه دى يعنى حد فاهم وواعى وذكى ولماح
خلطه كدا من شويه صفات حلوه اوى وضفيلها خفه الدم
تحياتى

أميرة علي كوكب مهجور يقول...

اينعم اروبه يعني ذكيه :)
مكنتيش بتشوفي اعلان اغسلي يا اروبه كريازي :)

متخافيش مش هاخد سنتين ولا حاجة نقدر نقول سنه وشهرين بس :)


ربنا يوفقك يا حلوة والي الامام يا ليدي :)

حلم بيعافر يقول...

smiiiiiiiiiiiiiiiiiiiiiiiiiiile
كبيرة اوى
مفيش حاجة تستاهل والدنيا مش هتقف عند اى حدث مهما كان مؤسف
تقبلى مرورى

الشعب لابد له من حكومه تشكمه يقول...

:))))
دى انا مبتسمه اصل لما بزعل اوى بضحك اوى وتلاقينى بزعل لمده ساعه بالظبط وبعدين ارجع لمودى العادى.لا تقلقى مبتسمين يا افندم.

موضوع دكتور اسلام ده زاد عن حده:) ختى بالك لا تكونى بتحبيه ولا حاجه هههههههههه.

انا باه عملت انهاردا طاقه ايجابيه رهيبه مكلكيش عليها..
عملت صنيه كيك بس اييييييييييه تستاهل بقك ههههههه.

ربنا يسعدكيادودو انتى تستاهلى كل خير يا اروبه.
على فكره الواد مودى اللى وريتك صورته دايما اقوله مودى اييييييييه؟
يقولى اروووووبه..

Lady E يقول...

Mr.Hazem : تسلم يا مستر حازم

وبعدين يا بخت مين وفق رسالة وموضوع في الحلال :) علشان يجيبولنا مواضيع صغننه متفائله

بعيدا عن الهزار

شيء جميل بجد انك تلاقي حد بيشاركك نفس افكارك وفي وسط كل الاحباط واليأس تلاقي الابتسامة والأمل جواك
نيالك برسالتك :)

اللهم امين ربنا يكرمك ويجعل ليك من دعائك نصيب

Lady E يقول...

بنت الأسلام : أهلا بيكي يا قمرايا

بجد الله على اسمك

سعيدة ان البوست عجبك

وربنا يسعدك ويرضى عليكي

نورتيني

Lady E يقول...

sookra : أمين يارب وليكي مثل دعائك يا سكره

ايه ده بجد؟ لا اكاد اصدق ما أرى أهو كذلك بجد :)
كل الصفات الحلوة دي يعني أروبه على ضمانتك ؟ :) ماشي انتي كمان اروبه وانا اروبه وكلنا اروبين نياهاهاهاهاها

دايما تعليقاتك مسكرة يا سكره

Lady E يقول...

أميرة علي كوكب مهجور : ههههههههههههه اخرتها بقيت كريازي يا مرمر طب تصدقي بعد كده مش هندهلك غير ب ايديال مش انا كريازي :)

وكويس جدا احنا كنا فين قللتي المده يا مسهل يارب سنة وشهرين قادر ربنا يفوتهم في ساعتين :)

ويوفقك يا حبيبتي والى الامام أيون كمان الى الأمام كمان عجلة للأمام حاااااااسب طراخ مش قولتلك خدي بالك الباركينج ده مشكله نياهاهاهاها

Lady E يقول...

حلم بيعافر : يا سلام ايه الابتسامة الحلوة دي سمايل وكبيرة يارب دايما :)

فعلا الدنيا كلها على بعضيها اصلا متستاهلش ثانيه حزن

Lady E يقول...

الشعب لابد له من حكومه تشكمه : هههههه اهلا اهلا بالمبتسمين هو ده يا ودييييييييع نياهاهاهاها بس يارب تكون ابتسامه من القلب

واعمل فيكي ايه بس عمالة اقول كاتبه رأيي فيه بصراحة وقلقانه وتقوليلي بحبه اكيد طبعا بحبه وبحترمه جدا كفاية انه من المنصورة يا بنتي :)

مسمعتيش عن ان من علمني حرفا صرت له صديقا :) وبعدين ده عشرة 4 سنين يا بنتي وعلمني انا وكل الدفعه كتير وعلى فكرة كمان بحب ابنه :) هو لسه في كي جي وبيحكي لنا عنه كتير

واوعي تكون تشوكلت كيك هزعل اوي المفروض اصلا يا بنتي لما تعملي ابداعات زي دي تبعتيهالي على طول ساعه وتكون عندي ومتقلقيش المستشفى قريبه من بيتنا :)))))) واحدة بواحدة

ههههههههههه برضه طلعتي اروبه
ربنا يخليلكو مودي ويحميه يارب بجد بسم الله ما شاء الله عسول اوي

ربنا يكرمك ويرضى عليكي يا كابيرة يا اروبه نياهاهاهاهاها

mohamed ghalia يقول...

لالا انا واخد الشعار ده على طووووووووووول
ياربد ديمها علينا نعمة

♥نبع الغرام♥♪≈ يقول...

وحشتينى قووووووووووووووى
عارفه انى مقصرة معاكى

غصب عنى حبيبتى
اخبار ست الكل ماما اية سلمى عليها كتير وقولها انها وحشتنى قووووووووووووووووووى

♥نبع الغرام♥♪≈ يقول...

ربنا يسعدك يارب ويوفقك حبيبتى بتمنالك الخير من كل قلبى

موووووواة

بســـمة انور يقول...

بمووووووووووووووت فيك يا اروبة

هههههههههههههه

بســـمة انور يقول...

ربنا يسعدك ويفرحك دايما يارب
وتفضلى احلى واحسن اروبه يا سكرايتى

امممووووووواااااه

Unknown يقول...

ايوة ياأروبة:)
قصدى ياليدى كلامك
جميل ومبروك الـبحث
وأن الطاقة اللى
طلعتها فيه ما راحتش
على الفاضى ولكن اعجب
الدكتور جداً.المهم عايزة
اقولك أنى مختلفة معاكِ فى
حكاية (الحب غير المشروط)
دا لانى بؤمن بالمثل اللى
بيقولك(اللى اوله شرط أخره نور)
الا فى حب الله وحب الرسول دول حاجة تانية.

عاشقه الرومانسيه يقول...

واللى مش عارف يبتسم من الاوضاع اللى حواليه واللى تجيب احباط
يعمل أيه؟

amirelhob يقول...

حلو البوست والعنوان اجمل بكتير والصور لذيذه وهاديه ومعبره وحبيت اوى تواج
دى هنا ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

أسماء أحمد فى حفلة تنكرية يقول...

hi
ana asmaa ahmed
men el-mansoura
nefsy aklmek ya 2mar
yaret tokoly aklmek ezay....
el-blog gameeeel aweee

Lady E يقول...

محمد غالية : شعار رائع

يارب فعلا التفاؤل والابتسامة نعمه كبيره

Lady E يقول...

انوسة : وحشتيييييييني فينك

يارب تكوني بخير دايما

مش هسلم على فكره نياهاهاهاها وانتي صغننه لما تتقابلوا تاني ابقي سلمي عليها براحتك :) زي يوم اللقاء

Lady E يقول...

انوسة : ربنا يستجيب ليا وليكي ولكل المسلمين يارب

نورتيني يا قمرايا

Lady E يقول...

بسبوسة : هههههه وانتي كمان اروبه

وانا كمان بحبك اوووووووي ولو مجيتيش اللقاء الجاي هجيب منادي وامشي في شوارع المنصورة واقول بسبوسة تايهه يا ولاد الحلال :)

ربنا يتقبل يارب ويكون ليكي نصيب من دعائك يا حبيبتي

Lady E يقول...

دكتر نوره حبيبتي : الله يبارك فيكي يارب

تمام انا معاكي بس تفتكري حلو موضوع الشروط ده ؟ يعني واحد اتجوز واحده وبيحبها علشان جميله اول ما يروح الجمال يرميها ؟ ما هو ده حب مشروط
لو عملتلي كذا هحبك معملتش كذا مش هحبك
انا بتكلم في علاقاتك باللي بتحبيهم وبتثقي فيهم يا دكتر
مستنية رأيك في الموضوع

Lady E يقول...

دودو عاشقة الرومانسية : الكومنت بتاعك في طاقة سلبيه وتشائم ممكن تخلينا نولع واحنا قاعدين بجد :)

اللي مش عارف يبتسم يتصنع الابتسامه ومع الوقت هيلاقيها طلعت من قلبه
اصلك طالما شايفه ظروف بتحبطك هتفضل دايما موجوده

Lady E يقول...

أمير الحب :انتا فعلا اسم على مسمى بالدعوات الجميله اللي بتقولها كل مره في نهاية كل كومنت
على فكرة مدونتك بجد جميلة جدا زرتها امبارح

Lady E يقول...

اسماء أحمد : اهلا بيكي يا قمرايا

انتي فعلا دلوقتي بتكلميني :)

اي حاجه تحبي تقوليها اكتبيها عالمدونة وانا هشوفها ولو تحبي نتكلم على الايميل مفيش مشكله ابعتيلي ايميلك عالياهو وهضيف ايميلك

Unknown يقول...

لأ ياحبيبتى طبعاً
قصدى بالحب المشروط
اللى عارفة اوله ايه
واخره ايه وامتى وفين؟
اخره الارتباط
وامتى بعد..كذا شهر او سنة مثلاً
وفين :فى بيتنا الصغير (بيتكم يعنى)
طيب بعد الارتباط ؟
مين حيشتغل ؟
مين حيقعد فى البيت ؟
حنصرف كام؟حنعمل ايه؟
فاهمة قصدى ياليدى؟
ولا مقدرتش اوصلك
المقصود؟

Lady E يقول...

دكتر نورة حبيبتي : على فكرة انا بحبك اوي يا دكتر لأنك كنتي اول المدونين اللي علقوا في مدونتي في بدايتها وكنت سعيدة بجد ان حد عرف مدونتي :)
وكل ما بشوف تعليقاتك بحس بإنشراح وانشكاح وارتياح بجد :)
تمام وصل المقصود

احنا الاتنين اتكلمنا في نفس ذات الموضوع بس كل من وجهة نظره

يعني حضرتك اخدتي الحب المشروط على انه الشروط اللي بتبقى بين الزوجين وهما اصلا لو كان بينهم مودة ورحمه هيظبطوا كل حاجه ومش هيحتاجوا شروط
وفعلا في ناس لازم يبقى اللي اوله شرط اخره نور معاهم

بس انا بتكلم على حبك لأولادك مثلا فأنتي بتحبي أولادك مش علشانهم أحلى حد ولا أشطر وأروع حد وممكن يزعلوكي لكن حبك ليهم وحنانك عليهم غير مشروط وده ينطبق على باقي الناس يعني مش لازم ننتظر مقابل لحبنا يعني انا مثلا بحبك وبدعيلك علشانك انسانة جميلة وتتحب مش علشان عندي مصلحه معاكي او طالبة منك حاجة معينة لما تخلص هيخلص معاها حبي
واعتقد هو ده معنى الحب في الله اللي هو أسمى معاني الحب

شاب فقرى يقول...

لا إله إلا الله


الراجل عنده حق

فعلا أروبة

ما شاء الله أول مرة احس بطاقة غيجابية بدون منبع

يعنى مش وراها هدف ولا حاجة غير السعادة والحب للحياة

ربنا يسعدك كمان وكمان :)

وبالنسبة للكورسات ربنا معاكى ويوفقك

أنا زمايلى فى كلية أداب زيك كدا بالظبط

عمال يقولى كل يوم بنزل كورس

بيبقى هاين عليه أضربه بحاجة على دماغه وأقوله يابنى لو فى أى كورسات قولى مش تستخسر وربنا ما هاخد مكانك

بس سبحان الله

لسه فى مكانى بتعلم لوحدى وبذاكر

تقريبا 99% من اللى قلتيه فى ال HR أنا يعتبر مبادئى الخاصة اللى بطبقها فى حياتى

والحمد لله بفكر بنفس الطريقة الخاصة بالتفاؤل والأمل

بس أحيانا بتمر عليه لحظات بتعدى زى سنين

بحس فيها بكل حاجة سلبية فى الكون

خلاص خلصت كلامى

وهسكت وأمشى

خالص تحياتى وإحترامى الكامل

شاب فقرى