الاثنين، 8 أغسطس 2011

ثمانية وثمانية وكمان ثمانية :)




مساء الفل على حسب التوقيت المحلي للمدونة السنة دي احداثها كتيرة اوي والوقت فيها بيفوت هوا والوقت في رمضان بيفوت أسرع من أي وقت النهاردة 8/8 بحب الأيام اللي زي النهاردة اليوم والشهر شبه بعض ومش بس كده ده كمان الشهر الهجري النهاردة 8 رمضان :)

لسه لغاية دلوقتي مش مصدقة اننا دخلنا في شهر 8 ولسه كام شهر و2012 تيجي

الجو حاليا ومن اول شهر 7 معتدل وبيمطر على خفيف مطر بيسموه هنا رذاذ والجو ده بيساعد ان أي حد يجيله برد :) ماما بدأت الأول وانا بعدها بساعات واحنا الاتنين حاليا عندنا برد مش عايز يروح اللي انا مستغرباه ازاي ميج رايان في فيلم you've got mail وهي عندها برد كانت زي القمر كده ومتغيرتيش كتير يعني مثلا عينيها مبقتش عاملة زي البلونة ومكنتش شبه الكائنات الخيالية :) الصورة اللي فوق دي اخدتها النهاردة قبل أذان المغرب بدقائق بالكاميرا من البلكونة بتاعتنا :)

والصورة دي اخدتها في يوم تاني قبل كده لكن هو ده شكل الشارع من أول يوم رمضان الشارع على طول بيلمع ومتغطي بطبقة رقيقة من المية المختلطة بالطين والجو ضباب ورذاذ زي الندى في ساعات الصباح الباكر :)

*الصيام بيحسسنا بالناس اللي مش لاقيين قوت يومهم وبيعانوا من الفقر والجوع وبيخلينا شبه الملائكة وعبادة ثوابها كبير لكن لما تصوم وانت مريض فبتحس أكتر بالمرضى اللي مش لاقيين دوا ولا عناية طبية عالأقل احنا عارفين امتى هنفطر وناكل ونشرب وناخد الدوا لكن الفقير والمريض مبيعرفش هيصوم غصب عنه لغاية امتى

*المركز الطبي العالمي اللي دخله مبارك المركز ده في طريقي وانا رايحة مطار القاهرة ووانا راجعه من مطار القاهرة ومكنتش عارفه هو اسمه عالمي ليه؟ لكن والد صحبتي قاللي ان المركز الطبي العالمي ده واحد صاحبه عمل حادثه عالطريق ده ودخل المركز ده وقعد فيه ساعتين ف لقى الفاتورة كام؟ 10 الاف دولار يعني المركز عالمي علشان الحساب فيه بالدولار العناية الطبية فيه بيقولو كويسه لكن للي معاه فلوس وصاحب ابو صحبتي ده طبعا باع اللي وراه واللي قدامه علشان يدفع فاتورة المركز الطبي ومرة تانيه وانا ماشيه على الطريق ده كان في حادثة وسواق الميكروباص كان متبهدل وطبعا الطريق كان مقفول بسبب الحادثة ودخلوا المركز الطبي العالمي ده ومش فاكرة طلعوا بسواق الميكروباص ده تاني ولا لأ بس اللي فاكراه اني اشفقت عليه وكل لما بشوف المركز ده كنت بتوجس خيفة لكن عمري ما تخيلت ان المخلوع يتعالج فيه وشهداء الثورة ميلاقوش أي رعاية.

*متابعة مسلسل رجل من هذا الزمان دكتور علي مصطفى مشرفة وكنت منتظرة جدا اني اشوفه

من زمان وبابا وماما بيكلموني عن مشرفة لأنه عالم دمياطي وليه تمثال ومدرسة بإسمه في دمياط لكن لما شوفت المسلسل اتعرفت عليه اكتر وعجبتني شخصيته جدا عالم وموسيقي بيعزف وبيغني هما دول الدمايطة بالرغم ان المسلسل فيه اخطاء كتير في التسلسل التاريخي وكمان اللغة ساعات بيقلبوا على اميريكن انجليش ومش بس كده كمان فرانكو يبقوا بيتكلموا انجليش وفجأه تلاقي كلمة عربي نطت في النص او كلمتين ودي حركة بتضايقني جدا ده غير كام شخصية ملهومش في الانجليزي اصلا بيخرفوا كتير في النطق زي ام ليز والسكرتيرة بتاعة كلية الأداب في انجلترا كانت في الطراوة برضه ده انا بضحك ضوحك عالناس دي يعني ابسط حاجه مش عارفين تنطقوا روحوا خدو كورس عالسريع قبل المسلسل او حتى المنتج ممكن يجيب اجانب بحق وحقيقي علشان جودة المسلسل لأن المفروض انه مسلسل تاريخي مش بس دراما يعني شوفت لقطة في مسلسل اسمه انا القدس وكانوا الممثلين بريطانيين طبعا فرق شاسع بينهم وبين الممثلين في مسلسل مشرفه اما البطل فأدى دور مشرفه ببراعه لدرجة انه بيقنعني ان هو د. علي مصطفى مشرفه فعلا وكمان نطقه بالانجليش والعربي هايل

اللي لاحظته ان مشرفه طلع ودرس على حسابه علشان ياخد الدكتوراه التانيه دكتوراه العلوم :) ده ايام الملك

اما دلوقتي فأنا لغاية دلوقتي مش عارفة اروح انجلترا زيارة مش دراسه :)

*مصر انضمت ل اللستة اللي بيدعوا ليها في صلاة التراويح

اول يوم في صلاة التراويح اول يوم رمضان اتفاجئت ان الامام بيدعي لحقن دماء المسلمين في ليبيا وتونس ومصر وسوريا والعراق وفلسطين وهي دي العروبة والوحدة العربية :) طبعا انا بكتب الكلام ده عادي لكن يوميها اضايقت جدااااااااا وفضلت مضايقة كام يوم خصوصا لما سلمت على اللي كانت بتصلي جنبي وقالتلي انتي مصرية؟ قولتلها ايوة وفي سري : ايوة من البلد اللي كانوا بيدعولها من شوية اللي يراجع تاريخ مصر هيعرف ان عمرها ما استقرت وارتاحت

* بالرغم اني مش بحب كوكا كولا لكن اعلاناتهم بجد افكارها خطيرة

* ربنا مبيحرمنيش من حاجة في معرض كتاب في مصر وبرضه في معرض كتب ومراجع أجنبية هنا :)

المشكلة دلوقتي هرجع بكل الكتب دي مصر ازاي؟ سؤال يطرح نفسه


هناك 17 تعليقًا:

Lady E يقول...

تحديث قبل ما اي حد يعلق

لندن فيها احتجاجات وشغب نياهاهاهاهاهاه اشمعنى احنا يعني

نقلا عن تويتر الأحداث دي حصلت علشان الشرطة قتلوا واحد أسود فالناس مسكتتش على اهانة الكرامة دي

هي دي البلد اللي انا عايزة ادرس فيها يا ترى لو كنت هناك في الأحداث دي كان هيبقى احساسي ايه عااااااااا

سُـمـيّـة يقول...

السلام عليكم
فى البداية أنا سعيدة جدا لأنى أول حد يعلق ((بعدك طبعا))
مش عارفة بقى أعلق على ايه ولا على ايه بس اهم حاجة أنا فعلا بحب أقرأ ليكى أى حاجة وخلاص ((حب فى الله يعنى))
بس انا مش فاهمة انتى فين؟عموما يارب تقدرى تروحى لندن
سلام

Bent Men ElZman Da !! يقول...

شكل الشارع تحفه
اومال احنا هنا الشمس الحارقه دى ليه :(
كل سنه وانتى طيبه يا جميله وينعاد عليكى بالخير
وان شاء الله تسافرى انجلترا بعد الاحتجاجات ما تخلص بقى :)
وتحققى كل اللى نفسك فيه

غير معرف يقول...

مـدونـة هـمـسات

شمس النهار يقول...

مساء الفل

الجو اللي في الصورة ضباااابي بموت في الجو ده

وسلامتك من اللانفلونزرا
ميج رايان كانت بتمثل لكن واحنا عندنا انفلونزاااااااااا
بنبقا قمة الواقعية

:))))))

ترجعي مصر انتي وكل كتبك بالسلامة
اه صحيح
بالنسبة للمركز العالمي
نعالج فيه المخلوع اه
لكن شهداء الثورة معاهم ربنا
البلد دي لسه مااتغيرتش
ناقصنا كتير علي مانتغير

Lady E يقول...

فتاة من عالم آخر : وعليكم السلام ورحمة الله وبركاته

انا الاسعد اكيد :)

ههههههههه علقي ع اللي تحبيه او عليهم كلهم :)

ربنا يحبك يا فتاة ويارب يديم المحبة

انا في القارة الصفراء قارة أسيا :)

اللهم امين تسلمي

نورتيني

Lady E يقول...

Bent Men ElZaman Da !! : وشكله عالطبيعه مع المطر الخفيف خطييييييير :)

معلش لما الجو كان شتاء وبررررد في مصر هنا الجو كان حر جدا والشمس حارقة فدلوقتي في تبادل ادوار الجو مش حر ومش برد :) خريف

وانتي طيبة وبصحة وسعادة اللهم امين انا وانتي والمسلمين

هههههههههه اصلا السنة دي كل ما احب اعمل اجرائات السفر لانجلترا الاقي حاجة تعطلني :) مرة فرح كيت وويليام
ومرة دخول الصيف في انجلترا وطبعا ارتفاع اسعار كل حاجة هناك ومرة تالتة موضوع الشغب ده هيأجل سفري لتالت مرة هههههههه واحتمال كبير مروحش السنة دي خلاص

اللهم امين شكرا على امنيتك الطيبة
اتمنالك زيها واحسن منها :)

Lady E يقول...

غير معرف : المدونة جميلة ورقيقة جدا

مع اني مبحبش الأسلوب ده ان حد يسيب لينك من غير ما يقول العواف او يكح حتى بس على اي حال شكرا

Lady E يقول...

شمس النهار : مسائك ورد وهنا وكل حاجة حلوة تحبيها

والجو ده كمان بيحبك يا شموسه خصوصا في الحر اللي مصر فيه اليومين دول :)

الله يسلمك يا حبيبتي
ههههههههه أيون فعلا قمة الواقعية بكامل واقعيتها :)

ان شاء الله ارجع مصر انا وكل اللي بحبهم مش بس الكتب :)

صح عندك حق لكن على الأقل بنتغير مش واقفين محلك سر زي الأول

كل سنة وانتي طيبة يا شموسة

AhMeD RaDy يقول...

اممممممممممم بصى

انتى عارفة طبعا ان كل واحد بيعلق على اللى مسه فى كتابات اى شخص بيدخ ليعلص عليه

تعرفى بقى .. انا بعشق الاجواء دى الاجواء الشتوية بتاع الرذاذ الخفيف والحياة صاحبت الرياح ولمسة الصقيع دا ياااااااااااااااه بجد بجد بعض الشتاء اوى اوى ... بموت فيه

ومش مشكلة ان مصر يدعى ليه عاتى ما

احنا بندعى ليهم بان ربنا يحررهم من التابعية !

عموما مصر قوية جدا وباذن الله تعالى اللى جى افضل بكتير بس الصبر الفترة دى

كفايـة طيبـة يقول...

الف سلامة عليكي يا حبيبتى :)

طبعا مش فاكراني عشان بقالى قرن مدخلتش مدونتك

وبقالى قرنين مدخلتش مدونتي انا شخصيا ... وكله اتنسي

بس حبيت اعدى اسلم عليكي واقولك ترجعي بالسلامة وكتبك معاكي :)

reemaas يقول...

اخيرا عرفت انك فى لندن كنت هموت واعرف بتمطر فين دى:)

اولا انتى موهوبه فى التصوير او انا حاسه كده

ثانيا عجبنى كل الحاجات اللىكتبتهيها رغم تنوعها وكل واحدة فيهم كانت محتاجة بوست لوحده على فكرة

انا كمان وجعنى الدعاء لمصر مش الدعاء نفسه لا انننا بندعى بحقن الدماء حاجة ترعب

Noha Saleh يقول...

كل سنة وانتى طيبة ورمضان كريم
اتكلمتى فى حاجت كتير مهمة

بس انا عاوزة اعلق على الصور

الجو بجد شكله يجنن انا بحب اوى الاجواء دى

والف سلامة عليكى

Lady E يقول...

AhMeD RaDy : يارب اللي جاي فعلا يبقى احسن وان شاء الله يبقى احسن عندي امل

Lady E يقول...

كفايـة طيبـة : طبعا فاكراكي يا كل الطيبة انا نشلت الاسم ده من احساس طفلة دايما بتقولك يا كل الطيبة والاسم ده لايق عليكي :)

مش هترجعي بقى لمدونتك ؟ انتي وهي وحشتوني سعيدة بإني شوفتك على بلوجر تاني وهبقى سعيدة اكتر لما أزور مدونتك والاقيها موجودة

نورتيني بجد

Lady E يقول...

reemaas : هههههههههه يارييييت انا مش في لندن بس بعتبرها بشرى خير منك :)


يا كزوفي يا كزوفي اوعدك هنشر صور تانيه من تصويري برضه ان شاء الله سعيدة جدا بإحساسك :)

تسلمي

بالضبط كده ده اللي وجعني برضه بدل ما ندعي لمصر بحاجة عدلة حاجة تشرفنا بندعي بحقن الدماء

Lady E يقول...

Noha Saleh : وانتي طيبة وبخير وصحة وسعادة
الله اكرم

سعيدة ان الصور عجبتك والجو فعلا حلو جدا :)

الله يسلمك تسلميلي