السبت، 5 مارس 2011

اللي مصبرني




الدفا والمودة والحب والإبتسامة الصافية اللي من القلب بص في وش أي حد في أي مكان في الشارع أو في الهايبر أو حتى في الكلية أو في الشغل ده لو أصلا لقيت شغل هتلاقي كل ده تلاشى لا في دفا ولا مودة ولا حب ولا ابتسامة صافية
زمان أيام الجامعة كنت بدرس حاجات وفهمتها أوي بعد ما خلصت كلية مصطلح الإغراق في المادية
materialism المادية اللي كل البشر غرقانين فيها ونسيوا حاجات كتيرة جدا حلوة وطحنوا نفسهم بنفسهم في مطحنة الحياة
والموضوع ده لكل البشر وبيلخص المعنى ده أغنية money money money by ABBA band وبيلخص ده وجوه الناس وحقدهم وحسدهم للإنسان اللي بيتمتع برزق وافر ده غير كمان انقطاع الاتصال بين الناس ومتأكده ان كل واحد فينا بيحصله كده
يبقى مهتم بموضوع وفجأه يلاقي اللي بيتكلم معاه مش معاه أو بيكلمه في موضوع تاني كل ده من سمات العصر الحديث اللي اتعرفت عليها في كتب الكلية واتعرفت عليها بجد لما اتخرجت من الكلية وفعلا أغلب الكلام اللي درسته طلع صح
ده غير كمان شعور عدم الأمان اللي مسيطر على الجميع بلا استثناء الغني خايف لا يخسر فلوسه والفقير خايف على رزقه والغريب أن كل خوف البشر من ناحية الرزق وطبعا الرزق مش بس فلوس لأ الرزق صحة وراحة بال ووقت وزوج أو زوجة صالحين وأطفال وصحبة طيبة وحاجات تانية كتير بس مفيش ناس كتير فاهمين كده
كمان انعدام الأمان وهتكلم عن نفسي أنا خلاص مبقتش حاسة بالأمان مش على النطاق العائلي لكن على النطاق العربي كل البلاد العربية بقى فيها دوشة بما فيها البلد اللي انا فيها مع انهم يعتبروا مرفهين بالنسبة للمعيشة في مصر وكفاية ان الباحثين عن عمل من العمانيين ليهم مصروف شهري ما يعادل 2000 جنيه ياللي بتطالبوا بأدنى حد للأجور 1200 جنيه وكمان السكن متوفر ليهم وموقفين عربياتهم الأحدث موديل زي اللاند كروزور والهامر والتويوتا بأنواعها والنيسان وبرضه عاملين اعتصامات وأهو تقليد أعمى وخلاص
ومع ان الوضع هادي بس أنا برضه مش حاسة بالأمان وبرضه الوضع في مصر ميشجعش عالرجوع لأن برضه في مصر مفيش أمان عالأقل حاليا
مصر وحشتني جدا ومش مصر كلها لكن الحاجات اللي بحبها في مصر وأهمهم -الكتكوتة- والأشخاص كمان اللي بحبهم في مصر لكن ما باليد حيلة هنزل مصر مش هعرف ابدأ دراسة في حاجة مفيدة ولا هعرف ألاقي شغل
اللي مصبرني ومهون عليا اني مش في بلدي اني مع اهلي وكمان التسوق او الshopping وده بيبقى أسعد وقت في حياتي والصورة اللي فوق بعدسة الكاميرا بتاعتي لأكبر هايبر في صلالة اسمه اللولو وفتح الأسبوع اللي فات
غير كده النهاردة زي بكرة زي بعده والناس بيزيدوا بعد عن بعض والرأسماليين بيزيدوا الفقراء فقر أكتر يمكن أكون محبطة ويمكن أكون بفكر بواقعية بس في كل الحالات أنا عايشة بالأمل وأحلامي الحمد لله بتتحقق
هي صحيح بتتحقق ببطء أوووووووووي وكأنها بيبي لسه متعلم يحبي بس المهم انها بتتحقق والمهم نتعلم نحلم ونمشي ورى أحلامنا

http://www.youtube.com/watch?v=t4scdbs8thQ&feature=related

هناك 10 تعليقات:

مدونة رحلة حياه يقول...

السلام عليكم
ونبقى ننتظر الأمل بعد فضل الله
طرحك سهل يحمل بين طياته المر

MaNoO يقول...

بدون مبالغه بس الدفا والحب والابتسامه الصافيه والمساعده بدون مقابل انا بدأت احس بيهم فى مصر على ااقل بدات احس ان الناس رايقه اى نعم مش كل حاجه اتظبطت بين يوم وليله بس احساس الناس ان الهم الاكبر راح وان المشكله الجايه لو جت هتبقى مننا احنا وبس
بالنسبه للوطن العربى المشكله مش مشكله فلوس ولا اكل ولا حياه حلوه طيب ما ليبيا دخلهم عالى جدا جدا لكن يعنى ايه تدى لواحد كل حاجه وتربطى لسانه وتاخدى منه عينيه
اللى بيحصل دلوقتى ماهو الا تصحيح للأوضاع واللى جاى عمره ما هيكون اسوأ من اللى راح
نصيحتى ليكى تعايشى معا لحاله اللى انتى فيه والمكان ومش هقولك تفائلى لا الواقعيه حلوه جدا لك برده شوفيها من الجانب الاخر
انتى عارفه لو انتى فى مصر دلوقتى كان فكر دا اتغير تمام سيبك من كل اللى بتسمعيه احساس كل حاجه هنا بقى مختلف

فراشة يقول...

حبييييييييبه قلبي
وحشاني يانونتي
مصر وحشه من غيرك :)

نفسي اشوفك جدا والله وبعدي ربنا الظروف تنصلح وكله يبى تمام

مبروووووك الكاميرا شبه بتاعتي يمكن اختها ولا حاجه ههههههههه

كمان السعوديه هيحصل مظاهرات وحد ادني للأجور 10000
خلي المصريين بقى يعيطوا ويروحوا يحتلوا السعوديه
حاجه بجد غريبه جدا ربنا يستر ع وطننا العربي

وحشاني خالص ووحشني عصير البرتقال

حلم بيعافر يقول...

ياااااااااااااامسهل يارب

ايه اخرة المشى ورا الحلم ؟

mrmr يقول...

الناس ابتديت تحب الحياه
وعايشه على امل بحياه جميله وسعيده وبقيت متفائله جدا

اسلوبك جميل وطرحك للموضوع اجمل
اقعدى بالعافيه

حنين الذكريات يقول...

مسأك فل معطر بالورد ملفوف بالتل من مده كبيرة مجتش عندك بالتعليق لكن تعلمين انى متابعة كل موضوعاتك
خاليكى متفائلة الوطن العربى بخير وبينفذ الاتفاقية الصهيونية كما هى مكتوبه ومرسومه كويس جدا
الدفا والحب الأن لايوجد غير عند بعض الأسر القليلة بين الوالدين والأبناء فقط
أنعدم بين الخوه بعضهم بعض حتى الاشقاء من اب واحد وام واحده
اتمنى اصلاح الاخلاق وعودتها قبل أصلاح النظام
ربنا يرحم البشر جميعا من شر الفتن والحقد والحسد
دمتى ودامت كتباتك الجميلة

~ISLAM~ يقول...

فعلا الكل خايف
واللى مش خايف بيدور على حاجه يخاف عليها او منها

عارف ليه كل ده بيحصل
عشان النوايا مش خالصه
وكله بيحور وبيتعامل بأكتر من وش

موضوعك صائب جدا
تحياتى ليكى

قلم رصاص يقول...

ان شاء الله القادم أحسن :)

ومصر بتتغير للأحسن بس مع شوية صبر
معاكي ان سلوكيات الناس بقت مفرطة في المادية وللأسف دا نتاج طبيعي للحياه السريعة في كل حاجة.

لكن لازم تتأكدي كل لحظه إننا أجمل بلد في العالم وجه الوقت خلاص اللي رجعت فيه بلدنا لينا وبنغيرها بإيدنا مع شوية صبر ووقت ، وهي سنة الحياه...

ترجعي مصر بالسلامة ان شاء الله
:)

Lady E يقول...

مدونة رحلة حياه : وعليكم السلام

يمكن مر ويمكن حقيقة مره ويمكن ادراك الحقيقة أحسن شيء لعلاج المر

FAW يقول...

رغم المشهد المقلق بس برضو مش مبرر لليأس في غد أفضل
ربنا يكرم