السبت، 26 مارس 2011

الحياة باللون الوردي والأبيض


من كام يوم شوفت فستان فرح هو بالضبط فستان فرح أحلامي "الفستان أبو ديل" :) شبه الفستان اللي فوق ده بس مش أوي يعني - هو أحلى طبعا-
وطبعا بيحصل بيني وبين ماما جدال دايما طول عمري بقول لها أنا اللي هشتري فستان الفرح وماما تقوللي لأ الفستان عالعريس :) أقولها وفيها ايه لما أجيبه أنا تقوللي فال وحش طيب فال وحش ليه ؟ تقوللي هو كده المهم ان انا اصلا مش هجيبه دلوقتي علشان هيخلل في الدولاب لأن أصل 2011 العظيمة مش هتشهد حفل زفافي ولا خطوبتي واحتمال كمان 2012 واحتمال كمان 2013 :) وأهو كله في علم الغيب الله أعلم بس ساعات ربنا سبحانه وتعالى بيبعت رسائل على لسان الناس فالواحد يفهم ان الحلم الفلاني هيتأخر شوية أو لازم امشي في الخطوة الفلانية علشان أوصل للمينا اللي هتوصلني للبر التاني علشان أحقق حلمي :)
المهم أنا ليه أفتكرت الفستان
اولا أنا بحب فساتين السهرة جداااااااااا وخصوصا فساتين الفرح ولما كنت بمشي بالكتكوتة وقدامي محل فساتين فرح كنت ببص عليه وبسيب الطريق :)

ثانيا بقى وده الأهم كنت بتفرج على فوكس موفيز - حلوة موفيز دي - وكانوا بيتكلموا على أغلى ويدينج اتعمل في العالم وطبعا كان ويدينج المشاهير وتشوف بقى أرقام خيالية مليون ونص زورار ومليونين زورار وتلاتة مليون زورار :) ويا سلام بقى لما المعلق يقول وجابوا طفلهم الأول وبعدين فكروا يعملوا ويدينج بارتي لأ بجد كتر خيرهم

قعدت أتأمل شوية وصوت العقل والحكمة طلع وقاللي مش مهم الفرح يبقى غالي اوي كده المهم اني أعيش الحب وأشوفه في عيون اللي بحبه يوم فرحي أشوفه شايفني أميرة وأشوفه مش شايف غيري وسامع بس صوتي
وطلع صوت الجنان وقاللي هو حد قاللك ان اللي بيعملوا الأفراح دي ضاربين بعض بالشوزات ما هما بيحبوا بعض برضوا وكل الكلام اللي بتقوليه ده
واللي غاظني ان في فرح من أفراح المشاهير العريس جاب البدلة بتاعته ب3000 زورار-في حدود المعقول السعر ده- أما بقى العروسة الهبلة فتخيلوا جابت الفستان بكام؟ ب50000 زورار بذمتكوا في تواضع أكتر من كده :)

وفرحت ان فرحي مش هيكون فيه شوكولاته ماركة جايه من سويسرا يادوب هي كوفرتينا عالعريس:) ولا واين وشامبين جاي من فرنسا فكده هنوفر كتير:)) أوي
ويجعل أفراح المحسنين عمار وعقبال عندي وعندكوا - اللي لسه متجوزوش-
.

هناك 13 تعليقًا:

" يـ ألوناتك ! " يقول...

ربنا يرزقك بابن الحلال :) وان شاء الله في 2011 كمان .. وانتي عارفة مش المهم الفستان بكام بس عارفة انتي هتشوفي فستان وتقيسيه واول ما تشوفي نفسك هتقولي هو دا اللي عايزة اتجوز بيه .. حتى لو فيه احلى منه تاني جنبه :)

موفقه

حنين الذكريات يقول...

فستان الزفاف والزفة عنوان الفرح والعفة وعيون البنات عاشقاه دى البنت وهى فى اللفه تشتقله وتتمناه
ربنا يفرحك وتلبيسيه قريب وبلاش 2013 ليه التفاؤل ده
على فكره انا مع مامتك فى ان شراء البنت لفستان الفرح حاجه شوءمه اعرف بنوته اشترت فستتان الفرح وعدى عليه 5 سنوات ومتلبس وبعدين بقت تخرجه صدقة الى ان اصبح لايصلح
مش مهم الفستان ولا حتى الفرح المهم تكون الحياة سعيدة مع ناس بنحبهم وبيحبونا
ربنا يكتبلك الهنا والفرح قريبا

فراشة يقول...

حبيبتي حبييبتي

يارب فستان احلامك يبقى أحلى من دا مليون مره ياربويبقى قريب ويبقى فرح جميييييل جدا بسيط ورقيق وجميل زيك كدا
والعريس يبصلك بحب قووووي ويبقى مش شايف غيرك بس عشان بيحبك مش عشان عنده قصر نظر :))
بهزر ههههه طبعا

اسكتي انا كمان شت فستان أحلامي او شبهه برضه اللي كله تللي دا ورقييييييق جدا جدا وكل ما اعدي من عليه اتنح كدا وفكرت برضه اسأل بكام واحوش واجيبه
بس قلت مش هيتلبس فبلاش بقى احرج نفسي هههههههههه

وحشاني يا قمر جداا بجد

ربنا يسعدك ويفرح قلبك ياااااارب

غير معرف يقول...

تصدقى مكنتش اتصور
ان كلامك واحشنى اوى كده
ومدونتك وصورك على المدونة
ياااااااااااااااااه
رجعتينى لايام كتير اوى ورا
انا مش عارفه ليه بحب أقرء
اى حاجه ليكى
*************
حسيت بروح نونتى تانى
حلو اوى الفستان
بحب انا الفساتين الكب دى ^_^
تفتكرى مين فينا الى هيرش البيرسول الاول
؟؟؟
كيكى

Noha Saleh يقول...

مدونتك حلوة ودمها خفيف وفعلا حسيت ان فيها روح طفلة
ربنا يرزقك بإبن الحلال اللى يجيب الفستان والكوفرتينا والجاتوه كمان
تعرفى بقى كمان بيقولوا ان فال وحش لما العريس يشوف الفستان قبل يوم الفرح
بصى بجد بقى موضوع الافراح ده نسبى فى ناس تحب تعمل افراح كبيرة وناس بتحب تعمل افراح عادية وبالفلوس الباقية يقضوا شهر العسل فى مكان حلو
انا مبسوطة اوى انى دخلت مدونتك وهدخلها على طووووول ان شاء الله

sony2000 يقول...

::))
بجد ضحكت اد كدهون:)

يارب يحققلك كل حاجه حلوا يارب

Malooka Yousef يقول...

ربنا يكرمك ان شاء الله بالزروج الصالح وتلبسى الفستان اللى تحلمى بيه

نيللى يقول...

اولا وحشتينى ياانوس يلى بتختفى اختفاء بالايام والاسابيع بل بشهور تقريبا انتى اشتريتى طاقيه اللخفه بتاعت عبد المنعم ابراهيم فى فيلم "طاقيه الاخفاء" هههههه

المهم
بصى عن تجربه واحده تجوزه وكنت متخيلى ان نصيبى هيجى بعد 5 سنين ولكن فجاه لقيتى نصيبى او قدرى جه فجاه ومن غير ميعاد والحب كمان بيجى من غير تخطيط
فخلى بالك انك ممكن تتخطبى وتحبى فجاه
ده اول حاجه

تانى حاجه الواحد لما بيحب اوى ويلاقى الانسان الصالح اللى يعرف دينو واهم حاجه الدين وان هيرعى ربنا فى
الواحد بيقول انا اخاف على فلوسوا بدل ماادفعوا الشئ الفلانى
احسن اننا نتفسح بيها وكمان اكون وفرتلوا
وكمان الفرح مظهر اجتماعى انا عن نفسى مش بحبو لان شيفها فلوس على الفاضى ومش بستفاد حاجه
غير ان الناس يتريقو على اللى بيتجوزوا ويكلو ويشربوا وخلاص

وربنا يرزقك بابن الحلال يارب امين

وجع البنفسج يقول...

ربنا يعوض عليك بالزوج الصالح وبالذرية الصالحة ان شاء الله ..
اول مرة هنا وان شاء الله مش الاخيرة ..
بالنسبة لفستان الفرح ، انصحك ماتشتريش فستان علشان كل يوم بتنزل موضات جديدة ، بلاش بعد كده تندمي على اختيارك .. خلي الفستان لوقته ، وانا مع مامتك ، " ده فال وحش يابنتي !! هههههه "
ربنا يرزقك بالزوج الصالح واللي يشتري لك احلى فستان في الدنيا كلها .. واكيد راح يكون احلى فستان .. لانه بتكون لابستة احلى عروس .. هيك هي المعادلة .. مافيش فستان فرح مش حلو .. العروس بتعكس جمالها ودلعها عليه فبيطلع احلى فستان ..

تقبلي تحيتي وتقديري ..

mrmr يقول...

ربنا يفرح قلبك
ويرزقك بالعريس الصالح اللى يحبك ويخاف ربنا فيكى

Bent Men ElZaman Da !! يقول...

ربنا يرزقك بالانسان اللى يستاهلك ومش بعيد يكون فى 2011 ماحدش يعرف ;)
وان شاء الله يا حبيبتى تجيبى الفستان اللى بتحلمى بيه
الفرحه مش بتتقدر بالفلوس اتعملت بكام والا ايه جه منين
الفرحه هتحسيها من ااقل تفصيله بتحصل ماحدش ياخد باله منها بس هتفرق معاكى اووى
ربنا يسعدك دايما يا قمر :))

Tears يقول...

ان شاء الله تفرحى دايما

الفستان اللى فى الصورة رائع :)

Amr Wady يقول...

!Don't Give Up Your Dream

“Keep away from people who try to belittle your ambitions. Small people always do that, but the really great make you feel that you, too, can become great.”

-- Mark Twain