الاثنين، 9 نوفمبر 2009

تفاصيل يوم الندوة الثقافية مع الاعلامي أ/ سيدعلي في كليتنا



صورة لكليتنا النهاردة طبعا نظيفة وأحلى من أي يوم

طبعا الكلية النهاردة كانت حاجة تانيه خالص جايلنا في الندوة الثقافية الكاتب الصحفي ومقدم برنامج 48 ساعة أ/ سيد علي طبعا انا مش متابعة برنامج 48 ساعة دايما يعني ساعات بشوفه لكن كنت عايزة احضر الندوة علشان اشوف ايه اللي هيحصل فيها

طبعا ملقتش مكان اركن فيه الكتكوتة من الزحمة اللي كانت في شارع الكلية وكمان علشان رحت بدري نسيت الكارنيه والبطاقة واي اثبات شخصية وفوجئت على بوابة الكلية ان أم ابراهيم بتقوللي افتحي شنطتك _ قال أيه بيفتشوها – بس هي بصت فيها لقت الكتب فقالتلي اتفضلي هي وظبابيط الأمن
دخلت الكلية لقيت بلونة كبيرة مكتوب عليها اسم الاعلامي الضيف , رحت المدرج الرئيسي عندنا في الكلية _ مدرج المسرح_ لقيته زحمة ومكاني اللي بقعد فيه فضوه علشان الدكاترة يقعدوا فيه
المفروض اللقاء كان يبدأ الساعة 10 انا رحت الكلية الساعة 10 ونص ومكنش لسه بدأ
فاتت ساعة وبرضه مبدأش والتانية ولسه برضه الضيف مجاش اخيرا بدأوا الندوة الساعة 1 الا خمسة




دي صورة الاعلامي سيد علي وهو داخل المدرج طبعا الصورة مش واضحة أوي


طبعا المدرج اتغيرت معالمه واتفرش سجاد وبقى فيه مراوح والستاير اتقفلت ومكتب الدكاترة اتفرش وحطوا عليه ورد والكلية اتنظفت وكمان شارع الكلية اتنضف وعارفين مين اللي عمل كل ده؟ اتحاد الطلبة وطلاب اعلام هما اللي رتبوا ونظفوا بإيديهم فعلا الكلية كانت حاجة تانيه النهاردة



بدأ الحوار بكلمة الدكتورة جيهان اللي بجد تعبت جدا في الاعداد للندوة دي وعملت مجهود كبير جدا لإنجاح الندوة وبعدين أيات من القرأن الكريم بعدها العميد قال كلمة وبعدها نائب العميد وأخيرا الاعلامي أ_ سيد علي اتكلم وقال كذا حاجة منها ملحوظته ان المدرج كله بنات ومكنش شايف الاولاد فقال ما شاء الله عدد البنات اللي بيتعلموا ومحجبات زاد جدا عن السنين اللي فاتوا بس فين الاولاد فالاولاد قالوله احنا هنا يا عيني كانوا قاعدين في بنشين اتنين وباقي المدرج كله بنات :) اصلا الرجالة ماتوا في الحروب

وبعدين اتكلم في كذا موضوع واخيرا جه وقت الأسئلة وحيث اني مش اعلام انا انجليزي وحيث كمان اني لسه عارفه موضوع الندوة امبارح قبل ما اروح عالبيت على طول وقولتلهم انا معاكو ومقعدش وضبت الكلية معاهم فكان لقسم اعلام الاولوية في الاسئلة وكنت هتجنن لازم أسئل فكتبت سؤالي في ورقه ووديتها مع اتحاد الطلبة لدكتورة جيهان بس للأسف عدد طلبة اعلام اللي سألوا كان كبير بس على مين هسال يعني هسأل وكمان أسئلة كتير من الي كنت عايزة اسألها في طلبة غيري سألوها



المهم خلصت الندوة وقناة المحور عملوا لقاء مع أ/ سيد علي ومع العميد ونائب العميد وبعض الدكاترة وطبعا صوروا الندوة وبالتالي صورونا بس مصوروش معانا وكان في زحمة غير طبيعية من الطلبة
فكان في مصور فوتوغرافي وحد كان من قناة المحور تقريبا فالمصور بيقوله : شوفت يا عم شعبية الاستاذ سيد كبيرة
رد عليه الشخص ده وقال له : يا عم ولا شعبية ولا حاجة دول بس عايزين يتصوروا في التلفزيون
انا اتعصبت وحسيت بالاهانه معنى كلامهم اننا تافهين فقولت للمصور والشخص اللي كان معاه : على فكرة احنا مش عايزين نتصور في التلفزيون ولا حاجة بس في قدامنا شخص ليه قيمة في المجتمع وليه مكانة فعايزين نستفيد بخبرته مش أكتر



وعلى فكرة انا اصلا ميهمنيش تصوير التليفزيون لأني عارفاه كويس لأن بابايا اعلامي وليه اصحاب مخرجين وصورت كذا برنامج للأطفال وغنيت مع الفنانة نادية مصطفى وقالتلي وقتها انتي أصغر كورال شوفته في حياتي
وقررت اني هاروح ومش مهم التصوير اللي قالولنا عليه بإعتبار اننا متميزين وفعلا كنت همشي بس افتكرت اني لسه مسألتش الأسئلة اللي عايزة أسئلها بتاعت المدونين وبالتحديد أسئلة الجميلة داليا قوس قزح وبالرغم من الزحمة وأسئلة عشرات الطالبات قدرت اني أسأل الاعلامي أ/ سيد علي عن التدوين وكانت أسئلتي



انا : إيه راي حضرتك في التدوين ع الانترنت ؟ ده سؤال المدونين عايزين يعرفوا اجابته من حضرتك

أ/ سيد علي : من أعظم الحاجات اللي حصلت العشر سنين اللي فاتوا ومن أروعها

أنا : طب يا فندم في صحفيين في جريدة الأهرام قالوا ان المدونين أولاد الشوارع ؟ ( على فكرة ده حصل ومعنى الكلام اننا مش صحافيين ولا بنكتب حاجة كويسة)

: لأ طبعا دول " سفلة" التدوين شيء رائع

أنا : وفي رأي حضرتك ازاي ممكن نحمي حقوق الملكية الفكرية ع الانترنت ؟

: ده موضوع كبير أوي لازم تكتبي فيه وكلكوا تكتبوا فيه وتفتحوا باب النقاش وتعملوا جروب

الحمد لله عرفت اسأله 3 أسئلة بحالهم والحمد لله برغم انه مكنش عنده متسع من الوقت الا انه جاوبني وكان مهتم جدا

المهم بعدها رحت اوضة العميد وقعدت مع الدكاترة والعميد ونائب العميد ومخرج ومصور ومعدين قناة النيل للتعليم العالي ايون قناة المحور مشيوا مع الاعلامي بتاعهم لكن اللي صوروا بعد كده قناة النيل للتعليم العالي


وكان في تورتة كبييييييرة وتخيلوا كمان قعدت مع الدكاترة على الترابيزة بتاعتهم وأكلت التورتة معاهم ومعرفتش اكمل طبقي كان في دكاترة عايزين يولعوا فيا ازاي طالبة واقعد معاهم في اوضة العميد ومش كده وبس كمان على نفس الكراسي ونفس الترابيزة :)

واللي خنقهم اكتر اني صورت مع قناة النيل للتعليم العالي كنت كل شوية بأجل التصوير وكنت اخر موهبة وانا بغني خير اللهم اجعله خير العميد بصلي بصة رعبتني ف اتلخبطت وغنيت مقطع صغير جدا من بكتب اسمك لفيروز وحسيت اني أخدت كل اللي في القاعة لعالم تاني كلهم كانوا مبهورين ولما مكملتش غنا

المخرج والمصور قالولي ليه كده مكملتيش ليه قولتلهم العميد بصلي أصله عايز يصور :) صورت قبل العميد تخيلوا مكنش عايزني اصور علشان سيادته يصور الاول مع ان في 3 مواهب صوروا قبلي بس برضه صورت قبله نياهاهاهاها صحيح مش كتير بس برضه قبله


المهم بجد كان يوم لذيذ هو مرهق شوية بس لذيذ وانا رايحة البيت وصلت دكتورة جيهان بيتها قريب جدا من بيتنا والكلام معاها ممتع جدا بس كانت عايزاني اركز معاها ومش مهم الطريق :) طبعا انتو عارفين اني مكنتش مركزه مع الطريق معناها ايه بس الحمد لله عدت على خير وكان بجد يوم جميل
ومش ممكن ابدا انسى كتاب ما فعله العيان بالميت لبلال فضل اللي استمتعت بقرائته طول اليوم قبل الندوة
أخيرا كليتنا بقت كلية أخيرا

هناك 21 تعليقًا:

الشعب لابد له من حكومه تشكمه يقول...

خساره جيت وملحقتش اقولك على الاسأله:(
اصلى بتابعه فى برنامج 48 ساعه هو وهناء السمرى:(
بس اييييييييييه ده طلعتى فى التلافزيون دا احنا عدينا باه ونجيب الاوتوجراف وتمضيلنا باه:)
بقولك ايه صحيح محدش ساله عن البلاغ اللى شوبير مقدمه فيه؟؟؟؟؟؟؟؟؟؟؟؟؟؟
متكلمش فى اللى حصل على الهوا لما استضاف هبه....؟؟؟

بندقه بقولك ايه خدى ميلى من اميره اوك..عاوزه ارغى معاكى قررت ارغى علشان وحشنى:)

Unknown يقول...

ما شاءا لله عليكي
طلعتي مش قليلة :)
بتمنالك التوفيق دايما يارب
ومنه للأعلى
وان شاءا لله كان نهارك موفق :)
للأمام

شفـقــة و إحســــان يقول...

ايه ده بس بس بس..... سيبك من كل ده
بقى الحاج طلع اعلامى والكتكوتة طلعت بتصور اغانى اطفال وغنت مع نادية مصطفى دى انتى واصلة بقى يا ليدى
ماشى يا عم ومخبية براحتك
انا زعلانة منك ومش هقولك ليه
مخمصاكى

أميرة علي كوكب مهجور يقول...

يا مشرفنا انت ياجميل وش بيغمز :)

حنين الذكريات يقول...

ربنا يوفقك وتكونى من ضمن الصحبه اللى كنتى معاهم أو اعلاميه كبيره تغير المفاهيم وتظهرى ايجابيات مصر والمصريين والكل هيبقى ايجابى الى الامام

Lady E يقول...

الشعب لابد له من حكومه تشكمه : خسارة فعلا يا شيما :(

ههههههههه المرة الجاية ابقي جيبي الاوتوجراف نياهاهاهاها
انا سجلت مع قناة النيل للتعليم العالي لكن لسه البرنامج متعرضش

طبعا الاسئلة محدش سأل عن شوبير لكن هو اتكلم عن شوبير وموضوع انه بيطلع في برنامجه لمدة 5 ساعات يدافع عن نفسه ان محدش بيعمل كده في العالم

وايه موضوع هبة ده احكيلي علشان انا مشوفتوش

بالنوسبة لميلك طلبته من أميرة وقالتلي هبعتهولك لما نتكلم ميل ولغاية النهاردة لسه متكلمناش ميل :)
هبعتلك ايميلي الكومنت اللي بعد ده ولما تاخديه قوليلي علشان امسحه
بجد وحشااااااااااااني

Lady E يقول...

Mr.Hazem : شكرا ليك يا مستر حازم

ومفيش انسان عايش في الحياة قليل

اللهم أمين وليك مثل دعائك

والحمد لله كان نهار جميل وموفق

دمت بخير

Lady E يقول...

شفـقــة و إحســــان : في الأول انا تقريبا عارفة ليه مخمصاني يا شفشوقة يا حبيبتي والله كان نفسي اشوفك في اللقاء بجد ان شاء الله لازم اشوفك واتعرف بيكي اللقاء الجاي ان شاء الله وبعدين اسمك في قلبي مش مهم أقوله عالمدونة ولا ايه؟ :)

وانا صورت برامج للأطفال وبرنامج مع الفنانة نادية مصطفى كانت بتغني اغانيها مش أغاني أطفال وكنت بغني معاها في الكورال واتعرفت بيها بجد انسانة وفنانة رائعة وطيبة جدا
وبعدين مش مخبية ولا حاجة بس مجتش فرصة اني أقول قبل كده بس :)

منوراني يا شفشوقة ومتزعليش مني كله الا زعلك :)

Lady E يقول...

أميرة علي كوكب مهجور : هههههههه

شكرا يا مرمر وش بيغمز :)

Lady E يقول...

حنين : أهلا بيكي يا قمرايا

يارب الكل يبقى ايجابي

اكيد لو كلنا بقينا ايجابيين حاجات كتير هتتغير وتبقى أحسن

شكرا ليكي يا جميله

Maram يقول...

تصدقي اني عمري ما حضرت اي ندوه الجامعه عندنا بتعملها برغم من اني اعلام؟!!! بس بجد حبيت روحك اوي.. آنا فعلا اتفرجت مرتين تلاته علي برنامج ٤٨ ساعه وفعلا لفت نظري ..حسيت انه متواضع وشه سمح .... المهم بتحصل في احسن الجامعات أنا لما بروح الجامعه وبشوف الأعلام مرفوعه وفي زرع في كل حته بعرف ان في ضيف مهم جي لينا ... والله احنا شعب مسخره


:) أديني ابتسمت اهه

blue-wave يقول...

لسه زى مانتى
شقيه ومجتهدة
اتمنى تكونى دايما بخير
تحياتى

صاحب رأى يقول...

هو اوباما اللى كان بيزور الكلية ولا ايه :)
ايه النظافة دى كلها

عموما انتى طلعتى كبيره اوى
مش فى السن :)
بس واصله واصله

كيكى عوووووو يقول...

واصله واى واصله
دى فى كوارل الاشبال**
انا بس جيت اديكى بوسة وحبة حقد
امواااااااااااااااة
**الحمامات....طاااارت
وش بيغمز
كع كع كع

Lady E يقول...

MaraM : ليه كده يا مرمر؟

تسلميلي يا قمرايا وانا كمان حبيت روحك جدا عقبال لما أشوفك ان شاء الله ونحب رغينا سوى :)
ههههههه ومن ناحية احنا شعب مسخرة ف فعلا احنا شعب مسخرة
مش فاهمة كل الأعلام اللي كانت في الكلية دي ليه :)

ابتسامتك نورت المدونة يا مرام يارب دايما مبتسمة :)

Lady E يقول...

صاحب رأى : هو مش أوباما :)

بيتهيألي لو كان اوباما اللي جاي الكلية كانوا بنوها تاني مش بس نظفوها :)

ياريت يجي لنا في الكلية كل يوم ضيف علشان تبقى بالنظافة والجمال ده :)

Lady E يقول...

كيكى عوووووو : يااااااه أخيرا رديتي

يا رافعة معنوياتي يا كتكوتتي

ربنا يخليكي ليا يارب

البوسة مقبولة لكن شويةالحقد بدليهم بشوية اي حاجة تانيه متخليش الحقد الدفين يظهر يا كيكي متفكرينيش بالأكاديمية والتكييف :)

أحلى حاجة ان الحمامات طارت نياهاهاهاهاها وش بيغمز

ساسو يقول...

هو انتي في كلية ايه بالظبط ..فين يعني محافظة ايه؟

Lady E يقول...

ساسو : عيب عليكي يا ساسو يعني مأخدتيش بالك ان الكلية في دمياط وانا عمالة اتكلم وارغي عن دمياط احنا بلديات يا بنتي :)

انا في English art يا ساسو

ساسو يقول...

يااااارااااجل (وش مكسوف اكتر من الطمطماية)
هههههههههههههه
معلش انا اسفه اصل الزهيمر شغال معايا علي عينه
انا كنت بتأكد بس مش اكتر
وطلعنا بلديات فعلا
تحيا دمياط حره مش مستقله ..

a7med-Mado يقول...

ههههههههههههه الله يسهله ياعم
قبل العميد وقناة التعليم العالى وفيروز
كل دة فى يوم واحد
على فكرة أنا أول مرة أدخل المدونة بس عجبتنى أوى وعجبنى كلامك