لكن سمائك ممطرة وطريقك مسدود مسدود يا بنتي

بحب الصورة دي يا سلام لو فعلا امشي وسط السحاب

مش عارفة ليه بعد الأجازات بيكون في حالة ارهاق عامة النهاردة معظمنا كان شكلنا غريب في الكلية هي الأجازة بتريحنا وبتدينا دفعة للحياه ولا بتخلينا نرتاح وناخد ع الأجازة ؟

المهم حصلت حاجات كتير النهاردة اخترت لكم منها

خير اللهم اجعله خير خلصت الكلية وقولت أروح الشهر العقاري اسأل ممكن اسجل كتابي ومواضيعه ازاي وايه الخطوات اللي هعملها وكده من باب العلم بالشيء مش أكتر

المهم اني رايحة وجايه في طريق المحكمة اللي فيها الشهر العقاري كل يوم ومش عارفه مكانه ضللت الطريق في الأول وبعدين دخلت المحكمة ولقيت ما شاء الله كل المحاميين لابسين فورمال (رسمي فهمي نظمي ) ما شاء الله شكلهم يفرح بدل وحاجات كده بس هو محدش قال لهم ان الجرافت السودا معناها حداد؟ !!!!!! ما علينا

كان في انتخابات تقريبا لأن كان في زحمة غير طبيعية من المحاميين وواحد عمال يتكلم عن الغد المشرق البسام وقاعدين يسمعوه

المحكمة متواضعة جدا المهم دخلت اوضة كده مش مكتوب عليها اي حاجه علشان اسأل فين الشهر العقاري لقيت الموظفة نايمة
فسألت موظفين كانوا قاعدين جنب بعض هو فين الشهر العقاري قالولي هو ده قولتلهم اصل مفيش اي حاجة مكتوبة تقول ان هنا الشهر العقاري ( انا مسمياه شهر العقارب)
وسألتهم عن اني عايزة اسجل كتاب وشوفوا الحوار اللي حصل بس هوصف الأوضة الأول اللي كان قاعد فيها الموظفين

أوضة كبيرة فيها شباك واحد بيطل على مبنى تاني والأوضة مفيش فيها ابسط قواعد النظافة كلها تراب وشكل البلاط مش باين اساسا والدهانات بتاعت المكان باهتة بطريقة غريبة , انا وقفت شوية بقول الله يكون في عون الناس اللي بيشتغلوا هنا بجد حاجة صعبه يعني حاجه متشجعش عالشغل أصلا

أنا : السلام عليكم لو سمحت عايزة اعرف ممكن اعمل ايه علشان أسجل كتاب

الموظف : كتاب ؟

أنا : أيوة كتاب او مواضيع لكتاب

الموظف : كتاب ازاي يعني انتي كاتبة كتاب

أنا : أيوة

الموظف : كل الي بيحصل هنا هبل وعبط كل اللي هقدر أعمله اني اثبتلك التاريخ وخلاص عليكي وع القاهرة

أنا : القاهرة !!!!!!!!!!!!!!!!!!!!!!!!!!!!!!! اومال الشهر العقاري هنا فايدته ايه

الموظف : الشهر العقاري هنا مبيعملش حاجه للكتب كل اللي ممكن اعمله اني اثبت التاريخ وخلاص

أنا : التاريخ !

الموظف : بصي انا هقولك في مكان للكتب في القاهرة اسمه دار المصنفات الفنية في العجوزة عارفاها ؟

أنا : ....................

الموظف : طب بلاش عارفة وزارة الثقافة

أنا : ........................

الموظف : يبقى مش عارفاها هي المصنفات دي اللي هتفيدك هي في العجوزة والعجوزة في الجيزة على كورنيش النيل طبعا

أنا : وليه الشهر العقاري هنا مش بيسجل حاجه انا بسمع انهم بيسجلوا الخواطر او الأشعار او أي حاجه مكتوبة في القاهرة عادي

الموظف : اول مرة اسمع الموضوع ده

أنا : يعني الحل اني اروح القاهره :(

الموظف التاني : بصي ممكن تروحي رأس البر الشهر العقاري هناك هيسجلوا لك عنوان كل حاجه كاتباها في الكتاب

انا : وخلاص هنفجر عنوان طب والعنوان هيفيد بإيه ما ممكن الفكرة اصلا تتسرق انا عايزة أسجل الأفكار علشان حقوق الملكية الفكرية

الموظف : وهو في حد بيسرق الأفكار

أنا : في سري ياااااااااااااااااااااارب صبرني أيوة في ناس بتسرق الأفكار وبتنسبها لنفسها

الموظف : خلاص يبقى تروحي القاهرة

أنا : متشكرة جدا

وخرجت من المحكمة وانا مش شايفة قدامي وجوايا دموع مخنوقة يعني علشان أسجل الكتاب بس لازم اروح القاهرة اومال دار النشر بقى وباقي الخطوات هعمل فيها ايه

روحت الكتكوتة وفتحت الام بي ثري لقيت انغام بتقول دلوقتي أحسن - اني اعرف ان الطريق مكلكع دلوقتي احسن - ولسه هتنزل دموعي جت الأغنية اللي بعدها انغام برضه مهزومة ضعيفة مليش طموح قلت نيفر نيفر نيفر نيفر ناجحة وقوية وطموحة خير ان شاء الله

وفي الوقت اللي بحس ان الحياه فيه جايه اوي على احلامي ونفس السؤال بيجي في بالي هو ليه كل ما أقرب من تحقيق أحلامي الاقيها بتبعد عني يعني خلاص همسكها الاقيها طلعت تجري وتلاشت عن الأنظار
بفتكر حولم الله يرحمه لكن سمائك ممطرة وطريقك مسدود مسدود بس انا مش هستسلم ويا انا يا السفارة في قلب العمارة :) قاهرة قاهرة وانا هخاف يعني ولا ايه

وزي ما الموسيقار عمار الشريعي بيقول : في دنيتنا المجروحة ملناش الا الأحلام وانا اخدت الجملة دي وعدلتها وخليتها

في دنيتنا المجروحة ملناش الا الأحلام يمكن في يوم نقدر نحققها

ومفيش حياة من غير أمل وأميرة وإيمان :)

أقول ولا بلاش :)

بعد الانتخة والأجازة لابد ولا مفر ان يكون عندنا امتحانات شفوي طول الأسبوع الجاي

بالنسبة للبوست اللي فات قبل ما أقول بطلب الأمان :) طيب اقول ولا لأ

أقول ولا لأ ؟

يلا هقول وأمري لله حبايبي الحلوين اللي بيدرس English Art لازم ولا بد ولا مفر انه مياخدش الكلام بمعنى واحد يعني لازم يحلل الكلام ويفصصه ويفهمه ويعرف ما وراء الكلام ويستنتج كذا معنى ويطلع للقصة القصيرة او المقال أكثر من معنى وبكدا المقال او القصة بتكون ثرية

ودي اسمها الكتابة الرمزية أخت رمزي :) وحيث ان عندي امتحانات فقلت اجرب الأسلوب الرمزي ده البوست اللي فات وانا بكتب الموضوع بيبقى عندي كذا معنى بفكر فيه غير المعنى الواضح والصريح اللي كل اللي قرأوا البوست اللي فات فهموه

ولو فكرتوا في البوست اللي فات ومأخدتهوش زي ما هو ظاهر بالضبط هتلاقوا معاني جديدة :)

تاني حاجة على اعتبار اني قولت اول حاجة انا مش عارفة ليه مش برتاح للقاهرة زحمة ودوشة ولما بروح بالكتكوتة بحس ان شوية وهيجيلي انهيار عصبي مع اني مش بدخل وسط البلد والأماكن الزحمة يمكن اسكندرية زحمة بس فيها حبيبي البحر فمش بحس بالغربة لكن القاهره بحس انها غريبه هي بعد الساعه 1 بتكون ساحرة وبتبدأ الزحمة تقل لكن لسه خوفي من القاهرة زي ما هو وخصوصا لما بشوف عربيات الاسعاف اللي مش عارفه توصل للمستشفى من كتر الزحمة والحقيقة انا سميتها عربية الاتلاف لأن المريض بيتلف لغاية لما يروح المستشفى ويكمل تلف هناك :(

تالت حاجة بفرح أوي وبحس ببهجت :) لما اسمع كلام المدونين عن مدونتي

كلام خالتو ستيتة حبيبتي اللي بجد بجد نفسي اقابلها جدا لما قالتلي بحب اقرأ كلامك وحاجات تانيه كتير :)

كلام سومة لما قالتلي على فكرة انتي بتكتبي حلو أوي يا خبر ابيض انا حالتي وقتها اني كنت تعبانه جدا ونايمه بعد ما سمعت الكلمتين دول حسيت ان شوية وهطير في السما لأن نبرة صوتها مكنش فيها مجامله لكن كلام بجد

خالتو المصرية حبيبتي هي بقى لها كتير مش بتدخل المدونات بس برضه بحب رأيها جدا في أي حاجه بكتبها

وأخيرا أميرة كل ما بنتكلم بتفاجئني انها فاكرة بوست من المدونة وبتقتبس حاجات منها وبتقولهالي :) هيييييييه مع ان برضه قبل كده قالتلي انها مش بتحب المدونات اللي بيكون فيها يوميات :) ده على اساس اني بكتب شهريات مش يوميات

بجد بجد شعور جميل لما تلاقي حد مهتم بكلامك يمكن وأكيد ميكونش أحلى كلام ولا انا كاتبة بمعنى الكلمة انا بس بحب الكتابه ومن غير التشجيع ده اعتقد اني مكنتش هقدر استمر وعلشان كده بجد شكرا

نهاية الدنيا + تحديث

تحديث : يا جماعه انا مقولتش اطلاقا ان صحبتي مريضة نفسيه ومستحيل اسمح لحد انه يقول عليها كده

هي كل الموضوع انها في حالة حزن ومش قادرة تكمل حياتها وتفرح وده تعريف الاكتئاب

دموع لساعات متواصله وصداع ويأس واحباط وخوف وملل ولا مبالاه ومش عايزة تشوف حد ولا تكلم حد ولا تذاكر ولا تخرج ولا حتى بقت بتفرح من أي حاجه

وبصفتي صحبتها الانتيخ حاولت اطلعها من المود 100 مرة ومعرفتش طب اعمل ايه ؟ اعمل ايه قرأت شوية عن الاكتئاب وأدوية الإكتئاب وعرفت الأتي :-





التأثيرات الجانبيه لأدوية الإكتئاب أفظع من الإكتئاب نفسه ده غير ان الدوا تأثيره مش بيظهر الا بعد اسبوع او اكتر من استخدامه :(



الأعراض الجانبية للإكتئاب

ميل للنوم

تفكير بالانتحار

قلة تركيز

اضطرابات القلب واضطرابات هضمية وادمان للدواء ....الخ

يبقى كده اللي يجيله اكتئاب من الدنيا وبلاويها يقعد ساكت ومكتئب وخلاص ويفكر في طريقه يعدي بيها الوقت ويهدر ايامه يوم ورى التاني

انا اسفة يا صاحبتي مش عارفة اعمل ايه اول مرة احس ان انسانة غالية عليا ومش عارفة اساعدها

وسلامتها ام حسن م العين وم الحسد وسلامتك يا حسن من رمش اللي حسد

وسكر حلوة الدنيا وتجيب السكر

ذكريات الطفولة

امبارح سمعت حدوتة أبلة فضيلة الصبح والغنوة اللي بعديها وكمان شوفت فيلم ice age بجد فيلم جميل أوي

حدوتة أبلة فضيلة كانت جزء اساسي من صباحاتي الطفولية وكنت فاكرة ابلة فضيلة هي الفنانة كريمة مختار وفضلت الفكرة دي عندي لغاية لما في يوم سألت ماما وقالتلي ان ابلة فضيلة مش كريمة مختار :)

بمجرد ما سمعت الحدوتة افتكرت البنوتة الصغنونة اللي حبيتها اوي واللي محتفظة بصورتها وهي في اولى ابتدائي في المحفظة بتاعتي

واللي لما زميلاتي في الكلية او صحباتي بيسألوني معاكي صورة ليكي بقولهم أيوة دي أنا وبوريهم الصورة دي :)

حاسة ان عمري وقف عند الفترة دي لأنها كانت من أجمل فترات حياتي

مدرسة اللغات وكل المدرسين اصحاب بابا وكلهم كانوا بيدلعوني وزميلاتي كانوا مفروسين مني :) اشمعنى انتي اللي بيدلعوكي ومهتمين بيكي كده

شيتوس والشوكولاته "شكوكو" انا كنت مسمياها كده هي شوكولاته بتبقى سايحه وبتتاكل بمعلقة صغنونة وال لوليتا في الفسحة

طابور الصبح اللي مكناش بنشوف فيه اي حاجه من طلاب ثانوي الطوال واللي كانوا بيقفوا في الطابور قدامنا

مدرسة الاعدادي اللي جنب مدرستنا ويوم الزلزال لما مدير المدرسة قال لنا ان لو حسينا بهزة الزلزال ننزل تحت الديسك وفضلت اتدرب طول اليوم ازاي انزل تحت الديسك واتخيل الطوب واقع على الديسك وواقع جنبنا ومع ذلك لما حصلت هزة ومع اننا كنا اطفال الا اننا التزمنا بأمكننا ومخفناش عكس مدرسة الاعدادي بنات اللي كانت جنبنا كلهم صرخوا وخرجوا من المدرسة وفزعونا معاهم

هما اللي كانوا اطفال مش احنا :)

حفلات المدرسة والفستان الأبيض المنفوش أبو وردة حمرا بتاعي

والحواديت اللي مستر محمد مدرس الموسيقى كان بيحكيها قبل ما نطلع على المسرح " مرة واحد صياد ضاع منه خاتم كان بيحبه

وبعدين اصطاد سمكة كبيييييييرة فتحها ملقاش الخاتم :) وبعد سنة , سنة كامله اصطاد سمكة كبيرة جدا فتح السمكة لقى جواها سمكة متوسطة وجوه السمكه المتوسطة سمكة صغيرة وجوه السمكه الصغيرة سمكة اصغر منها وبرضه الخاتم مش موجود :) "

تدريباتنا على الأغاني ورقصاتها وانا مكنتش عارفه ايدي اليمين والشمال وكنت بلخبط بينهم فقالوا لنا الايد اليمين اللي بناكل بيها وبنكتب بيها وكان معانا بنوتات بيكتبوا بإيدهم الشمال وكنا متلخبطين اخر لخبطة في البروفات

أغنية القطن قطننا طارح فوق أرضنا ولبسنا الفلاحي والمنديل ابو أويه هو اسمه كده كان شكلنا زي العسل والميك اب بتاعنا كان صعيدي ليه مش عارفه

يوم الأجازة وصلاة الجمعه وبرامج الشيخ الشعراوي

ألبوم عايدة الأيوبي و بعض أغانيها اللي كنت ناسياها واللي لما سمعتها تاني بعد طول غياب حسيت بنفس المشاعر اللي كنت بحسها وانا طفله لما بسمعها وكنت متخيله ان مفيش ناس كتير عارفين عايدة الأيوبي بس في الفترة الأخيرة لقيت فاطيما حبيبتي وشيما وأميرة بيتكلموا عنها وفي أخر كورس أخدته كنت انا وأية زميلتي بنغني أغاني عايدة الأيوبي وعلى فكرة الاغنية اللي في البلوج اهداء ليهم لأني بحبها أوي وشيما فكرتني بيها

الشوكولا و المشروب اليومي اللي كنت بتضايق منه عسل ابيض بالليمون علشان ميجيليش برد ومع ذلك كان بيجيلي برد مفيش فايده :)

انا بحب أوي الفترة دي من حياتي ولما بنقعد في الكلية انا وزميلاتي اللي كانوا في مدرسة اللغات بيبقى أحلى وقت وبنفتكر مدرستنا كانت جميلة أوي والحياه كانت جميلة أوي وان شاء الله اللي جاي جميل برضه

طول ما جوايا الذكريات الجميلة دي هفضل روح طفلة مش عايزة تكبر

يارب الأجيال الجايه يستمتعوا بطفولتهم ويعيشوها صح لأني حاسه ان الاطفال دلوقتي كبروا قبل الأوان

كده كتير وانا زهقت + تحديث لdr.norahaty

تحديث : بجد بجد بعتذر يا د. نورا انا قرأت التعليقين بتوعك وعجبوني بجد ورفعوا من روحي المعنوية بس لأني كنت بقرأهم بسرعه من الموبايل وصاحيه من النوم ومسافرة اتلخبطت واخترت رفض وحاولت ارجع الكومنتات تاني معرفتش بجد بجد بعتذر

*********************************************

أول تدوينة ( المقدمة) ده أول بوست كتبته في المدونة ياريت تقرأوه

انا بجد مكنتش عايزة اتكلم في الموضوع ده لكن خلاص بقى over أوي أوي أوي

انا لما عملت مدونة كان هدفي اني اتعلم واعمل صداقات وأخوات وكنت متفائلة جدا وفعلا عرفت بنوتات وناس من أرقى وأحلى الناس من التدوين أولهم كيكي أختي اللي لسه متقابلناش لغاية النهاردة ومع ذلك وقفت معايا في كل موقف ضايقني وكل ازمة اتعرضت ليها وبعد كده عرفت ناس تانيه كتير وبدأت الوجوه تظهر والصورة تبان حبه حبه العالم اللي كنت فرحانه بيه بدأ يظهر ناس غريبه فيه بالظبط زي ما بابا قاللي لأنه كان معترض اني اعمل مدونة وكان رأيه ورأي ناس كتير ان النت عموما عالم مزيف وكله بيكدب على كله بس انا مسمعتش الكلام

المهم قضيت وقت جميل جدا وعرفت ناس بجد رائعين ومدونتي كانت مكاني المفضل اللي بفرح فيه وبهرب فيه من أي حاجه مضايقاني وعمري ما كنت اتخيل ابدا ان يجي اليوم ومدونتي نفسها تضايقني

كتير سألوني انتي عاملة موديرشن ليه

الاجابة اني عاملة موديريشن لأن في تعليقات غريبة بتجيلي وبضطر احذفها وقولت لصاحبها بكل ذوق تعليقاتك غير مرغوب فيها ومع ذلك عنده اصرار انه يتابع المدونة وبيكتب تعليقات مستفزة وانا خلاص زهقت مش كل ما هدخل مدونتي هضايق
صديقة ليا قالتلي عتاب الندل اجتنابه بس خلاص طفح الكيل زي ما بيقولوا

انا حبيت التدوين وحبيت مدونين كتير بقوا فعلا جزء من حياتي ومش هقول اسماء لأن الأسماء كتير وخصوصا بعد لقاء المدونين في المنصورة لأني لما شفت اصحاب المدونات اللي اعرفها واللي حتى مش عارفاها فعلا حسيت اننا أسرة واحدة وحسيت بألفه وود واحترام بيننا كلنا وصعب عليا اني أقول انه
لو استمرت المضايقات وقلة الذوق دي انا هحذف المدونة ووالله العظيم انا بتكلم بجد لأن بصراحة كده كتير وانا عمري ما هنزل للمستوى ده وأرد ردود مش لطيفة على اي حد بيستفزني

خاين والخيانة في دمه+ تحديث

تحديث : الحمد لله وصلنا بالسلامة عند خالتو حبيبتي مع ان ربنا استجاب دعائي والجو بيمطر طول الطريق :) وكنت مهييسة أخر تهييس :) من كتر المطر وان شاء الله بكرة هنسافر قاهرة ام عز اتمنى ان الجو يكون حلو
انا بكتب من اتصالات يو اس بي مودم :) ربنا يخلي لنا التكنولوبيا
--------------------------

تفتكروا اللي في الصورة ده حب بجد؟ ولا عرف أصلا معنى الحب؟ ولا يعرف ان في حاجة موجودة في الحياة اسمها حب؟ معتقدش

لما البكاء والدموع يبقى عادي جدا بإسم الحب والحبيب ولا همه دموع حبيبته وهو السبب في دموعها وحزنها واكتئابها

لما تزرع له في كل يوم ورده ترويها بدمها ودموعها وحبها وتعطرها بأغلى وأحلى عطر عندها وفي نفس الوقت ياخد منها الوردة ويديها لوحدة تانيه

لما الحب يبقى حاجز للنجاح يبقى حب مريض - الحب بيقوي مش بيضعف-

لما الحب يبقى في الضلمة زي الخفافيش بيتخبط في الحيطان مش في النور كل الناس تفرح بيه والمحبوبة تبقى فخورة بدبلة الخطوبة او الجواز في ايدها يبقى مش حب تبقى سرقة ووهم مش هيتحقق

لما تحب أوي وتخلص أوي وتلاقي مقابل ده خيانة وغدر وخداع يبقى انتا اخترت غلط

لما تفتكري انك الوحيدة في حياته وتكوني فرحانه انك في قلبه وان قلبه ليكي لواحدك وفجأه تلاقي كل البنات حافظه كلامه !

لما يرجع لك ندمان مش عشان أي حاجة غير انه اناني وبيحب نفسه وشاف ان محدش حبه واهتم بيه جدا غيرك ومع انه مخترش طريقك ومشي في طريقه مع واحده تانيه بس برضه الخيانة في دمه

لما تكوني شايفاه قمر في السما وهو مش كده وكل الناس بيصرخوا حاسبي ده سراب خداع ميستاهلش ثانية واحدة من حبك وتتناسي كلام كل الناس وتحطي ايدك على ودانك وتقولي لأ انا متأكده انه غير كده وفجأه تلاقيه فعلا كده وأفظع من كده كمان

لما يفضل يقلل صورته في عنيكي ويقللها ويقللها ويبقى عندك فرصة تدوسي على صورته وتكسريه وتخليه يدوق طعم الألم بس متعمليش كده مش علشانه لا سمح الله لأ علشانك متعودتيش تأذي حد وعلشانك مش هتنزلي للمستوى ده

لما تكوني بتدعيله ودلوقتي مبترتاحيش غير لما بتدعي عليه

يبقى حبيتي خاين مقدرش حبك ولا هيقدر حب أي حد واتأكدي انه بيحب نفسه وبس

ملحوظة صغنونة : يمكن اتأثرت شوية بالروايات اللي بندرسها بس ساعات الحقيقة بتكون أغرب من الروايات

ملحوظة تانيه : انا مسافرة على نفس ذات الطريق اللي عملت فيه حادثة :) ويارب الدنيا متمطرش لأني مش ناقصه حوادث تانيه :)

ملحوظة كمان : بلوجر بيهيس ومش عايز يسيب مسافات

اي خدعة نكد بنكد انا كمان بعرف انكد وطالما كل اللي حواليا راكبين موجة النكد ف يلا بينا نكتئب وعلى رأي الشاعر محدش واخد منها حاجه

عيد سعيد

نفسي اعرف مين سعيد ده اللي كل عيد بيبقى عيده (عيد سعيد) وليه ميكونش عيد اي حد غير سعيد :)

أهلا أهلا بالعيد مرحب مرحب بالعيد

هيه هيه هييييييييييييييييييييييييييييييييه هيه هيه هيييييييييييييييييييييييييييه

غنوا معايا غنوا وقولوا ورايا قولوا كتر يارب ف أعيادنا واطرح فيها البركة وزيد جانا العيد اهو جانا العيد جانا العيد اهو جانا العيد

كل سنة وكل المسلمين بخير وكل زوار وقراء مدونتي بصحة وسعادة ويارب السنة الجاية نبقى متجمعين على جبل عرفات

بكرة ان شاء الله وقفة عرفات وصيام اليوم ده مستحب جدا وبعد بكرة العيد هيييييييييييييييييييه وفي اجازة من الكلية 10 أيام عشر أيام بحالهم أحمدك يارب :)

العيد ده حبيبي بجد بينقذني من أزماتي المالية بيجي في وقته بصراحه :) مستنية العيدية بجد

ومن هذا البوست الجميل بأدعو كل المدونين انهم يجيبوا بلالين أو بلونات :) الاتنين واحد ونلعب بالبلونات ونعمل زينة في البيت علشان نحس ان في فعلا عيد مش عايزة العيد يبقى أكل وخلاص عايزاه يبقى عيد بجد ويديلنا طاقة سعادة لباقي السنه

وبمناسبة الأكل محدش يبقى رومانسي ويتعلق بالخروف أو بالبقرة أو أي حاجه هتتدبح لأن في سنة من السنين كان عندنا خروف قبل العيد بأسبوعين وكنت بأكله وبلعب معاه وبنجري ورى بعض وبقرأ له الأشعار بتاعة كتاب اللغة العربية برضه وهو كان عالسطح فكنت بقوله شايف القمر يا خروف يعني كانت قصة حب ملتهبه :) امنعوا الضوحك

وعلى فكرة الخروف مكنش بيأكل غير من ايدي ومكنش بيتكلم مع حد غيري برضه مكنش بيرضى يتكلم مع بابا :)

وبابا سماه الخروف البصباص :)

المهم لما جه يوم العيد وشوفت الخروف بيدبح وأكلت منه عييت وأكلت منه مرة واحدة بس وبعد كده مأكلتش منه تاني فبلاش حد يبقى عاتفي أوي كده لأن كده مش صح والخروف أصلا مخلوق علشان يبقى أضحية دي شغلته في الحياه

عايزين نفرح بجد لأن الفرح بقى عزيز أوي في زماننا

ربنا يفرحنا جميعا

Bedazzled

Bedazzled

فيلم جميل بجد واتاخد منه فكرة فيلم طير انت

الفيلم فكرته بإختصار ان البطل اللي فوق في الصورة بيبع كيانه "روحه" للشر مقابل ان الشريرة اللي في الصورة برضه :) تحقق له 7 أمنيات المهم حققتله 6 أمنيات بس كل مره كانت بتبوظ له أمنيته هو كان نفسه ان بنوتة بيحبها تحبه المهم في الأخر متمناش أخر أمنيه

واتحررت روحه من الشر مع انه لو كان طلب أخر أمنيه كانت روحه هتفضل في الجحيم طول حياته

المهم لفت انتباهي جمله قالتها الشريرة : الحكاية مش حكاية نعيم وجحيم

النعيم والجحيم احنا اللي بنصنعهم ، النعيم والجحيم احنا الي بنصنعهم

احنا اللي بنصنعهم !

كلمتين وبس

كل اناء ينضح بما فيه ومن السهل ان تنخدع في حد بعض الوقت لكن مش ممكن حد يخدعك كل الوقت

واللي يعيش بجد ياما يشوف وعلى رأي جاهين بانو بانو على أصلكو بانو

وعجبي !!