السبت، 14 فبراير 2009

حكاية الخطوبة يوم الفلانطين علشان خاطركو مع دردشة

لسه بكلم البت صبحتي من شوية وعندها نفس احساسيسي ومشاعيري هيجيلنا نقطة بكرة واحنا شايفين كل الاحبة اتنين اتنين واحنا ماشيين منفضين ولا قلوب حمرا ولا ورد احمر ولا لبس احمر ولا حصبة ولا حاجة
ده غير ان بكرة هيبدأ النكد أأقصد المخفية (الكلية ) وبالعند فيهم مش هلبس احمر مع ان كل الكلية هيلبسوا احمر
عمالة اسمع اغنية امتى هتعرف امتى بتاعت اسمهان وماما عمالة تغيظني وتقولي بتغنيها لمين انا بغنيها لنفســــــــي عااااااااااا انا حاسة بمود رومانسي النهارده وبسمع اغاني رومانسيه واتفقت مع ماما تجيبلي ورد بكرة على اساس ان حد عبرني في الفلانطين ايييييييييييه دنيا
وما شاء الله النهارده كنا ماشيين بالكتكوتة وشوفنا كذا زفة لعرايس وعرسان وفي زفات ماشي فيها عربيتين وفي زفات ماشي فيها عربيااااات من اول الشارع لأخره وكل العربيات متزوقة بالورد وشكلها تحففففففففه ومنهم عربيه كانت متزوقه بالنور (السلوك اللي فيها لمبات الوان صغنونة) واللمبات مكونة شكل قلوب بجد العربية كان شكلها جمييييييل ما شاء الله وانا بقى كنت بستنهز فرصة أي شارع فاضي وعمالة ازف انا كمان بيب بيب بيب بيب بيب وماما عمالة تقولي ايه رأيك ابقي زفي نفسك يوم الفرح وتبقي اول عروسة تزف نفسها وانا اعترضت بشدة هو انا هتجوز علشان ازف نفسي ولا ايه
اومال العريس فين وفين بابا؟؟ ربنا يديك الصحة يا والدي وتزفني انتا وعريسي المنتظر ده لو طلعت حية من كلية الهباب ان شاء الله لو ليا عمر يعني

---------------------------------------
نيجي بقى للخطوبة بتاعت البت مها

وصلنا عند خالتو في ساعتين ونص بدل 4 ساعات وطبعا طول الطريق كنت عايزة انام لاني كنت مرهقة جدا ومنمتش كويس قبل السفر وماما كانت نفس ذات الموضوع بس الحمد لله ربنا كان مييسر الطريق والدنيا مكنتش زحمه وصلنا وركنت الكتكوتة ونعمة الصغنونة (بنت اخت مها) اول لما شافتني باستني وجت قالتلي بحبك اوي يا نونا وبعدين طلعنا لخالتو وكان اصحاب مها واخواتها (كلهم متجوزين) كلهم عند خالتو وكل اللي كانوا موجودين اول لما شافوني قالولي الكلمة الغبية عقبالك ( الكلمة دي ساعات بتبقى سخيفه وبتوجع) وبعدين شغلو اغاني فرح في الكمبيوتر
منها اخيرا اتجوزت وكمان اغاني شعبية تانيه ومها كانت هايصه عالاخر وبعدين طلعنا شنطنا ودخلنا المطبخ نجهز الغدى مع خالتو كان كل بنوتة بتعمل حاجة اما انا فسخنت العيش ومها كانت حريصة انها تقولي عقبالك كل 5 دقايق (كانت بتضايقني) ف وانا بسخن العيش ايدي اتلسعت وقولتلها هي والبنوتات اللي كانوا في المطبخ بعد عمر طويل ان شاء الله لقيتهم طلعوا فيا وقالولي ليه يعني وحاجات تانيه
(قال ايه بيدافعوا عني من كلامي )
وبعدين قولت لخالتو مش قادرة اتغدى عايزة انااااااااااام قالتلي اتغدي الاول واخدتني من ايدي وروحنا اتغدينا
وبعد الغدى الساعة 4 مها كانت عايزة تلبس الفستان وتعمل الميكب اب بس انا وصحباتها مرضيناش وقولنالها بطلي هبل المفروض محدش يشوفك بالفستان دلوقتي خالص علشان انتي نجمة الحفلة ولازم تبقي مفأجه للمعازيم ولتامر وكمان من هنا لبليل اكيد الميك اب هيبوظ
وبعدها دخلت الاوضة بتاعت خالتو وحاولت انام معرفتش انام جت نعمة وقعدت تقولي احكيلي حدووووووووتة
انا :
يا نعمة يا حبيبتي انا مش فاكره حواديت دلوقتي انا عايزة انام
نعمة :
لالالا والنبي والنبي احكيلي حدوتة انا عارفه انك عارفه حواديت
انا : طب ايه رأيك انتي اللي تحكيلي حدوتة ؟
نعمة :
لأ انتي اللي احكيلي حدوتة
انا : ماشي يا نعمه في حدوتة بحبها اوي كنت بسمعها لما كنت ادك بس مش فاكراها اوي
نعمة
: احكي وانتي هتفتكريها
انا :
صلي على النبي
نعمة :
عليه الصلاة والسلام
انا :
كان يا ما كان في قديم الزمان كان في راجل طيب وعنده 3 بنات واحده كبيرة وواحده متوسطة وواحدة صغنونة
نعمة : اااااه اه القصة دي عارفاها بتاعت لما ابوهم كان مسافر والوردة صح
انا : صح يا نعمة طالما عارفاها سيبيني انام بقى
نعمة : لا ماليش دعوة كمليها
انا : هكملها بس تحكيها معايا
وحكيت شوية في القصة ونعمة شوية
واعترضت اوي لما قولتلها ان الراجل المخيف اللي كان بيخوف كل الناس
لما اتجوز اطيب واحن بنوتة واصغر بنوتة من البنوتات التلاتة بقى جميل و شكله حلو لان السحر اللي كانت عملاه الساحره الشريرة راح لما اتجوز وفضلت تسألني يعني هو بقى حلو بعد لما جابوا المأذون؟ ولا بعدما الفرح خلص ؟والساحرة سابته يتجوز عادي كده طب وهي كانت فين وقت الفرح؟؟
(كأني كنت معاهم يعني) وبعدين اخيرا عرفت اقنع نعمة اني عايزة انام وقالتلي خلاص هنام جنبك بقى انا كمان صحيت بدري
واول لما نمنا جت خالتو
خالتو :
ايه ده انتو نايمين قومو قومو العريس جاي بعد ساعة
انا : سيبينا ننام شوية يا خالتو انا لبسي جاهز هقوم البس على طول
خالتو : لأ صحصحوا وقوموا البسو من دلوقتي
واضطريت اسفة اني اصحى وانا منمتش اصلا عااااااااااا عااااااااااااا
والبوست الجاي اقولكو ايه اللي حصل في حفلة الخطوبة

ان شاء الله




هناك 37 تعليقًا:

mohamed ghalia يقول...

مبروووووووووووووووووووووك
وعقبالك ياليدى
وهترجعىىىىىىىىىىىىىىىىىىىىىى للكلية
يلا يلا استعدى
قومى حضرى الشنطة هههههههههههههههه
دمتى بكل الود

Lady E يقول...

mohamed ghalia : الله يبارك فيك يا محمد
وبرضه بتقوللي عقبالك ماشي ماشي الله يسامحك :)

ومالك فرحان فيا كده ليه ده انا نفسي الكلية دي اروح النهاردة الاقيهم عملولها ازالة بمعظم الدكاترة والطلبة اللي فيها عااااااا

دمت بخير يا محمد ومتفرحش اوي انتا كمان مسيرك تروح الكلية بتاعتك

بسمة انور يقول...

HAPPY VALENTIN'S DAY
مبروك لمها
وكل سنة وانتى طيبة
ويااارب تخدى هدايا الفالنتين الجاى (وانا كمان يارب).هههههههه

تامر علي يقول...

ما أحلى الرجوع للمدرسة .... كان أوحش إحساس في حياتي وانا قايم الصبح رايح المدرسه :)
الخطوبه احساس جميل ...ايوه ...وكتب الكتاب .... احساس جميل ....آه .....الجواز بقى .....بلاش خليها مفاجأة علشان منصدمكيش من (الفرحة)

احساس طفلة محبة للرومانسية بس واقعية يقول...

Happy Valentine's Day يا قمر
واحلى بوكية ورد ليكى النهاردة
ومبروووك لمها وعقبالك بس من غير ما تزعلى دا هم بيقولوا كدا بس من حبهم فيكى وحبهم فى انهم يفرحولك

تقبلى مرورى

ستيتة يقول...

عقبالك ..بعينك اقول ليكى الكلمة دي
لما تخلصي الكلية ياحلوة وتكبري ياصغنونة نبقى نوريكي اليوم الأحمر بتاع الفلانتين واليوم التيكني كلور بتاع العريس

قومي يابنت ذاكري انا معنديش جواز قبل التخرج
عاااااااااا بعبه ياماما
بنننننننننننننننت

Ahmed يقول...

زلانتيييييين برده؟
هو اليوم ده مش هيعدي بأه ولا ايه؟

أنا بطالب من موقعي ده أن اليوم ده ييكون لكل الناس (طبعا فهماني) يأما يتلغي

ارحمونا بأه في ناس غلابه
اهئ اهئ اهئ

حروف يقول...

وانتي وحشاني جدا
وعقباللك ودول علقوا امتي
كل سنة وانتي طيبة
هابي فلانتين

SHAPE YOUR LIFE (ABOALI) يقول...

جميل اليوم
وحيث انك كرهتى عبقالك

انا فى رقم تليفونى 3 ستات
وعاوز اكمل 4 ستات
فكرى كده

وزواج مبارك ان شاء الله
الفااااااااااااااااتحة
ههههههههههههههههه

عقبال التشهد بقى

وبلاش حكاية الكلية الهباب ده

خليكى كده متفائلة
قولى الكليه العسل
قولى الكليه الملونه

كده
خليك نموذج
وبلاش حكاوى الساحرة وامنا الغولة
وربنا يهدى

blue-wave يقول...

الف الف مبروووك
وعقبالك
وهابى فالنتين

مسدس صغير يقول...

مليون مبروك ليها.
وعقبالك لما يجيلك عريس من المنصورة طالما انتى بتعزيها كده...هههههههه
تحيتى..

فتــافيت (رحاب الخضري) يقول...

ههههههههههههههه

عارفة بليل قاعدة انا واخويا نفقص على بعض .. لان الفلانتين اللي فات كنت مخطوبة وهو خاطب .. وكنا بنغيظ بعض بالهدايا وكده

الفلاتين ده انا فاسخة وهو فاسخ .. وقاعدين زي المطلقين والنبي .. وماما هاتموت من الضحك علينا

يعني السنة اللي فات كانت خليك معايا .. وايامي معاك شغالة في البيت زي النهاردة

امبارح بقى اوخر الشتى واغنيةى ميرايم فارس الشتوية .. هي اللي شغالة

يلا ولا دايم غير وجه

وعقبال زي مها يارب وافرح بيكي

غير معرف يقول...

خسارة بجد أنك مش قريتى اللى اتكتب عن المدونة

بصى يا ستى

كان مكتوب




مدونة طفلة مش عايزة تكبر...إحدى المدونات الطريفة خفيفة الظل اللى تكتب عن الحياة الجامعية بشكل ساخر فصاحبتها طالبة فى كلية الآداب قسم اللغة الإنجليزية و هى غير راضية عن نظام كليتها

و بعدين يا ستى جابو الصورة اللى كنتى حطاها اللى قبل اللى أنتى حطاها دلوقتى

و بعدين جابوا حتة من بوست انتى كنتى كتباه

انا مش فاكراه اوى بس تقريبا كانو بيقول

منك لله يا كلية لما دخلت اولى مش عارفة كان إيه و فى تاية إيه و فى تالته جننتينى و حاجة تانية كدة

معلش يا قمرايا و الله ما فاكرة أصله كان من كام شهر كدة :)








و ألف ألف مبروك على الخطوبة

Kiara يقول...

اااااااااااه مش بحب انا نظام الاجزاء دا

ماسي ماسي مبروك ياقمر وعقبالنا حلو كدا :)

بنوتة يقول...

السلام عليكم
مبروك وعقبالك ومتضيقش من الكلمة لو سمحتى ان شاء الله تحكيلنا في القريب العاجل كمان عن خطوبتك وابقي افتكرينا يعنى
فكرتينى بالجامعة بكرة
هتصدقينى لو قلتلك انى عندى امتحان الاتنين
لا طبعا صح انا شخصيا مش مصدقة عشان كده لسة مفتحتش الكتاب
تحياتى وسلام

Lady E يقول...

BAsMA : وانتي طيبة يا قمرايا

نورتيني يا جميلة

romansy يقول...

الف الف مبروك
الفرح دا جميل قوى وجاى فى وقته
عقبال فرحك ان شاء الله وتتخرجى من الكليه بسلام كده

حسام غانم يقول...

كل سنة وانتي طيبة


ومبروك لمها


وعقبالك

Lady E يقول...

تامر علي : ايييييييه كانت ايااااام دايما باص المدرسة كان بيفوتني وكان نفسي المدرسة تبقي بالليل مش الصبح

وعلى رأي احمد ادم في برنامج بني ادم شو الخطوبة وكتب الكتاب بتبقى فرحان وباصص للنجوم والجواز هو الحفرة اللي بتقع فيها وانتا باصص للنجوم

دمت بخير

Lady E يقول...

احساس طفلة محبة للرومانسية بس واقعية : وهابي بيرث داي ليكي يا جميل هههههههه اصل انا بتخنق في الفلانطين مش بحتفل بيه
وكده يبقى جالي اتنين بوكيه واحد منك وواحد من ماما

وتقصدي من حبهم انهم يفرحوا فيا

نورتيني يا قمر ما احنا طفلات زي بعضينا هههههههه

Lady E يقول...

ستيته حسب الله الحمش : ماشي يا دكتر انا موافقة

بس اذاكر ايييييييه دلوقتي ده احنا الطلبة بنروح الكلية والدكاترة هما اللي مش راضيين يجو طب نعمل ايه تاني؟؟

بجد دايما منوراني وفرحاني بتعليقاتك الجميلة يا احلى د/ ستيتة

Lady E يقول...

Eng. Ahmed Abo El-Ella : الحمد لله عدى وكان كله استئكاب بس ماما جابتلي ورد :)


وانا من موقعي بضم صوتي لصوت السيد الوزير المحافظ الانجينير بإلغاء الفلانتاين
وعلى رأي الشاعر اللي مش عارفه اسمه
يا تلغو الفلانطين يا تقتلو المحبين

طوبه فضه وطوبه دهب يقول...

الف مبروك ليها ياقمر وماتقلقيش نصيبك فى السكه بس انتى خلصى كليتك ومستنين نعرف مها عملت ايه فى الخطوبه

Lady E يقول...

حروف (دلو مرة ثانية وجرح ثاني سابقا) : وانتي كمان كنتي وحشااااني يا قمرايا

وبعدين بلاش نظام الار ده خلي المدونين يعلقو براحتيهم :)

كل سنة وانتي طيوبة وعسولة يا قمرايا

منورااني دايما

Lady E يقول...

ABOALI : انا بقول بدام عايز 4 ستات في رقم تليفونك يا ابوعلي يبقى تجيب رقم تليفون جديد فيه 4 ستات بدل 3

وبالنوسبة لكلية الهباب فلو كنت مكاني كنت قلت عليها اكتر من كده
وبعدين علشان الوزن
كلية الهباب = كلية الأداب

اما عن حكاوي الساحرة فللأسف انا مكنتش فاكره باقي القصة اوي فأفتكرت قصة الجميلة والوحش وكملت القصة
ولو تلاحظ معظم حكاوي الاطفال فيها الساحره الشوريرة

Lady E يقول...

blue-wave : الله يبارك فيك يا دكتر

وهابي فلانتاين ليك وللعروسة

Lady E يقول...

مسدس صغير : الله يبارك فيك
ومين اللي قالك انه مش متقدملي عريس من المنصورة؟؟ بس انا مش موافقه :)

Lady E يقول...

فتافيت : هههههههه يا عيني يا بنتي

ان شاء الله الفلانتاين الجاي كلنا نغيظ بعض بالهدايا هههههه

وعارفه انا كمان في نفس ذات الحالة

وعقبالك وعقبالي وعقبال كل البنوتات وكل الشباب والخطوبة تكون احلى من خطوبة مها كمان

نورتيني يا احلى فتافيت

Lady E يقول...

انا ودماغي : متحرمش منك ابدا يا ميرو

انا فعلا ملحقتش اشتري النسخه بتاعت الجريدة لأن اسماء (الصحفية) قالتلي انها كتبت عني بعدها بيوم لكن كلمت اسماء وبعتتلي الكلام اللي كتبته عني في ملف وورد

ومرة تانيه تسلميلي يا سكرة

Lady E يقول...

كيــــــــــــارا : الله يبارك فيكي يا قمر

وايوة عقبالنا حلوة لكن عقبالك دي كلمة مس حلوة خالث خالث خاااااالث

Lady E يقول...

بنوتة : وعليكم السلام ورحمة الله وبركاته

الله يبارك فيكي يا قمرايا

وكل شيء بأوان خليني اشوف الكلية دي هتعمل فيا ايه الاول نفسي اتخرج بقىىىىىى عاااااااااا

وربنا يوفقك ويعينك على الامتحان يارب

Lady E يقول...

romansy : الله يبارك فيك يا رومانسي

امين يا رب

Lady E يقول...

حسام غانم : وانتا طيب وبخير يا حسام

على فكرة زرت مدونتك وموضوع الدروس الخصوصية ده مهم جدا بجد بس مش عارفه اعلق المؤشر بتاع الكتابة مش بيظهر في المربع بتاع التعليقات مش عارفه ليه؟؟

Lady E يقول...

طوبة ذهب وطوبة فضة : الله يبارك فيكي يا دكتر

هو جاي في الطريق بس اظاهر العربية اتعطلت بيه وهو جاي او الدنيا زحمه

إيمان يقول...

يا عينى يا بنتى
هم كل الدلو متسربعين كده
يلا ربنا يهديهم
أنا كمان كنت متسربعه زى ساعتك وربنا وفقنى وأتخطبت وأنا فى أول سنه كليه وإتجوزت بعد التخرج خبط لزق .... ودلوقتى بندب حظى واقول أصل أنا إتجوزت بدرى و إتلخمت بالعيال وأبوهم ومعشتش حياتى...لكن تفيد بأيه يا ندم يا ندم وتعمل أيه يا جواز
تعرفى كل الأطفال إللى بيشفونى بيقولولى أحكيلنا حدوته...يمكن علشان دلو
وتعرفى كمان كل ما أدخل انام ...وخاصة الظهيره .. مبيجليش نوم
قولتيلى إنتى برجك أيه ؟؟؟!!!

لجين أبو الدهب يقول...

يارب تكون كانت خطوبة سعيدة ..

وعقبالك ( من غير ضرب بقولها بصفيان نية والله ) ..

منتظرة حكاية الخطوبة

دُمتِ بخير ليدى ..

Rannon يقول...

ايه ده وقفتي ليه
كملي يا بنتي
هستنى الباقي

وعقبالك :))