الثلاثاء، 14 أكتوبر 2008

كلام كتير




كنت دايما لما بغيب عن جدتي ا لله يرحمها كنت بقولها
(البعيد عن العين ب
عيد عن القلب يا ماما ستو) وكانت بتقوللي (يا حبيبتي بتغيبوا حبة بتزيدوا محبة ) والمعنى ده حسيت بيه لما رجعت مصر كل صبحاتي استقبلوني بحفاوة كبيرة جدا وبحب بجد لسه مش مصدقة ان في حد بيحبني حتى لما ببعد وبسافر ويعتبر ببقى في عالم النسيان بس مش عارفة ليه حاسة انكم نسيتوني وبفكر كتير يا ترى لسه فاكرينني ولا نسيتوني في مدونين كتير قريبين لقلبي انا متأكده انهم منسيونيش لأني منسيتهمش ولأن مستحيل ابقى دايما فكراكم وانتوا تنسوني حتى لو بعدت شهرين مش اسبوعين طبعا احداث اسبوعين كتير جدا اني اقولها كلها في بوست واحد بس هقول شوية حاجات اولا : اتأخرت في السفر اسبوع كامل علشان اتأخرنا 5 دقائق بحالهم على الطيارة فمرضيوش يطلعونا ع الرحلة احنا وناس كتير ومنهم كان دكتور في الجامعة بريطاني ما شاء الله شاب زي القمر من جامعة كامبريدج وكان بيكلم المضيفة المسؤلة عن رحلته ومكنش في اي اماكن في الرحلات الايام التانيه الا waiting list يعني قايمة الانتظار يعني اللي ع القايمة دي بيروحوا المطار كل رحلة ويشوفو لو في حد اتاخر او مجاش بيطلعوا الرحلة مكانه وللأسف قضينا يومين بنروح المطار ومفيش اي اماكن عالطيارة وطبعا وقتها كنت عصبية جدا ودمي محروق لاني بكره الانتظار ومكنتش عارفة ايه اللي حصل في الكلية وكمان كان عندي استبحس زي اللي بيجيلي ايام الامتحانات ومكنتش بنام ده غير ارهاق التحضير للسفر ثانيا : أخيرا لقينا معاد تاني للسفر وطبعا بعد اسبوع من المعاد اللي كان مفروض نسافر فيه وقررنا مش هنروح تاني المطار الا يوم السفر وهننسى موضوع الويتنج ليست ده خالص الغريب بقى اني قبل ما كنت بروح المطار ولما كنت برجع من المطار كنت بفتح التلفزيون وبلاقي اغاني كلها اللي كاتبها الكاتب الجميل أيمن بهجت قمر واللي ناويه اكتب بوست عن اغانيه السهلة الممتنعة
الغريب اكتر اني لما طلعت الطيارة شغلوا فيلم في محطة مصر وبرض
ه لمحت اسم أيمن بهجت قمر في تتر الفيلم
على فكرة فيلم في محطة مصر بجد رائع
ثالثا : اخيرا طلعنا الطيارة وكان في كمية هنود مش معقولة وعلى فكرة الهنود مش بس كانوا على الرحلة الاخيرة لأ الهنود بيجو مصر بأعداد مهولة من سنتين او اكتر وطبعا بيشتغلوا في مصر لا وايه الفرد الواحد جايب كل عيلته معاه طبعا دمي اتحرق ان كل دول جايين يشتغلوا في مصر واحنا المصريين مش لاقيين شغل رابعا : مش عارفة ليه لما وصلنا البسبوسة والمقهورة ام عز حسيت اني بحلم وهصحى الاقي اني لسه مسافرتش وفضلت حاسة كده وخصوصا اني رجعت لقيت شركة فودافون المحترمة شفطوا 3/4 رصيدي مع اني كنت اشتريت صلاحية بس مش عارفة ليه يعني يخلصوا الرصيد وفضلت مستئكبة لغاية لما وصلنا البيت واتصلت بيا زميلتي بالصدفة تسأل عليا وبجد حسيت اني في بيتي وفي بلدي فعلا بس برضه فضل الاحساس بالغربة معايا خامسا : تاني يوم رحت الكورس وزميلاتي استقبلوني استقبال جميل جدا وخصوصا بنت زميلتي البيبي القمر ميرنا ما شاء الله عليها ط
فلة رائعة الجمال وخفة الدم حسيت انها عروسة لعبة عنتينها لونهم رصاصي في اخضر مع ازرق يعني لوحة فنية وكمان تختوخة كانت بتعييط مع كل البنوتات الا معايا وكانت بتلعب معايا وبتضحكلي وبتستخبى ورى الكرسي وقولتلها مليش دعوة هاخدك معايا ضحكتلي وقالتلي اه مامتها قالتلي شوفتي بقى عايزاكي تاخديها خديها او جيبلها عريس وخلصيني
بجد ضحكة البنوتة دي رجعتلي توازني النفساوي
سادسا : اطفال العيلة كلهم كبروا اومال لو كنت غيبت سنة بقى كان ايه اللي حصل مريومة حبيبتي بقت بتمشي ومشيتها شبه مشيت البطوطة وبقينا نعمل سباق في الجري انا وهي وبتحب تخوفني زي كيكي وضحكتها ما شاء الله جميلة جدا وبريئة جدا عمورة حبيبي راح الحضانة وبقى عنده مسؤليات كل لما اكلمه يقوللي انا رايح اعمل الواجب عندي حضانة بكرة والميس هتزعقلي قلت بقى عمورة هيبقى اشطر مني بصراحة شجعني اني اخلص اول شيت طلبوه مننا في الكلية وده في حد ذاته انجاز يسوفة : مش مصدقة انه دخل الحضانة لغاية دلوقتي بصراحة قمر في يونيفورم الحضانة سابعا : كان اول يوم كلية ليا النهاردة واول محاضرة اخدتها كانت عن كتابة المقال نظرا لأن راحت عليا نومة ومحضرتش المحاضرتين اللي قبل محاضرة المقال المحا
ضرة كانت روعة كان كلها ضوحك وخصوصا ان الدكتر قال لنا في بداية المحاضرة نكتب 3 براجرافات عن العولمة اللي احنا مكناش فاهمين اوي معناها ومازلنا مش فاهمين معناها بالعربي يبقى هنكتب عنها بالانجليزي ازاي ثامنا : كفاية كد ه بقى ايه الرغي ده كله مش عايزة ابقى شوريرة

سلام



هناك 14 تعليقًا:

Mona Shereif يقول...

وحشتينى اوى اوى اوى اوى
حمد الله على سلامتك
وكلامك جميل مش كتير
بجد وحشانى اوى

e_emy يقول...

نورتى بلوجك ياجميل

وحشتينى بجد

وبعدين محدش يقدر ينساكى ابدااا (:

بوست جميل ربنا يوفك ف حياتك ودراستك يارب

mohamed ghalia يقول...

حمدا لله على السلامة
وفى إنتظار جديدك
عام دراسى سعيد
بالتوفيق

هانى زينهم يقول...

اولا حمد ع السلامة ونورتى المحروسة وثانيا مبروك اللوك الجديد وثالثا انا مش معاكى فى حكاية ان البعيد عن العين بعيد عن القلب بالعكس البعيد عن العين هو اللى فى القلب .
ربنا يحققلك احلامك وان شاء الله تقضى فى مصر ايام احلى بكتير من ايام الغربة .

Lady E يقول...

Sometimes : وبجد انتي كمان وحشتيني جدا جدا يا قمرايا مع اني متابعة كل البوستات على بلوجك واخر مرة رديت من الموبايل (ليا عندك ربع جنيه ) :)

الله يسلمك من كل شر يا حبيبتي

وبجد انتي اللي عيونك حلوين وكلامك دايما سامعه صداه وبحاول احب الكلية مع انها مش عسولة خالص
وعندي احساس انك كنتي بتدرسي في نفس ذات الجامعة اللي انا فيها علشان كده ببقى متفائلة وان شاء الله السنة دي تبقى احلى من السنين الدراسية اللي فاتو

ربنا ميحرمنيش منك يا احلى منوش

Lady E يقول...

e_emy : انتي وحشتيني اكتر يا احلى ايمي

والبلوج منور بيكي وبكل اللي بيحبوه يا قمرايا

وربنا يكرمك يا رب انتي اللي محدش يقدر ينساكي خالص

اللهم أمين ربنا يرضى عليكي ويوفقك في كل حياتك يا حبيبتي

Lady E يقول...

mohamed ghalia : الله يسلمك من كل شر يا رب

وربنا يسمع منك

دمت بخير دائما

كـــيــــــــارا يقول...

نونااااااااااااااااا جت

هيييييييييييييييييييييييييييييييه

وحشتيني


الف حمد الله علي السلامه ياقمر

Lady E يقول...

هانى زينهم : الله يسلمك من كل شر يا مستر

ومش دايما البعيد عن العين بيبقى في القلب

لأن احنا اسمنا انسان والاصل في حياتنا النسيان وناس كتير بيينسوا اقرب الناس لقلبهم طالما بعيد ومش موجودين معاهم
ده حتى احيانا الناس بينسوا بعضيهم وهما مع بعض

ربنا يستجيب منك يا مستر

دمت بخير دائما

Lady E يقول...

كيارا : يااااه اخيرا قولتي حاجة يا كيارا شايفاكي من الصبح في البلوج بس مش بتقولي حاجة وكمان مستنياكي عالايميل وبرضه انتي مختفية والله وحشااااني جدا

ربنا يسلمك من كل شر

على فكرة قرأت البوست بتاع العريس عالموبايل لما كنت مسافرة وقعدت اضحك انا وماما هو اكيد كان قصدة لو مكنتيش انتي تدلعيه مين هيدلعه زي اغنية حكيم
يلا اهو اخد الشر وراح

مستنياكي عالايميل

انا حره يقول...

حساكى طفله صغنونه وعفريته بجد

انا حره يقول...

دا طبعا حاجه حلوه جدا ياريت تحافظى عليها

ان شاء الله مش هتكون اخر زياره ليا

Lady E يقول...

انا حره : أهلا بيكي يا قمريا

انا فعلا ببقى كده مع الاطفال وفي مواقف كتير لكن ساعات بكون جد برضه

ووعد الحر دين عليه هستنى زياراتك الجميلة

نورتي البوست والمدونة كلها

نيللي علي يقول...

رغم ان كل بوست بقره ليكى من 3 سنين,بس سعيده أنى بقره كل حاجه كاتبتيها ,لأنك بعترف انك الانسان الوحيده اللى بقر البوست بتاعها من اول كلمه لأخرها ,لأن بجد بتكتبى بأحساسك ..كل كلمة فى البوست حسيتها وحسيت اكنى كنت معاكى

وبالمناسبة انتى بعيد عنى ومشوفتكيش بس بالرغم ده كله بتوحشنى روحك ..ومش بقدر انسكى خالص