الأربعاء، 11 نوفمبر 2009

كلام متبعتر




* بصرف فلوسي في كروت الموبايل والشوكولاتة


- ايه التفاهات دي ؟


* والكتب والكورسات والورد :)


* كل ما بدخل المكتبة ببقى هتجنن وأشوف كتابي وسط الكتب وكل ما بقرأ كتاب وبلاقي فكرة من افكاري في الكتاب بحس اني اتأخرت أوي بس لسه مفاتش الأوان


* غرقانة وسط الكتب والأوراق والحياة متلونة بكل الألوان بتفوت بسرعة أوي ومفيش وقت خالص وكده أرحم بكتير
من ان الوقت يكون بطيء ويقتلني في كل ثانيه
* كل حاجة لما يبقى عندي 21 سنة
طب وليه البطاقة والرخصة قبل ال21 سنة حاجة تضايق بجد شيزوفرينيا
* كده كتير لتالت مرة مش بتردي على اتصالاتي وكل مرة بنفس الأعذار
مليت من الأعذار يا صاحبتي اعتقد دي بداية النهاية ولو استمرت هتبقى فعلا النهاية عالأقل لما نشوف بعض تاني أقدر أقولك وحشتيني
لكن كده بجد صعب فاكرة لما قولتلك مش هسمح لحد يضايقني في حياتي ؟
* شيما مدونتك بتجنني لغاية لما بفتح التعليقات لازم اجي مدونتك 10 مرات لغاية لما اعرف أعلق
تصدقي طلعنا اخوات حتى في الاغنية اللي بنحبها وبنحب ندندنها :) بكتب اسمك يا حبيبي عالحور العتيق بتكتب اسمي يا حبيبي ع رمل الطريق
فيروز فعلا ليها سحر خاص وبتودينا لعالم تاني
ان شاء الله لما نتقابل المرة الجاية هنغني فيروز وهنشرب فيروز كمان نياهاهاهاها :)
* مصر والجزائر وكأس العالم مش فارقة كتير كسبنا أو خسرنا
أكيد هفرح لو كسبنا لكن برضه مش هزعل لو خسرنا

هناك 49 تعليقًا:

أميرة علي كوكب مهجور يقول...

هو انا اول تعليق ولا ايه طيب لما نشوف كده

أميرة علي كوكب مهجور يقول...

اه اول تعليق :)

افكارك اللي بتلاقيها في الكتب عادي احنا ممكن نجيب فكره عاديه ونخليها م عاديه انتي متأخرتيش ولا حاجة


فيروز عالم تاني صوت تاني جو تاني لما فيروز بتغني الكون بيتلون ومينفعش اغني مع فيروز متستحقش مني كده بصراحه:)


ان شاء الله مصر هتكسب تيت تيرت تا مصر شوفتي الناس اللي بتبيع اعلام ع الكورنيش:)

شوكولاتة يقول...

وسعي كده يا بتاعت الكوكو إنتي

ربنا يكرمك يارب ياليدي ياصغنونة انتي
ويسعدك

ليكي سؤال غلس عندي في المدونة

سلاموز

عاشقه الرومانسيه يقول...

مصر والجزائر وكأس العالم مش فارقة كتير كسبنا أو خسرنا أكيد هفرح لو كسبنا لكن برضه مش هزعل لو خسرنا
*************************
تصدقى؟
ولا انا!!!!

الشعب لابد له من حكومه تشكمه يقول...

ان شاء الله تشوفى كتابك وسط الكتب وتعملى حفلة توقيع عندنا فى بوكس واجى اخد توقيعك تبصيلى من فوق لتحت وتقوليلى انتى مين:(

_مين صاحبتك دى قوليلى عليها بسسسسسسس.

_مدونتى الوحشه ازاى تعمل كده:(لازم اربيها...
بمناسبة نغنى فيروز كنا مره فى رحلى للقناطر وفى شجره معينه هناك كبيره جداااااااااااا وتحفه موووووووووووت قعدت انا واصحابى نغنى تحتيها لفيروز ولقينا الناس غنت معانا:)نباه نعملها انا وانتى فكره اللقاء الجاى ان شاء الله.

_مصر والجزاير ارجووووووووووكى ادعى نكسب بيتنا هيباه كئييييييييييب لو حاجه تانيه حصلت ولو اخواتى سمعوكى بتقولى كده هيبهدلوكى:( وللاسف مش هعرف ادافع عنك اصلى هكون ببهدل معاهم ههههههههههه..

ليس فقيرا من يحب يقول...

ان شاء الله اللى جاى

هيكون اجمل وكل احلامك هتتحقق

وكل الامور هتتعدل

Cute Kitty **sookra يقول...

ربنا يحققلك كل احلامك يارب
حلوه الكلام المتبعتر دا والالوان والشخابيط كمان

أميرة علي كوكب مهجور يقول...

انتي فين يابنتي كلمتك كتير انتي كويسه والله هشكلي هطلع صاحبتك اللي بتكلمي عنها هنا :(

الزنارى يقول...

أعجبتنى متفرقاتك كثيرا
لكن ليا تعليق صغير
بالنسبة مباراة مصر و الجزائر
لو خسرنا سيكون غضبنا كما لو مات أحد أحبابنا
و لو كسبنا سيكون فرحنا كما لو ولد لنا مولود جديد .
مع فائق الاحترام و التقدير
أحمد الزنارى

شاب فقرى يقول...

بطلى تشترى كروت موبايل واتعودى عالموبايل وهوا فيه خمسة جنيه بس

وبطلى تاكلى شوكلاته عشان صحتك :$

ولو فى صديقة باعتك أو مقدرتكيش

يبقى اللى ميقدرنيش ميلزمنيش

مادام باعتك مرة يبقى تقدر تبيعك ألف مرة

عادى جدا

سن ال 21 سنة مشكلة للكل والله

ربنا يعديه على خير يارب وتبقى احسن بعد ال 21

البت شيما فعلا ما شاء الله مزاجها رايق

احجزولى كوبايه فيروز معاكوا :$

بس تكون تفاح :D

او صندوق فيروز مخصوص للفقرى

بالنسبة للاغنيه رهيبة جدا جدا جدا :)

بقالى سنين مجتش وبتأخر فى الرد

نعمل إيه

فقرى بقى

تحياتى واحتراماتى ولنا عودة

فقرى

Ahmed يقول...

هوا مين فين ايه

بس سيبك انتي
المهم موضوع الشوكولاته ده

شكلك عندك نفس نوع الادمان اللي بعاني منه
مش بقدر استغنى عنها ابدا

Unknown يقول...

مشكلتي هيا نفس مشكلتي
وبصراحة ملقتلهاش عنوان هههههه قصدي ملقتلهاش حل

وفيروز لا تحتاج الى وصف
فيروز مع فنجان قهوة الصباح ستتعرف عليها :)

ان شاء الله بتفوز مصر :)
تحيتي

blue-wave يقول...

كلام مش متبعتر ولا حاجه
وكفايه انه من جواكى
يعنى بيعبر عنك
ربنا يكرمك لأنك بجد تستاهلى كل خير
وان شاء الله هانوصل كاس العالم

صاحب رأى يقول...

حرام عليكى
ازاى مش هتزعلى لو مصر مصعدتش
اللى ميزعلش ميعرفش يفرح
فى فرق بين الزعل والتعصب
لالالالا
انا بجد زعلان من الكلمتين دول
طبعا بتقولى وايه يعنى اتفلق
ماشى ماشى
يوم المباراه اياك تفرحى لما نصعد

رحــــيـل يقول...

ان شاء الله نشوف كتابك قريب
كله بأوان
صاحبتك ممكن فعلا تكون معذورة ومش عارفه ترد عليكى عن غير قصد

بســـمة انور يقول...

طيب افهم انا ايه بقى

على العمم يعنى ربنا يفكلك لوغارتمتك اللى انتى عايشه فيها حاليا

شفـقــة و إحســــان يقول...

ايه يا ليدى ده انتى فوتى ولا ايه؟؟
ههههههههههه
بس سيبك انتى احلى حاجة خرجت بيها من الموضوع ده انك اصغر من 21 سنة وقال ايه بتكلمينى
يلا بقى اجرى العبى فى الطين
هههههههههههه
وحشتينى يا قمر

احساس طفلة محبة للرومانسية بس واقعية يقول...

الظاهر ربنا كاتبلى احضر حفل توقيع كتابك
متتخضيش كدا كلها كام شهر واجى مصر ان شاء الله بس متتأخريش عن كدا بقى :)

مهما كانت افكار الاخرين اللى بتشوفيها شبة افكارك فدا حاجة كويسة عشان تبتدى من حيث انتهى الاخرون متعملش من اول وجديد وتظهر عندك افكار جديدة او حتى لو هى هى تتكلمى فيها بشكل مختلف وتجددى وتطورى انتى منك لنفسك

وبعديت تعالى هنا مين اللى قال ان الشكولاتة تفاهات ولا تفاهات دى كلام مبعتر غير انك مضيعة فلوسك على الشيكولاتة :)

ربنا يوفقك
دمتى بكل خير
تقبلى مروروى

لا تـــشـــتــــاق يقول...

ولا كلام متبعتر ولا حاجه
ده حال الناس لما تبقي في غيبوبه التوتر

Lady E يقول...

أميرة علي كوكب مهجور : أيوة حقيقة مش حلم يا مرمر انتي اول تعليق :)

Lady E يقول...

أميرة علي كوكب مهجور : افكاري اللي بلاقيها في الكتب بتخليني مش عايزة أقلد حد وأفكاري متكونش مكررة
عالعموم هو موضوع الكتاب ده على اد ما هو جميل بس هو خطوة مش سهلة

فيروز الصوت الملائكي الرومانسي اللي لما بسمعها بروح لدنيا تانيه

أيوة شوفتهم امبارح :)

dramaqueen يقول...

كفاية انه كلام طالع من جواكى
واحشانى يا قمراية

وبعدين ثلاث مرات بس وزهقتى امال لو فضلتى شهر بحالة بمعدل ثلاث مرات فى الاسبوع وفى ايام بتكون مكالمتين او تلاتة
ودايما ياما مش موجودة او فى الحمام او نايمة

وبعد كدة نرجع نتصالح من غير ولا كلمة عتاب
وبعدين يتكرر الموضوع تانى بس متصالحناش

تسمى اللى عملته دة ايه
هبل ولا حب ولا طيبة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

كيكى عوووووو يقول...

مممممممممممممم
اعذرى صاحبتك متعرفيش ظروفها ايه!!
معلش كبرى دماغك وفكرى فى صحوبيتك ليها نفسها متقدريش صحوبيتك ليها بانها رديت او لا....!!
يمكن تكون مضايقة ولا حاجة
***خلى قلبك ابيض زى ماهو**
الشيكولاته مش هايفة دة غراااااام وانتقام
كان فى حاجة هعلق تانى عليها بس نسيت**
اة افتكرت
كأس العالم هو الى هيجئ بنفسة وفى تاكس كمان!

حـــلـــم كـــان يقول...

هيييييييييييييييييه

اول تعليق

عارفه انى ال25 بس بستهبل

الاول اتمنى تكونى بخير

وبجد الواحد مش عارف يعمل ايه فى الموبيلات اللى مشطبه على فلوسه دى

وانت جيتى على اكبر مشكله فى حياتى الشكولاته بضعف اوى قصاد اى نوع منها

ويوم ماتلاقى صحبيتك بتمهد للنهايه
وهى قاصده يبقا هى مش تستهلك

انضم للرابطه محبى فيروز المطربه وليست فيروز التانيه عشان مش بحب طعمها


بس اختلف المتش فارق معايا طحن

مبسوطه انى شوفتك واتعرفت عليكى

حنين الذكريات يقول...

الحب للأشياء بيكون كويس اذامواصلش للأدمان بمعنى انك تضيعى فلوسك كلها على الكروت والشيكولاته لازم تسيطرى على نفسك شويه
الورد ده احلى حاجه وانتى أحلى ورده بين الورود
ولازم ترتبى أعمالك علشان الوقت ميجريش دون جدوى
أكيد مش هتفرق كتير مكسب أوخساره لازم تكون روحنا رياضيه

mohamed ghalia يقول...

فضفضى يابنتى محدش واخد منها حاجة

Lady E يقول...

شوكولاتة :العبو مع بعض ومتتخانقوش يا شوشو :)

تسلميلي يا حبيبتي ربنا يكرمك ويرضى عليكي ويسعدك

والسؤال جاوبته هيييييييييه :)

نورتيني يا قمرايا

Lady E يقول...

عاشقه الرومانسيه : أخيرا لقيت حد زيي يا دودو :)


أكيد مهتمين بالمباراة وبإننا نكسب بس اذا مكسبناش مش هنموت يعني

Lady E يقول...

شيما : انتي اللي هتوقعيلي يا شيما أصل انا ببصم بس :)

مدونتك لسه وحشه على فكرة امنعي عنها الشوكولاته :)

حلوة اوي الذكرى بتاعت فيروز حسيت اني كنت معاكو وأنا بقرأها
نفسي اللقاء الجاي يكون قريب زي ما فاتيما بتقول كل شهر او شهرين لقاء :) عندكو في المنصورة

ههههههههه كده يا شيما اهي مصر فازت ومحصلش حاجة تانيه يا شوريرة

Lady E يقول...

دموع كابر : تمت الزيارة يا كابر

Lady E يقول...

ليس فقيرا من يحب : ان شاء الله

حلو التفاؤل ده يا قمرايا

سعيدة بالكومنت بتاعتك اللي كلها تفاؤل

نورتيني

Lady E يقول...

sookra : اللهم أمين

والله انتي فعلا سكرة يا سكرة

على فكرة حلمت بيكي :)

Lady E يقول...

أميرة : بسم الله الرحمن الرحيم

الإجابة تونس

(وش بيغمز بعينيه الاتنين)

Lady E يقول...

الزنارى : شكرا على رأيك الجميل يا زناري

أكيد وجهة نظرك احترمها جدا

بالنسبة لغضبنا لو مات احد احبابنا هو بيبقى حزن أكتر من غضب

دمت بخير

Lady E يقول...

شاب فقرى : ابطل اشتري كروت موبايل
ممكن لأني بحول رصيد من الفرع الرئيسي لفودافون عندنا فالبطريقة دي مش هشتري كروت :) بس هتفضل المشكلة هي هي

"وبطلى تاكلى شوكلاته عشان صحتك :$"

أهو ده اللي مش ممكن أبدا ولا أفكر فيه أبدا الشوكولاته دي غرامي مقدرش استغنى عنها ممكن أقلل منها لكن أبطلها مستحييييييييييل بحبهاااااا

بالنسبة لصديقتي هي مباعتنيش هي مردتش على اتصالاتي بس وبعد كده اتصلت بيا وقالتلي
انها مكانتش في البيت بس علشان الموضوع اتكرر اكتر من مرة فأنا اضايقت

وعالعموم بعيدا عن الصديقة فعلا اللي بيبيعك مرة يبقى ممكن يبيعك دايما للأسف

سن ال21 عامللي عقدة وكولكيعة الحمد لله ان لسه شهرين وأكمل ال21 :)

وبعدين بلاش حقد عالبونية علشان بتحب فيروز

وبعدين كمان انا بحب فيروز اناناس اكتر من التفاح والمرة الجاية ان شاء الله فيروز عليك طالما مجيتش لقاء المدونين اللي فات :)

الاغنية أكيد لازم تبقى رهيبة كلمات أيمن بهجت قمر

دمت بخير وسلملي على اختك اللي لسه معرفتش مدونتها

Lady E يقول...

أحمـــــــــــــد أبو العلا : فكرتني
لما بتوه في طريق بقول هو منين يودي على فين :)
انتا تقريبا توهت في البوست
مع انه ميتوهش هو خواطر

الشوكولاته دي فعلا فعلا ادمان بحب كل حاجة فيها شوكولاتة حتى بحب جهينة ميكس بالشوكولاته

أكيد شركة كادبوري وجلاكسي وكيندر وغيرهم بيدعولي :)

Lady E يقول...

Mr.Hazem : اللي هي ايه مشكلتك يا مستر حازم قولها ومتقلقش سرك في بير كل الناس هتقرأه بس :)

فيروز مش هقول عنها غير ان فنها راقي بجد اللي عايز يهرب من الدوشة اللي بيقولوا عليها اليومين دول فن يسمع فيروز
هجرب نصيحتك وهسمع فيروز مع فنجان القهوة الصبح طالما هتعرف عليها :)

فازت او مش هتفوز انا روحي رياضية
في الاخر كلنا عرب

شكرا على التشجيع والمجاملة

دمت بخير

Lady E يقول...

صاحب رأى : حرام عليك :)

مين ده اللي ميزعلش ميعرفش يفرح

تصدق فعلا
انا مصرية وحياتنا كمصريين زي ما انتا عارف الفرح فيها كتير كتيييييييير كتيييييييييييير جدا لدرجة اني مش عارفة احزن تخيل طول الوقت فرحانة ومبتسمة ومش عارفة الناس بتزعل ازاي
فعلا فعلا بتهزر انتا شايف ان حياتنا كمصريين كلها مفرحة ومفيهاش زعل
اوعى تجيب سيرة الزعل دي تاني والا متبقاش من مصر


وعلى فكرة انتا اللي قولت تتفلق مش انا :)

واياكي دي اعتبرها تهديد ولا ايه ؟ :(

ماشي الله يسامحك :(

Lady E يقول...

رحــــيـل : أمين يارب

عندك حق فعلا كله بأوان

على فكرة صحبتي شافت كلامك وبتشكرك جدا ولما كلمتني استشهدت بكلامك :)

وبتقولك انتي عسولة أوي

Lady E يقول...

بســـمة انور : ههههههههه كنت عارفة ان ده هيكون ردك يا بسبوسة انتي مش بتحبي المواضيع اللي بتكون خواطر :)

عالعموم متقلقيش مفيش لوغاريتمات ولا حاجة :)

Lady E يقول...

شفـقــة و إحســــان : ههههه ده من زمان يا شفشوقة

بقى كده ؟ اصغر من ال21 بشهرين اتنين

مينفعش العب عالمرجيحة بدل الطين؟ :)

منوراني ودايما سعيدة بتعليقاتك

الشعب لابد له من حكومه تشكمه يقول...

ليكى عندى تاجين تعالى خديهمفى ايدك:)

Lady E يقول...

احساس طفلة محبة للرومانسية بس واقعية : يارب يا اختي يارب

تيجي بألف سلامة ان شاء الله

موضوع الأفكار مقتنعة برأيك بس مش عايزة كتابي يكون مكرر واول كتاب أكيد هتعلم فيه ومنه :)

لأ تفاهات دي اللي حواليا بيقولوها لما بقولهم بصرف فلوسي على الشوكولاته

لكن الشوكولاته عمرها ما كانت ولا هتكون تفاهات :)

متتأخريش للصيف يا احساس طفلة حاولي تيجي في الربيع علشان نفسي اشوفك

دمتي بخير وسعادة
وطبعا متقبلة مرورك

Lady E يقول...

لا تـــشـــتــــاق : غيبوبة التوتر
ايه الكلام الكبير ده
مين الناس اللي في غيبوبة التوتر
ومين غيبوبة التوتر دي أصلا !

Lady E يقول...

dramaqueen : هو الحقيقة طالع من الكيبورد :)
بجد انتي وحشاني اكتر يا قمرايا
طب كانت بتتصل بيكي تاني ولا بتطنش؟
انتي اكتر حد يقدر يسمي اللي عملته حب ولا هبل ولا طيبة ولا كوكتيل منهم هما التلاتة لأنك انتي اللي عارفاها
لو تهمك صالحيها ولو هي مصدر من مصادر التنكيد عليكي انسيها تماما انا بهدي النفوس :)
منوراني دايما يا كوين

Lady E يقول...

كيكى عوووووو : حضرة المحامي كيكي أهلا أهلا :)
على فكرة القلب بيبقى لونه احمر لكن يمكن قلبي ابيض علشان زملكاوية :)
طبعا الشوكولاتة مش هيفا ولا نانسي ولا حتى روبي نياهاهاها
وكاس العالم بيسلم عليكي وبيقولك انه جاي في ميكروباظ عطلان لأن حتى لو طلعنا كاس العالم
مستحيل دولة عربية تاخده !!

Lady E يقول...

حـــلـــم كــــان : هييييييييييه أول تعليق بعد ال24 هييييييييييه

الحمد لله انا بخير طول ما انتي وكل اللي بحبهم بخير

عاااااا أيون الحل اننا نرجع لعصور ما قبل التاريخ من غير موبايلات :)

الشوكولاتة بتخلي أي حد يضعف قدامها مش انتي بس :)

تمام يبقى اللقاء الجاي ان شاء الله هتغني معانا لفيروز ابدأي احفظي اغاني فيروز من دلوقتي

انا كمان سعيدة اني شوفتك واتعرفت عليكي يا قمرايا وعقبال اللقاءات الجاية ان شاء الله

ربنا يديم الود

Lady E يقول...

حنين : أينعم عندك حق
بس أسيطر على نفسي شوية أكيد انا مسيطرة على نفسي بدليل اني محولتش موبايلي لفاتورة ووقتها مش هيبقى في أي سيطرة :)
والشوكولاتة بحبها جدا وصعب انساها
تسلميلي يا أحلى حنين بين كل الحنينين :)
وأحلى زهرة بين الزهور
وأكيد لازم روحنا تبقى رياضية
سعيدة بتعليقك وبوجودك يا قمرايا
دمتي بخير

Lady E يقول...

mohamed ghalia : زي بسمة يا محمد مش بتحب المواضيع بتاعت الخواطر
شكرا على النصيحة ولو مفضفتش في مدونتي حبيبتي هفضفض فين في مدونة الجيران ولا ايه؟
دمت بخير