الأحد، 14 أغسطس 2011

اخيرا عشت لليوم ده


من سنة تقريبا واحنا ساكنين هنا الأوضة بتاعتي فيها بلكونة والبلكونة بتطل على مسجد قدام البلكونة على طول

فرحت في الأول ان هيبقى جنبنا مسجد وفرحت كمان علشان كنت بصحى على صوت الأذان كل يوم الفجر

وفجأه الفرحة دي خفت تدريجيا لأني لقيت أصوات المؤذنيين أصوات مش حلوة وأحيانا اللي بيأذن مبيبقاش عربي

فالكلام اللي بيقوله بيبقى غريب عن الأذان يعني مثلا بيقول : الله أجبر الله أجبر وهي الله أكبر الله أكبر ! فطبعا الكلام كده بيتغير ومرة تانيه مؤذن تاني بيأذن برضه عربي لكن صوته عادي من النوع اللي يخليك تسمع الأذان وتسرح في باقي الأذان ومتاخدش في بالك

أما النهاردة وأخيرا في أذان صلاة العشاء كنت في أوضتي وفجأه الأذان أذن بصوت ملائكي عذب يخلب الألباب فعلا خلاني فضلت قاعدة بسمع الأذان كله لغاية أخر كلمة ومش عايزاه يخلص حاسة ان هو ده الأذان اللي بجد

الأذان اللي ربنا سبحانه وتعالى بينادي بيه علينا بيقولنا تعالوا حي على الفلاح

الأذان شدني فعلا اني اطلع للبلكونة وشوفت العصافير وهي بتطير جنب المسجد كان نفسي أشوف اللي بيأذن ده وأقوله ربنا يكرمك ويرفع قدرك ويرزقك بالجنة من زمااااااااااااااااااان مسمعتش الأذان بالحلاوة دي من أيام المسجد النبوي من زمان محستش بالروحانية دي في الأذان اللي كل يوم بنسمعه 5 مرات

علشان كده الرسول صلى الله عليه وسلم اختار بلال ابن رباح علشان يبقى مؤذن لأن صوته حلو لأن فعلا الصوت بيفرق

لما تسمع صوت حلو يحببك في كلام ربنا ولما تسمع صوت يكرهك في اليوم كله

بالمناسبة مصر طول عمرها مهد الأصوات الحلوة وعندنا أعظم وأحسن مقرئين للقرآن في العالم ليه ده مبيظهرش دلوقتي ؟ ليه ثقافتنا بقت مستوردة من بلاد تانيه وليه مبنهتمش بتراثنا وثقافتنا

بالمناسبة كمان كان زمان المؤذن أو قارئ القرآن أو المبتهل –المنشد- كانوا بيتعلموا المقامات الموسيقية

- طبعا لو قلت لحد كده دلوقتي هيقولك اعوذ بالله الموسيقى حرام يا اخي- لكن فعلا ده اللي كان بيحصل

علشان المؤذن أو قارئ القرآن يعرف امتى يطلع بصوته للسما مثلا لما يكون في أيات نعيم وامتى ينزل بصوته لسابع أرض لما يكون في أيات بتتكلم عن العذاب وده مثل من أمثلة كتير

ملحوظة : والله لسه بدري يا شهر الصيام -14 رمضان-

هناك 15 تعليقًا:

kmhmhgfd يقول...

ربنا يرزقك الهداية والصلاح ويفضل قلبك دايما معطر بالاذان

بس الغريبة انى عمرى ما ركزت فى ماعى للادان ,, لما بيحصل بيبقا عشان اقرأ الدعاء الله بعد الاذان
شكرا عشان هتخلينى اخد بالى بعد كده :)

AhMeD RaDy يقول...

الله يا ليدى

بجد بجد توبيك حلو .. انا والله العظيم كنت لسه بفكر فى الموضوع دا ولو انى مش زيك كدا تدينى عالى

بس حسيت ان الاصوات بتاعت الاذان مش مخليانى خالص اركز فى الاذان

ربنا يخليه صاحب الصوت الرائع دا

Ana keda يقول...

يا حبيبتى
ربنا يعيشك كل الايام الى نفسك تعيشيها يا ليدى يا حبيبتى
وحشتينى اوووووووووى ووحشنى اعمل كومنتات عندك
بوسة كبيرة ليكى

Noha Saleh يقول...

ياااااااااااااه اجمل حاجة انك تسمعى الأذان بصوت جميل
اصل انا كمان عندى نفس المشكلة طبعا كل المؤذنين مصريين بحكم الاقامة فى القاهرة:)
بس مفيش غير واحد هو اللى احب انى اسمع صوته منهم كلهم

ادعى بس ربنا ان المؤذن ده يفضل موجود ومايروحش مسجد تانى

شمس النهار يقول...

تعالي عندي هنا
سبع ادانات مع بعض وورا بعض ماتبقيش عارفة ترددي مين فيهم
واصوات ماانزل الله بها من سلطان

وهو جامع واحد والباقي زوايا متناهية في الصغر
ويادوب مربع مايجيش 200متر في 200 متر

The illusionist يقول...

انا عاجبنى انا الكلام ده

انا عانيت من نفس المشكله كتير

و

ولسه بعانى منها

بس عاتى جتا

هنلاقى حل


صباح القشطاتو

Tamer Moghazy يقول...

عندك حق..
لما الصوت بيكون حلو بتحبي تسمعي اكتر وتستمتعي بكل حرف..
ولما يكون الصوت بدون اتقان بيخليك تسمعي بدون ما تنصتي وتتمعني في المعاني..
كل سنة وانت الى الله اقرب.

reemaas يقول...

تعرفى انا كمان بيشدنى جدا اللى بيأذن

بس انتى اكيد اكتر لان الغربة بيتخلى مقاييسك مختلفه

مين بس قال ان الموسيقى حرام

مدونة رحلة حياه يقول...

السلام عليكم
فعلا معك حق
لكن نعمل ايه لوزراة الاوقاف طيب الله ثراها
متعك الله بعمرك وتقبل منا ومنك صالح الاعمال
دومتى بخير

mrmr يقول...

كل سنه وانتى طيبه

رمضان كريم

Lady E يقول...

zay maTigy : اللهم امين شكرا على دعوتك الطيبة

شكرا علشان هتاخدي بالك بعد كده :)

نورتيني

sweet angel يقول...

كل سنه وانتي طيبه

ربنا يرضى عنك ويزكي نفسك ويرزقك السعاده دايما

Lady E يقول...

AhMeD RaDy : سعيدة اني كتبت عن حاجة مهمة كلنا بنفكر فيها

كلنا بنحاول نرضي ربنا على اد ما بنقدر يا احمد والتدين العالي ده يارب أقدر أوصل له في يوم

ربنا يكتر من أمثاله

شكرا على ردك الرائع

Lady E يقول...

Ana keda : هييييييييييييييييييييه ام بودي حبيبتي هنا يا جدعان وعندك أحلى عصير وجاتو من بوفيه المدونة لأحلى مرمر

الله على دعوتك الطيبة اتمنالك أحسن منها

بجد بجد وحشتيني جدا وأسعدتيني كمان جدا

أموااااه واحدة ليكي وواحدة لحبيب خالتو

Lady E يقول...

Noha Saleh : القاهرة بلد ال100 مئذنة وهي بلد أحلى أصوات من زمان بس مبيظهروش في الأذان مش عارفه ليه

كويس ان في واحد صوته حلو

يارب ميروحش مسجد تاني :)

نورتيني