الجمعة، 12 ديسمبر 2008

الطلاسم بااااااااااطل باااااااااطل


ملحوظة متابعة البوست ده واللي قبله

صحيت من عز نومي على رنات صحباتي الله يجازيهم وعلى ضميري اللي كل شوية بيئنبني ويقوللي عندك 7شيتات و2 اسينمنت ومعملتيش الا واحد يتيم منهم من زماااااااااان
كان عندك اجازة اسبووووووووع
انا : يا ضميري يا حبيبي دي مش شيتات دي طلاااااسم وانا مش بفهم في السحر يا عم الحج
ضميري : سحر مين حد قالك تطلعي حمامة من الحلة ده كام شيت يعني هو حلهم حاجة صعبة لما انتوا مش اد الكليات بتدخلوها ليه
انا : كليات مين يا عم الحج صلي على النبي هو اللي احنا فيها دي كلية دي كابوس
ضميري : ايوة ما هي حجة اللي مش بيحب يذاكر مسح السبورة
انا : نعم تقصد مين
ضميري : ولا حاجة ربنا يوفقك
انا : شكرا اميـــــــــــن يسمع منك ربنا يخويا انا واللي زيي
وبعد كلمات ضميري قضيت الليل بطوله ببص للشيتات واسيبها وابص للتلفزيون ثم للنت ثم للكتاب 5 ثواني ثم احط الشيتات في الفايل file وارميها عالمكتب وانسى الشيتات
واهو فات اسبوع على ده الحال واهو جه يوم الجمعه اللي كل الشيتات والواجبات اتراكمت عليا فيه عاااااااااااااا
طبعا مش عارفة انام علشان قضيت الاسبوع نوم وحان وقت المسؤلية قولت اشغل موسيقى هادية تريح اعصابي وانا بذاكر اخترت السيديهات وانها تشتغل ابداااااا مش عايزة تشتغل
وبعد نص ساعة اخيرا اشتغلت وبفتح اول شيت وبقول بسم الله الرحمن الرحيم لقيت السؤال خير اللهم اجعله خير بيقوللي :
حللي شخصية البطل نفسويا وتأثير الاماكن ومشاعر الاشخاص اللي كانوا معاه عليه وحللي نفسية مراته ونفسية عياله ونفسية الاشخاص اللي اتأثر بيهم وازاي ده اثر في جو القصة مع الاستشهاد بنصوص من الرواية ؟؟؟؟؟؟
طبعا الكلام ده كله بالعنجليزي والمطلوب اني احلل شخصيات الناس دي كلها وانا والله بريئة يا بيه ولا عمري شفت الناس دي ولا عارفاهم وبعدين احللهم ليه هو انا لا سمح الله دكتورة تحاليل ولا دكتورة نفسوية وبعدين دي نميمة وانا لاااااا اقبل :) بجد ايه الكلاكيع دي ولسه ده اول سؤال والبقية تأتي
وكمان لا بد ان اترجم علشان افهم اللي بكتبه عااااااااااااااااا

يا عيني يا عيني عالبنوتة
الشيتات بااااااطل بااااااااااطل
وكما يقول الاعلان
العربية اللي حيلتي باظت بااااااااااظت بااااااااااااظت
وجواز جود من اربيلا باااااااااااطل بااااااااااطل (ابطال الرواية) هما يتجوزوا واحنا ندفع تمن غلطتهم
عليك اللحمة بالبطاطس يا جود انتا واربيلا وسو بالمرة عااااااااااااا

هناك 13 تعليقًا:

Unknown يقول...

يخرب عقل والله دمك خفيف جدا بجد حاجة تزعل اني كنت معرفش مدونتك دي من زمان
ربنا يعينك ويقويك ع الشيتات وتحليل الشخصيات..
مودتي لك ومعذرة على كلمة يخرب عقلك دي

e_emy يقول...

ههههههههههههه

ايه ده انتى معايا تقول الاسبوع

انا كمان كنت بنام وجه انهرده الجمعه بقه
ولازم اخلص الى ورايا

بس بجد كنت ناويه ع حاجات كتير اذاكرها الاسبوع بتاع العيد دا
بس للاسف بقه ):

ربنا يوفقك ويوفقنا كلنا [-o<

اهم حاجه تهدى وتبدأى الجد بقه ومضيعيش وقت هانت ونخلص من الترم ده

ربنا يستر

Kiara يقول...

ههههههههههههههههههههههههههههههههههههه


بنتي وانا عارفاها

يابت انتي كل سنه في الموال ده ياااااارب تخلصي بقي

وحلليهم ايه مش عارفه تستنتجي

شوفوا الراجل قتل الوليه ليه

واسالي الوليه وقوليلها انتي الوليه

ولو قالت اه انا الوليه

تعرفي علطول ان الراجل مظلوم ههههههههههههههههههههههههه

غير معرف يقول...

هههههههه
انا احب اسمع تحليل المستر
و احب اناقش المستر في التحليل دي ..
لكن حلي و اكتبي و شيتات و مواضيع.. فلحد هنا و اقفي :):) فنفس الحكاية دي بالضبط : باطل باطل باطل ..
بس هترجعي تفتكري الايام دي و تقولي ياااااه :)
ربن معاكي و يوفقك دايماً..
و كل سنة و انت طيبة

مسدس صغير يقول...

الشيتات يا بنات قبل الاوان والفوات ..من رسائل العمارنه فى العصر الشيبسوتى., حلى الشيت تفلحى وسيبك من العيد واللحمه,.ههههههههههه تقبلى تحيتى مدونه جميله اسجل فيها اولى زياراتى

غير معرف يقول...

هههههههههههههههههه

والله انتي زي العثل

ربنا يعينك ويوفقك يارب
:)

moory-mero يقول...

السلام عليكم و رحمة الله و بركاته

ههههههههههههههههههههههههههههههههههههههههههههههههههههه
عثثثثثثثثثثثثثثثثثثثثثثل و ربنا

وعزراكي وحاسة بيكي كنت زيك كده وبهدله يااختي في الشيتات والابحاث والبرامج والتصوير والتحليل لما تعبت

ربنا يقويكي ياقمر

بس بجد انتي عثولة خالث وواضح انك دمك ثربات خالث مالث

ربنا ينجحك يارب هانت هانت كله بيعدي ان شاء الله

اول زيارة ليا يا أم دم زي الثكر وموث الاخيره يا قمر

في رعاية الله

صفا سارة يقول...

ههههههههه بجد انتى عسل وانا الحمد لله باكون صريحة مع نفسى محاولتش افتح كتاب اصلا فى الاجازةههههههه

kochia يقول...

الاجازة خلصت وخلاص
عودة بقي للشيتات وغيره
اهي ايام
ربنا يعينك

moustapha achraf يقول...

looool يا ستى اهو كلة برتقال

بنت الغربة يقول...

حبيبتى ياليدى ايه الدم الخفيف ده - انت عسل قوى
انا عمرى ماحبيت ماده قد الرسم والانجيليزى - كنت بحبهم جدا -وكنت بكره بقيت المواد علشان فيهم حفظ
علشان كده دخلت فنون جميله - كليه رايقه ومفيهاش حفظ خااالص - نصيحتى ماتبصيش للانجيليزى على انه ماده لازم تحفظيها
لالا بصيله على انه لغه لازم تتقنيها لانها اساس كل الشغل بعد كده
هنا فى دبى العربى منقرض ومحدش بيتكلم بيه خاالص - كله انجيليزى وانت كليتك مستقبلها حلو قوى لو اتقنت اللغه
ربنا معاك وحاولى تذاكرى وتسمعى كلام ضميرك - تحياتى ليك

mohamed ghalia يقول...

هههههههههههههههههههه
يابنتى ذاكرى
انتى ناوية على ايه السنة دى
لازم نستحمل غلطتهم بقى
وبعد الأسئلة دى بالنسبالك تافهه إنتى ناسية إنك محلله نفساوية كبيرة ولا ايه
بلاش تواضع بقى
بالتوفيق
كل سنة وانتى طيبة

كوارث يقول...

والله سهلة
حللي شخصية البطل والبطلة
هوا اكيد لازم عشان فيه رواية يبقى فيه حدث وبطولة !
والحدث ده اكيد هيعمل ازمة
واكيد البطل هيواجهها بحكمة والا ميبقاش بطل
كملي بقه في الكلام ده وابقي ترجميه وبعدين اكتبي وثقي في الامتياز !!
وهوا يعني مين بيفتح كتب دلوقتي