الأحد، 25 يوليو، 2010

العلم في الراس مش في الكراس


زي كل سنة توالت المسجات والتليفونات من الأقارب وغير الأقارب لتهنئتي بالنجاح من قبل ما أنا حتى أعرف النتيجة ولا أعرف عملت ايه في المواد المختلفة والموضوع ده على أد ما بيظهر انه اهتمام من الناس بيا على أد ما بيجنني وبيخليني أحترق داخليا وبيجيبلي انغلاق نفسي وضيق تنفسي وفسفس هستيري ، طيب الكلية عاملة موضوع الرقم السري أو الرقم القومي للدخول على النتيجة عالنت ليه علشان النتيجة تبقى خصوصية محدش يعرفها غيري ! واللي بيحصل العكس أنا أخر من يعلم ! لسه النتيجة مظهرتش عالنت بس انا عرفت التقدير العام لل4 سنين

من كام يوم كنت بدعي ربنا سبحانه وتعالى اني أجيب مقبول وحاطة في حسابي موضوع الفرنساوي اللي فضل معايا سنة تالتة ورابعة وبيقولو اني أخيرا نجحت فيه واللطيف أن باقي ال15 طالب وطالبة لسه شايلين المادة يعني 2 نجحوا من 15 كنت متأكده انه اكيد هيبهدل تقديري وهينقلني من فئة الجيد لفئة التقدير الشعبي وكنت خايفة جدا أجيب جيد علشان لو كنت جبت التقدير ده كنت أكيد أكيد هقدم دراسات عليا في كليتي اللي مش هتعلم فيها أي حاجة جديدة ولأني زي كل الناس بفضل الأمان وبخاف من التغيير فلو كنت جبت جيد مكنتش اتقدمت خطوة واحدة


دلوقتي عندي طاقة كبيرة جدا اني أثبت لنفسي و لكل الناس اللي عرفوا نتيجتي قبلي اني أذكى من كده ومستوايا أحسن من كده وأخدت عهد على نفسي اني إن شاء الله هكمل دراسات عليا في الجامعة الأمريكية أو في انجلترا أو أمريكا -نفسهم- ولأني مش بنت وزير بيتعالج على حساب الدولة ولا بنت واحد محتكر الحديد ولا بنت شيوخ على رأي شيري انتيمتي فأكيد الماجيستير في الجامعة الأمريكية أو في انجلترا حاليا هيبقى نوع من أنواع الجنون

لكن عهد على نفسي طول ما فيا حياة هفضل أسعى لتحقيق الحلم ده حتى لو بعد 10 أو 20 سنة وحتى لو كل الناس أحبطوني

دكاترتنا الأفاضل استطاعوا وبجدارة أنهم يحولوا أحلامنا من طلاب داخلين شايفين الحياة وردية وعندهم حماس يبقوا متفوقين ودكاترة جامعة مستقبليين لطلاب مرعوبين من التعبير عن رأيهم خايفين من كل حاجة وبيقولوا يارب ننجح ومش مهم تقدير ! وع العموم ربنا موجود واللي عايز يظهر أنه فعلا متميز وأحسن من توقعات الناس ليه بيعمل كده حتى لو قابله مليون عائق وظلم وظلام

والواضح اني مبعرفش أحقق أحلامي الا لو كان عليا ضغط داخلي من نفسي لتحقيقها والحمد لله على كل حال

وبرضه هفضل شايفة نفسي متميزة ومختلفة عن أي حد في سني .

معجزة سنة 2010 أنا نجحت في مادة اللغة الفرنسية بعد سنتين عذاب واكتئاب – يا بركة دعا الوالدين -

ونجحت من الدور الأول في كل المواد في كليتنا الموقرة برغم الامتحانات السخيفة والحر القاتل اللي كنا بنمتحر فيه

ومش بس كده كمان بقى عندي هدف عايشة لتحقيقه ، مرة تانية الحمد لله على كل حال


هناك 26 تعليقًا:

Lady E يقول...

مبروووووووووووك ليا ألف ألف مبروك وعقبال الماجيستير والدكتوراة والأستاذية بعدها كمان بالمرة ويا هنا مين يعيش :)

واللي يعيش ياما يشوف

لولولولولولي

تحيا الأحلام وليسقط سارقوا الأحلام

Lady E يقول...

لأني مش متوقعة ان حد يرد هنا أساسا دلوقتي فهحتفل بنفسي لتاني مرة :)

وصلي صلي صلي عالنبي صلي صلي

موسى نبي وعيسى نبي وكل من له نبي يصلي عليه

لولولولولي

والناجح يرفع ايده ويتذنب عالحيطة اللي قدامه نياهاهاهاهها

تقريبا من كتر ما أنا مضايقة هييست بس مهما كان أنا نجحت لولولولولي

قبلاوى يقول...

السلام عليكم

ألف مبروك النجاح

وان شاء الله تحققى كل اللى بتتمنيه

قلــ"بـــلال"ــــــب فارس يقول...

الف مليون مبروك وعقبلنا
وبااذن الله هيتحقق حلمك

sony2000 يقول...

مبرووووووك مبروووووووك
ويارب نتيجتي تكون كويسه
ياااااااااااارب
عوذا دعواتك:)

إيمان يقول...

الف الف الف مبروووووووووووووووك
وعقبال الدكتوراه والاستاذية وان شاء الله هتوصلى وكويس انك عرفتى انها حرب علشان منشوفش نفسنا على حقيقتها اللى هى فعلا مميزه ونحس اننا ولا حاجه
كويس انك قررتي انك متتكسريش وان شاء الله هنشوفك كاتبه كبيره ودكتوره فى الادب الفرنسي ( نياهاهاهاها)
ان شاء الله عن قريب

شوكولاتة يقول...

إن شاء الله يا نونو تحققي حلمك واشوفك دكتورة كده في الجامعة الامريكية مش بس طالبة وياستي مبروك على الفرنساوي وعقبال الألماني والايطالي والاسكندراني والدمياطي
ومبروك الليسانس مقدمااااا

طلب صغنون لليدي صغنونة
بوست جديد مهم عاوزين كل مدون معانا يساعدنا في مشروع مهم التفاصيل عندي في المدونة

http://chocolatah.blogspot.com/2010/07/blog-post_26.html

معانا ولا.......

Ana keda يقول...

مبررررررررررروك يا حبيبتى
يا رب علطول فى نجاح كده وتفوق
والحمد لله يا حبيبتى
لكا مجتهد نصيب
احلمى كتير ويا رب تحققى كل احلامك يا رب
وحشتينى

شاب فقرى يقول...

مبرووووووك
انتى من الناس اللى مش بتشتغل او مش بتحب الشغل غير لما يبقى فى هدف وتحت ضغط :)

ربنا يوفقك يارب ويكون معاكى
والف الف الف مليون مبروك :)

ليه سؤال : أغنيه إيه دى ؟؟؟
اللى قلتى عليها فى الرد عندى ؟؟

تحياتى
شاب فقرى

Lady E يقول...

قبلاوي : وعليكم السلام ورحمة الله وبركاته

بتهزر صح ! فين مدوناتك يا قبلاوي دخلت عليها من شوية وملقيتهاش ! انت مش عارف ان انا بتابعها ولا ايييييه بجد زعلت لما لقيت انك لغيت مشاركة ملف تعريفك أصلا :( ياريت تبقى اجازة قصيرة وترجع تاني ده أولا

ثانيا : الله يبارك فيك وعقبال تخرجك يارب بس بتقدير كويس طبعا يا دكتر المستقبل وربنا يبعدك عن الدكاترة الروتينين ويحقق كل أحلامك وكل اللي بتتمناه

نورتني واوعى تقفل مدونتك

Lady E يقول...

قلب بلال فارس : الله يبارك فيك وعقبالك بالنجاح والتفوق وعقبال التخرج

دمت بخير

Lady E يقول...

سوني : الله يبارك فيكي يا سوني

ان شاء الله هتكون كويسة وهتنجحي بتقدير حلو كمان

عقبال لما اباركلك يا قمرايا

Alaa Salim - علاء سالم يقول...

السلام عليكم

مبروك النجاح ويارب دايماً من نجاح لنجاح أكبر

وإن شاء الله تحققي حلمك وتحققي أكتر من أحلامك بشويه
بس المهم يكون عندك الإصرار والعزيمه

أميرة علي كوكب مهجور يقول...

مبروووووووووووووك
لوووووووووووولولي لووووولولي
ربنا يحقق كل احلامك

اسيره الاحزان يقول...

الف مبرووووووووووووووووووووووك يا قمر

عقبالى انات كمان يارب واخد الشهاده واخلص اصل انا كرهت الكليه وايامها والدكاتره كرهونا فالتعليم وسنينه

غير معرف يقول...

ألف ألف مبروك يا ليدي
ربنا يوفقك إن شاء الله وتحققي كل إللي نفسك فيه
قبلاتي
ديدي

Lady E يقول...

إيمان : تصدقي فرحت بتعليقك زي ما فرحت لما عرفت اني نجحت في المدعو الفرنساوي :) وحشاني بجد

ربنا يكرمك ومن بؤك لباب السما ربنا يتقبل يارب

عندك حق كلنا مميزين مفيش واحد فينا شبه التاني كل واحد فينا نموذج متميز وفعلا في ناس عايزيننا نيأس ونستسلم بس على مين بعينهم :)

تسلميلي يا حبيبتي ويارب

نورتيني بجد وبلاش الغيبة الطويلة دي تاني بفتقدك

Lady E يقول...

يتبــــــــــــــــع

Lady E يقول...

شوكولاتة : يسمع من بؤك ربنا يا شوكولاتي الحلوة

الفكرة عجبتني وهدخل الفسفس بوك وهفهم اكتر ايه الموضوع

نورتيني

Lady E يقول...

Ana keda : الله يبارك فيكي يا حبيبتي وعقبالك يا قمرايا

اللهم أمين يارب كلنا نحقق أحلامنا

سلامي ليكي ولبودي

Lady E يقول...

شاب فقري : أومال ايه :)

اللهم امين وليك زي دعائك

الله يبارك فيك

Lady E يقول...

علاء سالم : الله يبارك فيك

اللهم أمين وليك زي دعائك

اكيد اهم حاجة في تحقيق الأحلام الإصرار والعزيمة

Lady E يقول...

أميرة على كوكو مهجور : الله يبارك فيكي يا قمرايا

وعقبااااااالك في الدبلومة

Lady E يقول...

أسيرة الأحزان : الله يبارك فيكي يا قمرايا

ان شاء الله تنجحي وبتفوق كمان

Lady E يقول...

ديدي : الله يبارك فيكي يا حبيبتي

اللهم امين وانتي كمان

نورتيني وانتي زي القمر مش بشوفك غير كل شهر مرة :)

Lyssandra يقول...

مبرووووووووووووك ولو انها متأخرة أوي :)