الاثنين، 2 نوفمبر 2009

معجزة صحيت بعد الموت


كان ياما كان يوم الجمعة اللي فاتت كان في بنوتة ومامتها رايحين يزوروا خالة البنوتة وطلعوا ع القاهرة ومن القاهرة راحوا جمهورية المنوفيه وهما في الطريق ضلوا الطريق وطلعوا على طريق تاني خالص غير اللي بيمشوا فيه وكانت نجاة بتكمل الصورة وبتقول في الmp3 طويييييله طويييييييله يا سكة العاشقين تيرا طوييييييلة طويييييييييله على العاشق طويله يا عيني والجو كان جميل والشمس خفيفه وفجأه الجو بقى ممطر مطر خفيف وهما ماشيين في طريق كبير مكون من خمس حارات يعني طريق كبير ويستحمل ان 5 عربيات يمشوا جنب بعضيهم بس القاهريين الله يعمر بيتهم كانوا بيمشوا 7 او 8 او احيانا 9 عربيات جنب بعض وكانوا عاملين زحمة وهرجله كبيره جدا

وفضلت البنوتة ومامتها ماشيين لغاية لما الحمد لله دخلوا في الطريق الصح طريق القناطر المنوفيه _ وهيلا هيلا في القناطر رحلة جميله في القناطر كلنا عيله في القناطر _ دي اغنية كنت بحبها وانا طفله

كانت البنوتة عندها بداية دور برد وكانت صاحية بدري ومنامتش كويس والجو بدأ يمطر على الطريق السريع ما بين القناطر والمنوفيه وكأن المطرة كانت مستنياهم المطرة بدأت خفيفه والبنوتة كانت ماشية بسرعة والطريق كان عامل زي الثعبان كله منحنيات فمامة البنوتة قالت لها هدي السرعة شوية فالبنوتة – وبراءة الأطفال في عينيها – بصت للمراية الصغنونة لمحت وراها 3 عربيات منهم عربية بيجو بيضا ظهرت فجأه
وداست البنوتة على الفرامل بكل قوه علشان تهدي السرعه ووقتها فقدت السيطرة على الكتكوتة

الكتكوتة راحت منها يمييييييين بكل قوووووووه يعني كان ممكن تخبط في العربيات اللي وراها او جنبها ففكرت ان الفرامل فيها مشكله فضغطت أكتر على الفرامل مرة تانيه فالكتكوتة راحت منها شماااااال ناحية السدود الأسمنتيه اللي بتبقى بين الطريقين وفجأه البنوتة حست انها مش شايفه أي حاجه ومش قادرة تسيطر على الكتكوتة ومش قادرة تسمع كلام مامتها بوضوح في الوقت ده الكتكوتة خبطت في السدود الأسمنتيه 3 مرات والكتكوتة لفت منها وبقت في الاتجاه المعاكس ووقفت بعد طبعا ما اتخبطت من كل النواحي في الوقت ده كان صاحب العربية البيجو البيضا وقف عربيته ونزل وقف الطريق للبنوتة ومامتها لأن ده طريق سريع والحادثة حصلت في منحنى يعني العربيات اللي جايين مندفعين عمرهم ما هيشوفوا الكتكوتة ولازم يخبطوا فيها ولو كان ده حصل كانت الكتكوتة والبنوتة ومامتها بقو كفته كل ده والمطر بقى ينزل بغزارة كبيرة جدا وحجب الرؤية شويه

نزلت البنوتة ومامتها وهما الاتنين كان الفاصل بينهم وبين الموت ثواني وشافوا الخبطات بتاعت الكتكوتة وكانوا متوقعين انها بقت كفته من قدام من شدة الخبطات لكن الحمد لله اللي حصل خبطات خفيفه بالنسبه للحادثه وخدوش في دهان الكتكوتة والبنوتة اعصابها باظت فمامتها أصرت انها تكمل سواقة الكتكوتة وكمان مامة البنوتة كانت اعصابها بايظة بس حاولت تكمل سواقه كل ده وصاحب العربيه البيجو موقف الطريق للبنوته ومامتها وواقف تحت المطر والبنوتة ومامتها مكانوش شايفينه وبعد الحادثة وقفت عربيات كتير علشان تساعد البنوتة ومامتها بس اللي فعلا ساعدهم الشخص صاحب العربيه البيجو واللي المطرة بهدلته وهو موقف الطريق واللي قال للبنوتة ان سبب الحادثه انها ضغطت على الفرامل والمطرة لسه خفيفة والأرض في الوقت ده بتبقى عامله زي الصابون مزحلقه فمينفعش الضغط على الفرامل وقتها

الشخص ده انتظر لغاية لما البنوتة ومامتها ركبوا الكتكوتة ومشيوا وهو ركب عربيته ومشي بس مظهرش في مراية الكتكوتة ولا ظهرت عربيته في الطريق تاني علما بإن مفيش طريق متفرع من الطريق السريع يعني من المستحيل انه يكون دخل شارع جانبي – عارفه ان في ناس ممكن متصدقش الكلام ده بس هو ده اللي حصل –

والبنوتة كانت حاسه ان في ملائكه حواليها اول لما خبطت في السدود الاسمنتيه حست ان في ملائكه بتحميهم ده كان احساس قوي مسيطر عليها وكان نازل عليها سكينه غير عاديه

ملحوظة : البنوتة ومامتها هما انا ومامتي وقلت انشر موضوع الحادثة لأسباب كتير منها

اولا : اني اترعبت على كل المدونين والغير مدونين اللي بيتعاملوا مع العربيات وكان جاي على بالي قبل الحادثه على طول ديدي ربنا يحميها ويسلم طريقها يارب
ف خالتو ستيتة والانجينير احمد ابو العلا ومرمر على كوكب مليان ناس :)
وديدي وappy ومستر هاني زينهم ربنا يسلم طريقكم ويحميكم ومحدش يفرمل والجو فيه مطرة

ثانيا : الحمد لله فعلا حسيت بمعنى العناية الالهيه في الوقت ده
بجد ربنا سبحانه وتعالى جميل اوي

ثالثا : في عربيه نقل اتقلبت واحنا جايين في طريق المنصورة دمياط معنى كده ان الحوادث ف المطر منتشرة جدا فكان لازم اكتب عنها

رابعا : شباب كتير بيبقى نفسهم يموتوا مع أي مشكله بيواجهوها ومفيش عندهم امل في الحياه
لو اتعرضوا لحادثة زي دي وكانوا أقرب للموت من الحياه هيفهموا ان الحياه غاليه اوي وان العمر لحظة
عن نفسي حاسه اني اتولدت من جديد وشايفه الحياه بنظرة جديده

خامسا : أميرة على كوكب مهجور اول صديقة تعرف عن الحادثة ومن وقتها بتكلمني الصبح وبالليل واحيانا بعد الغدى :)
علشان تطمن عليا انا ومامتي ربنا يكرمك يا مرمر يارب وبجد انتي انسانة جميله جدا وكلمة شكرا قليلة أوي عليكي
كيكي قلب الام اللي معايا بقلبها في كل الحوادث اللي بعملها ربنا يكرمك ويباركلي فيكي
بجد ربنا يخليكوا ليا

هناك 48 تعليقًا:

فراشة يقول...

لا الحمد لله ربنا نجاكي

الف بعد الشر عليكي ياقمر انتى وماماتك

طريق القناطر دا ياربي عليه ربنا يكفينا شره وأصلا المنوفية كلها طرقها وحشه وكمان ف المطره بتبقى زلابيا

ربنا يستر عليينا
وابقى خلي بالك من نفسك ودايما ف المطر هدي السرعه

Lady E يقول...

فراشة : الله يسلمك من كل شر يا فراشه

وبجد طرق مصر معظمها رهيبه والله رهيبه :)

وبعدين انتي طلعتي زومل ومن المنوفيه ولا ايه :) خالتو بتاعتي هناك

وفي المطر فعلا الأرض بتبقى مزحلقه جدا

الحمد لله وبجد " الله خير حافظا وهو أرحم الراحمين " من سورة يوسف

ربنا يكرمك يا فراشه يا جميله

دمتي بخير وربنا يكفيكي شر طريقك

الشعب لابد له من حكومه تشكمه يقول...

ايه ده ايه ده.؟؟؟؟؟؟؟؟
ولسه عاوزه تيجى عندنا بيها.انتى هتهرجى ولا اييييييييييه..
لا طبعااااااااااااااااا سامعه..
الحمد لله على سلامتكو,قدر ولطف

احساس طفلة محبة للرومانسية بس واقعية يقول...

يا حبيبتى الحمد لله ان ربنا عداها على خير
يارب انتى ومامتك تكونوا بخير واعصابكم افضل دلوقتى هى اللحظات دى بتكون قاسية بس بفضل الله لو عدت على خير بتكون اثارها الايجابية اكتر والقرب من الله وتقدير قيمة الحياة بيكون افضل

ربنا يوقف لك اصحاب القلوب الطيبة اللى شبة الملائكة دى دائما لان الدنيا مكنتش هتستمر لو مكنوش موجودين فيهاويارب دائما ربنا حاميكم
دمتى بكل خير
تقبلى مرورى

بسمة انور يقول...

الف حمد لله عل السلامة يا قمرة
الحمد لله جت سليمة
تعرفى كنتى على بالى اليومين اللى فاتو دول وكنت عايزة امن عليك باى شكل لولا انى نايمة فى السرير كنت قمت طمنت عليك ي سكرايه
وحشانى جدا والله
خلى بالك على نفسك

mohamed ghalia يقول...

حمدا لله على سلامتك
شوفتى ده عشان جيتى المنوفية حد يجى المنوفية برجليه ههههههههه

Remas يقول...

الف الف حمد لله على سلامتك ياقمر

وحمد لله على سلامة مامتك

ربنا يحميكو ويحفظكو

فعلا السواقة في المطر صعبة ربنا يسلم

صمت المشاعر يقول...

حمدلله علي سلامتك يا ليدي

وربنا يحميكي يارب انتي وماما

ستيتة يقول...

ايههههههههههههههههه ده
حمد الله على السلامة
والف بعد الشر عنك وعن ماما من كل اذى
معلش هي المطرة فعلا وحشة ومينفعش معاها لا جري ولا فرملة
وكلنا ماشين بستر الله الستير والله
ربنا يلطف بينا يا حبي
ومتتعقديش عادي جدا جدا
انزلي وسوقي عادي ومع الوقت رجلك ها تتعود ساعة المطر تبعد عن الفرامل وبعد الشر عنك ساعة فرقعة الكاوتش برضه ممنوع تدوسي فرامل بس لازم تمسكي الدركسيون حلو جداااااااااااااااااااا
ربنا يبعد عنا وعنك شر الطريق وعن كل البشر يارب
سوقي بالشويش ياليدي
سوقيييييييييييي بالشويش
بوسة جامدة جدااااااااااااااااا

أميرة علي كوكب مهجور يقول...

حمدللع ع السلامه وربنا موجود معانا دايما والحمدلله ع كل حاجة

ربنا يسلم طريقك دايما وبعد كده نتعلم مش نسوق بسرعة ولا فرامل وقت مطره

والشكر ده ملوش لازمة انت مش صاحبتي انتي اختي ولازم اطمن عليكي

عاشقه الرومانسيه يقول...

بعد الشر عليكى ياليدى
ربنا يحفظك من كل سوء يارب

غير معرف يقول...

الحمدلله انك بخير :)

ربنا يبعد عنك كل شر ياااااارب

مسدس صغير يقول...

مليون سلامة عليكى وعلى ماما
الحمد لله
ربنا كريم
بعد الشر عليكى
ربنا يبعد عنكم السؤ انتى وماما والمسلمين جميعا

Unknown يقول...

الف الحمد لله على سلامتكم
وبعيد الشر عنكم وربي يحميكم ويحفظكم وان شاء الله عمرها ما تتكرر
ويبعد عنكم كل مكروه

الحمد لله :)

غير معرف يقول...

ربنا يحفظك من كل سوء
الف سلامة عليكى وعلى ماما
حمدا لله انه جند لكم جندا من جنوده
اى ان كانت نوعيته
خلى بالك من نفسك وانتى بتسوقى
بعد كده واسمعى تعليمات ستيتة
ربنا يحفظكم جميعا والله قلبى وجعنى
الحمد لله
تحياتى

شاب فقرى يقول...

الف الف الف مليون سلامة

يا نهار مطرة

كل دا وأنا معرفش
:(

عالعموم انا هتناسى خالص انى عرفت متأخر وهقول سلامتك ألف سلامة

يارب مش تتكرر تانى وربنا يحميكى قادر يا كريم

بس يارب البنوتة تتعلم السواقه كويس وتاخد بالها من نفسها ومن مامتها

اتمنى لك الخير

ويارب يارب يارب تكون اخر حادثة تعمليها

بعد كدا اركبى ميكروباص

أرحم بكتير ن السفر بأى كتاكيت

يارب يستر عليكى
قولى آمين

شاب فقرى

يــوم جــديد يقول...

حمدا لله على سلامتك انتي ومامتك
ربنا يبعد عنك كل شر وأذى يارب
إحساسك إن في ملائكة حارسينك إحساس يطمن جدا الحمد لله إنه رزقك به
وإن شاء الله تكفير ذنوب
وألف سلامة على الكتكوتة

فراشة يقول...

هههههههه تخيلي انا من جمهورية المنوفية

بس ان شاء الله هنخليها مملكة قريب

وعلى رأي mohamed ghalia
فيه حد ييجي المنوفية برجلية يابنتى احنا بنهرب منها

وحمد الله على سلامتك انتى وماماتك كمان مره

كيكى عوووووو يقول...

ايه التفرقة العنصرية الى فى البوست دة!!!
ازاى اسمى مايكتبش مع الناس الى خايفة عليهم من عربيتهم!!1 ايه دة ايه دة صراع الطبقات هيبتدى ولا ايه؟؟ ولا هو التوك تك وسيله النقل المفضلة ليه مش عاجبكى ع الاقل احسن من الكتكوته الى عاملة نفسها فار وعايشة دور عربية!! مش بيطير زيها هو بيتشقلب فى الهواء بس
ال قلب ال
كولنى بقى باغنية ست الحبايب
وكمان مانا بكلمك قبل الفطار وبعد الغداء والعشاء مانا روشتة رسمى ولا بتنسى هاااااااا
مش بتعدى ليه الجمايل؟؟!!

إيمان يقول...

الحمد لله ولا حول ولا قوة الا بالله

الف سلامة عليكى وعلى ماما وعلى الكتكوته يا حبيبتى

خللى بالك من نفسك ابوس ايدك

انا فعلا مصدقه انه كان فى ملائكه حوليكى وان لولا رحمة ربنا كنتى ضعتى لأن الحادثه كانت فعلا حادثة موت
ربنا يستر على كل المدونين ويحميكى

Lady E يقول...

الشعب لابد له من حكومه تشكمه : مين اللي قال اني عايزة أجي بيها

من يوم الحادثة وانا ركناها ومش بروح بيها أي مكان ولا حتى الكليه
فمستحيل اني اسافر بيها تاني اليومين دول وفي الجو ده

الحمد لله والله يسلمك من كل شر يا حبيبتي

وفعلا قدر ولطف

Lady E يقول...

احساس طفلة محبة للرومانسية بس واقعية : الحمد لله

الحمد لله احسن بكتير يا حبيبتي عارفة يوم الحادثة انا وماما معرفناش ننام دلوقتي احسن بكتير الحمد لله
وعندك حق في ايجابيات كتير اتعلمتها من الحادثة

"ربنا يوقف لك اصحاب القلوب الطيبة اللى شبة الملائكة دى دائما لان الدنيا مكنتش هتستمر لو مكنوش موجودين فيهاويارب دائما ربنا حاميكم "

اللهم أمين
اللي انا متأكده منه يا احساس طفله ان كان في ملائكه فعلا مش ناس قلوبها شبه الملائكه بس
يمكن مكنتش شايفاهم بس كنت حساهم أوي وكنت واثقة من وجودهم

Lady E يقول...

بسمة أنور : الله يسلمك من كل شر يا قمرايا

القلوب عند بعضيها ومكنتش عارفه اطمن عليكي ازاي ومدونتك للقراء المدعوين فقط مش ناويه تفتحيها بقى ولا ايه؟

والف سلامة عليكي من العمليه وبعد الشر عنك الحمد لله انك بخير دلوقتي ويارب دايما تبقي في احسن حال

وانتي كمان بجد كنتي وحشاني جدا
ان شاء الله أشوفك في لقاء المدونين

Ahmed يقول...

ألف حمدلله على سلامة البنوته ومامة البنوته ومعلش للكتكوته
اللي ييجي في الحديد يتعوض

للاسف السواقه فعلا بقت خطر جدا

عارفه النهارده وانا راجع على الطريق الدائري قعدت اعد عدد المرات اللي الخطوره كانت قريبه جدا مصدقتش ان كل ديه خطوره خارجه عن سيطرتنا بس حسيت اد ايه ربنا يسترها معانا وان احنا فعلا ماشيين بحفظه وستره علينا

ربنا يحفظنا جميعا

Lady E يقول...

mohamed ghalia : الله يسلمك من كل شر

مالها المنوفيه بس

دي حتى بلد الريس :)

Lady E يقول...

reem : الله يسلمك من كل شر يا قمرايا

اللهم أمين وليكي مثل دعائك

دمتي بخير

Lady E يقول...

صمت المشاعر : الله يسلمك من كل شر يا قمرايا

اللهم امين

ربنا يحميكي ويحفظك

دمتي بخير

Lady E يقول...

ستيتة حسب الله الحمش : الله يسلمك من كل شر يا خالتو

فعلا كلنا ماشيين بستر الله وبرحمته

وانا اتعقدت خلاص مش لسه هتعقد :)

اللهم أمين

حاضر يا خالتو

ربنا يسلم طريقك ويحفظك

بوسة كبيره

لا تـــشـــتــــاق يقول...

الحمد لله ان ربنا نجاكى وحمد لله على سلامتك وسلامه ماما
وبعدين بقي مالها المنوفيه ياست فراشه ماهى زى الفل
وكله تمام
عموما حمدلله على السلامه مره تانيه

Lady E يقول...

أميرة علي كوكب مهجور : الله يسلمك من كل شر يا حبيبتي

اللهم أمين

وأكيد الحادثة كانت خير معلم لدرجة اني مبقتش اسوق الكتكوتة أصلا :)

"والشكر ده ملوش لازمة انت مش صاحبتي انتي اختي ولازم اطمن عليكي "

بجد الشكر مالوش لازمه
ماشي يا مرمر شكـــــــــــــرا نياهاهاهاهاها

Lady E يقول...

عاشقه الرومانسيه : الله يسلمك من كل شر يا دودو

ويحفظك من كل سوء يا قمرايا

Lady E يقول...

Hager Za3bal : الحمد لله يا قمرايا

ربنا يحفظك ويحميكي

ساسو يقول...

ربنا يحميكي يا عسل والف سلامه عليكي وعلي مامتك ربنا يحفظكم
خلي بالك من نفسك
ربنا يستر طريقك

شوكولاتة يقول...

الف حمد الله على سلامتك
والحمد لله إن ربنا نجاكي أنتي ومامتك والكتكوتة بس خلي بالك بعد كده وياريت ماتسافريش والدنيا مطر كده وربنا يسلم طريقك ويحفظك يارب

تحياتي

Maram يقول...

علي فكره فعلا في ملايكه لكل واحد فينا بيحمونا من اي شر ....حمدلله علي السلامه .. حولي تتفادي السواقه بسرعه في حالتين المطر او في رمل علي الطريق ... ربنا يحميكي وحمدلله علي سلامه البنوته ومامتها والكتكوته. :)

Lady E يقول...

مسدس صغير : الله يسلمك من كل شر

أمين

Lady E يقول...

Mr.Hazem : الله يسلمك من كل شر

أمين

الحمد لله دائما وابدا

Lady E يقول...

أم مالك : أهلا بيكي

الله يسلمك من كل شر

وليكي مثل دعائك وربنا يرضى عليكي ويكرمك يارب

أنا أسفة ان قلبك وجعك من البوست
وسعيدة جدا بزيارتك للمدونة

Lady E يقول...

شاب فقرى : الله يسلمك من كل شر

أمين يارب

وعلى فكرة الميكروباص هو كمان بيعمل حوادث :)

أمين وربنا يستر علينا كلنا

Lady E يقول...

يــوم جــديد : الله يسلمك من كل شر يا حبيبتي

أمين يارب

وفعلا كان احساس جميل أوي بغض النظر عن الحادثة كل ما بفتكر احساس ان الملائكة حواليا بحس براحه وطمأنينة كبيرة جدا

دمتي بخير يا قمرايا

Lady E يقول...

فراشة : الله يسلمك من كل شر كمان مرة

وعرفت من أميرة انك جاية مصر النهاردة

الحمد لله على سلامتك مقدما

Lady E يقول...

كيكى عوووووو : مااااشي مش هرد عليكي (وش بيطلع لسانه)

Lady E يقول...

إيمان : الله يسلمك من كل شر

وانتي كمان ارجوكي خدي بالك من نفسك علشان عارفه بتعملي حوادث زيي و والله جيتي في بالي وكنتي من ضمن المدونين اللي خايفه عليهم من السواقه بس لما كتبت البوست نسيت اكتب اسمك مع انك بجد كنتي في بالي

الحمد لله يا ايمي قدر ولطف

أمين

بجد بجد بحبك جدا

Lady E يقول...

أحمـــــــــــــد أبو العلا : الله يسلمك من كل شر يا انجينير

الطريق الدائري ؟ طريق النعوش الطائرة اسمه لوحده يخض على فكرة مشيت فيه يوم الحادثة هو طريق واسع بس مشكلته تهور اللي بيسوقو عليه :(

أمين يارب

ربنا يحفظك ويحميك ويسلم طريقك انتا وجولفدان :)

Lady E يقول...

لا تـــشـــتــــاق : الله يسلمك من كل شر

والمنوفيه زي الفل كفاية ان الريس منها :)

Lady E يقول...

ساسو : الله يسلمك من كل شر يا جميلة

أمين يارب

تسلميلي

على فكرة بفرح بتعليقاتك :)

Lady E يقول...

شوكولاتة : الله يسلمك من كل شر يا حبيبتي

لما كنت مسافرة كانت الشمس مشرقة والجو جميل لكن قلب فأجه :)

الحمد لله قدر ولطف

Lady E يقول...

MaraM: أهلا بيكي يا قمرايا وبجد منوراني

الله يسلمك من كل شر يا جميله

وفعلا في ملائكة بيحمونا بس انا حسيتهم كتير ومعانا يوم الحادثة