الخميس، 21 أكتوبر 2010

تفاصيل بسيطة


" مش عارف هل بتقصدي حد معين مريتي بتجربة معاه للدرجة اللي توصلك لهذا الحد من الغضب اللي ربما أكون حسيته في كلامك لدرجة وصفك الشباب عالنت بإنه سيس " جزء من تعليق على البوست اللي فات لمدون بحترم كتابته وفكره لكن الواضح انه مبيحترمش حد لأنه سألني سؤال شخصي مش فاهمه هيستفيد ايه لما يعرف اجابته يعني هيضره بإيه أو هيفيده بإيه؟ ومين اللي ادى لحضرته الحق يسألني ويتدخل في اللي ملوش فيه في حياتي الشخصية !!!!!!!!!! ويعمل اسقاط على شخصيتي وهو ميعرفنيش اصلا الا من خلال مدونتي اللي ضايقني فعلا ان المدون ده المفروض من كتابته يتفهم انه مثقف على أي حال يا أ-محمد ناصر الدين الهلالي Please in your next comment try to show some respect or please do not comment or read my blog at all

في بوست عند شاب فقري بيقول كتير من اللي عايزة اقوله كفى ووفى فعلا إلى غير معرف

------------------------------------------

بفكر انزل مصر بعد العيد بس عايزة حوالي شهر علشان ارتب حياتي تاني في مصر

يوم هاخده في التنقل ما بين مطار داخلي ومطار دولي ومواصلات لغاية لما اوصل لبيتنا

واسبوع علشان نعمل صيانة للكتكوتة لأني سايباها تعبانه أصلا وكمان البطارية هتتشحن لأن بقالها كام شهر مشتغلتش وأسبوع زيه لغاية لما نظبط البيت وأفضي شنطتي

دايما في الأفلام بشوفهم اول لما يوصلوا من السفر بيشيلوا كل حاجاتهم من الشنطة وانا مش كده انا بحب احتفظ بشنطتي وبالتيكت بتاعها وباخد اللي بحتاجه منها وخلاص

وعالأقل شهر علشان أرجع الانترنت وشهر كمان لغاية لما أزهق وابقى عايزة أسافر تاني :)

هنا وحيدة وهناك وحيدة مش فارقة كتير لكن اللي فارق معايا بجد

لما كنت بحس الاحساس اللي انا حساه دلوقتي كنت بروح رأس البر ع اللسان أقعد قدام البحر ساعة ساعتين وأروح النيل أجيب أيس كريم كاساتا فانيليا متقطع فيه فواكه ومش ممكن انسى ايس كريم الليمون

وفي الطريق بسمع موسيقى هادية أو أغاني رومانسية وبرجع تاني متفائلة ومرحة

في مصر بتصل بكيكي وتفضل تقوللي ما تيجي بقى وأقولها يا بنتي اجي ايه بس هو سهل كده ما تيجي انتي

تقوللي ياريت

بقعد عالنت 24 ساعة بيسرق وقتي بطريقة غريبة لكن هنا بتحكم في الأوقات اللي بدخل فيها النت ودي حاجة مضايقاني :(

مع ان الصورة الكبيرة مش رائعة الجمال لكن فيها تفاصيل بسيطة بتسعدني ^ أشيائي الصغيرة^

منظر الشمس وهي داخلة أوضتي الصبح ومش مخلياني اعرف انام ،

الهوا اللي جاي من شباك أوضة بتطل على راس البر من بعيد ،

بوكس اند بينز بكل حفلات التوقيع والأمسيات اللي بتعملها ،

كوك دور المنصورة وأكله اللذيذ

كورسات التنمية البشرية وأمسيات مكتبة مبارك والجيم وحواديت البنات هناك

كورس الموسيقى اللي نفسي أدرسه

ودبلومة الترجمة اللي محتارة فيها اخد ترجمة فورية ولا ترجمة تحريرية ولأ اسيبني من الترجمة وأخد لسانيات وصوتيات كل ده في بلدي برغم ان الصورة اللي يشوفها من بعيد يلاقيها سودا لكن فيها شوية الوان حلوة

على رأي جدتي الله يرحمها رب هنا رب هناك

كل اللي بيفرق بس بين مكاني هنا ومكاني هناك تفاصيل بسيطة

هناك 28 تعليقًا:

أميرة علي كوكب مهجور يقول...

الاشياء دائما تكمن في التفاصيل
وبعدين وحيده هنا ازاي يعني ها قوليلي ازاي انا روحت فين يا انسه :))

mrmr يقول...

مصر تنور بوجودك يا قمر

FAW يقول...

أعتقد من كلامك إنك من دمياط , جميل قوي موضوع النيل والبحر في مكان واحد . . :)
عامة تنوري مصر .

فراشة يقول...

السلام عليكم ...وحشتيني

هسيبني من الجزء الاول من البوست

تعرفي بجد قولتي نفس اللي بحس بيه جدا .. تعرفي انا كدا بقالي شهر بالظبط ف مصر لسه يدوب حاسه اني بدات آخد على الحياة هنا ولسه فيه شنط فيها حاجات :) .. ماما وصلت امبارح يعني انا روحت بيتنا أخيرا ومبسوطة جدا بالتفاصيل الصغيره اللي بحبها

يارب تيجي ف العيد ولا اقولك يارب يعملك اللي فيه خير ليكي دايما
بحبك ف الله :)

VÖltaa يقول...

رب هنا رب هناك

الظاهر الناس الكبار كلهم بيقولو الجملة دى :) :)

سلامة الكتكوتة D:
,

و ربنا يسعدك سواء هنا او هناك

تحياتى :)

P A S H A يقول...

يااااااه
اللسان وراس البر

المكان ده جميل جدا ووحشني جدا

‏:-)

ربنا يرجعك بألف سلامة إن شاء الله

خالص تحياتي وعميق احترامي وتقديري

Lady E يقول...

أميرة علي كوكب مهجور : أينعم

ههههههه افتكري كلامك ده لما انزل مصر ان شاء الله

وحشاني بجد

Lady E يقول...

mrmr : مصر منورة بيكي يا مرمر

تسلميلي

Lady E يقول...

FAW : أيوه انا من دمياط واتكلمت عنها قبل كده كتير عالمدونة

ما شاء الله معلوماتك هايلة تقريبا زرت راس البر قبل كده فعلا النيل والبحر في مكان واحد عند اللسان في راس البر

ربنا يكرمك مصر منورة بأهلها

غير معرف يقول...

شكرا على البوست

Lady E يقول...

فراشة : وعليكم السلام ورحمة الله وبركاته

والله يا فراشة وانتي وحشاني اكتر

سيبك من الجزء الأول مفيش مشكلة :)

الف الحمد لله على سلامة مامتك ربنا يخليهالك ويباركلك فيها سلميلي عليها كتير

هييييييييييييه اخيرا يعني هيبقى عندك نت هيييييييييييه

اللهم أمين
ياااااه يا فراشتي دايما دعواتك بتيجي في وقتها عارفة لسه بشوف مسجاتك اللي فيها دعاء وببقى سعيدة جدا وبدعيلك
ربنا يرزقك بكل خير ويسعدك ويفرح قلبك

احبك الله الذي تحبينني فيه وانا كمان بحبك في الله

MaNoO يقول...

هبدا من مكان ما انتهيتى رب هنا رب هناك
والتفاصيل اكيد اكيد بتخلينا نشوف حاجات اكتر فى الغالب بتبسطنا الفرق بين التفاصيل والصوره العامه ان الصوره العامه بتقابلنا تحسى انها فى وشك كدا انما التفاصيل بتريحنا نفسيا وداخليا
سيبك انتى راس البر السنه دى تجنن احلى من السنه اللى فاتت كمان لازم تزوريها واتكلى فى مطعم ايلاند انا مش عارف فاتح فى الشتا ولا لا

همسات وبحــ الحياه ــر يقول...

لاتهتمى بأى تعليق مستفز :)
اكيد هتنورى مصر
قصرت معاكى الفترة اللى فاتت بس يعنى انا اغيب وانت كمان تغيبى ومتسأليش علياه :(:(:(

The illusionist يقول...

يخرب عقلى

انا اتاخرت فىا لتعليقات
استغفر الله العظيم يا رب

المواصلات الدولى صعبه يا ستو اى
بس ما علينا لسه واصل مدونتكبالتوكتوك

اخيرا لقيت حد دماغه فيها حاجه سايحه
انا عندى كميه السياح دى فى احشاء وصلاتى المخيه العصبيه

كورسات موسيقى وبيانو وكونفيرس وهندسيه وتنميه بشريه وطيران
اااااااااااااااااااااااه
ويل لمن اخترع كل هذه الاشياء
بس فى كل الحالالالالالالالالالالالالالالالالات

هتنورى كاستا وفنيليته تانى

حنين الذكريات يقول...

للأسف الشباب هذه الايام من الجنسين مفاهيم الاخلاق عندهم اتغيرت
النت بالنسبة للبعض منهم ماهو الا تسلية لشغل الوقت
طبيعى ان الانسان يحن لوطنه وجزوره حتى لو اتربى بعيدا عنه
حاولى تشغلى وقتك بشئ بتحبيه غير النت اللى مش موجود عندك 24 ساعة
البلد اللى انتى فيها من أجمل البلاد من حيث المناظر الطبيعية وفيها البحر اللى بتحبية اخرجى ومتحبسيش نفسك لعدم الشعور بالوحدة والغربة
ربنايسعدك ويوفقك فى اى مكان بتحبيه

sony2000 يقول...

اولا منوره
ثانيا سيبك من اي كومنتات رخمه
ثالثا جمله عجبتني ووقفت عندها اوي
كل ده في بلدي برغم ان الصورة اللي يشوفها من بعيد يلاقيها سودا لكن فيها شوية الوان حلوة
ياريت

Lady E يقول...

VOltaa : تقريبا :)

الله يسلمك وميتعبلكش كتكوتة قادر يا كريم

اللهم أمين وليك مثل دعائك

دمت بخير

Tears يقول...

لا تلتفتى لاى تعليقك يضايقك

التجاهل سلاح قاتل

دمتى بخير

~ISLAM~ يقول...

كل كلامك ده جميل اوى
عشان كده مش لازم نفضل نعذب نفسنا ونعذب بلدنا دايما
ليه منبصش لنص الكوبايه المليان
ونبطل بقى رتم التشاؤم اللى ساد جوانا كمصريين
مع ان فى حياتنا حاجات كتيره حلوه والله
تحياتى ليكى

Lady E يقول...

P A S H A : ان شاء الله تزورها تاني مع اللي بتحبهم

اللهم أمين

بالنسبة لإختبار نمط الشخصيات فبجد انا مش ناسية لكن مش لاقية وقت اكتبه تاني وارفعه عالنت :(

دمت بخير

Lady E يقول...

يوميات شحات : عفوا

Lady E يقول...

MaNoO : كلامك سليم

بتغيظني ولا ايه :) انا بحب راس البر جدا في الوقت ده وفي الشتا بتبقى دافية وهادية وجميلة جدا

مطعم ايلاند بيتهيألي شوفت الاسم ده قبل كده بس مش فاكرة فين في راس البر بس اكيد طالما حلو اوي كده هروحه ان شاء الله

دمت بخير

Lady E يقول...

همسات وبحــ الحياه ــر : مين قال كده بس يا همسات وأنا اقدر برضه انا فاكرة اني زورت مدونتك وعلقت فيها
بجد :)

Lady E يقول...

The illusionist : المواصلات الدولي صعبة فعلا يا جدو زناتي

اكيد الكلية هي اللي مش مخلياك تاخد كل الكورسات دي حاليا لكن اكيد تقدر تاخدها في الصيف

خليك متفائل اللي عايز يدرس كل ده ويطور نفسه احسن كتير من اللي مش عايز يعمل حاجة

"كاستا وفنيليته تانى" انت بتتكلم هونولولي صح ؟ :))

Lady E يقول...

حنين الذكريات حبيبتي : أكيد كلامك سليم

انا وقتي مشغول فعلا وانتي عارفة بس برضه مش متعودة النت يكون كده عايزاه يكون موجود على طول :)

اوعدك اول لما اجيب عربية ان شاء الله هنفذ نصيحتك وهخرج مع انتيمتي كمان :)

اللهم أمين

ربنا يسعدك ويحفظك ويبارك في عمرك يا حبيبتي

Lady E يقول...

sony2000 : واحشاني بجد يا بنتي عاش مين شافك

خليكي متفائلة يا سوني انا مبقولش ان الصورة كلها على بعضها حلوة لكن فيها تفاصيل صغيرة حلوة

Lady E يقول...

Tears : أنا دائما مش بلتفت لأي تعليقات بتضايقني وبتجاهلها لكن التعليق ده بجد ضايقني جدا لدرجة اني مقدرتش اتجاهله

Lady E يقول...

iـــــــــــsــــــــــlــــــــــــaـــــــــm : الله على كلامك يا اسلام بجد

احنا مش بنستفيد اي حاجه من التشاؤم غير ان الأمور بتسوء أكتر لكن التفاؤل كفاية انه بيخليك في مود حلو وتفائلوا بالخير تجدوه وربنا سبحانه وتعالى قال في حديث قدسي : "انا عند ظن عبدي بي فليظن عبدي بي ما شاء"