الخميس، 19 فبراير 2009

الضلمة متخوفش يا سمكة ملوونة


اعترافا بالمقولة اللي بتقوووول نورت مصر واعترافا كمان بالأغنية الوطشنية اللي بتقول مصر يا أول نور في الدنيا شق ظلام الليل لولولولولي احسب عمر النور في الدنيا يطلع عمر النيل لولولولولولي
النور بيقطع عندنا كل 5 ثواني مره نياهاهاها لا مش للدرجة دي بيقطع 5 مرات في اليوم بس ومن اسبوع
في الاول كنت ببقى فرحانه ان النور قطع سامعه حد بيقول حد يفرح ان النور بيقطع هرد عليه وأقوله ايون انا
الدنيا بتبقى هدوووووء والقمر منووور - مع ان مفيش قمر دلوقتي- لكن بعد كده بقيت بضايق الكهربا دي بجد نعمة كبيرة جدا في حياتنا
كنت بشوف النهاردة برنامج اي تي شو عالنايل كالتشر او على رأي ماما النيل الثقافية بطلي الانجليزي بتاعك ده
كانوا مستضيفين الصحفية اللي بحبها جدا اسماء رمضان اللي بتكتب في باب المدونخانة في جريدة العالم اليوم
واللي اختصارا بقول عنها المدونخانة اللي مدوخانة لأني بدوخ على ما بلاقي عدد الجرنال يوم الخميس
انا كنت سعيدة جدا وانا بشوف اسماء لانها كانت بتتكلم بتلقائية وبعلم عن المدونات اما الاخ المذيع احمد يوسف فللأسف افتقد المعرفة عن المدونات
مع اني قرات عنه انه اخد شهادة تقدير كأحسن مذيع في مجال التكنولوجيا (لا تعليق)
للأسف مكملتش البرنامج لأن النور قطع لكن في بعض الحاجات استفزتني ك مدونة في الحوار
مثلا كان في اتصال من بنوتة صاحبة اسماء البنوتة دي بتكتب في المنتديات ف المذيع سألها سؤال ما معناه لاني مش فاكره نصه بالضبط
انتي مش بتخافي تدوني في المنتديات لانك ممكن تتعرضي لمضايقات من الشباب وغيرهم ؟؟ ده على اساس ان احنا رايحين ندون في ديسكو او كباريه صح؟؟ لو فكرنا بالطريقة دي مش هنفتح النت اصلا
تاني حاجة كان بيسأل اسماء سؤال ما معناه برضه ازاي بتصاحبي ناس من عالنت لأن الناس عالنت مش بيبقو معروفين ؟؟
واسماء ردت رد عجبني جدا ان كل انسان بيبان من اسلوبه
اما عن رأيي ( ليدي) فأنا عرفت احسن ناس من النت
وكمااااان من ضمن اسئلة المذيع لأسماء : انتي متابعة ايه من المدونات اليومية زي ما بتتابعي اخبار اليوم والاهرام؟؟
والله؟؟ هو في حاجة اسمها مدونات يومية وانا معرفش
ولما اسماء ردت عليه وقالتلو انها بتتابع مدونة البحث عن السعادة لأنها مدونة جميلة وهي اللي بتبعث الامل في حياتنا
رد الاخ المذيع وقال ومين الكاتبة بتاعت المدونة دي ( اسمحولي بقىىىىىىى كااااااااااتبة في عينك )
ده كاتب واسمه محمد غالية وانا لا اسمح ان حد يقول عليه كاتبة ومحدش يقوللي مكنش يعرف لان ده عذر اقبح من ذنب
وده ان دل على شيء فيدل ان المذيع للأسف محضرش للقاء كويس وانه مش عارف يعني ايه مدونات ومقرأش مدونات اساسا - ده اللي انا فهمته من متابعة الحلقة النهارده- وعلى العكس اسماء لانها لسه داخله التدوين جديد بس متمكنة من معلوماتها وبتتكلم بكل معرفة وثقة
عمار يا اعلامنا عمااااااار وكفاية علينا مية سنة سينما سينما يا سينما
على فكرة انا مش بتكلم الكلام ده من فراغ انا كنت من اطفال التلفزيون بس مش المصري طبعا وبابا ليه اصحاب اعلاميين كتير يعني عارفة كويس انا بتكلم على ايه

هناك 29 تعليقًا:

Eng. Ahmed Abo El-Ella يقول...

حلو قوي موضوع الكهربا ده
خمس مرات بس في اليوم يا بلاااااااش


على فكره انا بدايق جدا واتخنق أوي لما واحد مذيع أو واحده هانم بتتكلم عن موضوع وهما مش محضرينه أصلا

يعني عندك في مذيعه انما ايه من ايام السب البابلي وتلاقيها في كل البرامج الرياضيه
تلاقيها مثلا بتعلق على متش تنس وبتسأل الضيف بكل ثقه؟ هو ديه مش اوفسيد؟

يادي النيله

ولا لما مذيعه مثلا لابسه من غير هدوم وبتستضيف عالم دين وبتجادله كمان

ولا مذيع متخصص في الكلام عن خصوصيات المرأه

الموضوع ده بيخنقني. وعلى فكره معظمهم بيكون كعاه جوايز زي اللي انت قولتيها هنا بالظبط

Eng. Ahmed Abo El-Ella يقول...

هااااااااااااااا
انا أول تعليق

Eng. Ahmed Abo El-Ella يقول...

وكمان التاني ويارب التالت
تلاتلاف طوبه وعربية رمل

انا ودماغي يقول...

يااااااااااه على الكهربا لما بتقطع فى أوقات مصيرية بجد و بتيجى فى أوقات ملهاش لازمة...بس انا بصراحة بحبها تقطع بالليل عشان محسش بتأنيب ضمير لما مذاكرش
نياهاهاهاهاهاهاها

على فكرة بجد المذيع يغيظ أوى و أنا لو من رئيس القناة مخلهوش يعتب القناة دى تانى أصلا

و بعدين أسماء معاها حق الشخص بيبان من أسلوبه بلاش بقى التفكير اللى مش بيجيب همه ده أنى مكلمش حد و لا أقوله حاجة عشان عرفته من على النت

بس قشطة عليكى أنك بتقرى المدوخانة طلعالى يا جمييييييييل
قشطة عليكى

ABOALI يقول...

هههههههههههههههههه
اعلام يا معنمى اعلام
انتى جايه تشتغلى ايه
اعلالالالالالالالالالالالالالالالالالالالالالالاميه

ماسبيرو يا سيدتى ده مزرعة للواساطه
ومرتع فساد صح

وكان لازم تقطعى عنهم الكهربا
وتستخدمى نفوذك يا باشا

وانا شايف انى كل اللى بيحصل ده
من العقول المغلقه

اللى عامله نفسها فاهااااااااااامه


انتى جايه تشتغلى ايه ؟
هههههههههههههههههه

مدونااااااااااااااتى يا بيه

صوت القلم على القفا بيرن
اى اى اى اى

Lady E يقول...

Eng. Ahmed Abo El-Ella : ايوة منزلين عرض خاص على الكهربا تقطع خمس مرات وعليهم مرتين هدية

فعلا كل النماذج اللي قولت عليها دي نماذج ناس غريبة المفروض يشتغلو اي حاجة تانيه غير انهم يبقو اعلاميين لانهم كده بيتعاملو مع المشاهدين على انهم متخلفين وم الاخر بيشتغلونا

منور التعليق الاول والتاني والتالت يا انجينير
والف مبروووووك على الطوب والرمل ربنا يقدرك وتجيب الاسمنت والحديد

ستيته حسب الله الحمش يقول...

اجمل جملة سمعتها في حياتي ياليدي

الضلمة ما تخوفش يا سمكة يا ملونة

اعلامنا يا حلوة زي حالنا

الكوسة هي الغالبة على مونتجات السوك المحلية
ونتوقع سقوط قرع متقطع .. مع قرنبيط من آن لآخر

هم بيعينوا المذيعين بامتحان جودة؟
ده حسب مين بابا ومين ماما وياترى طنط ظاظا مذيعة ولا كبيرة مذيعات في ايوها قناة؟

بنوتة يقول...

السلام عليكم
الموضوع حلو أوى
بس الكهربا بتدلع أوى
أما عن الاعلام المصرى فحدث ولا حرج
كان في مذيعة في مرة بتسأل من مخترع الجاذبية؟؟؟؟
تعرفي؟
ههههههههههه
بس على فكرة فعلا لسة في ناس كتيرة معندهاش علم بالمدونات
سلام

احساس طفلة محبة للرومانسية بس واقعية يقول...

الكهرباء بتقطع كل يوم 5 مرات
بتهزرى صح
ايام ماكنت فى مصر كانت مرة كل اسبوع او اسبوعين دا الحال اتدهور بجد

تعرفى انا فى اليابان بقالى 3 سنين الكهرباء قطعت فيهم مرة واحدة بس لمدة نص ساعة لان كان فى زلزال قوتة 6 ريختر
والسلك اتقطع وصلحوة فى ساعتها

بالنسبة للاعلام كلو عامة مستواه بقى فى النازل للاسف و للمذيعين الرخمين دول اللى مش بيكونوا محضرين او بيحبوا يستظرفوا هتلاقى منهم كتير برضو للاسف

وبالنسبة لعالم التدوين والنت والمنتديات رد اسماء كافى لان كل واحد لية اسلوبة ومهما حاول يدارية طبعة بيغلب علية وبيبن شخصيتة كويس

تقبلى مرورى

Lady E يقول...

انا ودماغي : اشطة عليكي يا ميرو شطورة انك متابعة المدونخانة وان شاء الله قريب الاقي مدونتك مكتوب عنها في الجرنال

اما عن المذيع فأنا قرأت عنه امبارح عالنت وقلت ايه ده عالم مش مذيع وكنت متوقعة حوار احسن من كده في الحلقة بتاعت النهارده بس للأسف خاب ظني

نورتيني يا قمرايا

مهندس / على درويش يقول...

موضوع فعلا جميل

وكدا تبقي أنت أكيد في مصر....


لا تعليق

Lady E يقول...

ABOALI : انا متعاملتش مع حد في ماسبيرو بس كلامك ده ظاهر على شاشة التلفزيون مذيعين ومذيعات يجيبو شلل اطفال والكويس منهم بيسيب التلفزيون المصري
وبعدين نفوذ ايه بس ده انا غلبااااااانه
وبأييد كلامك ان كل اللى بيحصل ده
من العقول المغلقه

اللى عامله نفسها فاهااااااااااامه

ومفيناش من ضرب عالقفا كل واحد يخبي قفاه انا م مسؤلة نياهاهاها

BAsMA يقول...

حلو الموضوع اوى


انت اكيد فى مصر
لما يبقى المذيع مش متابع حاجه بالشكل دة او حتى على الاقل محضر الاعداد بطريقه منظمة ومقنعه

اكيد مصرى


بس ايه موضوع الكهربا دة

mohamed ghalia يقول...

ههههههههههههههههههه
أنا شوفت الربنامج
وأسماء فعلا كانت منوره القناة
مش مشكلة غلطة المزيع
ومتشكر جدا ليكى يا أحلى أخت فى الدنيا على دفاعك عن مدونتى وغضبك عشان غلطة المزيع
بجد ربنا يعزك ويكرمك
وربنا يستر على مصير إعلامنا
والمهم إنى أسماء لقت جزء من التقدير الى تستحقة
دمتى بكل الود والسعادة

مسدس صغير يقول...

اولا انا عايز اعرفك حاجه مهمه . ان وزارة الكهربا بتراعى وجودك فى المنطقه فبتقطع الكهربا عشان تخفف الضغط عن اللمبات لأن انتى منورة والكهربا كذلك؟؟ تقيله
غير كده اسماء رمضان صحفية اتمنالها كل النجاح وهيه فعلا ماشية بخطوات ثابتة فى جريدة العالم اليوم فى باب المدونخانة وكذلك مدونتها اللى بنفس الاسم .. ربنا يسهلها امورها ان شاء الله وتبقى صحفية ناجحة ومشهورة عن قريب ان شاء الله..
وبالنسبة للمذيع الجاهل بتاع النيل كالتشر قصدى الثقافيه . ده عادى فى اى حاجة تابعة للتليفزيون المصرى ويجعله عامر...

E73 يقول...

بسم الله الرحمن الرحيم
السلام عليكم ورحمة الله وبركاته

هههههههههه
عجبتني قوي دخلتك في البوست ده بتاعت لولولولولييييي
بس بجد حاجة تحرق الدم
مش عارفين يجيبوا حد بيفهم شوية؟!
يادشي الفشايح

Lady E يقول...

ستيته حسب الله الحمش : فينك يا حسب الله تشوف كلام ستيتة بقى اجمل جملة سمعتيها في حياتك يا دكتر هي الضلمة متخوفش يا سمكة ملونة
طب مددي عالشيزلونج واحكيلي عن طفولتك مكنتيش بتشوفي بوجي وطمطم؟؟
طماطم كانت بتغني لسمكتها الملونة و بتقولها الضلمة متخوفش يا سمكه ملونة الضلمة متخوفش واحنا مع بعضنا
وفعلا الكوسة والقرع موجودين كتير في التلافزيون والمذيعين بيطلعو ولادهم مذيعين برضه معندناش مشكله لكن يبقو بالسطحية وقلة الثقافة اللي بنشوفها يبقى لا وألف لأ ميستحقوش يبقو اعلاميين

Lady E يقول...

بنوتة : وعليكم السلام ورحمة الله وبركاته
سبحانك يارب مخترع الجاذبية ياااااااه ايه الاسئلة الذكية دي ههههههه
بصي السؤال ده مش في المقرر في اختيارات ؟؟ولا اقولك نستعين بصديقة
وبعدين انا عارفة ان في ناس كتير مش عارفين يعني ايه مدونه اصلا بس صعب لما يبقى مذيع بيتكلم عن المدونات ومش عارف معلومات كتير عنها

mohamed ghalia يقول...

عشان متزعليش كمان كتبت موضوع عن التفاؤل شوفيه وقوليلى رأيك

كيكى يقول...

أزيك ياليدى؟؟
المهم
*********
اسم البوست عاجبنى اوى
*********************
اشمعى الكهربا بتقطع 5 ةمرات فى اليوم عشان الحسد يعنى!!!
المهم تانى
كتير اوى بيلتو ويعجنو فى حاجات كتير ميكونش فاهيمن فيها..مجتش على المذيع يعنى رغم المفروض انه بيكون وجها اعلامية وانى بقى المذيع دة مجاش من فراغ
بس تقولى ايييييييييييييييييييييية بقى!!
******************
أخر حاجة ابقى اقولها
أزيك ياليدى؟؟؟؟
عووو

Lady E يقول...

احساس طفلة محبة للرومانسية بس واقعية : اكيد الحال متدهور في كل حاجة مش بس في الكهربا بس انا اخيرا عرفت انهم بيعملوا تصليحات في الكهربا علشان كده الكهربا بتقطع ظلمنا الناس يا احساس طفله ههههه
وبعدين بتقولي زلزال عادي كده ههههه :) ربنا يحميكم من كل شر
منوراني دايما

إيمان يقول...

أنا عن نفسى كنت بشوف بوجى وطمطم بس مش فاكره حكاية السمكه الملونه دى
بس بجد عنوان جامد جدا وكلمه معبره عن الأحوال الكهربائيه فى مصر
أما بقه عن التليفزيون المصرى أنا عامله مقاطعه ومش بتفرج عليه إطلاقا مطلقا بالتلاته
موضوع كويس عن الكوسه الكويسه
تسلم إيدك .. ومخك الممخمخ

Lady E يقول...

مهندس / على درويش : مش هي دي مصر يا باشمهندس

شكرا لتعليقك

Lady E يقول...

BAsMA : مصري يا بسمه

والكهربا بيعملو تصليحات فيها بس بقالهم كتيييير بقالهم اسبوع عااااا

Lady E يقول...

mohamed ghalia : بتشكرني على ايه بس يا محمد انا بجد اضايقت من المذيع بس بدام انتا مسامحه يبقى حصل خير وانا كمان مسامحاه على غلطاته الكتير

وفعلا اسماء تستاهل كل خير هي بجد شخصية جميلة

وبجد موضوع التفاؤل جميل جدا ربنا يبارك فيك

Lady E يقول...

E73 : وعليكم السلام ورحمة الله وبركاته

مش عارفه هو تقريبا بيفهم بس مش عارفه ايه اللي حصله في الحلقة دي

نورتيني يا جميلة

عاشقه الرومانسيه يقول...

بالنسبه للكهربا فانا شايفه انك مستهدفه علشان بتقطع كتير كده
ههههههههههه
وبالنسبه لاعلامنا فده عااااااااااادى جدا
ما كل حاجه بقت زفت يعنى جت على الاعلام؟
ده انتى غريبه
عديها ياشيخه بقى علشان خاطرى المره دى
هههههههههههههههههههههه

حسام غانم يقول...

عمار يا مصر !!

Rannon يقول...

انا كمان بفرح لما النور بيقطع معرفش ليه :))

معاك حق اصلا اغلب برماج ومذيعين النيل الثقافية في البطاطا
هو انا بكره التليفزيون من شوية :))