حكاية الخطوبة يوم الفلانطين علشان خاطركو مع دردشة

لسه بكلم البت صبحتي من شوية وعندها نفس احساسيسي ومشاعيري هيجيلنا نقطة بكرة واحنا شايفين كل الاحبة اتنين اتنين واحنا ماشيين منفضين ولا قلوب حمرا ولا ورد احمر ولا لبس احمر ولا حصبة ولا حاجة
ده غير ان بكرة هيبدأ النكد أأقصد المخفية (الكلية ) وبالعند فيهم مش هلبس احمر مع ان كل الكلية هيلبسوا احمر
عمالة اسمع اغنية امتى هتعرف امتى بتاعت اسمهان وماما عمالة تغيظني وتقولي بتغنيها لمين انا بغنيها لنفســــــــي عااااااااااا انا حاسة بمود رومانسي النهارده وبسمع اغاني رومانسيه واتفقت مع ماما تجيبلي ورد بكرة على اساس ان حد عبرني في الفلانطين ايييييييييييه دنيا
وما شاء الله النهارده كنا ماشيين بالكتكوتة وشوفنا كذا زفة لعرايس وعرسان وفي زفات ماشي فيها عربيتين وفي زفات ماشي فيها عربيااااات من اول الشارع لأخره وكل العربيات متزوقة بالورد وشكلها تحففففففففه ومنهم عربيه كانت متزوقه بالنور (السلوك اللي فيها لمبات الوان صغنونة) واللمبات مكونة شكل قلوب بجد العربية كان شكلها جمييييييل ما شاء الله وانا بقى كنت بستنهز فرصة أي شارع فاضي وعمالة ازف انا كمان بيب بيب بيب بيب بيب وماما عمالة تقولي ايه رأيك ابقي زفي نفسك يوم الفرح وتبقي اول عروسة تزف نفسها وانا اعترضت بشدة هو انا هتجوز علشان ازف نفسي ولا ايه
اومال العريس فين وفين بابا؟؟ ربنا يديك الصحة يا والدي وتزفني انتا وعريسي المنتظر ده لو طلعت حية من كلية الهباب ان شاء الله لو ليا عمر يعني
---------------------------------------
نيجي بقى للخطوبة بتاعت البت مها

وصلنا عند خالتو في ساعتين ونص بدل 4 ساعات وطبعا طول الطريق كنت عايزة انام لاني كنت مرهقة جدا ومنمتش كويس قبل السفر وماما كانت نفس ذات الموضوع بس الحمد لله ربنا كان مييسر الطريق والدنيا مكنتش زحمه وصلنا وركنت الكتكوتة ونعمة الصغنونة (بنت اخت مها) اول لما شافتني باستني وجت قالتلي بحبك اوي يا نونا وبعدين طلعنا لخالتو وكان اصحاب مها واخواتها (كلهم متجوزين) كلهم عند خالتو وكل اللي كانوا موجودين اول لما شافوني قالولي الكلمة الغبية عقبالك ( الكلمة دي ساعات بتبقى سخيفه وبتوجع) وبعدين شغلو اغاني فرح في الكمبيوتر
منها اخيرا اتجوزت وكمان اغاني شعبية تانيه ومها كانت هايصه عالاخر وبعدين طلعنا شنطنا ودخلنا المطبخ نجهز الغدى مع خالتو كان كل بنوتة بتعمل حاجة اما انا فسخنت العيش ومها كانت حريصة انها تقولي عقبالك كل 5 دقايق (كانت بتضايقني) ف وانا بسخن العيش ايدي اتلسعت وقولتلها هي والبنوتات اللي كانوا في المطبخ بعد عمر طويل ان شاء الله لقيتهم طلعوا فيا وقالولي ليه يعني وحاجات تانيه (قال ايه بيدافعوا عني من كلامي )
وبعدين قولت لخالتو مش قادرة اتغدى عايزة انااااااااااام قالتلي اتغدي الاول واخدتني من ايدي وروحنا اتغدينا
وبعد الغدى الساعة 4 مها كانت عايزة تلبس الفستان وتعمل الميكب اب بس انا وصحباتها مرضيناش وقولنالها بطلي هبل المفروض محدش يشوفك بالفستان دلوقتي خالص علشان انتي نجمة الحفلة ولازم تبقي مفأجه للمعازيم ولتامر وكمان من هنا لبليل اكيد الميك اب هيبوظ
وبعدها دخلت الاوضة بتاعت خالتو وحاولت انام معرفتش انام جت نعمة وقعدت تقولي احكيلي حدووووووووتة
انا : يا نعمة يا حبيبتي انا مش فاكره حواديت دلوقتي انا عايزة انام
نعمة : لالالا والنبي والنبي احكيلي حدوتة انا عارفه انك عارفه حواديت
انا : طب ايه رأيك انتي اللي تحكيلي حدوتة ؟
نعمة : لأ انتي اللي احكيلي حدوتة
انا : ماشي يا نعمه في حدوتة بحبها اوي كنت بسمعها لما كنت ادك بس مش فاكراها اوي
نعمة : احكي وانتي هتفتكريها
انا : صلي على النبي
نعمة : عليه الصلاة والسلام
انا : كان يا ما كان في قديم الزمان كان في راجل طيب وعنده 3 بنات واحده كبيرة وواحده متوسطة وواحدة صغنونة
نعمة : اااااه اه القصة دي عارفاها بتاعت لما ابوهم كان مسافر والوردة صح
انا : صح يا نعمة طالما عارفاها سيبيني انام بقى
نعمة : لا ماليش دعوة كمليها
انا : هكملها بس تحكيها معايا
وحكيت شوية في القصة ونعمة شوية واعترضت اوي لما قولتلها ان الراجل المخيف اللي كان بيخوف كل الناس
لما اتجوز اطيب واحن بنوتة واصغر بنوتة من البنوتات التلاتة بقى جميل و شكله حلو لان السحر اللي كانت عملاه الساحره الشريرة راح لما اتجوز وفضلت تسألني يعني هو بقى حلو بعد لما جابوا المأذون؟ ولا بعدما الفرح خلص ؟والساحرة سابته يتجوز عادي كده طب وهي كانت فين وقت الفرح؟؟ (كأني كنت معاهم يعني) وبعدين اخيرا عرفت اقنع نعمة اني عايزة انام وقالتلي خلاص هنام جنبك بقى انا كمان صحيت بدري
واول لما نمنا جت خالتو
خالتو : ايه ده انتو نايمين قومو قومو العريس جاي بعد ساعة
انا : سيبينا ننام شوية يا خالتو انا لبسي جاهز هقوم البس على طول
خالتو : لأ صحصحوا وقوموا البسو من دلوقتي
واضطريت اسفة اني اصحى وانا منمتش اصلا عااااااااااا عااااااااااااا
والبوست الجاي اقولكو ايه اللي حصل في حفلة الخطوبة
ان شاء الله