السبت، 20 أغسطس، 2011

وحشاني يا متعبة في الحرب او في السلم يا بعيدة وقريبة

قبل ما أرد على تعليقات البوست اللي فات واللي قبله وقبل ما أكمل الجزء التاني من اقتباسات الرواية وقبل ما أنسى

النهاردة عملت بطاقة جديدة
باللغة العربية الفصحى بطاقة هوية لفت نظري حاجات كتير وكنت مش مرتاحة وأنا داخله مركز شرطة وكنت بتحامى في بابا وشوية شوية همسك في هدومه من كتر الزحمة

المهم دخلت أعمل بطاقة بابا جاب لي الأوراق المطلوبة للبطاقة وجواز السفر والفيزا - الفيزا بتاعت البنك مش بتاعت السفر- وبالرغم من الزحمة الا انه كان فيه نظام وكان في أول لما دخلت أربع ضباط ولما لقوا المكتب زحمة خرج منهم
2و2 بس اللي فضلوا يخلصوا اجرائات البطاقات
وعجبني جدا انهم طبقوا مبدأ

Ladies first
يعني خلصوا بطاقات كل البنوتات والنساء عموما اللي كانوا موجودين الأول

وتعامل الضباط معانا كان قمة في التحضر والنبل والذوق طبعا أنا بفتكر كل اللي بسمعه عن الأقسام وضباط الشرطة في مصر ولا على ايه ما انا مجربة تعامل شرطة المرور الله لا يسامحهم ومش ناسية الرائد اللي كان بيوقف البنات بحجة انهم مش رابطين الحزام علشان يرخم عليهم ويفرد عضلاته ويستهبل شوية بس حظه ان انا والبنوتة اللي كانت واقفة معايا مدينالوش فرصة يعاكس
المهم طبعا الإجرائات مأخدتش ربع ساعة مع ان المكان زحمــــــــــــــة جدااااااااااا
والاجرائات غاية في السهولة والسرعة البصمات بتتاخد بجهاز البصمات مش زي ما بشوف في الأفلام في الفيش والتشبيه حبر وحاجات غريبة
وكمااااااااان فلوس البطاقة بتتاخد بالفيزا في ثواني بدل ما تتأخر على الخزنة ويقولولك الخزنة قفلت فوت علينا بكرة يا سيد
المهم اتصورت وطلعت بابا كان منتظرني بره المكتب لأن الرجالة بيقفوا والستات بيقعدوا طبعا مش قوارير ليهم معاملة خاصة :)

سيبكوا من كل اللي فات وعايزاكو تركزوا على الحوار اللي جاي ده اللي دار وأنا بقدم الورق للضابط
الضابط الأولاني قاعد عالمكتب وبيقول للضابط التاني : تصدق يا أخي أنا من الصباح وانا جالس أخلص شغلي عالمكتب حتى ما رحت الحمام
الضابط التاني واقف جنب المكتب : الحمد لله احنا في رمضان اذا كنا في الأيام العادية كنا ما بنفطر للحين
الكلام ده كان الساعة الثانية عشر
ضااااااااااااابط اد الدنيا ومش عارف يقوم من عالمكتب ويروح الحمام حتى علشان ميعطلش الناس !!!!!!! حد مصدق الكلام ده انا عن نفسي لو مكنتش شوفت الضابط وانه فعلا مشغول جدا وسمعت كلامه مع الضابط التاني مكنتش صدقت الحمد لله انهم مشافوش ضباط مصر !!!
حاجة من الاتنين يا إما الضابط ده ضميره صاحي جدا مبيضيعش دقيقة من وقته يا إما سستم العمل بتاعه حازم جدا في تضييع الوقت
يا إما الاتنين معا ضميره صاحي والسستم حازم

نرجع لكلامنا تاني روحت مع بابا لمكتب تاني وبابا قاللي يلا نجيب البطاقة قولت بس .. نص ساعة بقى على ما البطاقة تطلع زي اول بطاقة عملتها هنا مفيش ثواني ولقيت الضابط بينده اسمي اخدوا البصمات مرة تانيه اوتوماتيك برضه وسلمني البطاقة وأنا مذهولة
البطاقة مأخدتش 5 دقائق نقول عشرة لو حبيت أبالغ وأقول اتأخرت

ودي ايه؟ دي دولة عربية حد يقولي ايه تاني دولة عربيــــــــــــة
حضارتها
3000 سنة يعني أقل من حضارتنا حضارة ال7000 سنة واخدين بالكو

في مصر بقى :

علشان أطلع بطاقة أخدت شهرين رايحة جايه القاهرة ورحنا مجمع التحرير واللي عايز يدعي على حد يقوله الهي تخلص ورقك في مجمع التحرير يا بعيد نفس نظام فيلم الارهاب والكباب بالضبط بدون أي مبالغة !!!

ورخصة القيادة أخدتها بعد 3 أيام ده غير الامتحان اللي اخد مننا يوم كامل !!

والبطاقة العادية في مصر بتاخد اسبوعين ده غير الطوابير والزحمة والخزنة اللي بتقفل والدمغة

نفسي نبقى زي البلاد العربية عالأقل ايه اللي حصل لمصر؟ طبعا لازم افرح ان في بلد عربيه بتستخدم التكنولوجيا كده وأزعل علشان بلدي
وأزعل علشان ناسها اللي ناس كتير صعبوا الحياة عليهم وخلوا وقتهم ملوش أي ثمن

ربنا قادر يا مصر أشوفك أحسن بلد في الدنيا

هناك 8 تعليقات:

ياسمين يقول...

صحيح مصر كان بتعاني وهي دلوقتي في طور الشفاء وان شاء الله في وقت قريب هتكون مصر أفضل الدول العربية ...حتي اللي بيساعد في الدول العربية دي كانوا مصريين يعني احنا مش قليليين يعني...

sony2000 يقول...

امنيييييييييييييييييييتي والله

اشوفها احسن بلد فالدنيا
علي الاقل قبل مااموت:(

مدونة رحلة حياه يقول...

السلام عليكم
انا استمتعت بطريقة عرضك وسردك للاحداث والمواقف وكأنى عشتها بنفسى
اتمنى فعلا مصر وكل بلادنا تبقى بالشكل دا وافضل كمان
دومتى بخير

reemaas يقول...

الحكايه مش قلت ضمير خالص على فكرة الشغل اللى تتحكم فيه ضماير البشر يبقى نظام مش مظبوط
ده سيستم ورءساء بتراقب وشكاوى مواطنين بيتحقق فيها بجد فالموظف لازم يخاف ويعمل شغله صح ومقابل ده بياخد علاوات حقيقية ومرتب قيم يقدر يعيش بيه عيشه كريمة تخليه يشوف شغله بنفس وما يمدش ايده

دايرة كده لازم تتظبط علشان تلاقى ده

كلمات من نبع احساسي يقول...

ماهو دة اللي بيقهر الواحد فعلا :)

The illusionist يقول...

لييييييييييييييييييييييييه

انتى جاسوسه

او معندكيش قلب ولا دم وجيبتى وساطه عشان تتخطى كل الناس وتعملى كده

تاخدى بطاقه فى خمس دقايق ليه

انتوا مجانين

هى سايبه

لازم اهانه وقرف وحر ولزق وتف واوعى يا كابتن واتاخرى يا مدام
وانتى يا ابن ال
................
اقف عدل
ولا اللى رايح يقدم فى الجيش
اه والنبى هو الججيش عندهم كده كمان
يعنى محترمين برضو
طب ينفع اطوع عندهم فى الجيش انا
اهئ اهئ اهئ
حسبى الله ونعم الوكيل

بيعاملوكم باحترام
اهئ اهئ

الكلمه دى حلوه قوى
اشمعنى بقى
هه
هه

قلم رصاص يقول...

احنا علمنا البلاد العربيه الشقيقه في 50 سنه اول اقل.. وكنا بنعتقد واحنا في عصر مبارك اننا يلزمنا 300 سنه او اكتر عشان نلحق الدول دي تاني.. لكن انا كلي امل وتفاؤل ان مصر بعد مبارك مش هاتغيب على الوصول لما تستحق ويليق بها كأول دولة في التاريخ.. وليس كما يزعم الغرب أن الدولة كشخص معنوي( اقليم وشعب وسلطة سياسية) لم تظهر الا في القرنين السادس عشر والسابع عشر.

مصر لم تكن أبدا فاسدة، النظام السياسي الحاكم هو من افسد الحياة بها.. وفساد الرعية من فساد الراعي.

ان شاء الله مصر ستعود قريبا بقوه لتقف بين اﻷمم العظمى على قدم المساواة بل وستسير تلك اﻷمم في فلك مصر.

مبروك البطاقة الجديدة :)

ابراهيم رزق يقول...

العيب مش فى مصر و لا حضارتها

العيب فى اللى فضل كابس على نفسنا ثلاثين سنة
قتل كل طموح
خنق كل فكر
نهب كل خير
بدد كل ثروة
سجن كل امل
بأذن الله القادم احسن

تحياتى