مسا النور والهنا عالموجودين هنا

أصبحت أيامي تمر بسرعة البرق

اليوم يمر كدقيقة والأسبوع كثواني معدودة

والشهر يمر كلحظات

والسنة تمر كالحلم الوردي الجميل

هذا ما أردته لنفسي أن أكون شيئا مذكورا وسر النجاح ان انت لازم تخلقه لازم نتعب ونعافر ونحاول نقدم أحسن حاجة عندنا علشان ننجح وبجد النجاح طعمه حلو أوي وبينسي أي تعب قبله

نرجع ل اللغة العربية الفصحى تاني

أردت أن أذيب روحي في روح الكون الكيبر وأستشعر السعادة اللامتناهية من تحقيق ذاتي وحبها وتقديرها وبجيبلها شوكولاته كمان :)

المهم ده كان كلام كتبته في المذكرة الصغنونة بتاعتي أصل انا بقى لي كام يوم مشغولة لدرجة ان معنديش وقت أكتب حاجة جديدة عالمدونة وأخيرا ارتحت شوية قبل ما أدخل في دوامة كورسات وشيتات وأبحاث جاديدة

يوم السبت اللي فات كان في لقاء مدونات دمياط والفكرة كانت بيني وبين أميرة على كوكب مهجور بس في الأخر قولتلها مش لاعبة :) والبونيه يا عيني هي اللي عملت اللوقاء
والمعاد الأخير ل اللوقاء جه فأجه وكنت مترددة اني احضر اللقاء لولا مرمر كانت بتتصل بيا كل 5 دقائق وتأكد عليا اني أحضر
وقلت هحضر نص ساعة أسلم عالبنوتات وأتعرف عليهم وأمشي فورا :)

ولأني روح طفلة مش عايزة تكبر رجعت في كلامي أول لما اتعرفت بالبنوتات والنص ساعة بقت ساعة ونص
بجد بنات عسولين وطيوبين وحبوبين أوي وأكتر حاجة عجبتني اني حسيت اني عارفاهم من زمان وكمان أفكارنا كانت متقاربة وكمان انهم بنوتات متدينين ومش متشددين يعني نقدر نقول عليهم صحبة صالحة

أميرة على كوكب مهجور : طبعا مش محتاجة كلام أنا اتكلمت عنك كتير قبل كده وبجد شكرا ليكي على تشجيعك ليا اني أحضر اللقاء لأنه بجد كان لقاء جميل وأنتي عملتي مجهود انه ينجح
ربنا يسعدك ويفرح أيامك

امرأة من ثلج : لما اتكلمنا قولتلها ايه الصقيع ده :) بنوتة عسولة وطيوبة أوي ومتحدثة لبقة وأفكارها جميلة جدا
وبالتوفيق يا قمرايا وعقبال ما مدونتك النونو تحبي وتمشي وتطلع سنان كمان :) ، عقبال مليون سنة تدوين وانتي منورانا وعايزة أشوف الاحتلال الدمياطي :) و ولا تزعلي احنا الاتنين روح طفلة مش عايزة تكبر

ريمان : شخصية ودودة جدا وطيوبة جدا وروحها جميلة بجد وريمان فعلا تستحق اسم مدونتها ملائكيه
و ولا يهمك يا ريمان أنا واحساس طفلة واحد :) كلنا أطفال :)

يارا : هي الهدوء والسكينة والطيبة بتاعت اللقاء ، هادية جدا ورقيقة جدا ، بنوتة مبقتش موجودة في العصر اللي احنا فيه ده

بنت الاسلام : أو خلينا نقول أم المدونين- مع انها صغنونة- عملت جو ل اللقاء بأسئلتها ومناقشاتها وبجد بنوتة مثقفة جدا ولبقة جدا وطيوبة جدا وطول اللقاء كانت عمالة تقوللي يا طفلة وانا كنت عمالة اقنعها اني روح طفلة مش طفلة بس :)

بجد بجد اتشرفت بمعرفتكوا يا بنوتات ومدونات بلدي ويارب تبقى معرفة خير دائما
وكان نفسي أشوف باقي مدونات دمياط بس ملحوقه ان شاء الله يوم الخميس11/3 الجاي هنروح جمعية رسالة اللي في دمياط والبنوتات اللي عايزين يجو معانا ويشاركوا في عمل الخير يقولولي في التعليقات وأنا هحاول اجيبلكم رقم موبايل علشان البنوتات اللي تحب تحضر يعرفوا مكان جمعية رسالة

ولأول مرة أقول اني هحضر لقاء قبلها ، بس انا ان شاء الله ناوية أحضر لقاء بورسعيد وفكرة اني اروح كانت موجودة لكن بعد كلام وتشجيع شفقة وفاتيما ليا وانا بحبهم اوي هما الاتنين ف ان شاء الله هروح ويارب نقدر نسعد الأطفال اللي هنشوفهم ويارب أعرف أوصل بورسعيد بالكتكوتة ويارب يبعد عني يوميها اني ارجع في كلامي :)
ويارب تيجي يا خالتو ستيتة نفسي أشوووووووفك جداااااااا

------------------------------------------------------------

ع الهامش : حنين حنين حنين أنا دايبة فيكي حنين أنا دايبة فيكي حنين وحشتيني ومفتقداكي
اوي يا حنييييييييييييين
بجد انا من غيرك زي المساكين يا حنين

كيكي : انا بقيت مدمنة أورنج جوس وأغنية عوعو عو علشان بيفكروني بيوم لما اتقابلنا ، وحشتيني أوي ومفتقداكي بجد ومسجاتك اكتر مسجات بتضحكني من قلبي

حنين وكيكي بحبكو أوي وربنا يخليكو ليا

ملحوظة كل اللي هيعلقوا عالبوست ليهم وردة من اللي في الصورة

من أيامي

اذا أردت شيئا بشدة هيجيلك

كان في كورس مش تنمية بشرية خالص لكن كورس ادارة أعمال – تبع العفاريت مش اعمال يبقى عفاريت على طول اشتاتا اشتوت :) – نياهاهاهاها

يعني الموضوع مش تبع دراستي خالص
المهم الكورس ده سبحان الله كان الترم الأول أيام امتحاناتي ومكنش ينفع بأي حال من الأحوال اني أخده وبعدين جه نفس الكورس بنفس المدرب الترم التاني برضه في وقت صعب وزحمة بالنسبة لي وبصيت للإعلان وقلت في سري والله نفسي أحضر وحابة الكورس جدا بس المعاد مش مناسب يلا الحمد لله على كل حال

رحت المكتبة النهاردة ولقيت ايه؟ لقيت المعاد اتغير :) والمعاد مناسب بالنسبة لي الحمد لله
بس الاستفسار مكنش في المكتبة كان في مكتب اسمه في السما – عجبني الاسم- طبعا مش هقولكوا لفيت عالمكتب ده أد ايه -وأنا أصلا بتوه قدام بيتنا - :) لحد ما الحمد لله لقيته ، كان في هناك بنوتتين عسولين أوي بنوتة اسمها رنا وبنوتة اسمها نسرين – بقول أسمائهم علشان منساش – ولقيتني تلقائيا بحجز الكورس ، وانا كنت رايحة استفسر بس


دعاء رائع

في دعاء جميل جدا عرفته من فترة وافتكرته النهاردة

" بسم الله الرحمن الرحيم

وصلى الله على سيدنا محمد وعلى آله وصحبه وسلم تسليما كثيرا

اللهم إني أسألك بالعرش والكرسي والنور الذي عليه سيدنا محمد صلى الله عليه وسلم

أن تسخر لي قلب من أحوجتني إليه وأن تكفيني شر من يقدر علي ولا أقدر عليه يا من بيدك ملكوت

كل شيء أنت عالم به وقادر عليه "

تنويه :

لمدونات دمياط الأعزاء اللي عارفة انهم كتير وعزوة ما شاء الله زي دودو دعاء
وفتافيت وندى نصر اللي عرفت مدونتها بالصدفة في لقاء مدونات حريمي طبعا يوم 17/ 3 ان شاء الله والموضوع بالتفصيل عند أميرة على كوكب مهجور

http://amira3lakawkab.blogspot.com/2010/02/blog-post_28.html

أغنية

الأغنية اللي في البلوج حاليا هي بحار ل بلاك تيما والحقيقة الأغنية عاجباني جدا وحبيتها أيوة انا حبيتها
و الفريق ده فيه المطرب اللي مثل دور سواق التاكسي في فيلم 1000 مبروك الفيلم اللي لما شوفته كنت بغني نفس أغانيه لما ببقى في الكتكوتة " يا دريكسيوني يا دريكسيوني يا دريكسيوني ، يا دبرياجي يا دبرياجي يا دبريااااجي " :)

أخيرا :-

لعيون حنين انتيمتي ولعيونكم كتبت استبيان التقييم الذاتي في ملف وورد ورفعته
علشان اللي عايز يحل الأسئلة ، واللي هيحل الأسئلة يبعتلي الاجابات وأنا هقول له الاجابة لأن علشان يعرف الاجابة في جداول وحسابات وحاجات غريبة فبدل ما اكتب كل الكلاكيع دي هوفرها عليكو وهحسب الاجابات وابعت لصاحبها أو صاحبتها الانماط الأربعة لشخصيته وأعلى وأقل نمط

وحاجة كمان أنه يهمني أعرف أنماط الشخصيات الجميلة اللي بتتابع مدونتي

لو حد مش حابب يبعت الاجابات في أخر بوست ممكن يبعت الاجابة ع البوست اللي فات أو اللي قبله علشان المدونة عليها موديريشن في البوستات القديمة

بالنسبة لأنماط الشخصيات ففي شخصيتين بحبهم أوي ومتأكده من نمط شخصياتهم وهما فراشة ومرمر تعبت بجد الاتنين نمطهم حسي – مشاعرهم وأحاسيسهم عالية ما شاء الله – ودي حاجة أنا متأكده منها من قبل ما يعملوا الامتحان

وده اللينك :

http://www.4shared.com/account/file/233933873/ef3587db/___online.html

بالتوفيق ويارب تنجح يا تتح :)

--------------------

ع الهامش : وقد يجمع الله الشتيتين بعدما يظنان كل الظن أن لا تلاقيا
شعر قيس الملوح
وغناء فيروزة الروح فيروز

سمعني سلام بودعك

احلى حاجة في الكلية انها بتفتح شهيتي عالكتابة وبلاقي مادة ممكن اكتب عنها علشان بعد كده ابقى افتكر ذكريات أيام الكلية وخصوصا اني اخر ترم ويارب يجعله أخر الأحزان عايزة اخلص بقى من الكلية دي بكل حاجة فيها

خلاص بقى 4 سنين اللي نقول نعيده ده لو كان بيضة وفيها كتكوت كان زمان الكتكوت في الحضانة دلوقتي ، وبعدين اصلا اول مرة أنجح اني اقعد في مكان دراسي كل الفترة دي ، دائما كنت كل سنتين بالكتير أغير المدرسة مش علشان مشاغبة لا سمح الله دي حاجة اتمناها لكن تبع شغل بابا والمكان اللي كنا بنبقى فيه

اللي مش حلو بقى اني لما بحتفل بنفسي اني نزلت الكلية يوم بعدها مش بنزل الكلية أسبوعين أيوة هذه حقيقة

قضيت ليلة غريبة بحاول اجبر نفسي اني انام بالعافية بنظام هتنامي يعني هتنامي ولما كنت بصحى كنت بقول شوية أدعية مع حسبي الله ونعم الوكيل وبنام تاني
نزلت النهاردة والجو كان برد بغلاسة ومكنتش عاملة حسابي انه هيبقى برد أوي كده ومع اني صحيت بدري على غير العادة الا اني نزلت متأخر كالعادة

مفاجعة البطارية بتاعت الكتكوتة نايمة وشده اللحاف والبطانية ما هو الجو برد حقها
في الوقت ده المطر كان لسه نازل خفيف (زي وقت الحادثة) حسيت ان ربنا بيحبني مش مستعدة أسوق في الجو ده والطرق المزحلقة وحسيت ان لو كنت رحت الكلية بالكتكوتة النهاردة اكيد كانت هتحصل حاجة مش كويسة
وكان احساس قوي اوي -وقد كان وانا راجعه من الكلية كان في حادثة كبيرة موتوسيكل خبط بنوتات أطفال جايين من المدرسة والحادثة كانت في الطريق اللي دائما بمشي منه الحمد لله غالبا احساسي مبيخيبش- ، نرجع لقبل المحاضرة تاني قلت الحمد لله واخدت تاكسي ووصلت الكلية دكتر أنور لابس بدلة جميلة وشيك أوي انا استغربت انه مش جايب عروسته معاه ما هي بدلة بالشياكة دي تنفع في الأفراح لكن خسارة في الكلية

وطبعا زي ما زميلاتي حكولي زي محاضرة الأسبوع اللي فات ان احنا كطلاب سنة رابعة فاشلين في الانجليزي والمفروض منتخرجش م الأخر محناش نافعين ، والمحاضرة كلها كان بيعلمنا الجرامر من أول وجديد وعمال يتريق علينا وعلى اخطائنا في الامتحان والبنات الهاطلة بيضحكوا وبعدين صبحتي قامت وقالت للدكتر انت بتتريق علينا ليه – عجبتني أوي- قالها مش قصدي انا قصدي اضحكوا على أخطائكوا علشان متكرروهاش يا سلاااااااام

والدكتر قال لنا ممكن نخلي المحاضرة الساعة 12 وانا قولت هيييييييييييه هنام براحتي بقى والبنات ولاد اللذينا
قالوله لأ يا دكتر 10 يا جماعة 12 قالولوا لأ 10 اه يا دفعة عايزة يتولع فيها بجاز الساعتين دول يفرقوا معايا هنام براحتي بس أقول ايه بقى ما نصهم متجوزين وعايزين يروحوا علشان يطبخوا

بعدها رحنا نشوف السكشن امتى وقابلنا مين دكتر الفرنساوي ويا حبيبي اللي يخاف من العفريت يطلعلو
حبيبي الفرنساوي حبيبي بقيت معيدة فيه 3 سنين معايا وكل سنة المنهج بيتغير فعلا وزارة التعليل

رحت السوبر ماركت وانتقمت بقى جبت شوكولاتات كتير وحبيبي شيتوس بعد كده هيسموني فتاة الشوكولاته والشيتوس ، بعدها رحنا مكتبة مبارك انا وزميلاتي من اول اسبوع عاملين لينا بحث عن قصة قصيرة نختارها
دورنا في القصص والروايات ، من يوم ما دخلت الكلية نفسي اقرا كتاب واحد انجليش من اوله لأخره غير كتب الكلية وحتى كتب الكلية مش بقرأها من أولها لأخرها والغريب ان كان في روايات درسناها ومفتكرناش منها ولا كلمة الا العنوان :(((((((( خيبة والله خيبة

بعدها رحت قاعة من القاعات في المكتبة قرأت شوية في كتاب الأحاديث القدسية
ايه الروعة دي وايه الجمال ده والطمأنينة اللي حسيت بيها دي
واحد ربنا دخلة الجنة بحسنة واحدة
واحد ربنا غفرله علشان قاعد مع ناس بيذكروا ربنا بس مكنش في نيته ذكر لكن
اهل الذكر جليسهم لا يشقى

الله
معقول يا رب سبحانك انت جميل كده وبتحبنا كده اومال ليه بيخوفونا منك وكل كلامهم نار وعذاب وعقاب

انا بحبك وواثقة انك بتحبنا وخلقتنا علشان بتحبنا ومهما اتألمنا فبنتألم علشان نتعلم

ياللي بتبحث عن اله تعبده

بحث الغريق عن اي شئ ينجده

الله كريم ورحمن رحيم

احمل صفاته وانت راح توجده

وعجبي

-----------

ع الهامش : في دايرة الرحلة أيامنا ع المولى

ليلنا أيا ليلنا مرة هتحلى لنا

تميل على ميلنا في دايرة الرحلة

محمد منير

كل الكلام مرة واحدة 2

دورت على كتاب بيت من سكر لسوزان عليوان كتير عالنت ومعرفتش أوصل له
قرأت شوية من الكتاب على موقع سوزان عليوان http://www.suzanne-alaywan.com/
وقررت اني هدور عالكتاب في المكتبات لأن في أشعار كتير عجبتني في الكتاب ده
تاني يوم في مكتبة مبارك كانوا عاملين معرض صغير للكتب ومش عارفة ليه دائما بتبقى كتب اسمائها مكلكعة

بالصدفة رحت بصيت عالكتب وجبت كتاب وكنت خلاص ماشية ببص بين الكتب لقيت كتاب بيت من سكر مستخبي بين الكتب ، بصيت شوية للكتاب وأنا مش مصدقة اني لقيته بالسرعة دي وبجد فرحت بيه ولاحظت ان
مع ان الكتب دي معروضة من فترة الا ان محدش قرب منها مع ان في كتب قيمة جدا وأسعارها رمزية !



اتفرجت ع الفيلم الأجنبي الجميل Tooth Fairy هو فيلم كوميدي بس فيه معاني عميقة أوي والفيلم الأسبوع ده أخد المركز السابع في الأفلام الأمريكية وايراداته أكتر من 9 مليون دولار
الفيلم جميل بجد وعجبني جدا وبيقول رسالة مهمة أوي لا لقتل الأحلام والخيال والاستهانة بالطموحات
اللي هيتفرج عالفيلم هيقضي وقت جميل بجد

لو مكنتش انسانة اكيد كنت هبقى جنية طيبة بفستانها الوردي المنفوش وجناحاتها الرقيقة والعصاية السحرية والأضواء حواليها

بتحقق الأحلام الطيبة وبتسعد الأطفال وطول الوقت بترقص وبتغني مع الورد والفراشات والعصافير

عجبني 3 كليبات لهيفا مع اني مش بعتبرها مطربة لكن بتأدي كويس وبتعرف تختار الكلمات كويس
عجبني اغنياتها بابا فين ولما الشمس تروح والاغنية اللي عجباني بجد (انت تاني) كلمات والحان وكليب
بحب النوع ده من القوة الداخلية مش اللي بيقعدوا يعيطوا على قصص الحب الفاشلة
الكليب جه دلوقتي على روتانا كليب وانا بتكلم عنه :)
اما اسوأ اغنية فهي الموعد الضائع من ناحية الفكرة واللحن والكلمات كمان مش حلوة أوي
وده مش تقليل من راشد الماجد أو يارا بالعكس لأن الأتنين أصواتهم مفيش عليها خلاف لكن بجد الأغنية مملة
والكليب جميل بس برضه ممل

بيعجبني الكتب أو المدونات اللي أسلوب كتابتها راقي وبتسمو بالروح والمشاعر الإنسانية بس لفت نظري حاجة غريبة أوي ان كتير من كتب المدونين أو الكتب الشبابية متأثرين بكتاب غربيين زي ايزابيل الليندي وباولو كويلو ولاغيين شخصيتهم شوية ولغاية دلوقتي مش عارفة ده ميزة ولا عيب

وعلى النقيض في كتب مصرية أوي بس ممكن أوي تتفاجأ لما تقرأها ببعض التعبيرات والمفردات الغير راقية تماما بتوصل انها بتكون الفاظ شتيمة أو الفاظ مفيش فيها حياء والكلام ده شوفته في كتب لكتاب بحب اقرأ لهم زي بلال فضل وعمر طاهر مع انهم مش مضطرين انهم يكتبوا ب أسلوب زي ده وبرضه خالد الخميسي استخدم التعبيرات دي في كتابه تاكسي حواديت المشاوير لأن دي فعلا المفردات الحقيقة لبعض سواقين التاكسي

بس مش معنى كده اني اشوف التعبيرات والأسلوب ده في الكتابة لأن الأدب لازم يكون راقي اومال هيبقى غذاء الروح ازاي ؟!

وفي النهاية أسيبكم مع رباعية من رباعيات جاهين كنت بسمعها زمان في الراديو قبل ما اروح المدرسة

غــــــمــض عـــيـنـيـك وارقـــص بـــــخــــفــه ودلــــع

الـــــــدنــــيــا هى الــــــشــابــه وانــــــت الــــــــجــدع

تـــــــشــوف رشــــــــــاقــه خـــــــطــوتــك تـــعــبــدك

لـــــكـن انـــــت لـــو بــصــيــت لـــرجـــلـــيــك. .تــقـع

عجبى !!

please be happy

back to college

عايزين تموتوهم تعالوا واحبطوهم

في اخر كورس h.r اخدته لقيت المستر قال كلام غريب اوي : "عارفين الجماعة اللي بيشحتوا مش بتلاقوهم تخان مع انهم ممكن ميكونوش بياكلوا او عندهم سوء تغذية بس في شكرة في البطن اللي هي الشكرة بتاعت العواطف وتقدير الذات (شكرة يعني مسار طاقة) فالشحاتين دول بيهانوا كتير أوي فالجسم بيضطر يبني كتل من الشحوم على مركز الطاقة ده علشان يعوضهم اي احساس بالإهانه "

الكلام ده فضل يودي ويجيب في دماغي لغاية لما اخر يوم في الكورس سألت فيه المستر

انا : يعني يا مستر اللي بيشحتوا دول مش ممكن يكون الأكل بتاعهم سعراته الحرارية عاليه وعلشان كده بيتخنوا يعني مثلا عندك الأمريكين أكبر نسبة سمنة في العالم علشان هما أكتر ناس بياكلوا الوجبات السريعة زي الهامبورجر وغيره ومعظم مطاعم الوجبات السريعة والحلويات زي الدونات وباسكن روبنز وغيرها امريكية فيبقى دول اشخاص مهانين ازاي

وجاوب وياريته ما جاوب لأني مضايقة من اجابته لغاية النهاردة

في 3 انواع من الاضهاد - انا مش فاكرة الا نوعين بس من الاضطهاد ولذالك مش هقولهم - والدراسات الأمريكية أثبتت ان معظم الأمريكين اتعرضوا لل3 انواع من الاضطهاد دي

انا : بس ده برضه مش معناه ان لو حد تخين يبقى اتعرض للإهانة كتير

المستر : اومال بياكلوا ليه؟

انا : جه في بالي ان ناس كتير بتاكل لما تكون متوترة او مضايقة يعني معنى كده ان اي حد تخين مريض نفسي !

مش اسلوب حياته غلط او مثلا بيعشق الشوكولاته وبيلاقي نفسه من غير ما يحس بقى over weight

معنى كده كمان اننا بنحكم ع الشخص البدين انه مكلكع ومش سوي نفسيا وبنحكم عليه بالموت لأن أي شخص بدين وخصوصا لو امرأه بيبقوا حساسين جدا ولو عرفوا معلومة زي دي هيبقوا عايزين يبقوا لواحدهم ومش عايزين حد يبصلهم بصة انهم مش سويين نفسيا

طبعا المستر قاللي انه مش مهم شكل الشخص بدين او رفيع المهم الطريقة اللي بيعيش بيها حياته صحية ولا لأ وكلام ايجابي كتير..... الخ

لكن انا مفضلش في بالي من الكلام كله الا كلمة اومال بياكلوا ليه ؟

يوم من الأيام

نفس الموضوع أرق كل يوم ومش عارفة أنام ، بالطريقة دي هتمنى ان كل يوم يبقى عندي امتحانات
لأني بنام بعمق أيام الامتحانات حتى لو شربت كل القهوة والنيسكافية والشاي اللي في الدنيا برضه بنام بيبقى نوع من الهروب ، بقيت زي ماجي في فيلم CITY OF ANGELS يوم لما بتنام للصبح بتفرح وبتحس ان في حاجة مش طبيعية حصلت


بيسعدني جدا لما أبقى موجودة في جروب وأقول ان عندي مدونة والموجودين في الجروب ياخدوا لينك المدونة ويقرأوها بس في نفس الوقت بقلق لأن معظم كتاباتي حكي وبوح وأعتقد متهمش ناس كتير وبقلق كمان من انهم يضيعوا الوقت في مدونتي ويطلعوا منها ويقولوا " منك لله ضيعتي وقتنا عالفاضي " الوقت أغلى بكتير من اننا نضيعه

نفسي جدا أعمل حفلة غنائية – أغني فيها – انا بعشق الغنا والموسيقى - ويكون في الحفلة دي كل اللي بحبهم والحضور بالملابس الرسمية
والجنتلمن بالبدل والبنوتات باللبس اللي بربرق وطبعا انا كمان هلبس بربرق والحفلة دي تكون تبع الكلية _ وانا هحاول انها تبقى حفلة التخرج- أو تكون في ساقية الصاوي – مع اني مروحتهاش أبدا – بس مش عارفة حباها ليه ومش عارفة لغاية امتى هفضل أأجل الحلم ده ويا ترى هيتحقق ولا لأ انا افتقدت جو حفلات المدرسة
الكلية بجد مملة جدا ومفيهاش أي نشاط أو بمعنى أصح انا كمان مش متحمسة اني اشارك تبع الكلية حتى لو كان في انشطة – بكرة أول يوم كلية في الترم التاني - سامعة موسيقى احباط خلفية بتقول ييييييييييييييييييييه
لما بمشي قدام الكلية مش بحس بأي انتماء أو حنين ليها وخلاص بقى نفسي اتخرج علشان زهقت وفي نفس الوقت خايفة من الحياه بعد الكلية ، أكيد هيبقى فيها صعوبات بس لازم الصعوبات دي لو كنت عايزة أحقق أحلامي

كمان نفسي أروح دريم بارك والسندباد ولندن وتركيا ولبنان وأماكن كتير جدا جوه وبره مصر
وأخيرا اكتشفت ان كل ده مش مهم المهم الصحبة الكويسة والروح لأن من غير الصحبة الجميلة وروحهم الحلوة
مفيش أي حاجة من دول هيبقى ليها طعم ، في أشخاص معينين في حياتنا الحياة مش بتحلى غير بيهم ومن غيرهم الحياة ملهاش لازمة



عايزة احط اختبار نمط الشخصيات (بصري ، حسي ، سمعي ، رقمي ) عالمدونة بس مش عايزة احطها في بوست وتضيع في وسط زحام المدونة عايزاها تكون موجودة في المدونة دائما علشان اللي يحب يعرف شخصيته ممكن يعمل الاختبار ده ويعرف من المدونة مش من البوست وبس
اكيد هلاقي حل اني انقل أسئلة الامتحان عالمدونة وتبقى موجودة على طول بس ازاي مش عارفة
ولغاية ما اعرف

دمتم بخير

كل الكلام مرة واحدة

رحت المطار مع حنين انتيمتي ورحت مكتبة الشروق في المطار جبت منها كتابين حلوين أوي كان نفسي أجيبهم كتاب اسكندرية/بيروت لنرمين نزار وكتاب سفينة نوح لخالد الخميسي بس مش ناوية اشيله من الغلاف دلوقتي خالص خليني فرحانه بشكله وهو متغلف دلوقتي

سفر حنين عمل لي مرارة في قلبي وروحي ويوميها فضلت أكل حاجات مسكرة ان المرارة دي تروح أبدا طعم المر من قلبي وروحي واحساس رهيب بإفتقاد حنين وافتكرت أغنية " مليش أمل في الدنيا دي غير اني أشوفك متهني حتى ان لقيت ان بعادي راح يسعدك ابعد عني اما أنا مهما جرى هفضل أصون عهد الهوى وان غبت يوم ولا سنة هفضل أنا هفضل أنا أنا برضه أنا "

تاني يوم صحيت على صوت حنين بتتصل بيا تطمن عليا وتبلغني انها وصلت بالسلامة ، حسيت اني مش عايزة اعمل حاجة في الدنيا غير اني أنام ونسيت أقول ان وانا في المطار اتصلت بيا زميلتي في الكلية نفس البنوتة اللي وانا في سنة اولى عملتلي مشاكل كتير معنوية بس لقيتها بتتصل بيا وصوتها مخنوق بالعياط حسيت اني متعاطفة معاها ونفسي أخفف عنها وفهمت هي مخنوقة من ايه من الكول تون بتاعتها

رجعنا على دمياط مع خالتو وأنا فيا اللي مكفيني من سفر حنين لسفري أنا للطاقة السلبية اللي كانت حواليا

كل الناس بتشتكي ، مفيش حد مرتاح أبدا او بيقول بكرة احلى !

روحنا دمياط وفتحت الايميل وكلمت زميلتي وحكتلي بالتفصيل الممل عن الي حصل معاها وعن مشكلتها ونسيت خالص انها جرحتني في يوم من الأيام وانا اتعاملت معاها كويس جدا كنت حاسة أوي بيها ولأنها في الأول والأخر زميلتي وبنت ومسلمة ومهما حصل فهي كان ليها مواقف جدعنه معايا ، بعدها تعبت أوي ، كانت بتحكيلي وانا بدمع من كلامها ولأني مريت بتجربة شبيهه من تجربتها فنصحتها والحمد لله تقبلت النصح وارتاحت وبقت في مود كويس وانا كالعادة أخدت طاقتها السلبيه وفضلت اسأل نفسي هو انا ليه خففت عنها

بس لقيت الحديث ده ومندمتش على الزائر الكئيب صاحب لقب " اوعى تضحك " اللي زارني

كان عندي كورس H.R هيبدأ النهاردة ومكنتش متحمسة خالص اني اروح وكنت وفكرت كتير اروح ولا لأ وفعلا رحت بعد ما الكورس بدأ بساعة ونص والحمد لله اني رحت معايا بنوتات زي العسل وولاد دماغ وطبعا شرح مستر اسلام عبد اللطيف لا يعلى عليه وبيجاوب عن كل اسئلتنا وفي حاجات كتير كنت بفكر فيها ولقيتها موجودة عندنا في الكورس وكمان اتناقشنا فيها

نفسي أوي أجيب التدريبات اللي عملناها في المدونة هنا يمكن اكتبها عالمدونة ان شاء الله

ضحكنا كتير وفي بنوتة زي العسل معانا اسمها سارة كل شوية تقول على رأي المثل وبتعلق تعليقات بتطلع الضحكة من جوه قلوبنا بجد بنوتة لذيذه اوي وفي بنوتة كمان معانا هادية جدا بس أول لما اتكلمنا سوى دردشنا كتير ولقينا المواضيع بتتفتح لواحدها وأول مرة أحس بجو الألفة كده في الجروب من أول يوم في الكورس ، في روح جميلة أوي بيننا كلنا وانا متأكده ان من هنا لغاية ما الكورس يخلص الأيام هتفوت بسرعة أوي

ونطلع من البوست كله بإيه عزيزي القارئ : لو انت مكتئب ونمت وقفلت على نفسك بالمفتاح هتفضل مكتئب لكن غير وهتلاقي حياتك بتتجدد وتتغير للأحسن المهم متستلمش

لونها لون فرحة والنهاردة مش جارحة

ياااااااااه النهاردة كان يوم جميل جميل جميييييييييل 10/2/2010

سافرنا للقاهرة أخيرا

ركبت المتروووووووو ياهووووووووو ايه الاحتراع اللي كله تكنولوبيا ده حبيته حبيته حبيييييييته لأ بصراحه 100 فل وطبعا ممكن أظهر ان عندي تاتش هطل لأني فرحانه بالمترو بس يا جماعه راعوا اني قرويه بس مش ساذجه :)

وأخيرا أجمل حاجه في اليوم بعد سنتين انتظار قابلت توأم روحي كيكي عووووو

وعو عو عو عو عو عو :) بجد يا كيكي كان يوم خياااااااااال ميرسي عالهدية يا حبي ومش هقول الهدية كانت ايه (وش بيطلع لسانه )

وكمااااااااان رحت معرض الكتاب لأول مرة في التاريخ مع مامتي وخالتو

وفي الحقيقة المعرض عايزله يووووووم لوحده انا ملحقتش اروح كل المعرض ، الوقت فات عليا وانا في مكان في المعرض اسمه سور الأزبكية واتجننت لما لقيت كتب لبرنارد شو وتي اس اليوت ب 3 جنيه واسعار لا تذكر وجبتهم فورا

ملحقتش أجيب كتب المدونين وكتاب سفينة نوح لخالد الخميسي

بس ان شاء الله هجيبهم من مكتبة الشروق يوم الجمعة الجايه

كنت حاسه ان ف حاجه هتحصل تاخد شوية من سعادتي وقد كان نسيت الغدى بتاعي قبل ما نروح لما روحت بشوف الشنط ملقتوش معايا عااااااااا

بس برضه فرحاااااااااااانه الحمد لله

معلش مش عارفة احكي بالتفصيل علشان انا عند خالتو والكيبورد بتاعتها بشعه

شكر خاص لمامتي حبيتي لأنها كانت تعبانة شوية ومع ذلك ملغتش السفر

وشكر خاص لكيكي وهي عارفه ليه

وشكر لخالتوا بالمره :)

اليوم بجد كان رائع بيكم

ملحوظة التعليقات اللي في البوست اللي فات ان شاء الله هرد عليها

بوست ملوش اسم

بحاول أنقذ نفسي من بحر الاكتئاب واليأس اللي ممكن أغرق فيه ومحدش هيعرف يطلعني منه علشان كده بحاول ان المكتئبين ميزيدوش واحده وخصوصا ان الامتحانات خلت بصيص الأمل عندي يختفي في ظروف غامضة ومش معنى كده اني بكره دراستي بالعكس اللغة الانجليزية وآدابها دراستها رائعة بس معظم امتحاناتها فاجعه :(

أنا بحب المحاضرات وكلامي مع زميلاتي والاستفادة برأي الدكاترة ، بس مش بحب البيروقراطية وروح العداء اللي بين بعض الدكاترة المعقدين وبيننا فاكرين اننا داخلين معاهم حرب مع انها حرب غير متكافئة اطلااااقا

يارب كل الدكاترة المظلمين من جواهم يا تهديهم يا تهدهم
وربنا يكرم الدكاترة المخلصين واللي عايزين يعلمونا بجد لأنهم فعلا يستاهلوا كل التقدير والاحترام ويستاهلوا ندعي لهم ونفتكرهم بالخير دائما حتى بعدما نتخرج ان شاء الله

عايزة اروح معرض الكتاب بجد نفسي اروووووووح ولا مرة رحته مع اني دائما بروح معرض الكتاب اللي بيبقى في رأس البر عندنا في الصيف
وبمناسبة الكتب فدلوقتي بقرأ في كتابين عاجبينني افتوكالايزو للكاتب أسامة غريب وكتاب ملوش اسم للمفكر – هو بيحب اللقب ده وقاله عليه في كتابه- والمذيع والكاتب أحمد العسيلي ده غير طبعا كتب الرائع عبد الوهاب مطاوع الله يرحمه

مش عارفة ليه كل حاجه في الحياه بقت عادية وروتينية ساعات بحس اني old fashion
مفيش حد من البنوتات الحلوين اللي أعرفهم بيقرأوا ، احيانا زميلاتي في الكلية ساعات لما يشوفوا كتب معايا يتريقوا شوية على اسمائهم وبعدين ياخدوا من الكتب اللي معايا ويقرأوا منها :)
وأنا مقتنعة ان القراءة غذاء الروح _ والموسيقى كمان بس مش موضوعنا -

وسؤال حلقتنا النهاردة أقصد سؤال البوست ومحدش يربط بينه وبين الكلام اللي فوق : يعني ايه بنت مسترجله أصل انا بشوف ولاد متبنته كتير في الشارع اليومين دول يعني بياكلوا لبانه وطريقة مشيهم وكلامهم زي البنات وحتى ساعات بيرقصوا في الأفراح أحسن من البنات ، لكن مش فاهمه يعني ايه بنت مسترجلة طب ايه اللي يخلي حد يحكم على بنت انها مسترجلة؟

ع الهامش : انسى الآمك وأعلى على جرحك
تحلى ف عينيك الدنيا وتصالحك
طول ما نهار الخير بإمكانه
يطوى سواد الليل واحزانه

قطر الحياة

قطر الحياة عمره ما هيفوتك

كلمات بحبها من تتر البداية لمسلسل الدالي للشاعر ابراهيم عبد الفتاح

ع الهامش برضه : شيلت الموديريشن