السبت، 7 نوفمبر 2009

لقاء مش أي لقاء (موضوع للغيظ فقط)

أيون بغيظ كل اللي محضروش وكنت مفتقداهم جدا واللي لازم يكونوا موجودين معانا اللقاء الجاي ان شاء الله

امبارح كان يوم لذيذ بجد مرمر أميرة على كوكب مهجور يا عيني غلبتها على ما صحتني من النوم لأني بطبيعة الحال مش بصحى بدري من النوم وكمان يوم الجمعة يوم الويك اند اللي ما بصدق انام فيه براحتي وخلاص أخيرا صحيت وببدأ في اللبس وهوب الكهربا قطعت وابتديت أقلق وأقول مش هروح اللقاء لكن نزلت مع انتيمتي (مامتي) وقابلت أميرة ومامتها وروحنا الموقف وركبنا من هناك

اتعرفنا اكتر انا وأميرة ودردشنا كتير طول الطريق وبعدين لما وصلنا موقف المنصورة مرمر كلمت صبرني يارب وكان تليفونها غير متاح فكلمت نوران أم شريف السكرة وقالت لنا انهم لسه في مستشفى الأطفال روحنا هناك وانا دخلت بتحفظ (داخله بنك الدم بقى بيني وبينه عداوة) ما شاء الله لقيت العدد كبير وأول حد شوفته كانت صبرني يارب وأول حاجة أقولها ليها كانت فين شيما :) قالتلي اللي لابسة اصفر هناك وكان في بنوتة جنب شيما هي كمان لابسة أصفر :) ف اتلخبطت وبعدين سلمت على شيما وبجد حسيت اني اعرفها من زمان وللأسف مخضتهاش ب بوكيه الورد :) المرة الجاية يا شيما أوعدك اني هخضك بس من غير بوكيه ورد علشانك سبتيه في كوك دور عااااااااااا عااااااااا عااااا
وشوفت خالد همس الأحباب فقولتله انا ليدي ومدونتي روح طفلة مش عايزة تكبر فقال لي بكرة تكبري ان شاء الله :)


وطلعنا من المستشفى وانا مع شيما ودخلنا المسجد سوى سمعنا خطبة الجمعة وبجد كانت جميلة جدااا
وصلينا سوى ياه على الروحانيات الجميلة اللي كنا فيها وطلعنا من المسجد اتجمعنا وروحنا على كوك دور مشيا على الأقدام وبجد طلع مكان كويس قضينا فيه وقت جميل واتغدينا سوى انا وشيما وبنت المنصورة واختها وضحكنا من قلبنا وكمان كنت قاعدة فلقيت نوران بنت خيخة جت سلمت عليا وعلى مامتي من غير ما اعرف انها نوران وانا هموت واتعرف عليها اساسا وسألت عليها وبعد كده عرفت انها هي اللي سلمت عليها بجد بنوتة جدعة وعسولة أوي و مش خيخة ولا أي كلام

بعدها طلعنا على نادي الأطباء في طلخا عالنيل بجد نادي شيك وأجمل ما فيه انه عالنيل وكنا هنقعد قدام النيل بس مش عارفة مين اللي اقترح اننا نقعد في قاعة كان فيها كوشه طبعا محدش قعد عالكوشة نياهاهااهاها سيبنا الكوشة وقعدنا على ترابيزة كبييييييرة يرمح فيها الخيل تلاتين يوم ما يجيب أخرها (طبعا لأن الخيل مربوطة هاهاهاها) واتعرفت بشوية من الموجودين منهم :

فاتيما العسولة والرقيقة وروحها بجد جميلة جدا والحضونة بتاعتها ادمااااان بجد حضنها مش أي حضن اخدت حضن منها مرتين ربنا يرجعلك يوسف يارب وميتحرمش من حضنك :)

ونوران بنت خيخة كنت بحبها من مدونتها ولما اتعرفت بيها امبارح حبيتها أكتر

حلم كان بنوتة لذيذة و شقية ودخلت قلبي بسرعة وحسيت اني اعرفها من زمان


شيما حبي يا حبي مكنتش عايزة يفوت فسوة وانا مش معاها بجد هي فعلا اختي الكابيرة شخصية تتحس اكتر من انها تتوصف بالكلام لأن الكلام مش هيوفيها حقها وعملت امبارح مجهود كبير جدا علشان اللقاء الجميل ده


رحيل وايمان بنوتتين عسولين وحلوين جدا فرحت جدا لما اتعرفت عليهم وصلينا سوى علشان يبقى تعارف وعيش وملح وصلاة كمان :)


بنت المنصورة وأختها بنوتتين زي العسل حسيت اني اعرفهم من زمان وكمان بنت المنصورة طلعت زومل من نفس ذات الكلية :)

ابراهيم كاتب مصري بجد انسان ذوق وجدع جدا وكفاية انه برضه زومل في نفس ذات الكلية

صلاح مسدس صغير المحامي بتاعنا مرح وذوق جدا وهو وابراهيم جابلونا مركب علشان ناخد جولة في النيل

أميرة مرمر بجد انا بحبك جدا ولولا انك شجعتيني مكنتش حضرت اللقاء ده بجد انتي بنوتة جميلة أوي

عاشقة وغلبانه : طلعت مرحه طلعت مرحه هييييييييه كنت كل ما بدخل مدونتها بزعل ويمكن اعيط كمان بس لما شوفتها لقيتها بنوتة زي القمر ومرحة وعسولة

صبرني يارب : عسولة جدا وجميلة جدا ومرحة وكانت عاملة جو جميل ل اللقاء وأول حد شوفته في اللقاء وحسيت بالاطمئنان

افتقدت جدا خالتو ستيتة حبيبتي وكلنا سألنا عليها ونفسي اشوفها في أقرب وقت
وكمان افتقدت ايمان ايمي حبيبتي واحساس طفلة رومانسية يارب اشوفك لما ترجعي من اليابان او اجيلك اليابان
وشباك موارب منار الدكتورة بتاعتنا ويوم جديد عرفت انها اتكلمت في التليفون بس امتى مش عارفه عااااااا كان نفسي اشوفك وبسمة انور سالت عليكي اول لما وصلت وقالولي انك مجيتيش مخمصاكي وشاب فقري برضه عرفت انه مش جاي والانجينير احمد ابو العلا بجد كان يوم جميل وفاتك وكيكي عوووو حبيبتي أي خدمة اتصلت بيكي في اللقاء وانتي متصلتيش بيا في أي لقاء روحتيه شوفتي بقى (وش بيطلع لسانه)
ديدي كان نفسي اشوفك بجد

طبعا الرحلة النيلية كانت روعة واتعرفنا فيها على بعض اكتر وبجد منظر الطبيعة ياخد العقل وفاتكو نص عمركو ياللي محضرتوش اللقاء


وكمان بعد اللقاء اتمشيت مع مامتي على النيل ومفيش ولا تاكسي جاي فاضي كلهم كانوا مليانين لغاية لما اخيرا لقينا تاكسي وتوهنا لغاية لما وصلنا لمكتبة بوكس اند بينز وكل ما اسأل على كتاب يقولولي خلص بس جبت كتابين حلوين

بجد يا مامتي انا بحبك اوي وانتي فعلا انتيمتي واليوم كان جميل بوجودنا سوى


ملحوظة : هجمع كل الصور اللي كنت عايزة انشرها عالمدونة وال3 صور بتوع يوم اللقاء وهنشرهم كلهم في بوست لواحديهم ان شاء الله


هناك 18 تعليقًا:

احساس طفلة محبة للرومانسية بس واقعية يقول...

هو انتى كمان رحتى
يعنى خيخة وفاتيما وصبرنى وسول وليدى وعاشقة وغلبانة انا مش هسيبكم الصيف اللى جى واحتمال الربيع كمان غير بلقاء زى دا مليش دعوة انا ليا عندكم لقاء

شكل اليوم كان جميل فعلا وغير انكم اصلا متجمعين كمان ركبتوا مركب فى النيل وسمعت ان كان فى شيكولاتة يعنى غيظ بغيظ ماشى ماشى ماشى و مش كفاية بتتكلمى على اللقاء
لا وقصدك كمان تغيظينا

بس يلا معلش المرة دى عشان الصور اللى هتحطيها البوست اللى جى ايووووووووون اللى جى خليكى جدعة بقى

يارب دائما متجمعين فى الخير
تقبلى مرورى

احساس طفلة محبة للرومانسية بس واقعية يقول...

يلا حظى عشان ما امشيش زعلانة
اول تعليق والتااااانى كمان

الشعب لابد له من حكومه تشكمه يقول...

يا هلا ياهلا ببندقه:)
ايه يابنتى اتصلت بيكى امبارح علشان اطمن وصلتو ولا ايه الموبايل كان مقفول..

انا مبسوطه اوىىىىىىىى انى شوفتك والله سلميلى على طنط كتييييييييييييير.
انتى صورتى صور؟؟؟؟؟؟؟ صورتيها امتى؟؟؟؟؟؟؟؟؟
ها جايه امتى باه:)

غير معرف يقول...

إزيك يا جميلة بإذن الله :)

..

مامتك بجد,أنا بحسب أختك:)

غير معرف يقول...

إزيك يا جميلة بإذن الله :)

رحــــيـل يقول...

كنتو منورين بجد
واديكو عرفت سكة المنصوره كل لقاء لازم تيجو بقى
هههههههه
انا مبسوطه بجد انى عرفتكم
يااارب تكونى بخير دايما

Ahmed يقول...

والله ياليدي انا عارف اد ايه بتكون اللقاءات ديه جميله
لأن الناس ديه كلها واولهم انتي طبعا مش ممكن يجتمعوا في مكان وميكونش اجتماع جميل كل اللي فيه يفرحوا

بس هنعمل ايه؟ هيا بتكون ساعات حظوظ واوقات صعب انها تتوفق عند كل الناس

ان شاء الله نتجمع كلنا على خير

mohamed ghalia يقول...

دا انتى بتغظينا بجد بقى
عاااااااااااااااااا
ناس هايصة وناس لايصة
أنا كنت فى المعسكر على طريق الفيوم بزور صاحبى فى الجيش
ماثى ماثى
خيرها فى غيرها

غير معرف يقول...

للاسف متعرفتش عليكى
بس اللقاء الجاى ان شاء الله
اليوم كان جميل بيكم كلكم صراحه
فرصه جميله جدا

Unknown يقول...

اهئ اهئ اهئ
طيب انا شو ذنبي تغيظيني

يلا ربنا يسعدكم ويبسطكم على طول
بصراحه بحسدكم على لقائاتكم ههههه
ربي يوفققكم ويحميكم وما يحرمكم من بعض
وترتقوا دائماً بكتاباتكم
تحيتي

مسدس صغير يقول...

سعداء جدا انك نورتينا وماما كمان والله
نورتونا
بجد كان يوم جميل
سعيد انى اتعرفت عليكو كلكو
ربنا يديم الود والورد
هههه
سلميلى على ماما بقى وقوليلها نورتينا

فراشة يقول...

اكيد كان لقاء جميل بيكم

ان شاء الله المرة الجاية أكون موجودة

عشان متغيظينش هههههههههه

حمد الله على السلامة وعقبال المرة الجاية ورحلة العمرة والحج

Darsh Basha يقول...

نورتى اللقاء يا ليدى
انتى ومامتك
وان شاء الله تتكرر مرة كمان

بســـمة انور يقول...

ليدى حبيبتى
بتزعلينى ليه بس
والله كنت عايزة اجى اللقاء ده عشانك انتى مخصوص
بس معلش بقى معرفتش اجى
وزعللللللللللللللت خااااااااالص وربنا

انتى من المنصورة ولا منين؟؟؟

بســـمة انور يقول...

على فكرة يا قمرة لينك مدونتى اتغيرت


وبرضو نا زعلانة عشان مشوفتكيش
عااااااا اهئ اهئ اهئ واااااء

بســـمة انور يقول...

http://basma-2010.blogspot.com/

دة اللينك صحيت نسيت

بمووووووووت فيك وربنا خالص مالص كتيييييير

عاشقه الرومانسيه يقول...

زعلانه منك بقى هه بس

همس الاحباب يقول...

سعدنا بمقابلتك جدا انت والست الوالدة
ودايما نشوفك على خير
تحياتى