الاثنين، 23 فبراير 2009

حفلة الأميـــــــــــــــرات


امبارح وانا ماشية في الكلية في وسط الدوشة والزحمة لمحت اعلان للأسف مصورتوش مش عارفة ليه _ لو روحت الكلية ولقيته لسه متعلق هصوره_
الاعلان خلاني اسرح وقلت مستحيل كليتنا تبقى بالتحضر والذكاء ده
بداية القصيدة كفر زي ما بيقولو في اول الاعلان مكتوب ويلكم بارتي _ ويلكم بارتي الترم التاني واخدين بالكو _ ما علينا عدوها يا ساتر بتمسكو ع الوحده ليه كده
اصلا احنا دخلنا الكلية ومحدش عبرنا ولا عرفنا عليها ولا احتفلو بينا ولا اي حاجة خالص مالص بالص
قولت اخيرا افتكرونا وهيعملولنا ويلكم بارتي صحيح فات سنتين ونص دراسيتين لكن موش مشكلة خاااااالص نحتفل بالبارتي ليه لأ
تكملة الاعلان :
الى اميرات وامراء الكلية _ اللي هما مين الامراء والاميرات دول تجاوزا صدقت انه الامراء والاميرات دول احنا الطلبة_
دعوة لحضور الحفل الملكي _ حفل ملكي مرة واحدة كده_ يوم 24/2 وعلى الراغبين في الحضور ارتداء الملابس الرسمية الملكية للأمراء والأميرات _ لا متقولوش بجد مش مصدقة عنتيني حفلة تنكرية في كليتنا المفترية لالالا قولو كلام غير ده_
بعد الاعلان بشوية رحت اتحاد الطلبة _ اللي هما في قمة السخافة وواخدين في نفسهم مقلب للأسف_ سلمت عليهم وسألتهم على المكتوب في الاعلان وقالولي ايوة الحفلة الساعة 12 الظهر في الكلية
انا : طب ايه موضوع اللبس الملكي اللي في الاعلان ده
واحدة من اتحاد الطلبة : لا عادي ده علشان الاعلان شو مش اكتر
انا : شو ازاي يعني انا كنت مفكرة الحفلة هنيجي بفساتين وكده
نفس الواحدة : فساتين هاهاهاهاها طب بصي تعالي يوم الحفلة بفستان سواريه _ طب دي نكتة؟؟ اضحك يعني ولا ايه؟؟_
انا : يعني الحفلة عاديه
نفس الواحدة : اه وعلى فكرة في اجتماع للعميد يوم مش عارفة ايه
انا : ابقي قابليني لو حد حضر
نفس الواحده : عارفه ان محدش هيحضر
انا : سلام
وطلعت من اتحاد الطلبة ونفسي اولع فيهم وفي الكلية اصلا احنا مخترناش الناس دي يبقو اتحاد طلبة ولا علشانهم من اعلام يعني
ودايما اعلاناتهم مستفزة
خير خير كلها 3 ترمات بما فيهم الترم ده واخلص من الناس اللي تجيب شلل رباعي دي ان شاء الله
في النهاية احب اقول ان ده بوست رخم بس انا كتبته علشان محدش يرد ع البوست اللي قبله تاني :)

هناك 23 تعليقًا:

Blind Sniper يقول...

ويلكم بارتى الترم التانى هههههههة اية الحلاوة و الشقاوة دية يلا ما علينا

mohamed ghalia يقول...

حلوه فكرة حفلة الأميرات بس لو كانت بجد
ياليدى متشغليش بالك وفكرى فى مذاكرتك ومحاضراتك أحسن هههههههههههه
يلا سلام

Lady E يقول...

Blind Sniper : هما اكيد شافو شكل الكلمة حلو فكتبوها وخلاص
منور المدونة يا سنيبر بعد طول غياب

Lady E يقول...

mohamed ghalia : هي كانت هتبقى بجد في حالة لو كنا في الجامعة الامريكية
لكن احنا بكل فخر في جامعة مصرية

blue-wave يقول...

ههههههههههههههههه
والله انتى حكايه
حلوة علشان محدش يعلق على البوست اللى فات دى:))

ستيته حسب الله الحمش يقول...

الحمدالله الحمدلله
احنا بصراحة كنا موحتاجين برينس وبرينسس علشان الكلية تحلو وتبقى خضرا
عيزينها تبقى خضرا الكلية اللي في الصحرا

وبلاش تلاكيك بقى وماله لما تروحوا بارتي وياريت يعزموا ليكو مطرب الخيل تامر باشا يا حوستي

والعيال تديها رقص "اديها متحرمهاش" .. هو ده تطوير التعليم ومداد جودة واستاذ اعتماد .. وسلم لي على هرش نوفوخ الشباب الي مطلوب في السوق

قلبتي عليا المواجع والبطاطس

حسام غانم يقول...

لا بس بجد بجد

إعلان جاااااااااااااامد

هي الإعلانات الغريبة دي هي اللي بتلزق في الدماغ

Lady E يقول...

blue-wave : يا سلاااااام يا دكتر سيبت البوست بالويلكم داي واللبس الملكي والكلام الفاضي ده ومسكت في اخر كلمتين في البوست
ايون انا مش عايزة حد يعلق على البوست اللي فات علشان عايزة اطلع من مود الحادثة
ربنا يحميك من كل شر يا دكتر

Lady E يقول...

ستيته حسب الله الحمش : هههههه وحياة ربنا وانا بكتب البوست عايزينها تبقى حضرة كانت في دماغي
وبعدين يا دكتر مالها الحفلات يعني وماله مطرش الجرجير تامر يا حوستي ده كل اشباه الولاد زمايلنا بيقلدوه في كل حاجة وخصوصا اكتر حاجة بحبها فيكي هو ده
يلا منه لله ضيع جيل تافه كامل
وبعدين قوليلي قلبت عليكي المواجع والبطاطس المسلوقة ولا المقلية علشان هناك فرق

Lady E يقول...

حسام غانم : ايون فعلا هي جت على اعلانات الكلية يعني ما كل الاعلانات غريبة وتفقع وتغيظ بره الكلية زي اعلان استرجل واشرب بيريل

ويا حسام والله مدونتك جميلة جدا بس مش عارفة اكتب تعليقات فيها عااااااا
تقريبا المشكلة في الكمبيوتر عندي بيزعل من صفحة التعليق المنفصلة

إيمان يقول...

تتصورى للحظه كده
تخيلت إن ممكن الحلم يتحول لحقيقه
زى كده الأفلام لما البطل يكون طلعان عين اهله وفجأه .. الحياه تضحكله
وتخيلتك إنتى والبنات بالفاساتين الملوكى
والولاد بالبدل الملوكى بردك
ياسلام بجد كان مشهد جميل قوى
بس صحيت على صوت صاحبنا بتاع إتحاد الطلبه وهو بيقولك ههههههه
ههههه فى عينه

لجين أبو الدهب يقول...

اتحاد الطلابة مشهور باعلانات المضروبة فى الكلية ..

بيحبوا يعملوا بربجندا فى الاعلان ..
احنا الاتحاد اللى فى الكلية الصراحة ما كنش بيكتب اى كلام فى الاعلانات .. بس لازم يعمل احتفال للاعلانات كده ..
بس عامة عمرى ما حبتهم ..

وعلى فكرة ياليدى ما تستعجليش الايام .. بكرة بجد تفتكرى ايام الكلية وتتمنى ترجع تانى ..
كانت احلى ايام حتى لو مع انحاد الطلابة :D

* الصورة اللى حاطها بحبها جدا اصل انا مهوسة بالعرايس دول ..

دُمتِ بخير ..

rona يقول...

صح كتير بيحصل كدا جوا الجامعه
وكبرى دماغك منهم

اقصوصه يقول...

looooooooooooooool

وانا اللي تحريتها الحفله اللي

بيختاار فيها الامير شريكة حياته

ههههههههههههه

romansy يقول...

انا اعرف ان حفله الاميرات بتبقى جميله
انما فى الكليه
اهو دا عيبه

بنوتة يقول...

السلام عليكم
مش عارفة حاسة انه بتاع اتحاد الطلبة دول بيهظروا
اوفر دى أوى
حفلة أميرات ولبس الامراء
تخيلى لة البنات مسألتش ولبست وراحت الجامعة هههههههههههه
دى كانت تبقى نكتة الموسم
موضوع جميل
تحياتى ليكى

Eng. Ahmed Abo El-Ella يقول...

يظهر أن كلهم بتوع اتحاد طلبه دول كده. نفس خفة الدم اللي تلطش
انا اعرف واحد منهم أيام ماكنا في الكليه وهو دلوقتي شغال في شركه تانيه قريبه مني. بس ايه ماشاء الله يتوجدش في مكان إلا لما تلاقي الناس كلها بتجز على سنانها منه

انتي عارفه انتخابات اتحاد الطلبه عملوها عندنا في الكليه امتى؟
تخيلي



يوم الأجازه
أيوه والله

مين اللي انتخب؟
لغاية النهارده محدش يعرف
هههههه

عايزه ايه بقى من ناس اللهو الخفي انتخبهم يوم الأجازه؟

ههههههه

سلاااام

maiosha يقول...

هههههههههههههههههه
ايه اعلانات الاطفل دى

ههههههههههههههههههه
وانتى يا شيخة عليكى حركات
ههههههههههههههههه

بقى عايزة تروحى الكلية الساعة 12 الضهر وانتى لابسة فستان
هههههههههههههه

الحمد لله انك سألتى والا كان هيبقى شكلك مش حلو خالص

ربنا يخرجك من الكلية دى على خير يا حبيبتى يا رب

عاشقه الرومانسيه يقول...

والله دى قلة ادب
وفيها ايه يعنى لما يعملوا لكم حفله
وتكون ملكيه وبالصوره اللى انتى حطاها فوق دى
مش احسن من المطربين الزفت والاغانى الهابطه وتنطيط الشباب

على فكره
انا باعتذر جدا
لانى كنت غايبه حوالى اسبوع عن التدوين والمدونات
اصل النت كان بعافيه شويه
ومش كنت باعرف اخر الاخبار

اقولك على فكره حلوه؟
اسرحى بخيالك واعتبرى نفسك اميره وانك حضرتى حفله فعلا
احلام يقظه يعنى
وصدقينى هتبقى مبسوطه

والبنت اللى ردت عليكى دى قوليلها
دودو عايزه زماره رقابتك تلعب بيها شويه يارخمه هانم

مش عارفة الدنيا وخداني علي فين يقول...

طيب إحمدي ربنا ان فيه إعلان من أصله بغض النظر عن المكتوب فيه
أنا أيامي مكنتش شايفة إعلانات خاالص
و كانت الناس بتقول لبعضها علشان نحضر

عموما كلها سنة و تخلصي من الكلية
بالتوفيق ان شاء الله

حسام غانم يقول...

همممم

أكتر من واحد قالولي فعلا إنهم مش عارفين يعلقوا عندي

إذن الوداع يا صفحة يا منبثقة

أهلا بيكي يا صفحة يا كاملة

غروب يقول...

هههههههههههههه

يا ويلكم يا ويلكم يا ميت نهار ويلكم

شكلنا هيعملوالنا حفله بعد منتخرج يكتبوا فيها ويلكم برضه
هههههههههه

البوست مش سخيف ولا حاجه

وانتى قمرايه

Lady E يقول...

إيمان : اييييييه كان حلم وراح انساه وارتاااااح
يادي الشيلة ويادي الحطة راحو على جمل ورجعو على بطة
والحلم راح على صوت صاحبتنا الرخمة مش صاحبنا وههههههه في عينها :)
بجد منوراني يا قمرايا والبوستات مش بتحلى الا بردودك