السبت، 17 أكتوبر 2009

دماغ نام ننا هو



اليومين دول بقرأ في رواية ربع جرام للكاتب عصام يوسف وهي بتتكلم عن تجربة 5 شباب مع المخدرات والقصة بتدور على لسان صلاح أحد أبطال الرواية

المهم اني وصلت لصفحة 150 والرواية 635 صفحة ولغاية دلوقتي الرواية بتتكلم بشكل من وجهة نظري يحبب الشباب في المخدرات يعني المخدرات بتخلي الانسان موده حلو وبتخلي الدنيا جميلة وبتخلي الانسان فرحان وبيضحك وكمان بيكسب ماتشات الكورة والأفظع انه بينجح في الثانوية العامة وكمان بينجح في الكلية وبيجيب تقدير جيد مع انه بيشرب حشيش كل يوم !!


المهم أن صلاح أو صاصا بدأ شرب سجاير وبيرة من وهو عنده 7 سنين – طبعا كارثة- ومحدش أكتشف الموضوع ده والجروب دلوقتي في العشرينات ومتسجنوش ولا مرة ولا قفوا في ولا كمين ولا حد تعب فيهم أو عمل حادثة ودخل أوضة العمليات فمنفعش يتبنج من كتر المخدرات اللي اتعود عليها ولا موقف من دول الا مرة واحدة لما عاطف اتمسك مرة وهو بيشرب حشيش فصلاح راح يخرجه من القسم وكان هيتحبس معاه وكمان الاشارة لبهاء انه بدأ يدخل سكة ادمان البودرة


لكن لغاية دلوقتي مفيش حاجة رادعة تبين ان المخدرات دي لعنة من لعنات الزمن وإنها مصيبة وكارثة عالعموم خليني مع الرواية لحد باب الدار

لما استعرت الرواية من المكتبة أمينة المكتبة قالتلي خدي بالك هتعيطي كتير من الرواية دي بس لغاية دلوقتي رد فعلي الاستغراب والضحك على بعض الكلام اللي ابطال الرواية بيقولوه وهما مسطولين ده غير احساسي بالأسى عليهم لكن متأكده ان حياتهم هتتغير للأسوأ


وفي حاجة تانية غير المخدرات بتعمل دماغ عالية جدا وبتخلي الانسان يهييس أخر تهييس ويبقى مش فاهم حاجة و رد فعله بطييييييء جدا ألا وهي قلة النوم .

وأعراض قلة النوم بالليل – وبقول بالليل لأن النوم بالليل مفيد اكتر من النوم بالنهار مليون مرة-

1- عدم التركيز خالص في أي حاجة وكإن الانسان ماشي في حلم مش حقيقة
2- التهتهه في الكلام وعدم الذكاء اللغوي اختيار ألفاظ مش لايقة على المواقف المختلفة
3- عدم الاحساس بالراحة واحساس بالارهاق والتعب
4- عدم الفهم والاستيعاب البطيء
5- الكسل وعدم الرغبة في الكلام والمناقشة
6- العصبية
7- اللامبالاة بالمواعيد

والحقيقة قلة النوم بالليل بقت موجودة عند ناس كتير ونسينا أن البركة في البكور وان الطاقة الحيوية اللي بتخلي الانسان نشيط وفي مود حلو ومنتعش وفرحان بتكون في اعلى تركيز ليها الفجر

وعلى رأي الشاعر :

فما أطال النوم عمرا ولا قصر في الأعمار طول السهر

هناك 29 تعليقًا:

موناليزا يقول...

بعد كتابتك للاعراض اعتقد ان فئة ليست بقليلة حولنا عاملين دماغ
ولا حول ولا قوة الا بالله
عموما فى انتظار بقية الاحداث حينما تنتهين من قرائتها كاملة:)

الشعب لابد له من حكومه تشكمه يقول...

حلم حياااااااااااتى انى انام بدرى او انام 6 سعات بس,تخيلى؟؟؟؟؟
انا بنام 4 سعات وبسسسسسسسسسسسسسسسس ودا من زمان جداااااا,ومش من النوع اللى ينام بالنهار يعنى على اد الارهقا والتعب برضه مش بنام بالنهار واكمل سهر عادى:(
فى الجامعه كنت انام الساعه 3 واصحى الساعه 7,لما اشتغلت نفس الحكايه:(
نفسىىىىىىىىىىىىىىىى اناااااااااااااااااااااااااااام بجد.
ومهما اسهر واهد فى نفسى واعمل مجهود واقول اكيد هرجع جرى على السرير مفييس فايده بسهر برضه:(

طوبه فضه وطوبه دهب يقول...

انا يمكن ماقرتش الكتاب بس واثقه ان التسلسل للاحداث هيختلف تماما ودا عنصر التشويق فى القصه انا كدا بعتبرها قصه ناجحه لو اتحبكت دراميا صح هتشوفى النجاح فى النهايه وياريت تحكى لنا عن نهايه الاحداث لانك شوقتينا نعرف النهايه لحد دلوقتى انتى فتحتى نفسنا على التجربه عايزين النهايه عشان نرتدع تسلم ايدك فكره جديده للبوست

Ahmed يقول...

ياسلام؟
غريبه ديه

طب خلينا نصبر شويه لغاية الآخر وتحكيلنا الأحداث هتوصلنا لفين

غير معرف يقول...

انا مقرتش الروايه دي .. بس متعودتش احكم علي حاجه من غير ما اكملها كلها ..

'' حطام (ك) بقايا '' يقول...

طيب
و كمية الفضول اللي عندي دي في نهاية الرواية اعمل لها ايه

يلاا مستنسة النهاية
ان شاء الله تروحي للصفحة الاخيرة تحكيلينا و بعدين كملي القراية
(ايموشن بيغمز)

Lady E يقول...

موناليزا : أهلا بيكي يا موناليزا
الاعراض اللي كتبتها أعراض بتظهر على الانسان اللي مش بياخد قدر كافي من النوم وكإنه فعلا أخد مخدرات بس نفس الأعراض اعتقد انها ممكن تنطبق كلها او بعضها على مدمنين المخدرات

بالنسبة لباقي الأحداث فعايزة وقت شوية لغاية لما أخلص الرواية لأنها كبيرة ما شاء الله :)

نورتيني

Lady E يقول...

الشعب لابد له من حكومه تشكمه : ياااااه يا شيما حلم حياتك

مش شرط طول أو قصر النوم المهم بتصحي مرتاحة ولا لأ

عارفة قرأت في أحدث كتاب لأنيس منصور اسمه القلب لا يمتلئ بالذهب فبيقول في مقالة اسمها فما أطال النوم عمرا انه ممكن ينام دقيقة او دقيقتين وهو في عربيته في طريقه للبيت ويفضل صاحي لتاني يوم الصبح علشانه بالدقيقة او الدقيقتين نوم انفق كل رصيده من النوم

حاولي تشربي مشروب دافئ زي البابونج مثلا أو لبن وتقعدي في هدوء واسترخاء قبل ما تحبي تنامي بساعة عالأقل ومتفكريش كتير وهابي دريمز :)

وبعدين بلاس الايموشن المكشرة دي
اضحكي تضحك ليكي الدنيا يا شيما

Lady E يقول...

طوبه فضه وطوبه دهب : أكيد تسلسل الأحداث هيختلف

"انتى فتحتى نفسنا على التجربه عايزين النهايه عشان نرتدع تسلم ايدك فكره جديده للبوست"

ايه ده مش انا مش اناااا برييييييييئة دي مش دعوة لفتح النفس عالمخدرات انا بس مستغربة ان الكاتب واصف ان الشباب دول مش بيفوقوا برغم كل مشاكل المخدرات وانهم عانوا منها ومع ذلك عادي جدا دايما مسطولين

نورتيني

Lady E يقول...

أحمـــــــــــــد أبو العلا : أكيد الأحداث هتتغير وان شاء الله هكمل كتابة باقي الأحداث بعد ما أقرأ باقي الرواية

Lady E يقول...

Hager Za3bal : جميل انك مش بتحكمي على حاجة غير لما تكمليها كلها يا هاجر

وبالنسبة للبوست فحكمي على الرواية حكم مبدأي وقلت عالعموم خليني مع الرواية لحد باب الدار

نورتيني

Lady E يقول...

'' حطام (ك) بقايا '' : أهلا بيكي يا كوكي

بس اذا رحت للصفحة الأخيرة دلوقتي هتفوت حاجات كتير مش هعرفها وبالتالي مش هعرف أحكيها :)

نورتيني

KEBLAWYAT يقول...

طيب لسه أكتر من 3/4 الرواية

صعب نحكم عليها دلوقت

يــوم جــديد يقول...

أيوة يا ليدي قلتي التشخيص والأعراض صح
بس فين العلاج
أنا كنت بدأت في الرواية دي وبعدين ما كملتش لظروف غامضة
هشوفها فين وأكملها معاكي

مدونتك كانت مفتوحة للمدعوين فقط على فكرة وكانت بتطردني كل ما أفتحها وتقولي امشي برا
كان في بوست اسمه اه يا كتكوتة مش لاقياه وعايزة أعرف مالها الكتكوتة بنزينها خلص؟

Lady E يقول...

قبلاوى : ده حكم مبدأي يا قبلاوي وفعلا كل شوية بكتشف مفاجأة جديدة في الرواية

Lady E يقول...

يــوم جــديد : أهلا بيكي

فين العلاج ؟ في الصيدلية طبعا :)

تمام حلوة الفكرة دي

أيوة معلش كنت قافلة باب المدونة شوية كده بس أديكي جيتي ودخلتي وكتبتي كومنت كمان وعندك واحد أورنج جوس ليوم جديد
المهم بس متكونيش زعلانة

وايه ده هي اخبار الكتكوتة وصلت حداكم :) عالعموم هسلملك عليها

MaNoOoSh يقول...

ازيك يا ليدي
وحشتيني جدااااااااا

مي يقول...

تصورى يا قمر باين عليها قصة جامدة لسه انتى اصلك فى الاول بس اكيد النهاية هتكون صدمة محدش هيتوقعها مع ان الطريق ده معروف نهايته
بس شوقتينا اوووووووووى لمعرفة باقى القصة
خلصيها بقى عشان تقوليهالنا بسرررررررررعة
تسلم ايديكى يا قمراية

لا تـــشـــتــــاق يقول...

ربنا يسترها على الاجيال الى جايه
دى اجيال سنينها بيضا
ربنا يستر

Lady E يقول...

مي : أهلا بيكي يا ميويا

وفعلا المخدرات نهايتها معروفة لو صاحبها متعالجش وبطل ادمان

ماشي كلامك يا قمرايا

نورتيني

Lady E يقول...

لا تـــشـــتــــاق : امين يارب

وربنا يستر على جيلنا برضه

على فكرة الرواية احداثها بتدور في الجيل اللي قبلنا

شاب فقرى يقول...

بصى

انا هحاول اتكلم بصراحة

انا شفت كل انواع الحاجات دى وشفت الناس لما بتشربها بتبقى عاملة ازاى

بس الموضوع بيبقى مبنى على حالة الانسان الخاصة

يعنى عايز يفرح هيفرح

ولو عايز يعيط ويحزن هيزعل أوى

المخدرات والحاجات دى بتظهر للبنى ادم هوا مين فعلا

بتوقع كل الحواجز

بتنسيه كل حاجة

وبالنسبة لدماغ نام ننه هو

انا مبقتش بعرف انام بليل

مش عايز اقولك تعبان نفسيا وعندى زهق رهيب

قليل لما بحس بالراحة
او بالحنين لشىء

للراحة أشتاق

وبالنسبة للكتاب

كملى لاخر سطر

يمكن يتغير الحال

وفى ناس سمعت عنها بتضرب حشيش من وهى سبع سنين

بس دا دماغه باظت تماما فوق ما تتصورى

وواحد بيشرب بقاله اربع سنين اهوه بقى دماغه باظت تماما
بس فى الاول كانوا تمام التمام وكانوا فعلا بينجحوا ويظبطوا

بس دلوقتى خلاص

حظام لا اكثر ولا اقل وامراض نفسيه وبلاوى

ربنا يسترها معانا

تحياتى

شاب فقرى

شفـقــة و إحســــان يقول...

بقولك ايه يا انوس والله شجعتينى على قراءة الرواية الفظيعة دى
وكمان شجعتينى على شرب المخدرات طالما بتقولى انها بتعمل دماغ اهى تخلينى انسى سى احسان وارتاح منه شوية
ميرسى على المعلومات القيمة اللى قدمتيها عن فوائد المخدرات
شفقة

Lady E يقول...

MaNoOoSh : الحمد لله يا منوش بخير طول ما انتي بخير

دخلت مدونتك امبارح بس أخر بوست عندك انتي قافلة فيه التعليقات وكمان مش بشوفك عالأيميل

وحشااااني بجد

Lady E يقول...

MaNoOoSh : أسفة رديت عليكي متأخر خطأ مطبعي

lady girl يقول...

بجد فعلا اغلب الناس دلوقتي بقت تعاني من قلة النوم ده بطريقه مش طبيبعيه نظرا لأنهم بيحبوا السهر ويقولوا لنفسهم القعده متحلاش الا في السهره فاكرين السهر ده ايه زي ماقولتي بتعمل دماااااااغ عالي اوووووي هههههههههههههههههههههه
انا طبعا منكرش ان جت عليا فتره كنت مشقلبه اليوم كله عشان كده أسألوا مجرب هههههههههههههههههه
بس الحمدلله جت المدارس والثانويه العامه خلصت عليا الحمدلله وعدلت نظام نومي من اول وجديد

Lady E يقول...

شاب فقرى : معلومة جديدة أول مرة اعرفها ان " الموضوع بيبقى مبنى على حالة الانسان الخاصة

يعنى عايز يفرح هيفرح

ولو عايز يعيط ويحزن هيزعل أوى

المخدرات والحاجات دى بتظهر للبنى ادم هوا مين فعلا

بتوقع كل الحواجز

بتنسيه كل حاجة "

الي مذكور في الرواية انهم لما كانوا بيشربوا مخدرات كانوا بيضحكوا وبيحسوا انهم حنين ورومانسيين جدا

اما باقي التعليق ف ليا عودة ان شاء الله للرد عليه وعلى باقي التعليقات

Lady E يقول...

"انا مبقتش بعرف انام بليل

مش عايز اقولك تعبان نفسيا وعندى زهق رهيب

قليل لما بحس بالراحة
او بالحنين لشىء

للراحة أشتاق "

اسأل نفسك ايه بالضبط اللي عايزه؟ ولغاية امتى هتفضل متنامش بالليل ونفسيتك تبقى مش متظبطة
وأكيد هتلاقي الحل من جواك

وطبعا المخدرات بتبوظ الدماغ والصحة والقيم كمان

دمت بخير

Lady E يقول...

شفـقــة و إحســــان : جميل يا شفشوقة نكمل قرائتها سوى

وبقترح انك تشربي بابونج بيعمل دماغ احلى من المخدرات بكتيييير وبيهدي الاعصاب وبيضبط النفسوية وكمان الشاي الأخضر بيعمل نفس ذات الدماغ ويا سلام لو كان بالنوعناع :)

وبعدين فوائد المخدرات دي بين السطور في الرواية مش من عندي أوعي تفهميني صح :) وكمان المخدرات ليها أضرار لا تعد ولا تحصى

نورتيني يا شفشوقة